19. ČLANKO PROUČIBASE
ĐILI 6 O nebo slavini e Jehova
Oponašinen e verno anđelen
Hvalinen e Jehova, sa olese anđelija (PS. 103:20)
SO KA SIKLJOVA?
Ka dikha so šaj te sikljova ando verna anđelija.
1-2. (a) Ko so hijam averćhane ando anđelija? (b) Ko so hijam slična?
KED o Jehova privucinđa tut ko ćaćipe, ov vićinđa tut te ove deo andi jekh but bari porodica ki koja tane hem milionija anđelija (Dan. 7:9, 10). Ked razmislinaja ando anđelija, šaj ki godi perela amenđe odova kobor razlikujinena pe amendar. Na primer, on postojinena but poviše nego o manuša (Jov 38:4, 7). On tane but pozorale amendar. Odobor tane sveta hem pravedna so amen sar nesavršena manuša niked našti te ova (Luka 9:26).
2 Ama, iako hijam but različita, amen hijam hem but slična. Na primer, sar olende hem amen šaj te oponašina e Jehovase osobine hem isi amen slobodno volja. Sar o anđelija, isi amen amare anava, amari ličnost hem razna zadatkija ki služba e Jehovase. Isto ađahar, hem amen isi amen potreba te služina amare Stvoriteljese (1. Petr. 1:12).
3. So šaj te sikljova ando verna anđelija?
3 Odolese so isi amen but zajednička buća e anđelencar, olengo šukar primer šaj te ohrabrini amen hem šaj but te sikljova olendar. Ko akava članko ka razmotrina sar šaj te oponašina len ko odova te ova ponizna, te manga e manušen, te ova istrajna hem te trudina amen te aćhol i skupština čisto.
O ANĐELIJA TANE PONIZNA
4. (a) Sar o anđelija mothovena soj tane ponizna? (b) Sose tane o anđelija ponizna? (Psalam 89:7)
4 O verna anđelija tane ponizna. Iako isi len baro iskustvo, moć hem mudrost, on šunena e Jehovase smernice (Ps. 103:20). Ked dobinena disavo zadatko ando Jehova, on na hvalinena pe sar ćerđe le niti koristinena pi moć te usmerinen i pažnja upro peste. On tane bahtale so šaj te ćeren so god o Jehova rodela olendar, iako avera na đanena olenge anava (Post. 32:24, 29; 2. Kralj. 19:35).a O anđelija na mangena te prihvatinen i slava koja pripadini e Jehovase. Sose tane asavke? Odolese so mangena e Jehova hem hor poštujinena le. (Čitin Psalam 89:7.)
5. Sar jekh anđeo mothovđa poniznost ked ispravinđa e Jovane? (Dikh i slika.)
5 Te razmotrina jekh događaj kova mothovi kobor tane o anđelija ponizna. Ko 96. berš ki n. e., jekh anđeo kaso anav na đanaja, alo te mothovi e Jovanese jekh vizija (Otkr. 1:1). Sar o Jovan reagujinđa? Ov pokušinđa te klanini pe anglo leste. Ama, o anđeo sigate ćhinavđa le hem phenđa lese: „Ma ćer odova! Me hijum samo robo sar tu hem te phralja. E Devlese klanin tut!“ (Otkr. 19:10). Akava anđeo ćaće hine ponizno. Ov na manglja te lel pese i slava. Odmah phenđa e Jovanese so valjani e Devlese te klanini pe. Isto ađahar, o anđeo na mislinđa soj tano považno ando Jovan. Iako hine but pomoćno hem služinđa e Jehovase pobuter vreme ando Jovan, ponizno phenđa soj tano hem ov robo sar oleste. Iako valjanđa te ispravini e Jovane, odova na ćerđa ko jekh grubo način nego vaćerđa oleja ljubazno. Verovatno haljilo so o Jovan ćerđa odova sose hine le baro strahopoštovanje.
