Amenđe tano šukar te ova paše jekh jekheja

1-2. Soj tano važno e Jehovase hem so mangela amen te ćera?

E JEHOVASE tano but važno sar amen ponašinaja amen jekh premalo jekheste. O Isus phenđa so valjani te manga amare pašutnen sar kokri amen (Mat. 22:37-39). Odova značini so ka ova šukar čak hem premalo okola kola na služinena e Jehovase. Ked mothovaja asavko šukaripe, tegani oponašinaja amare Devle e Jehova kova „dela oleso kham te ikljol hem aso lošna hem aso šukar hem o boršim te perel hem aso pravedna hem aso nepravedna“ (Mat. 5:45).

² Iako o Jehova mangela sa e manušen, ov posebno mangela okolen soj tane olese poslušna (Jov. 14:21). Ov mangela amen te oponašina le. Podstaknini amen but te manga amare phralen hem phenjen hem te mothova lenđe iskreno mangipe (1. Petr. 4:8; Rimlj. 12:10). Amen valjani te manga e phralen hem e phenjen, ađahar sar so mangaja amare porodica ili amare paše amale.

3. So na valjani te bistra ked vaćeri pe ando mangipe?

³ Sar so valjani te brinina amen andi luludi te šaj te barjol, ađahar valjani hem ponodri te ćera diso te šaj amaro mangipe premalo amare phralja te barjol. O apostol Pavle phenđa e hrišćanenđe: „Nek ovel tumen mangipe sar phralja hem ponodri“ (Jevr. 13:1). O Jehova mangela hem ponodri te mothova mangipe jekh jekhese. Ko akava članko ka dikha, sose valjani te ova popaše amare phralencar hem phenjencar hem sar šaj te ćera odova hem ponodri.

SOSE VALJANI TE OVA POPAŠE JEKH JEKHEJA?

4. Premalo Psalam 133:1, so valjani te ćera te šaj hem ponodri te cenina o jekhipe kova isi amen maškaro amende? (Dikh o slike.)

⁴ Čitin Psalam 133:1. Sar so o psalmista pisinđa, but tano šukar te ove amal nekasa ko mangela e Jehova. Sar so šaj te desini pe jekh manuš te na primetini kobor tano šužo jekh kaš iako nakhela uzo leste svako dive, isto ađahar šaj te desini pe te na primetina kobor tano šukar amaro jekhipe kova isi amen amare phralencar hem phenjencar. Amen dikhaja amare phralen hem phenjen često, šaj nekobor puti ko kurko. Odolese, sar šaj hem ponodri te cenina len? Amaro mangipe premalo lende ka barjol ako odvojinaja vreme te razmislina kobor svako olendar tano važno e skupštinaće hem amenđe.

5. Sar šaj upro avera te utičini ked dikhena so e Jehovaso narodo mothovi mangipe jekh jekhese?

⁵ Disave kola prvo puti avena ko amare sastankija tane oduševime ked dikhena kobor baro mangipe isi maškaro amende. Odova šaj te uverini len so arakhlje o ćaćipe. O Isus phenđa: „Premalo odova sare ka đanen so hijen me učenikija, ako mangena jekh jekhe“ (Jov. 13:35). Te dikha o primer andi Čajtra. Đi hine ko fakulteti, oj proučinđa e Jehovase svedokonencar. Jekh puti, on vićinđe la te avel ko regionalno kongres hem oj alji. Palo odova so jekh dive hine ko kongres, oj phenđa e phenjaće kolaja proučinđa: „Mo dad hem mi daj niked na zagrlinđe man, ama ko akava kongres aso samo jekh dive 52 đene zagrlinđe man. Osetinđum sar o Jehova prekalo akala manuša mothovi maje kobor mangela man. Me mangava te ovav deo andi akija porodica.“ I Čajtra napredujinđa hem krstinđa pe ko 2024. berš. Ked avera dikhena odova so amen ćeraja, sar soj tano o mangipe kova mothovaja jekh jekhese, odova podstaknini len hem on te služinen e Jehovase (Mat. 5:16).

6. Sar šaj odova so hijam paše e phralencar hem e phenjencar te zaštitini amen?

⁶ Odova so hijam paše amare phralencar hem phenjencar, šaj but te zaštitini amen. O Pavle podstakninđa e hrišćanen: „Nego hrabrinen jekh jekhe svako dive [. . .] te na bi tumaro vilo ovela zoralo sebepi o greh“ (Jevr. 3:13). Ako odobor obeshrabrinaja amen so počminaja te cida amen ando pravo drumo, o Jehova šaj te podstaknini disave phrale ili phenja kola odova primetinđe te pomožinen amen (Ps. 73:2, 17, 23). Olengo ohrabrenje ćaće but šaj te značini amenđe.

