Niked na hijam kokri

1-2. (a) Sose šaj te phena so niked na hijam kokri ked isi amen pharipa? (b) Sostar ka vaćera ko akava članko?

KED isi amen disave bare problemija, šaj osetinaja amen ka phene hijam kokri ko jekh brodo ki bari oluja. Ama, amen na hijam kokri. Amaro manglo Dad na samo so dikhela amare pharipa nego hem obećini so ka pomožini amen. Ov mangipaja phenela amenđe: „Me ka pomožinav [tumen]“ (Is. 41:10).

² Ko akava članko ka vaćera sar o Jehova pomožini amen ađahar so (1) vodini amen, (2) brinini pe amendar, (3) zaštitini amen hem (4) utešini amen. O Jehova uverini amen so bizo obzir kola pharipa ka oven amen ko životi, ov na ka bistrel amen. Ov niked na ka aćhavi amen. Odolese, niked na hijam kokri.

O JEHOVA VODINI AMEN

3-4. Sar o Jehova vodini amen? (Psalam 48:14)

³ Čitin Psalam 48:14. O Jehova đanela so amen našti bizo leste hem so valjani amenđe olesi pomoć. Sar vodini pe verna slugen avdije? Jekh način tano prekali Biblija (Ps. 119:105). Prekalo po Lafi, o Jehova pomožini amen te ana odluke hem te razvijina osobine sebepi kola ka ova pobahtale akana, a ki budućnost ka živina večno.a Na primer, ov sikavi amen te na ićera i holi ano amende, te ova poštena ko sa hem te manga e manušen ando vilo (Ps. 37:8; Jevr. 13:18; 1. Petr. 1:22). Ked mothovaja odola šuže osobine, amen ovaja pošukar roditeljija, amala hem pošukar rom ja romni.

⁴ Ki Biblija, o Jehova mukhlja te oven pisime o primerija ando manuša kola hine len slična problemija hem osećanja sar amende (1. Kor. 10:13; Jak. 5:17). Ked čitinaja ando akala manuša hem primeninaja odova so sikljovaja, odova ka koristini amenđe najhari ko duj načinija. Sar prvo, ka haljova so na hijam kokri, nego so hem avera isi len slična problemija hem uspinđe te istrajinen uzi Jehovasi pomoć (1. Petr. 5:9). Sar dujto, ka sikljova sar te istrajina hem te ova radosna (Rimlj. 15:4).

5. Prekalo kaste o Jehova vodini amen?

⁵ Isto ađahar, o Jehova vodini amen prekalo amare phralja hem phenja.b Na primer, o pokrajinska nadglednikija redovno posetinena o skupštine te ohrabrinen amen. Olenge govorija ohrabrinena amen hem pomožinena amen te aćhova ko jekhipe (Dela 15:40–16:5). O starešine isto trudinena pe te pomožinen svakonese te aćhol paše e Jehovaja (1. Petr. 5:2, 3). O roditeljija sikavena pe ćhaven te mangen e Jehova, te anen šukar odluke hem te ovel len šukar navike (Posl. 22:6). O zrela phenja pomožinena e poterne phenjenđe ađahar so mothovena lenđe šukar primer, dena len praktična savetija hem ohrabrinena len (Titu 2:3-5).

6. So valjani te ćera te šaj te pomožini amen e Jehovaso vođstvo?

⁶ O Jehova dela amen sa so valjani amenđe te šaj te ana šukar odluke hem te ova bahtale. Sar šaj te mothova zahvalnost aso odova so ćerela amenđe? Ko Poslovice 3:5, 6 pisini: „Uzdajin tut upro Jehova celone vileja, a ki ti godi ma oslonin tut.“ Ako ka ćera odova, „ov ka ispravini [amare] staze“, avere lafencar ka pomožini amen te cida amen ando but problemija hem te ova pobahtale. O Jehova svakonese amendar mangipaja dela savet. Razmislin samo kaj bi amen ovaja ako o Jehova na bi vodini amen (Ps. 32:8).

O JEHOVA BRININI PE AMENDAR

7. Sar o Jehova brinini pe amendar? (Filipljanima 4:19)

⁷ Čitin Filipljanima 4:19. Uzo odova so vodini amen, o Jehova pomožini amen đi trudinaja amen te ovel amen hrana, šeja hem than kaj te živina (Mat. 6:33; 2. Sol. 3:12). Iako tano normalno te brinina amen ando akala buća, o Jehova na mangela previše te sekirina amen aso odova. Sose? Odolese so amaro Dad niked na ka mukhel pe verna slugen (Mat. 6:8; Jevr. 13:5). Šaj te ovel amen potpuno poverenje ko odova so ov ka brinini pe amendar.

8. So o Jehova ćerđa e Davidese?

⁸ Razmislin odolestar sar o Jehova pomožinđa e Davidese. Đi našlja ando kralj Saul, o Jehova obezbedinđa olese hem olese manušenđe sa so valjanđa lenđe te preživinen. Ked razmislinđa sar o Jehova tegani brininđa pe olestar, o David phenđa: „Hijum le terno hem phuriljum, ama niked na dikhljum o pravedniko te ovel aćhavdo, ni olese ćhave te mangen marese“ (Ps. 37:25). Sar o David, šaj hem tu dikhljan sar o Jehova brininđa pe tutar ja ando phralja hem phenja ko pharo vreme.

