20. ČLANKO PROUČIBASE
ĐILI 47 Molin tut e Jehovase svako dive
Rode ando Jehova uteha
Nek ovel blagoslovimo o Dad ando milosrđe hem o Devel andi svako uteha (2. KOR. 1:3)
SO KA SIKLJOVA?
Ka sikljova sar o Jehova utešinđa e Judejcen kola hine ko ropstvo hem ka dikha so šaj te sikljova olendar.
1. Sar hine e Judejcenđe ko ropstvo ko Vavilon?
POKUŠIN te zamisline sar osetinđe pe o Judejcija kola hine ko ropstvo ko Vavilon. Olengi diz hine uništimi. Sebepi olenge grehija hem o grehija ando olenge phure, on hine legarde ki aver phuv (2. Let. 36:15, 16, 20, 21). Uduri hine len disavi sloboda hem šaj hine te ovel len normalno životi (Jer. 29:4-7). Ama, ipak o životi na hine lokho hem na hine asavko savo bi on mangena. Sar hine lenđe sebepi odova? Zapazin so jekh verno manuš kova hine ko ropstvo phenđa: „Bešljam uzo vavilonska reke. Runđam ked setinđam amen ko Sion“ (Ps. 137:1). Kuri akala manuša, kola hine but obeshrabrime, šaj hine te arakhen uteha?
2-3. (a)So o Jehova ćerđa e Judejcenđe kola hine ko ropstvo? (b) Sostar ka vaćera ko akava članko?
2 O Jehova tano „Devel andi svako uteha“ (2. Kor. 1:3). Ov but mangela pe narodo hem mangela te utešini le. Ov đanđa so disave Judejcija kola hine ko ropstvo ka pokajinen pe hem palem ka služinen lese (Is. 59:20). Odolese, prekalo šel berš angleder te oven legarde ko Vavilon, o Jehova phenđa e Isaijase te pisini jekh knjiga koja ka akhari oleso anav. Sose ćerđa odova? O Isaija phenela: „’Tešinen, tešinen me narodo‘, vaćeri tumaro Devel“ (Is. 40:1). Prekali Isaijasi knjiga, o Jehova utešinđa e Judejcen.
3 Sar e Judejcenđe kola hine ko ropstvo ko Vavilon, hem amenđe disavo puti valjani uteha. Ko akava članko ka dikha trin načinija sar o Jehova utešinđa e Judejcen. Sar prvo, obećinđa so ka oprostini okolenđe kola kajinena pe, sar dujto, dinđa len nada hem sar trito, pomožinđa len te ciden pestar i dar. Isto ađahar, ka dikha sar o Jehova ko slično način utešini hem amen avdije.
O JEHOVA MILOSRDNO OPROSTINI AMENĐE
4. Sar o Jehova mothovđa soj tano milosrdno Devel? (Isaija 55:7)
4 O Jehova tano „Dad ando milosrđe“ (2. Kor. 1:3). Akija osobina mothovđa ked obećinđa okolenđe soj tane ko ropstvo so ka oprostini olenge grehija. (Čitin Isaija 55:7.) Ov phenđa: „Sebepi mo verno mangipe kova večno trajini ka ovav milosrdno premalo tute“ (Is. 54:8). Sar o Jehova mothovđa po milosrđe? Iako o Judejcija sar narodo valjanđe te akharen o posledice sebepi odova so ćerđe, o Jehova obećinđa lenđe so na ka aćhon zauvek ko Vavilon. Odothe ka aćhon jekh određeno vreme (Is. 40:2). Šaj samo te zamislina kobor akala lafija ohrabrinđe len hem utešinđe len!
5. Sose amen isi amen pobuter razlogija te verujina so o Jehova ka oprostini amare grehija?
5 So sikljovaja? O Jehova spremno oprostini amare grehija. Amen avdije isi amen pobuter razlogija te verujina ko odova nego o Izraelcija ko Vavilon. Sose šaj te phena odova? Amen đanaja so o Jehova ćerđa te šaj te oprostini amare grehija. Oko 700 berš palo odova so phenđa e Isaijase te pisini pi knjiga, o Jehova bićhalđa pe mangle Ćhave ki phuv te del po životi sar žrtva aso sa okola kola kajinena pe. Sebepi odija žrtva, amare grehija šaj zauvek „te kosen pe“ (Dela 3:19; Is. 1:18; Ef. 1:7). Ćaće, o Devel kase amen služinaja tano but milosrdno!
