Šaj li te ovel amen mir ko sveto kuri isi mariba?
O Gari kova angleder đelo ko maribe, phenela: „Angleder so počminđum te proučinav i Biblija, na đanđum sose ko sveto isi odobor bari nepravda, sose o manuša patinena hem sose tane disave odobor okrutna. Ama akana isi man mir ko vilo sose đanava so o Jehova ka anel pošukar budućnost e manušenđe.“
O Gari nane jedino kova arakhlja mir ko vilo. Dikh sar i Biblija pomožinđa hem averenđe.
KI BIBLIJA PISINI: „Tu, Jehova, hijan šukar hem spremno hijan te oprostine“ (Psalam 86:5).
SAR AKAVA POMOŽINĐA AVERENĐE: „Akava stih uverinđa man so o Jehova tano milosrdno. Đanava so ov tano spremno te oprostini maje sa odova so ćerđum ked hijum le ko maribe“ (Vilmar, Kolumbija).
KI BIBLIJA PISINI: „Me ćerava nevo nebo hem nevi phuv. Okova so hine angleder na ka avel ki godi, niti ka pojavini pe ko vilo“ (Isaija 65:17).
SAR AKAVA POMOŽINĐA AVERENĐE: „Sebepi sa odova so dikhljum đi hijum le ki vojska, isi man depresija hem posttraumatsko stres. Ama, akava stih setinćeri man so pana hari više na ka oven man odola noćna more hem o mislija kola uznemirinena man. Jedva ađićerava o dive ked odola mislija više na ka aven maje ki godi!“ (Zafira, Amerika).
KI BIBLIJA PISINI: „Ko dive ked ov ka vladini ka niconen o pravednikija, ki celo phuv ka vladini o mir sa đi ka ovel o mesec“ (Psalam 72:7).
SAR AKAVA POMOŽINĐA AVERENĐE: „But putija razmislinava ando akala lafija. Pana hari, o mariba više na ka oven niti o lošna buća kola ovena sebepi o mariba. Isto ađahar, na ka brinina amen da li amare mangle ka aćhon đivde“ (Oleksandra, Ukrajina).
KI BIBLIJA PISINI: „Te mule ka oven đivde. [. . .] Oven đangavde hem oven radosna, tumen kola živinena ko praho!“ (Isaija 26:19).
SAR AKAVA POMOŽINĐA AVERENĐE: „Skoro celo mi porodica hine mudardi ked o manuša ando aver pleme napadinđe amaro pleme. Ama, akava stih uverini man so palem ka dikhav me porodica. Jedva ađićerava o vreme ked ka uskrsninen hem ked palem ka šunav olengo glaso!“ (Mari, Ruanda).
KI BIBLIJA PISINI: „Pana hari hem o lošna više na ka oven. [. . .] Ama o krotka ka nasledinen i phuv hem ka uživinen ko baro mir“ (Psalam 37:10, 11).
SAR AKAVA POMOŽINĐA AVERENĐE: „Iako o maribe završinđa pe, ko sveto pana isi nepravda hem lošna manuša. Ama, akala stihija dena man bari snaga. Đanava so o Jehova dikhela sa hem so haljola man. Ov obećini so pana hari ka cidel sa i patnja hem so ka bistra sa odola pharipa“ (Daler, Tadžikistan).
Akala tane samo nekobor manuša ando milionija e Jehovase svedokija kase i Biblija pomožinđa te arakhen mir. On sare sikljilje sar te ikalen i mržnja kotar po vilo (Efešanima 4:31, 32). Isto ađahar, on na mešinena pe ki politika hem ko nasilje na dikhena sar rešenje aso problemija (Jovan 18:36).
E Jehovase svedokija trudinena pe te pomožinen jekh jekhese (Jovan 13:35). Na primer, i Oleksandra kola pominđam angleder, sebepi o maribe morandilji te našel pe phenjaja ki aver phuv. Oj phenela: „Samo so nakhljam i granica, dikhljam amare phralen hem phenjen kola alje odothe te ađićeren amen. On pomožinđe amenđe te sikljova te živina ko odova nevo than.“
Vićinaja tumen te aven ko amare sastankija kuri šaj te sikljon sar šaj već akana te ovel tumen mir ko vilo hem sar o Devel ka ćhinavi sa o mariba. Ko amaro sajt jw.org šaj te arakhen o najpaše than kaj ićerena pe amare sastankija ja šaj te roden besplatno te proučinen i Biblija e brošuraja Ov bahtalo zauvek!