7. Sar tane povezime o mangipe hem o jekhipe? (Kološanima 3:13, 14)

⁷ Sar e Devleso narodo, amen daja sa amendar te mothova mangipe jekh jekhese hem odolese isi amen bare blagoslovija (1. Jov. 4:11). Na primer, o mangipe podstaknini amen te „podnosina jekh jekhe“ hem odova pomožini amen te ova ko jekhipe amare phralencar hem phenjencar (Čitin Kološanima 3:13, 14; Ef. 4:2-6). Odolese, ko amare sastankija šaj te uživina sar nigde averthe.

MOTHOVEN POŠTOVANJE JEKH JEKHESE

8. Sar o Jehova pomožini amen te ova ko jekhipe amare phralencar hem phenjencar?

⁸ Odova so hijam ko jekhipe amare phralencar hem phenjencar tano sar jekh čudo. O Jehova pomožini amen te ova ko jekhipe, iako hijam nesavršena (1. Kor. 12:25). I Biblija phenela „so o Devel sikavđa amen te manga jekh jekhe“ (1. Sol. 4:9). Avere lafencar, prekali Biblija o Jehova phenela amenđe so valjani te ćera te šaj te ova paše jekh jekheja. O Devel sikavi amen ked temeljno proučinaja hem primeninaja odova so sikljovaja (Jevr. 4:12; Jak. 1:25). A baš odova e Jehovase svedokija trudinena pe te ćeren.

9. So ando Rimljanima 12:9-13 sikljovaja ando odova te mothova poštovanje jekh jekhese?

⁹ Sar e Devleso Lafi sikavi amen te ova pana popaše jekh jekheja? Te dikha so o Pavle odolestar pisinđa ko Rimljanima 12:9-13. (Čitin.) Zapazin so ov phenđa: „Oven prva ko odova te mothoven so poštujinena jekh jekhe.“ Ko so mislinđa? Amen valjani prva te mothova iskreno mangipe averenđe ađahar so spremno ka oprostina lenđe, ka mothova lenđe gostoljubivost hem ka ova velikodušna (Ef. 4:32). Na valjani te ađićera amare phralja hem phenja te oven popaše amencar, već amen šaj prva te ćera odova. Tegani šaj te doživina odova so o Isus phenđa: „Pobuter isi bahtalipe ked dela pe nego ked lela pe“ (Dela 20:35).

10. Sar šaj te mothova so hijam „bućarne, a na mrzale“? (Dikh i slika.)

¹⁰ Zanimljivo tano so odmah palo odova so phenđa so valjani te ova prva ko odova te mothova poštovanje premalo avera, o Pavle podstakninđa amen te ova „bućarne, a na mrzale.“ Neko koj tano bućarno, tano but revno hem ked dobini disavo zadatko trudini pe šukar te ćerel le. Ko Poslovice 3:27, 28 hijam podstaknime: „Ma ćhinav te ćere šukaripe okolenđe kase valjani, ako šaj te pomožine len.“ Odolese ked dikhaja so nekase valjani pomoć, amen trudinaja amen te pomožina le. Amen na ađićeraja, niti pretpostavinaja so neko aver ka pomožini len (1. Jov. 3:17, 18).

11. So šaj te pomožini amen te ova pana popaše jekh jekheja?

¹¹ Jekh aver način sar mothovaja poštovanje averenđe tano ađahar so spremno oprostinaja lenđe ked povredinena amen. Ko Efešanima 4:26 pisini: „Ma mukhen te nakhel o dive, a tumen pana te oven holjame.“ Sose? Odolese so ko 27. stiho pisini so ked ka ćera odova na ka „mukha than e Bengese“. O Jehova ko po Lafi but putija phenela amenđe te oprostina jekh jekhese. Ko Kološanima 3:13 hijam podstaknime „ando vilo [te oprostina] jekh jekhese.“ Jekh ando najšukar način sar šaj te ova paše olencar tano te oprostina lenđe. Ked oprostinaja, amen pomožinaja te „arakhi pe o mir kova povezini amen“ (Ef. 4:3). Avere lafencar, ked oprostinaja isi amen pobaro jekhipe hem mir.