O anđeo mothovđa poniznost ked vaćerđa e Jovaneja hem ked ispravinđa le (Dikh o 5. odlomko)
6. Sar šaj te ova ponizna sar o anđelija?
6 Sar šaj te ova ponizna sar o anđelija? Sar o anđelija hem amen mangaja te ćera amare zadatkija ki služba e Jehovase bizo te hvalina amen ja te pokušina te la i zasluga aso odova so ćerđam (1. Kor. 4:7). Uzo odova, na valjani te mislina so hijam považna ando avera odolese so pobuter berš služinaja e Jehovase ja isi amen odgovornostija kola on nane len. U stvari, so pobuter odgovornostija isi amen, pana pobuter valjani averen te dikha sar pobare amendar (Luka 9:48). Sar o anđelija, hem amen mangaja te služina averenđe. Odolese, na mangaja nikas te ćhiva te mislini so hijam považna olendar.
7. Sar šaj te mothova poniznost đi nekase daja savet?
7 Amen šaj te mothova poniznost hem đi daja savet averenđe. Na primer, disave phralese, phenjaće ja amare ćhavenđe. Podijekh puti, ked daja savet amen valjani te ova direktna. Ama, sar o anđeo kova hine ljubazno đi ispravinđa e Jovane hem amen šaj te ova direktna, ama te pazina te na obeshrabrina e osoba. Ako na mislinaja so hijam považna averendar, odova ka pomožini amen te mothova poštovanje hem mangipe e osobaće ked daja la savet andi Biblija (Kol. 4:6).
O ANĐELIJA MANGENA E MANUŠEN
8. (a) Premalo Luka 15:10, sar o anđelija mothovena mangipe e manušenđe? (b) Sar on pomožinena amen ki služba? (Dikh i slika.)
8 O anđelija na phanena pe jaćha anglo odova so desini pe e manušenđe niti mislinena so amen na hijam važna. U stvari, on mangena e manušen. Radujinena pe ked neko ko ćerđa ozbiljno greh irini pe e Jehovase ja ked neko menini po životi hem počmini te služini e Devlese. (Čitin Luka 15:10.) Isto ađahar, pomožinena amenđe te propovedina i šukar vest (Otkr. 14:6). Iako na propovedinena direktno e manušenđe, on šaj te usmerinen amen đi ki osoba koja mangela te sikljol ando Jehova. Naravno, amen našti te ova sigurna hem te phena so o anđelija hine uključime ki disavi konkretno situacija. Sose? Odolese so o Jehova koristini hem po sveti duh te šaj te pomožini e manušenđe ja te usmerini pe slugen te arakhen okolen kola mangena te šunen (Dela 16:6, 7). Ama, ipak o Jehova koristini but pe anđelen. Odolese, ked hijam ki služba šaj te ova sigurna so o anđelija tane odothe te pomožinen amen.b (Dikh o okvir „On dobinđe odgovor ko pe molitve“.)
Jekh bračno par samo so završinđa i služba e kolicaja. On pođinđe te đan pese ćhere, i phen dikhela jekha romnja koja dićhola soj tani uznemirimi. I phen đanela so o anđelija šaj te usmerinen amen đi o manuša kola šaj rodena pomoć ko duhovno pogled. Oj mangela te utešini odola romnja (Dikh o 8. odlomko)
9. Sar šaj sar o anđelija te mothova so mangaja e manušen?
9 Sar šaj te oponašina e anđelen hem te mothova so mangaja e manušen? Ked šunaja o obaveštenje so neko irinđa pe ki skupština, hem amen šaj te radujina amen sar o anđelija. Valjani te da sa amendar odija osoba te osetini so ćaće mangaja la hem soj tano amenđe drago so palem ka služini e Jehovase (Luka 15:4-7; 2. Kor. 2:6-8). Isto ađahar, šaj te oponašina e anđelen ađahar so ka trudina amen te da amaro najšukar ki služba (Prop. 11:6). Sar so o anđelija pomožinena amenđe ki služba, amen šaj te trudina amen te pomožina amare phralenđe hem phenjenđe. Na primer, da li šaj te ćera plan te đa ki služba disave objaviteljeja kova tano neiskusno? Ili da li šaj e phurenđe ili okolenđe soj tane naborme te pomožina te đan ki služba?
