O Jehova tano amari „najbari radost“

1-2. (a) Sar but manuša avdije osetinena pe? (b) Sostar ka vaćera ko akava članko?

BUT manuša avdije dena sa pestar te oven bahtale. Ama, so god te ćeren, na đala lenđe odova kotar vas. But olendar tane but tužna hem mislinena so o buća niked na ka oven pošukar. Disave e Jehovase sluge šaj te osetinen pe ađahar. Amen živinaja ko „poslednja dive“ hem odolese šaj te oven amen bare problemija sebepi kola šaj te ovel amenđe but pharo (2. Tim. 3:1).

² Ko akava članko ka vaćera ando odova so šaj te ćorel amari radost. Ama, isto ađahar ka dikha so šaj te pomožini amen palem te ova radosna. Najangleder, ka dikha kastar avela i ćaćutni radost.

KASTAR AVELA I ĆAĆUTNI RADOST?

3. So sikljovaja ando Jehova kotar buća kola stvorinđa? (Dikh o slike.)

³ O Jehova tano uvek bahtalo, odolese mangela hem amen te ova bahtale. Ov ćerđa but buća kola radujinena amen. Na primer, amen uživinaja te dikha kobor tani šuži amari phuv, kobor tane šuže o boje, but volinaja te dikha sar o životinje ćhelena pese hem uživinaja te ha razno hrana. O Jehova ćaće mangela amen hem mangela te uživina ko životi!

Tikno slon: Image © Romi Gamit/Shutterstock; tikne pingvinija: Vladimir Seliverstov/500px via Getty Images; tikne jarcija: Rita Kochmarjova/stock.adobe.com; duj delfinija: georgeclerk/E+ via Getty Images

4. (a) Sose tano o Jehova bahtalo iako dikhela so o manuša patinena? (b) Sar o Jehova pomožini amen? (Psalam 16:11)

⁴ O Jehova tano svesno kobor o manuša patinena hem olese tano but žao sebepi odova. Ama, ki Biblija pisini so ov tano „bahtalo Devel“ (1. Tim. 1:11). Sose? Jekh razlog tano so ov već odredinđa o dive ked ka ćhinavi sa i patnja. Ama đi odova dive na avela, o Jehova haljola amare pharipa hem mangela te pomožini amen. Sar odova ćerela? Ađahar so pomožini amen te ova ćaće radosna. (Čitin Psalam 16:11.) Akana ka dikha sose o Isus hine radosno.

5-6. Sose tano o Isus radosno?

⁵ O Isus tano najbahtalo manuš kole o Jehova stvorinđa. Sose? Najhari ando duj razlogija. (1) „Ov tano slika ando Devel kova na dićhola“ hem savršeno oponašini pe Dade (Kol. 1:15; 1.Tim. 6:15). (2) Ov provodinđa najviše vreme pe Dadeja, kolestar hem avela i radost.

⁶ O Isus tano radosno odolese so uvek ćerela odova so o Jehova rodela olestar (Posl. 8:30, 31; Jov. 8:29). Sebepi odova, o Jehova tano zadovoljno oleja (Mat. 3:17).

7. Sar šaj te ova ćaće radosna?

⁷ Amen isto šaj te ova radosna ako hijam paše e Jehovaja. So pobuter sikljovaja olestar hem oponašinaja le, amen ka ova pana poradosna. Isto ađahar, šaj te ova radosna ked ćeraja olesi volja hem ked đanaja soj tano ov zadovoljno amencar (Ps. 33:12).a Ama, disavo puti šaj nekobor dive ja pobuter vreme te osetina amen but tužna. Ako ađahar osetineja tut, ov sigurno so odova na značini so o Jehova nane zadovoljno tuvaja. Amen hijam nesavršena hem podijekh puti šaj te osetina disavi dukh ko vilo, šaj te ova tužna ja depresivna. O Jehova haljola odova (Ps. 103:14). Akana ka dikha kola buća šaj te ćoren amari radost hem sar šaj palem te ova radosna.

MA MUKH NISOSE TE ĆOREL TI RADOST

8. Sar šaj o problemija te utičinen upro amende?

⁸ Prvo ćor: Amare problemija. Da li hine tut disavo progonstvo ja doživinđan disavi prirodno katastrofa? Da li hijan nabormo, phuro ja ćororo? Sebepi odola problemija šaj lokho te našala amari radost. Posebno ako našti ništa te ćera te menina odija situacija. I Biblija phenela so sebepi odova šaj te ova but tužna hem te mislina so niked palem na ka šaj te ova bahtale (Posl. 15:13). O Babis, kova služini sar starešina, osetinđa pe ađahar. Aso samo štar berš mulje olese roditeljija hem oleso jedino phral kova hine le. Ov phenela: „Osetinđum man so hijum kokri hem so niko našti te pomožini maje. Disavo puti hijum le but tužno sose mangljum pobuter vreme te provodinav me phraleja hem me roditeljencar angleder so ka meren. Ama našti hine odova te ćerav.“ Podijekh puti o problemija šaj te len amari snaga hem but te obeshrabrinen amen.