6. Sose tano utešno te razmislina ando Jehovaso milosrđe? (Dikh i slika.)
6 E Jehovase lafija kola tane pisime ko Isaija 55:7 šaj te utešinen hem amen ako isi amen osećaj andi krivica. Disave amendar borinena pe odoleja sebepi o greške kola angleder ćerđe, iako kajinđe pe aso odova. Odova posebno šaj te ovel slučaj ako pana akharaja o posledice ando amare greške. Ama, ako priznajinđam amare grehija hem ćhinavđam te ćera odova soj tano lošno, amen šaj te ova sigurna so o Jehova oprostinđa amenđe. A ked ov oprostini, ov više na pamtini amare grehija. (Uporedin e stihoja ando Jeremija 31:34.) Odolese, ako ov na irini pe ko amare greške kola ćerđam angleder, odova na valjani te ćera ni amen. Olese tano važno so akana ćeraja, a na o greške kola ćerđam angleder (Jezek. 33:14-16). Pana hari, amaro Dad, o Devel ando milosrđe ka cidel sa o pharipa kola isi amen sebepi o greške kola ćerđam.
E Jehovase nane važna o greške kola angleder ćerđam, već odova so akana ćeraja (Dikh o 6. odlomko)
7. So šaj te podstaknini amen te roda pomoć ako garavaja disavo greh?
7 So valjani te ćera ako mučini amen i savest odolese so garavaja disavo ozbiljno greh? I Biblija phenela te đa ko starešine hem te roda pomoć (Jak. 5:14, 15). Ama, nane uvek lokho te priznajina o greh. Odolese, šukar tano te ićera ki godi so o Jehova prekalo odola manuša mangela te pomožini amenđe. Isto ađahar, ma te bistra so on ka mothoven amenđe mangipe hem milosrđe baš sar o Jehova. Ako odova isi amen ki godi hem ako kajinaja amen, tegani ka ovel amenđe polokho te roda olendar pomoć. Te dikha sar e Jehovaso milosrđe utešinđa amare phrale e Arturea, kas mučinđa i savest. Ov phenela: „Dikhljum pornografija skoro jekh berš. Ama palo odova so šunđum jekh govor andi savest, phenđum me romnjaće hem e starešinenđe so ćerđum. Palo odova hine maje but polokho. Ama, pana hine maje pharo sebepi odova so ćerđum. O starešine setinćerđe man so o Jehova na vazdinđa pe vasta mandar. Ov ukorini amen odolese so mangela amen. Olenge lafija but utešinđe man hem pomožinđe man upro mande te dikhav sar o Jehova.“ Avdije, o Artur služini sar pioniri hem sluga pomoćniko. Kobor samo utešini amen odova so o Jehova milosrdno oprostini ako ando vilo kajinaja amen!
O JEHOVA DELA AMEN NADA
8. (a) Savi nada o Jehova dinđa e Judejcenđe? (b) Premalo Isaija 40:29-31, sar upro Judejcija kola kajinđe pe utičinđa i nada koja o Jehova dinđa len?
8 O Judejcija šaj hine te mislinen so niked na ka irinen pe ki pi phuv. I vavilonsko sila hine penđardi so niked na oslobodinđa e manušen kolen lelja ko ropstvo (Is. 14:17). Ama, o Jehova dinđa nada pe narodose. Ov obećinđa so ka oven oslobodime, a ked ov diso phenela ništa našti te ćhinavi le te ispunini odova (Is. 44:26; 55:12). Anglo Jehovase jaćha, o Vaviloncija hine sar prašina (Is. 40:15). Jekh puti te phudel i bavlal hem i prašina đelji. Sar šaj hine odija nada te pomožini e Judejcenđe? Valjanđa te utešini len. Ama, šaj hine te ćerel hem pana diso. O Isaija pisinđa: „Okola kola uzdajinena pe upro Jehova ka dobinen nevi snaga.“ (Čitin Isaija 40:29-31.) I nada šaj hine te del len snaga te vazden pe ko „phakha sar o orlija.“