10. So šaj te sikljova ando Sarako iskustvo?
10 So ako sebepi amare okolnostija više našti te ćera sa so mangaja? Šaj te ova sigurna so o anđelija pana ka pomožinen amen ki služba. Te dikha o primer andi Sarac kotar Indija. Palo odova so 20 berš služinđa sar pioniri, oj naborsalji hem pelji ko kreveti. Sebepi odova hine but depresivno. Ama, odolese so pomožinđe la o phralja hem o phenja hem so redovno čitinđa e Devleso Lafi, oj šaj hine palem radosno te služini e Jehovase. Naravno, oj morandilji te prilagodini pe ko neve okolnostija. Sebepi po nabormipe, našti hine ni te bešel te pisini lila. Odolese, vićinđa e manušen ko telefoni. Vićinđa sa okolen kas đanđa, a on phenđe laće ko bi mangela pana te proučini. So hine sebepi odova? Aso nekobor masek, i Sara hine la 70 kursija. Odolese so našti hine te vodini sa odola kursija, morandilji te del len disave objaviteljenđe ki skupština. But manuša kolencar proučini, akana avena ko sastankija. Šaj samo te zamislina kobor tane o anđelija bahtale ked dikhena sar sarađujinaja amare phralencar hem phenjencar, sar soj tani i Sara, kola dena sa pestar te propovedinen i šukar vest.
O ANĐELIJA TANE ISTRAJNA
11. Sar o verna anđelija mothovena soj tane istrajna?
11 O verna anđelija tane but šukar primer andi istrajnost. On istrajinena iako dikhena bari nepravda hem lošnipe sa akala berša. Dikhlje sar o Satana hem avera duhovna stvorenja kola nekad služinđe olencar, pobuninđe pe protiv o Jehova (Post. 3:1; 6:1, 2; Jud. 6). Ki Biblija pisini so jekh verno anđeo valjanđa te borini pe jekhe demoneja nekobor dive (Dan. 10:13). Isto ađahar, ki celo manušikani istorija o anđelija šaj hine te dikhen so samo hari manuša služinđe e Jehovase. Ama, on tane hem ponodri radosna hem revna đi služinena e Jehovase. On đanena so o Jehova ko pravo vreme ka cidel i nepravda.
12. So šaj te pomožini amen te istrajina?
12 Sar šaj te ova istrajna sar o anđelija? Sar olende hem amen dikhaja i nepravda ko sveto hem doživinaja protivljenje. Ama, hijam uverime so o Jehova pana hari ka cidel sa o lošnipe ki phuv. Odolese, sar odola verna anđelija ni amen na ćhinavaja „te ćera odova soj tano šukar“ (Gal. 6:9). O Devel obećini so ka pomožini amen te istrajina (1. Kor. 10:13). Šaj te molina amen e Jehovase aso oleso sveti duh kova šaj te pomožini amen te ova strpljiva hem radosna (Gal. 5:22; Kol. 1:11). Ama, so ako tu isi tut disavo protivljenje? Oslonin tut upro Jehova hem ma dara. Ov uvek ka pomožini tuće hem ka zorjaćeri tut (Jevr. 13:6).