9. Sar o Jehova brinini pe ando pe sluge ked ovela disavi prirodno katastrofa? (Dikh o slike.)

⁹ Isto ađahar, o Jehova brinini pe ando po narodo ked isi prirodna katastrofe. Na primer, ko prvo veko ked hine bokhalipe o hrišćanija ando razna thana bićhalđe pomoć e phralenđe hem e phenjenđe kolenđe odova valjanđa (Dela 11:27-30; Rimlj. 15:25, 26). E Devleso narodo hem avdije tano but velikodušno. Ked ovela disavi prirodno katastrofa, o Jehova podstaknini pe narodo te obezbedinen hrana, pani, šeja hem lekija okolenđe so živinena ko odola thana. O phralja andi gradnja popravinena o oštetime dvorane. Sa e Jehovase sluge spremno utešinena okolen so našalđe pe ćhera ili pe manglen.c

10-11. So sikljovaja ando Boriseso iskustvo?

¹⁰ O Jehova velikodušno brinini pe hem ando okola so na služinena lese. Isto ađahar, hem amen rodaja prilike te ova šukar premalo okola so nane amare phralja (Gal. 6:10). But putija sebepi odova amen šaj te vaćera lenđe diso ando Jehova. Ka razmotrina o iskustvo ando Boris, o direktori andi jekh škola ki Ukrajina. Iako nane e Jehovaso svedoko, ov uvek hine šukar premalo pe učenikija kola tane Svedokija hem poštujinđa olenge verovanja. Ked odlučinđa te našel sebepi o maribe ko pobezbedno than, amare phralja pomožinđe lese. Kasnije, alo ki Spomen-svečanost. Ked razmislini ando odova so o phralja ćerđe olese, ov phenela: „O Svedokija hine but šukar premalo mande hem brininđe pe mandar. But hijum lenđe zahvalno.“

¹¹ Sare šaj te oponašina amare nebesko Dade ađahar so ka mothova mangipe okolenđe kase valjani pomoć, bizo obzir da li tane amare phralja ja na (Luka 6:31, 36). Nadinaja amen so o mangipe kova mothovaja e manušenđe jekh dive ka podstaknini len te služinen e Jehovase (1. Petr. 2:12). Ama, bizo obzir da li odova ka desini pe ili na, amen ka ova bahtale sose „pobuter isi bahtalipe ked dela pe nego ked lela pe“ (Dela 20:35).

O JEHOVA ZAŠTITINI AMEN

12. Sar o Jehova obećinđa so ka zaštitini pe narodo? (Psalam 91:1, 2, 14)

¹² Čitin Psalam 91:1, 2, 14. Avdije, o Jehova obećini so ka zaštitini amen ando sa so šaj te rumini amaro amalipe oleja. Niked na ka dozvolini e Satanase te ćhinavi amen te služina lese ko način sar so ov mangela (Jov. 17:15). Ked i „bari nevolja“ ka avel, šaj te ova sigurna so o Jehova ka ispunini po obećanje so ka zaštitini pe narodo na samo ko duhovno pogled nego hem ko fizičko pogled (Otkr. 7:9, 14).

13. Ko kola načinija o Jehova zaštitini svakone amendar?

¹³ Sar o Jehova zaštitini svakone amendar? Prekali Biblija, ov pomožini amen te haljova soj tano šukar, a soj tano lošno (Jevr. 5:14). Ked živinaja premalo biblijake načelija, amen zaštitinaja amaro amalipe oleja hem anaja mudra odluke kola pomožinena amen te ova posaste hem pobahtale (Ps. 91:4). Isto ađahar, o Jehova zaštitini amen prekali skupština (Is. 32:1, 2). Amare phralja ki skupština mangena e Jehova hem šunena le. Ked hijam olencar ko sastankija, ki služba hem ked družinaja amen, odova but ohrabrini amen hem pomožini amen te cida amen ando lošna buća (Posl. 13:20).

14. (a) Sose o Devel na zaštitini amen ando sa o problemija? (b) Ko so uverini amen o Psalam 9:10? (Dikh i fusnota.)