9. Sose o Judejcija šaj hine te oven uverime so o Jehova ka oslobodini len ando Vavilon?
9 O Jehova dinđa e Judejcenđe hem dokaz sebepi kova šaj hine te verujinen so olese obećanja ka ispuninen pe. Kova dokaz dinđa len? Razmislin ando proročanstvija kola već ispuninđe pe ko olengo vreme. On đanđe so o Asircija osvojinđe o severno izraelsko kraljevstvo hem legarđe e narodo ko ropstvo (Is. 8:4). Pe jaćhencar dikhlje sar o Vaviloncija uništinena o Jerusalim hem palo odova legarena len ko ropstvo (Is. 39:5-7). Isto ađahar, đanđe so o Vaviloncija korjaćerđe e kralje e Sedekija hem legarđe le ko Vavilon (Jer. 39:7; Jezek. 12:12, 13). Sa so o Jehova prorekninđa ispuninđa pe (Is. 42:9; 46:10). Sa akava sigurno zorjaćerđa olengi vera so o Jehova ka ispunini po obećanje so ka oslobodini len.
10. Sar šaj amari nada te aćhol zorali ko akala poslednja dive?
10 So sikljovaja? Ked hijam tužna, amari nada šaj te utešini amen hem te del amen snaga. Amen živinaja ko pharo vreme hem isi amen bare dušmanija. Ama, na valjani te obeshrabrina amen. O Jehova obećinđa amenđe so zauvek ka živina ko raj. Odothe ka ovel amen mir hem sare ka ova bezbedna. Odija nada valjani te ovel amenđe jasno ko amare mislija hem ko amaro vilo. Ako nane ađahar, odova bi ovela sar ked bi dikhaja but šuži priroda ama kotar melalo đami. Sar šaj te „thova o đami“, avere lafencar amari nada te ovel amenđe jasno ki godi? Valjani redovno te razmislina ando odova kobor šukar životi ka ovel amen ko raj. Šaj te čitina o člankija, te dikha o videa ja te šuna o đilja kola vaćerena andi amari nada. Isto ađahar, ked molinaja amen e Jehovase šaj te vaćera lese ando odova sose jedva ađićeraja te avel o nevo sveto.
11. So zorjaćeri jekha phenja koja tani but nabormi?
11 Te dikha sar i nada utešini hem zorjaćeri amare phenja koja vićini pe Džoj. Oj isi la bare problemija pe sastipaja. I Džoj phenela: „Ked osetinava so nane man snaga, vaćerava e Jehovase sar osetinava man hem đanava so ov haljola man. Tegani, ov dela man ’but bari snaga‘ “ (2. Kor. 4:7) Isto ađahar, i Džoj zamislini pes ko nevo sveto ked niko na ka phenel: „Nabormo hijum“ (Is. 33:24). Ako hem amen phenaja e Jehovase sar osetinaja amen hem trudinaja amen amari nada te ovel zorali, tegani hem amenđe ka del nevi snaga.
12. Sose šaj te verujina so o Jehova ka ispunini sa so phenđa? (Dikh i slika.)
12 Sar e Judejcenđe kola hine ko ropstvo, o Jehova hem amenđe dela but razlogija te verujina ko olese obećanja. Razmislin ando proročanstvija kola ispuninena pe anglo amare jaćha. Na primer, amen dikhaja so i angloameričko svetsko sila ko isto vreme tani hem zorali hem slabo (Dan. 2:42, 43). Isto ađahar, šunaja so isi „zemljotresija ko razna thana“. Uzo odova, amen sar e Jehovase sluge propovedinaja i šukar vest „sa e narodonđe“ (Mat. 24:7, 14). Odova so dikhaja sar akala hem but avera proročanstvija već ispuninđe pe, uverini amen so o Jehova ka ispunini hem avera obećanja kola dinđa.
O proročanstvija kola avdije ispuninena pe pomožinena amen te verujina so o Jehova ka ispunini hem avera obećanja (Dikh o 12. odlomko)
O JEHOVA POMOŽINI AMEN TE NA DARA
13. (a) Kola pharipa hine len o Judejcija hari angleder te oven oslobodime? (b) Sar soj tano pisimo ko Isaija 41:10-13, sar o Jehova utešinđa e Judejcen?
13 O Jehova e Judejcenđe kola hine ko Vavilon phenđa so ka oven oslobodime. Ama, đanđa hem so na ka ovel lenđe lokho angleder te oven oslobodime. Ov prorekninđa so jekh moćno kralj ka napadini hem ka osvojini e narodon kola tane okolo Vavilon hem so palo odova ka napadini odija diz (Is. 41:2-5). Da li o Judejcija hine len razlog te daran? Na, sose but berša angleder o Jehova phenđa: „Ma dara sose me hijum tuvaja, ma brinin tut sose me hijum to Devel.“ (Čitin Isaija 41:10-13.) So značinđa odova so phenđa „me hijum to Devel“? Ov odoleja na setinćerđa len so valjani te služinen lese, sose odova već đanđe. Umesto odova, odole lafencar setinćerđa len so ov hem ponodri tano ki olengi strana hem so ka pomožini len (Ps. 118:6).