12. Sar o Jehova pomožini amen te oprostina averenđe?

¹² Podijekh puti, ćaće šaj te ovel pharo te oprostina nekase kova povredinđa amen. Ama, o sveti duh šaj te pomožini amen te ćera odova. Palo odova so podstaknini amen „iskreno te manga jekh jekhe“ hem te „ova bućarne,“ i Biblija phenela: „Nek o duh podstaknini tumen ki revnost“ (Rimlj. 12:11). Odova značini so e Devleso duh šaj te pomožini amen te ova revna hem te ovel amen želja te ćera odova soj tano ispravno. Avere lafencar, e Devleso duh šaj te podstaknini amen ando vilo te manga jekh jekhe hem spremno te oprostina jekh jekhese. Odolese valjani usrdno te molina amen e Jehovase te pomožini amen te ćera odova (Luka 11:13).

„MAŠKARO TUMENDE MA TE OVEN PODELE“

13. Sar šaj te avel đi o podele maškaro amende?

¹³ Ki skupština isi manuša ando razna nacije hem kulture (1. Tim. 2:3, 4). Odolese, svako amendar šaj te anel različita odluke ando odova so ka uravi, sar ka izgledini, sar ka brinini pe ando po sastipe hem savi zabava ka birini. Ako na pazinaja, akala buća šaj te ćeren podele maškaro amende (Rimlj. 14:4; 1. Kor. 1:10). Ama, odolese so o „Devel sikavi amen te mothova mangipe jekh jekhese,“ amen valjani te pazina te na insistirina ko odova so amare odluke tane pošukar ando averenge (Fil. 2:3).

14. So uvek valjani te trudina amen te ćera hem sose?

¹⁴ Isto ađahar, te na bi avela đi o podele ki skupština, amen valjani uvek te trudina amen te ohrabrina averen (1. Sol. 5:11). Ko poslednjo vreme, but manuša kola hine neaktivna ili cidime andi skupština odlučinđe te irinen pe e Jehovase. But radujinaja amen sebepi olengo! (2. Kor. 2:8). Aće so desinđa pe ked jekh phen koja deš berš hine neaktivno irinđa pe ki dvorana. Oj phenela: „Sare alje koro mande asandoj hem pozdravinđe pe mancar“ (Dela 3:19). Sar odova utičinđa upro late? Oj pana phenela: „Osetinđum so o Jehova pomožini maje palem te ovav bahtali.“ Ako trudinaja amen te ohrabrina sarinen, o Isus šaj prekalo amende te pomožini okolenđe kola tane „umorna hem opteretime“ (Mat. 11:28, 29).

15. So šaj pana te ćera te šaj ki skupština te ovel jekhipe? (Dikh i slika.)

¹⁵ Pana jekh način sar šaj te ćera mir tano, amare lafencar. Ko Jov 12:11 pisini: „Na ispitini li o kan o lafija sar so i ćhib probini o hajbe?“ Sar so jekh šukar kuvari probini o hajbe, te šaj te ovel sigurno soj tano ukusno angleder so ka ćhivel le anglo manuša, šukar bi ovela hem amen pažljivo te razmislina angleder diso te phena (Ps. 141:3). Amaro cilj tano te ova sigurna so uvek odova so ka phena ka ohrabrini averen, ka del len snaga hem ka pomožini lenđe (Ef. 4:29).

16. Ko posebno valjani te trudini pe te ohrabrini averen pe lafencar?

¹⁶ O roma hem o roditeljija posebno valjani te pazinen sar vaćerena pe porodicaja, olenge lafija uvek valjani te oven ohrabrujuća (Kol. 3:19, 21; Titu 2:4). Isto ađahar, o starešine valjani te ohrabrinen hem te utešinen e Jehovase bakren (Is. 32:1, 2; Gal. 6:1). Odolese, jekh poslovica andi Biblija setinćeri amen: „Kobor tano šukar o lafi vaćerdo ko pravo vreme“ (Posl. 15:23).

MANGIPE „DELONCAR HEM ĆAĆIPAJA“

17. Sar šaj te ova sigurna so o mangipe kova mothovaja amare phralenđe hem phenjenđe tano iskreno?

¹⁷ O apostol Jovan ohrabrinđa amen te „na manga samo lafencar hem ćhibjaja nego deloncar hem ćaćipaja“ (1. Jov. 3:18). Amen mangaja kotar vilo te mothova mangipe amare phralenđe hem phenjenđe. Ama, sar šaj te ćera odova? So pobuter vreme družinaja amen olencar, pana popaše ovaja jekh jekheja hem amaro mangipe ovela pana pozoralo. Odolese, rode prilike te družine tut olencar, sar na primer ko sastankija hem ki služba. Odvojin vreme te đa hem te posetine len. Ked ka ćera akala buća, amen ka mothova so o Devel sikavi amen te manga jekh jekhe (1. Sol. 4:9). Tegani amen hem ponodri ka dikha „kobor tano šukar hem prijatno ked o phralja živinena ko jekhipe“ (Ps. 133:1).