15. ČLANKO PROUČIBASE
ĐILI 30 Mo Dad, Amal hem Devel
Amenđe tano šukar te ova „paše uzo Devel“
Maje tano šukar te ovav paše uzo Devel (PS. 73:28)
SO KA SIKLJOVA?
Ka sikljova sar šaj te ova popaše e Jehovaja hem sar šaj odova te pomožini amen.
1-2. (a) So valjani te ćera te šaj te ova paše amal nekasa? (b) Sostar ka vaćera ko akava članko?
DA LI isi tut disavo šukar amal? So ćerđan te šaj te oven šukar amala? Verovatno družinđan tut oleja, šunđan ando odova so nakhlja ko životi hem ando odova so sviđini pe lese, a so na. Isto ađahar, dikhljan kola šukar osobine isi le kola šaj te oponašine. Ađahar počminđan te mange te amale.
2 Te šaj te ova amala nekasa, valjani te odvojina vreme hem te uložina trud. Šaj te phena so odova isto valjani te ćera te šaj te ova amala e Jehovaja. Ko akava članko ka dikha, sar šaj te ova pana popaše e Devleja hem sar odova šaj te pomožini amen. Najangleder ka dikha sose tano šukar te ova pana popaše amare najšukar amaleja, e Jehovaja.
3. Sose tano važno te razmislina ando odova sose tano korisno te ova paše amala e Jehovaja? Objasnin.
3 Sigurno složineja tut odoleja so te ove paše amal e Jehovaja tano šukar. Ama, ako hor razmislineja odolestar kobor tano odova ćaće šukar, ka ove podstaknimo te aćhove pana popaše oleja (Ps. 63:6-8). Na primer, amen đanaja so aso amaro šukaripe tano te pazina so haja, te vežbina, dovoljno te odmorina hem te pija pani. Ipak, but manuša na razmislinena ando akala buća hem na brininena pe ando po sastipe. Ama, so pobuter razmislinaja kobor tane akala buća aso amaro šukaripe, pana pobuter ka trudina amen te ćera len. Isto ađahar, amen đanaja soj tano šukar te ova paše amala e Jehovaja. Ama, ako hor razmislinaja sose tano odova korisno amenđe, tegani ka ova podstaknime pana pobuter te zorjaćera amaro amalipe oleja (Ps. 119:27-30).
4. So jekh psalmista pisinđa ko Psalam 73:28?
4 Čitin Psalam 73:28. O pisco ando 73. psalam hine Leviti hem oleso zadatko hine te služini sar muzičari ko Jehovaso hram. Ov verovatno beršencar verno služinđa e Jehovase. Ama, ipak hine svesno so valjani te podsetini hem pes hem averen ko odova kobor tano olese hem averenđe šukar te oven „paše uzo Devel“. Sose tano odova hem amenđe šukar?
AKO HIJAM „PAŠE UZO DEVEL“ KA OVA BAHTALE
5. (a) Sose odova so hijam popaše e Jehovaja ćerela amen te ova bahtale? (b) Sar i mudrost koja o Jehova dela pomožini tut hem zaštitini tut? (Poslovice 2:6-16)
5 So popaše hijam e Jehovaja, amen ka ova pobahtale (Ps. 65:4). Isi but razlogija sose šaj te ova bahtale. Na primer, ked ićeraja amen ko odova so sikljovaja ando oleso Lafi, amen šaj te ova mudra. Odova so o Jehova sikavi amen šaj te zaštitini amen ando lošna buća hem šaj te ćhinavi amen te ćera disave ozbiljna greške. (Čitin Poslovice 2:6-16.) Odolese, ki Biblija pisini: „Bahtalo tano o manuš kova arakhi i mudrost hem o manuš kova tano razborito“ (Posl. 3:13).
6. Sose o psalmista našalđa pi radost?
6 Naravno, čak e Jehovase verna sluge disavo puti isi len pharipa. O pisco ando 73. psalam našalđa pi radost ked počminđa te razmislini negativno. Ov počminđa te razmislini ando odova so o lošna manuša isi len šukar životi iako na obratinena pažnja ko odova so o Devel phenela niti šunena le. Sebepi odova, ov hine but holjamo. Čak manglja te ovel le odova so avera hine len. Ov mislinđa so o manuša kola tane nasilna hem ponosna šaj te dobinen sa so mangena, soj tane saste hem so čak na patinena (Ps. 73:3-7, 12). Odolese so dikhlja akija nepravda, ov mislinđa soj tano uzaludno te služini e Jehovase. Ov hine but tužno hem odolese phenđa: „Uzaludno trudinđum man mo vilo te aćhol čisto hem thovđum me vasta te mothovav so hijum nedužno“ (Ps. 73:13).