O ANĐELIJA POMOŽINENA I SKUPŠTINA TE AĆHOL ČISTO
13. Kova posebno zadatko o anđelija isi len ko poslednja dive? (Matej 13:47-49)
13 Ko akala poslednja dive, o Jehova dinđa e anđelenđe jekh posebno zadatko. (Čitin Matej 13:47-49.) Milionija manuša ando celo sveto tane zainteresujime asi šukar vest. Disave olendar ćerena promene ko po životi hem počminena te služinen e Devlese ađahar sar so ov mangela, a avera na. O anđelija isi len odgovornost te odvojinen „e lošnonen ando pravedna“. Odova značini so isi len zadatak te pomožinen i skupština te aćhol čisto. Ama, odova na značini so svako ko ćhinavđa te ovel le kontakt amencar ando bilo kova razlog niked više na ka irini pe hem so niked na ka oven problemija ki skupština. Šaj te ova sigurna so o anđelija dena sa pestar o skupštine te aćhon čista.
14-15. Sar šaj te oponašina e anđelen hem te mothova so mangaja i skupština te aćhol čisto? (Dikh o slike.)
14 Sar šaj sar o anđelija te pomožina i skupština te aćhol čisto? Amen valjani te da sa amendar te zaštitina amaro amalipe e Jehovaja. Odova ćeraja ađahar so birinaja amenđe amalen kola mangena le hem cidaja amen ando sa odova so šaj te rumini amaro amalipe oleja. Ko asavko način pomožinaja i skupština te aćhol čisto (Ps. 101:3). Isto ađahar, šaj te pomožina amare phralenđe te aćhon verna e Jehovase. Na primer, so ako đanaja so jekh phral ja phen ćerđa ozbiljno greh? Odolese so mangaja odola osoba, amen mangaja te podstaknina la te vaćeri e starešinencar. Ama, ako oj na ćerela odova, tegani amen valjani te đa hem te vaćera e starešinencar. Amen mangaja i osoba koja ruminđa po amalipe e Jehovaja so posig te dobini pomoć (Jak. 5:14, 15).
15 Nažalost, okola so ćerđe disave ozbiljna grehija valjani te oven cidime andi skupština. Tegani, amen ćhinavaja te družina amen olencar (1. Kor. 5:9-13).d Odova pomožini te aćhol i skupština čisto. U stvari, ked na družinaja amen okolencar soj tane cidime andi skupština, amen mothovaja lenđe so mangaja len. Odova so mangaja te aćhova poslušna e Jehovase, šaj te podstaknini len te irinen pe olese. Ako ćeraja odova, ka ova radosna amen, o Jehova hem o anđelija (Luka 15:7).
So valjani te ćera ako đanaja so jekh phral ja phen ćerđa ozbiljno greh? (Dikh o 14. odlomko)e
16. Sar šaj te oponašina e anđelen?
16 Ćaće tani bari čast te sikljova ando anđelija hem te sarađujina olencar! Odolese, hajde sare te oponašina olengi poniznost, olengo mangipe premalo manuša, olengi istrajnost hem te pomožina i skupština te aćhol čisto. Ako oponašinaja e verno anđelen, šaj zauvek te ova deo andi Jehovasi porodica.
ĐILI 123 Verno te ićera amen ko teokratsko redo
a Ki Biblija pisini so isi milijarde hem milijarde anđelija, ama pomini pe samo dujengo anav – Mihailo hem Gavrilo (Dan. 12:1; Luka 1:19).
b Ako mangeja te arakhe pobuter iskustvija, ko Indeks ando publikacije đa ki tema „Anđeli“, a palo odova ko podnaslov „Vođstvo anđela (primeri)“.
c Disave anava tane menime.
d Sar soj tano mothovdo ko Izveštaj ando Vodeće telo aso 2024. (br. 2), ako jekh osoba koja tani cidimi andi skupština avela ko sastankija, o objavitelj premali pi savest šaj te odlučini da li kratko ka pozdravini odola osoba.
e SO DIKHAJA KI SLIKA: Jekh phen vaćeri pe amalinjaće so valjani te vaćeri e starešinencar sebepi o greh kova ćerđa. Ama, odolese so olaki amalin na ćerđa odova, amari phen vaćeri e starešinencar ando odova so ulo.