9. So šaj te pomožini amen palem te ova radosna? (Jeremija 29:4-7, 10)

⁹ So šaj te pomožini amen palem te ova radosna? Amen valjani te ova realna hem zahvalna. O manuša ko sveto phenena so valjani te ovel amen savršena okolnostija ako mangaja te ova bahtale. Ama, odova nane tačno. Na primer, o Jehova phenđa e Jevrejenđe kola hine legarde ko ropstvo ko Vavilon te prihvatinen pe okolnostija hem te trudinen pe te den po najšukar. (Čitin Jeremija 29:4-7, 10). So sikljovaja olendar? Amen valjani te prihvatina amare okolnostija hem te ova zahvalna aso šukar buća kola isi amen ko životi. Ma bistri, o Jehova tano uvek odothe hem ov ka pomožini tut (Ps. 63:7; 146:5). I Efi koja doživinđa jekh nesreća pali koja aćhili paralizovano phenela: „But pomožinđe maje o Jehova, mi porodica hem i skupština. Mislinava so bi ovava but nezahvalno ako na bi trudinava man te aćhovav pozitivno. A me mangljum te mothovav lenđe so hijum zahvalno aso sa so ćerđe maje.“

10. Sose šaj te ova radosna iako isi amen problemija?

¹⁰ Amen šaj te ova radosna iako isi amen problemija ja desinena pe disave lošna buća amenđe ja amara porodicaće (Ps. 126:5).b Sose šaj te phena odova? Odolese so amari radost na zavisini ando amare okolnostija. I Marija, koja služini sar pionirka, phenela: „Čak hem ked isi amen problemija, amen hijam bahtale odolese so na bistraja odova so o Jehova obećinđa amenđe. Odova na značini so niked na ka rova ja na ka phena sar osetinaja amen. Ama, o Jehova uvek ka pomožini amen te na našala amari radost.“ Kobor god akana te ovel amenđe pharo, na valjani te bistra so amare problemija tane privremena, sar o tragija ando pre ki plaža. Pana hari, o Jehova ka cidel sa amare problemija. Na ka aćhol nijekh trago olendar.

11. Sar ohrabrini tut o primer ando apostol Pavle?

¹¹ Šaj podijekh puti mislinaja so o Jehova nane zadovoljno amencar odolese so isi amen problemija. Tegani, šaj te pomožini amen ako razmislinaja ando Jehovase verna sluge kola hine len bare problemija. Razmislin ando apostol Pavle. O Isus birinđa le te propovedini „avere narodonđe, a hem e kraljenđe hem e Izraelcenđe“ (Dela 9:15). Savi bari čast! Ama, ov hem ponodri hine le problemija (2. Kor. 11:23-27). Da li odova značinđa so o Jehova na hine zadovoljno oleja? Na. Odova so istrajinđa ko pe problemija mothovi so o Jehova hine oleja (Rimlj. 5:3-5). Akana razmislin andi ti situacija. Hem tu deja sa tutar te služine e Jehovase, iako isi tut problemija. Odolese, šaj te ove sigurno so o Jehova tano zadovoljno tuvaja.

12. Sar šaj te osetina amen ako našti te služina e Jehovase odobor kobor bi mangaja?

¹² Dujto ćor: Ked našti te ćera odova so mangaja ki služba e Jehovase (Posl. 13:12). O mangipe hem i zahvalnost premalo Jehova podstakninena amen te ćhiva amenđe ciljija đi služinaja lese. Ama, sebepi amare okolnostija šaj našti te ispunina odola ciljija hem sebepi odova šaj te ova razočarime (Posl. 17:22). Jekh pionirka koja vićini pe Holi, phenela: „Mangljum te đav ki Škola aso objaviteljija ando Kraljevstvo, te služinav ki aver phuv ili te pomožinav đi gradinđa pe o Ramapo. Ama, me okolnostija meninđe pe hem našti hine te ispuninav nijekh ando akala ciljija. Odolese hijum le razočarimi. Pharo tano ked mangeja diso te ćere, a našti.“ But đene osetinena pe baš sar olate.