¹⁴ Ko purano vreme, o Jehova podijekh puti zaštitinđa pe slugen ađahar so na mukhlja neko te povredini len ili te mudari len. Ama, ov na ćerđa uvek odova. I Biblija phenela so „o događaja kola na očekujinaja desinena pe svakone manušese“ (Prop. 9:11). Isto ađahar, o Jehova dozvolinđa disave olese sluge te oven progonime ja čak mudarde te šaj te dokažini pe so o Satana hovavi (Jov 2:4-6; Mat. 23:34). Slično tano hem avdije. Iako o Jehova na ka cidel amare problemija, šaj te ova sigurna so niked na ka aćhavi okolen so mangena le (Ps. 9:10).d

O JEHOVA UTEŠINI AMEN

15. Sar o Jehova utešini amen prekali molitva, Biblija hem prekalo phralja hem phenja? (2. Korinćanima 1:3, 4)

¹⁵ Čitin 2. Korinćanima 1:3, 4. Podijekh puti, isi amen bare problemija, hijam tužna hem sekirime. Šaj baš akana isi tut disavo pharipe sebepi kova osetineja tut so hijan kokri. Da li neko haljola sar osetineja tut? Ja, o Jehova. Ov na samo so haljola amari dukh, nego hem „utešini amen ki svako amari nevolja“. Sar? Ked ćućaraja lese amaro vilo ki molitva, ov dela amen „e Devleso mir, kova tano upreder odova so o manuš šaj te haljol“ (Fil. 4:6, 7). Isto ađahar, ked čitinaja i Biblija, e Jehovase lafija šaj but te ohrabrinen amen. Odothe o Jehova mothovi amenđe kobor mangela amen, sikavi amen sar te ova mudra hem dela amen nada. A ko sastankija utešini amen prekalo šuže mislija andi Biblija hem prekalo amare phralja hem phenja.

16. So sikljiljan ando Nejtan hem i Prisila?

¹⁶ Te šaj te dikha sar o Jehova ohrabrini hem utešini amen prekali Biblija, ka razmotrina e Nejtaneso hem e Prisilako iskustvo kola živinena ki Amerika. Angleder nekobor berš, on odlučinđe te selinen pe ko than kaj isi pobari potreba. O Nejtan phenela: „Hine amen poverenje upro Jehova so ka blagoslovini amaro trud.“ Ama, palo odova so reslje ko po nevo zadatko, hine len finansijska hem zdravstvena problemija. Ko krajo, morandilje te irinen pe ćhere. Ama, hem ponodri hine len finansijska problemija. O Nejtan phenela: „Pućljum man sose o Devel na blagoslovinđa amen ađahar sar so mislinđam so ka ćerel. Čak počminđum te pućav man, da li ćerava diso pogrešno.“ Sar đelo o vreme, on haljilje so o Devel na aćhavđa len ked hine lenđe najpharo. O Nejtan pana phenela: „Ko odova pharo vreme, i Biblija ulji amenđe sar jekh mudro amal kova ohrabrini amen hem dela amen mudra savetija. Usredsredinđam amen ko odova sar o Jehova pomožinđa amen a na ko kušnje, hem odova uverinđa amen so o Jehova ka ovel amencar hem ki budućnost.“

17. Sar o Jehova utešinđa e phenja e Helga? (Dikh i slika.)

¹⁷ Amare phralja hem phenja šaj te utešinen amen. Sar? Razmislin andi Helga koja živini ki Mađarska. Beršencar hine la razna problemija sebepi kola osetinđa pe so na vredini hem so nane la nada. Ama, ked razmislini ando odola berša, oj šaj te dikhel sar o Jehova utešinđa la prekali skupština. Oj phenela: „O Jehova uvek pomožinđa man ked dikhlja so nane man snaga sebepi i buti, so brininđum man ando mo nabormo ćhavo hem sebepi avera problemija. Ko akala 30 berš, o Jehova svako dive ispuninđa po obećanje so ka utešini man. Ov često utešinđa man prekalo averenge ohrabrujuća lafija. Često dobinđum poruke, razglednice ili pohvale baš ked najviše valjanđa maje.“

18. Sar šaj te utešina averen?

¹⁸ Isi amen bari prednost te oponašina amare Devle ađahar so ka utešina averen. Sar šaj te ćera odova? Šaj pažljivo te šuna len, te utešina len amare lafencar hem te pomožina len ko praktična načinija (Posl. 3:27). Amen trudinaja amen te utešina okolen so patinena, čak hem okolen so nane amare phralja. Ked tane amare pašutne tužna, naborme ili sekirime, amen đaja koro lende, šunaja len hem čitinaja lenđe disave ohrabrujuća stihija andi Biblija. Ked oponašinaja e Jehova, e Devle „andi svako uteha“, amen na samo so ka pomožina amare phralenđe te istrajinen nego šaj hem ka pomožina e manušenđe kola na služinena e Jehovase te mangen te sikljon olestar (Mat. 5:16).

O JEHOVA TANO UVEK OTHE AMENĐE

19. So o Jehova ćerela amenđe hem sar šaj te oponašina le?

¹⁹ O Jehova brinini pe ando sa okola so mangena le. Ov na aćhavi amen ked isi amen problemija. Sar so jekh roditelj brinini pe ando pe ćhave, ađahar o Jehova brinini pe ando pe sluge. Ov vodini amen, brinini pe amendar, zaštitini amen hem utešini amen. Amen oponašinaja amare nebesko Dade ked pomožinaja hem ohrabrinaja okolen so isi len problemija. Ko akava sveto, šaj te ovel amen pharipa hem te ova tužna, ama uverime hijam so o Jehova tano amencar. Ov phenela amenđe: „Ma dara, sose me hijum tuvaja“ (Is. 41:10). Odolese, uverime hijam so niked na hijam kokri!