7. So šaj te ćera ked hijam tužna? (Dikh i slika.)
7 Iako o psalmista hine but tužno, ov ćerđa diso te menini po stav. Ov đelo ko „Devleso veličanstveno svetilište“ hem uduri o Jehova ispravinđa oleso pogrešno razmišljanje (Ps. 73:17-19). Ako hijam tužna, amen šaj te molina amen e Jehovase hem te roda olestar te pomožini amen te đana so te ćera. O savetija ando oleso Lafi hem o ohrabrenje ando phralja hem phenja ka den amen snaga te nastavina te služina lese, čak hem ked hijam tužna. Ked isi amen but problemija hem na đanaja so te ćera, o Jehova ka utešini amen hem ka del amen mir (Ps. 94:19).a
O Leviti kova pisinđa o 73. psalam terđola anglo Devleso veličanstveno svetilište (Dikh o 7. odlomko)
KED HIJAM „PAŠE UZO DEVEL“ ŠAJ TE OVEL AMEN ŠUKAR ŽIVOTI AKANA HEM KI BUDUĆNOST
8. Sose tano pana šukar te ova paše uzo Devel?
8 Isi pana duj razlogija sose tano šukar te ova paše uzo Devel. Sar prvo, amen ka ovel amen šužo životi akana. Sar dujto, šaj te nadina amen so ka ovel amen šuži budućnost (Jer. 29:11). Akana pobuter ka vaćera ando akala buća.
9. Sar upro amende utičini odova so hijam paše e Jehovaja?
9 Ako hijam paše e Jehovaja, amen šaj te ovel amen šukar životi. Avdije, but manuša kola na verujinena ko Devel mislinena so o životi nane le smisao hem so jekh dive o manuša na ka postojinen. Ama, đi proučinđam e Devleso Lafi, amen uverinđam amen so o Devel „postojini hem so nagradini okolen kola revno rodena le“ (Jevr. 11:6). Čak hem avdije, amen hijam bahtale odolese so ćeraja odova aso so hijam stvorime – služinaja amare nebesko Dadese, e Jehovase (Pon. zak. 10:12, 13).
10. So o Jehova obećini okolenđe kola isi len poverenje upro leste? (Psalam 37:29)
10 But manuša nane len nada asi budućnost. On samo ćerena buti, khuvena ko brak, isi len ćhave hem palo odova ćhivena pare ki strana te šaj te ovel len ked na ka šaj te ćeren buti. On na đanena so o Devel obećini asi budućnost. Ki aver strana, amen đanaja so o Jehova brinini pe aso pe sluge (Ps. 25:3-5; 1. Tim. 6:17). Amen verujinaja amare Devlese hem Amalese hem đanaja so ka ispunini odova so obećinđa. Isi but buća kola jedva ađićeraja, sar na primer te služina lese večno ko raj. (Čitin Psalam 37:29.)
11. Sar utičini upro amende hem upro Jehova odova so hijam paše oleja?
11 Ked hijam paše uzo Devel, odova pomožini amen ko pana but načinija. Na primer, o Jehova obećini so ka oprostini amare grehija ako kajinaja amen hem ako hijam paše oleja (Is. 1:18). Sebepi odova, na valjani te mučini amen o osećaj andi krivica sebepi o grehija kola ćerđam angleder (Ps. 32:1-5). Isto ađahar, o Jehova tano bahtalo ked hijam paše oleja (Posl. 23:15). Naravno, isi pana but šukar buća kola isi amen odolese so hijam e Jehovase amala. Akana, ka dikha so šaj te ćera te šaj te ova popaše oleja?
SAR ŠAJ HEM PONODRI TE OVA „PAŠE UZO DEVEL“?
12. So valjanđan te ćere te šaj te ove paše e Devleja?
12 Ako hijan krstimo, tu već ćerđan but buća te ove paše e Jehovaja. Sikljiljan o ćaćipe ando Jehova hem ando Isus, kajinđan tut aso grehija kola ćerđan angleder, mothovđan bari vera ko Jehova hem dinđan sa tutar te ove lese poslušno. Ama, te šaj te ova popaše e Devleja, mora hem ponodri te ćera odola buća (Kol. 2:6).
13. Kola trin buća ka pomožinen amen te ova popaše e Jehovaja?
13 So ka pomožini amen te ova popaše e Jehovaja? (1) Amen mora hem ponodri te proučina hem te čitina i Biblija. Đi odova ćeraja, amaro cilj nane samo te sikljova disave buća ando Devel. Umesto odova, valjani te trudina amen te haljova sar o Devel razmislini, so mangela te ćera hem te trudina amen te živina sar so ov mangela (Ef. 5:15-17). (2) Valjani te zorjaćera amari vera ađahar so ka razmislina sar mothovđa amenđe po mangipe. (3) Amen valjani hem ponodri te mrzina o buća kola ov mrzini hem te na družina amen e manušencar kola ćerena lošna buća (Ps. 1:1; 101:3).