14. Sar o Jehova pana pomožinđa e Judejcenđe te na daran?
14 O Jehova utešinđa e Judejcen hem ađahar so setinćerđa len kobor bari moć hem đandipe isi le. Ov podstakninđa len te dikhen upre o ćerenja hem phenđa lenđe na samo so ov ćerđa len, već hem so svako ćereni đanela ko anav (Is. 40:25-28). Ako o Jehova đanela o anav andi svako ćereni, tegani sigurno đanela o anav kotar svako po sluga. Ako hine le moć te stvorini odola ćerenja, ov sigurno isi le moć hem te pomožini pe narodose. O Judejcija ko Vavilon na hine len nijekh razlog te brininen pe ja te daran.
15. Sar o Jehova pripreminđa e Judejcen aso odova so ka ovel?
15 O Jehova phenđa e Judejcenđe hem so te ćeren ked ka avel o vreme te oven oslobodime. Ko prvo deo andi Isaijasi knjiga, ov phenđa pe narodose: „Khuven ko tumare sobe kaj ka oven ko sigurno hem phanen o udara palo tumende. Garaven tumen samo hari đi na nakhela o gnev“ (Is. 26:20). Verovatno o Judejcija primeninđe akala smernice ked o kralj Kir napadinđa o Vavilon. Jekh istoričari kotar purani Grčka pisinđa so ked o Kir khuvđa ko Vavilon, ov „zapovedinđa pe vojnikonenđe te mudaren sarinen kola ka oven avri“. Zamislin samo kobor o manuša ko Vavilon darandilje! Ama, o Judejcija hine verovatno spasime odolese so šunđe e Jehovase smernice.
16. Sose na daraja ando odova so ka ovel ki bari nevolja? (Dikh i slika.)
16 So sikljovaja? Pana hari ka avel i bari nevolja. Ked oj ka počmini, o manuša ko sveto ka oven zbunime hem ka daran. Ama, na hem e Jehovaso narodo. Amen đanaja so o Jehova tano amaro Devel. Tegani amen ka terđova hem ka vazda amaro šero sose đanaja so amaro „spasenje tano paše“ (Luka 21:28). Čak hem ked ka napadini amen i koalicija ando narodija, amen ka ovel amen poverenje upro Jehova. Ov prekalo anđelija ka arakhi amen hem ka del amen uputstvija kola šaj te spasinen amaro životi. Ama, sar ka del amen odola uputstvija? Aćhola amenđe te ađićera hem te dikha. Najverovatno odova ka ovel prekalo amare skupštine. Šaj on ka oven o „sobe“ ko kola ka garava amen. Sar šaj te pripremina amen aso odova so ka ovel? Ađahar so ka ova paše amare phralencar hem phenjencar, spremno ka ićera amen ko uputstvija kola dobinaja hem ka ova potpuno sigurna so o Jehova vodini pi organizacija (Jevr. 10:24, 25; 13:17).
Amen đanaja so o Jehova isi le moć te spasini amen, odolese na valjani te dara so ka ovel amencar ki bari nevolja (Dikh o 16. odlomko)b
17. So značini te rode uteha ando Jehova?
17 Iako e Judejcenđe o životi ko Vavilon na hine hić lokho, o Jehova dinđa len odova so valjanđa lenđe. Odova ka ćerel hem amenđe. Odolese, bizo obzir so anela o tajsato dive hem ponodri rode uteha ando Jehova. Nek ovel tut poverenje so o Jehova oprostini pe verno slugenđe hem so brinini pe tutar. Ti nada nek ovel zorali. Ma bistri o Jehova, to Devel tano tuvaja hem nane sostar te dara.
ĐILI 3 O Jehova tano amari nada
a Disave anava tane menime.
b SO DIKHAJA KI SLIKA: Jekh tikni grupa ando phralja hem phenja ćedinđe pe ko jekh than. On tane uverime so o Jehova isi le sposobnost hem moć te zaštitini pe narodo kuri god te ovel.