13. So šaj te ćera bizo obzir ko save okolnostija hijam?

¹³ So šaj te pomožini amen palem te ova radosna? Na valjani te bistra so o Jehova na rodela amendar odova so amen našti. Ov cenini amen iako našti te ćera odova so avera ćerena. O Jehova mangela te ova skromna hem verna (Mih. 6:8; 1. Kor. 4:2). Olese tano považno save hijam andral nego odova so ćeraja. Da li bi ovela razumno te očekujina amendar pobuter nego so o Jehova očekujini?c Naravno so na! Odolese, ako sebepi te okolnostija našti te ćere e Jehovase sa so bi mangeja, tegani razmislin so šaj te ćere. Na primer, da li šaj te pomožine e ternenđe ja te ćere diso e phurenđe? Da li šaj te ćhive tuće cilj te ohrabrine nekas ađahar so ka đa koro leste ja ađahar so ka vićine le ko telefoni ja ka bićhale lese poruka? O Jehova tano zadovoljno ked amen ćeraja odova so šaj. Ov ka blagoslovini amen hem ka del amen radost. Isto ađahar, našti ni te zamislina ko save sa načinija ki budućnost ka služina e Jehovase. I Holi, kolatar angleder vaćerđam, phenela: „Razmislinava hem phenava kokri maje: ’Aš hari, anglo tute tani večnost‘. Uzi Jehovasi pomoć, ko nevo sveto ka ispuninav sa me ciljija.“

14. So pana šaj te ćorel amari radost?

¹⁴ Trito ćor: Ked mangaja te ugodina samo amenđe. Ko internet o manuša šaj izgledinena bahtale odolese so ugodinena kokri pese. Šaj te počmina te mislina so ako isi amen disavo hobi, ako ćinaja odova so mangaja hem ako putujinaja ko razna thana, odova ka ćerel amen te ova radosna. Odola buća nane pogrešna. O Jehova mangela te uživina ko buća kola dinđa amen. Ama, but manuša haljilje so odova na ćerela len te oven ćaće bahtale. Jekh pionirka koja vićini pe Eva, phenela: „Ked samo razmislineja sar te ugodine kokri tuće, niked na ka ove zadovoljno. Uvek ka mange pobuter.“ Ako mangaja te ugodina samo amenđe, tegani ka ova tužna hem razočarime.

15. So šaj te sikljova ando kralj Solomon?

¹⁵ Ando Solomoneso iskustvo sikljovaja so ked o manuš mangela te ugodini samo pese, odova na anela lese bahtalipe. Sose? Ov trudinđa pe te ćerel sa so šaj te ovel bahtalo. Na primer, probinđa but ukusno hajbe, šunđa but šuži muzika hem ćinđa pese but skupa buća. Ama, sa odola buća na ćerđe le te ovel bahtalo. Ov phenđa: „I jakh odova više našti te dikhel, niti o kan više našti odova te šunel“ (Prop. 1:8; 2:1-11). O manuša ko sveto mislinena so ako isi len pare hem ako ćerena sa so mangena, ka oven bahtale. Ama, odova nane tačno. Odola buća našti te ćeren amen te ova bahtale.

16. Sose hijam poradosna ked ćeraja diso averenđe? (Dikh o slike.)

¹⁶ So šaj te pomožini amen palem te ova radosna? O Isus phenđa: „Pobuter isi bahtalipe ked dela pe nego ked lela pe“ (Dela 20:35). Jekh starešina kova vićini pe Alekos, phenđa: „Trudinava man te ćerav disave tikne buća averenđe. Ked pomožinava len, tegani na razmislinava mandar hem odolese hijum bahtalo.“ So šaj tu te ćere te pomožine averenđe? Ako dikheja so neko tano tužno, trudin tut te ohrabrine le. Tu šaj našti te rešine olese problemija. Ama, šaj te utešine le ađahar so pažljivo ka šune le, ka ove saosećajno premalo leste hem ka podstaknine le te fordel po pharipe upro Jehova (Ps. 55:22; 68:19). Isto ađahar, šaj te setinćere le so o Jehova na aćhavđa le (Ps. 37:28; Is. 59:1). Šaj te nudine lese hem disavi praktično pomoć, sar na primer te ćere lese diso hajbase ili te đa te phire oleja. Šaj te vićine le ki služba sose i služba uvek anela amenđe bahtalipe. Odolese, mukh o Jehova te ohrabrini averen prekalo tute. So pobuter razmislineja averendar hem odolestar sar šaj te pomožine len, tu ka ove poradosno! (Posl. 11:25).

17. So valjani te ćera ako mangaja te ova ćaće radosna? (Psalam 43:4)

¹⁷ Amen šaj te ova ćaće bahtale ako trudinaja amen te ova paše amare nebesko Dadeja. I Biblija uverini amen so o Jehova tano amari „najbari radost“. (Čitin Psalam 43:4.) Odolese, bizo obzir save problemencar borinaja amen, na valjani te dara. Ako o Jehova tano amaro najšukar amal, ov ka pomožini amen zauvek te ova radosna! (Ps. 144:15).