14. So šaj te ćera svako dive te šaj te ugodina e Jehovase? (1. Korinćanima 10:31; dikh i slika.)
14 Čitin 1. Korinćanima 10:31. But tano važno te ćera odova soj tano ugodno anglo Jehovase jaćha. Ama, nane dovoljno samo te đa ko sastankija hem ki služba. Odoleja so ćeraja svako dive šaj te ugodina e Jehovase. Na primer, ked hijam poštena ko sa hem ked averencar delinaja odova so isi amen, o Jehova tano but bahtalo (2. Kor. 8:21; 9:7). Isto ađahar, ov mangela te mothova so ceninaja o životi kova dinđa amen sar poklon. Odolese, amen pazinaja kobor haja, kobor pijaja hem ćeraja avera buća kola pomožinena amen te ova saste. Ked o Jehova dikhela so čak hem ko tikne buća trudinaja amen te ugodina lese, oleso mangipe premalo amende ovela pobaro (Luka 16:10).
Ako vozinaja pažljivo, ako brininaja amen ando amaro sastipe ađahar so vežbinaja, haja zdravo hrana hem ako hijam velikodušna, o Jehova ka ovel zadovoljno amencar (Dikh o 14. odlomko)
15. Sar o Jehova očekujini te ponašina amen e manušencar?
15 O Jehova tano šukar premalo sa o manuša, bizo obzir da li služinena lese ili na (Mat. 5:45). Ov očekujini hem amen te ova šukar premalo sarinende. Na primer, ov mangela te na vaćera nikastar lošno, te na svađina amen hem te ova blaga premalo sa o manuša (Titu 3:2). Odolese, čak hem ako o manuša na verujinena ko Jehova, amen na valjani te mislina so hijam pošukar olendar (2. Tim. 2:23-25). Amen ka ova popaše e Jehovaja ako uvek hijam šukar premalo sarinende.
AĆHOV „PAŠE UZO DEVEL“ ČAK AKO ĆERĐAN GREŠKE
16. Sar osetinđa pe o pisco ando 73. psalam?
16 Ama so ako palo disavo vreme, počmineja te misline so na zaslužineja e Jehovaso mangipe? Sar so angleder vaćerđam, odova desinđa pe hem e manušese kova pisinđa o 73. psalam. Ov phenđa: „Me pre harićkase hine ka ciden pe ando pravo drumo, harićkase hine ka perav“ (Ps. 73:2). Ov priznajinđa e Jehovase so hine ogorčeno, nerazumno hem so hine sar i životinja bizo razum (Ps. 73:21, 22). Ama, da li ov mislinđa so sebepi olesi greška o Jehova više na mangela le hem so na ka oprostini lese?
17. (a) So ćerđa o psalmista čak hem ked hine obeshrabrimo? (b) So sikljovaja ando oleso primer? (Dikh i slika.)
17 Ako o psalmista mislinđa so o Jehova aćhavđa le, ov sigurno ađahar osetinđa pe samo kratko vreme. Čak hem ked hine lese but pharo, ov đanđa so valjani te ovel paše uzo Jehova. Ov pisinđa: „Ama kotar akana uvek ka ovav uzo tute, tu ićereja man kotar mo desno vas. Te savetencar vodineja man, a ko krajo ka legare man ki slava“ (Ps. 73:23, 24). Hem amen valjani te molina e Jehova te del amen snaga ked hijam slaba hem obeshrabrime (Ps. 73:26; 94:18). Čak ako ćeraja disavo ozbiljno greh, amen šaj te irina amen e Jehovase hem te ova sigurna so ov ka oprostini amenđe (Ps. 86:5). Ked hijam obeshrabrime, na valjani te bistra kobor tano važno te aćhova paše uzo Devel (Ps. 103:13, 14).
Ked osetinaja so hijam duhovno slaba, amen valjani te ova pana popaše e Jehovaja ađahar so pana poviše ka molina amen hem ka đa redovno ko sastankija (Dikh o 17. odlomko)
OV ZAUVEK „PAŠE UZO DEVEL“
18. Sose nane granica ko odova kobor šaj te ova paše e Jehovaja?
18 Nane granica ko odova kobor šaj te ova paše e Jehovaja hem kobor šaj te penđara le. I Biblija phenela so amen našti potpuno te haljova olese drumija hem so olesi mudrost hem oleso đandipe tane but bare (Rimlj. 11:33).
19. So o psalmista vaćeri amenđe andi budućnost?
19 Ko Psalam 79:13 pisini: „Tegani amen, to narodo hem o stado ando to pašnjako, ka zahvalina amen tuće zauvek, ka hvalina tut andi generacija ki generacija.“ Đi trudineja tut te ove sa popaše uzo Devel, hem tu šaj te ove uverimo so ov ka blagoslovini tut hem so šaj te phene: „O Devel tano stena ando mo vilo hem ov tano sa so isi man ki celo večnost“ (Ps. 73:26).
ĐILI 32 Ov ki e Jehovasi strana!
a Neko ko but vreme osetini pe anksiozno hem tužno, šaj valjani te rodel pomoć ando doktorija. Aso pobuter informacije dikh i Stražarsko kula broj 1/2023. berš.