Sikljov te moline tut e Jehovase ando vilo

1-2. (a) So šaj te ćhinavi amen te phrava amaro vilo e Jehovase? (b) Sar đanaja so o Jehova šunela amare molitve?

DA LI primetinđan so često molineja tut aso ista buća ili so na vaćereja e Jehovase sar ćaće osetineja tut? Ako ja, na hijan jedino. Odolese so hijam but zauzeta, šaj te desini pe te molina amen ki sig. Isto ađahar, šaj na phravaja amaro vilo e Jehovase ki molitva odolese so mislinaja so na hijam dovoljno šukar te vaćera oleja.

² I Biblija uverini amen so e Jehovase nane važno kola lafija koristinaja ki molitva, već odola lafija te aven ando vilo. Ov šunela o „molbe ando krotka“ manuša (Ps. 10:17). O Jehova pažljivo šunela svako amaro lafi sose but brinini pe amendar (Ps. 139:1-3).

3. Ando kola pućiba ka vaćera ko akava članko?

³ Šaj pućaja amen: „Sose na valjani te dara te phena e Jehovase sar osetinaja amen? Sar šaj amare molitve te ćeren amen te ova pana popaše e Jehovaja? Sar o molitve kola tane pisime ki Biblija šaj te pomožinen amen amare molitve te oven pana pošukar? So te ćera ako na đanaja so te phena e Jehovase ki molitva?“ Hajde te dikha o odgovorija ko akala pućiba.

PHEN E JEHOVASE SAR OSETINEJA TUT

4. So šaj te pomožini amen slobodno te vaćera e Jehovaja ki molitva? (Psalam 119:145)

⁴ Ked haljovaja so o Jehova tano amaro verno amal kova mangela amenđe samo najšukar, amen šaj slobodno te phena lese so mučini amen. O pisco ando 119. psalam trudinđa pe te ovel le asavko amalipe e Jehovaja. Oleso životi na hine bizo problemija. Disave manuša vaćerđe hovajba olestar (Ps. 119:23, 69, 78). Isto ađahar, disavo puti hine obeshrabrimo sebepi o greške kola ćerđa (Ps. 119:5). Ama, odova na ćhinavđa le te phravel po vilo e Jehovase ki molitva. (Čitin Psalam 119:145.)

5. Sose na valjani te mukha amare negativna osećanja te ćhinaven amen te molina amen e Jehovase? Vaćer jekh primer.

⁵ O Jehova mangela čak hem okola kola ćerđe ozbiljno greh te molinen pe olese (Is. 55:6, 7). Odolese, na valjani te mukha amare negativna osećanja te ćhinaven amen te molina amen e Jehovase. Aće jekh primer. Jekh piloti đanela so valjani te vaćeri e manušencar kola tane odgovorna te usmerinen le ked valjani lese pomoć. Da li o piloti ka odlučini te na obratini pe olenđe ako našaldilo ja ako ćerđa disavi greška? Naravno so na! Isto ađahar, ako na hijam sigurna so te ćera ja ako ćerđam disavo ozbiljno greh valjani te roda e Jehovastar pomoć ki molitva (Ps. 119:25, 176).

SAR ŠAJ O MOLITVE TE ĆEREN TUT TE OVE POPAŠE E JEHOVAJA?

6-7. So ka pomožini amen te phena e Jehovase sar ćaće osetinaja amen? Vaćer jekh primer. (Dikh i fusnota.)

⁶ Ked iskreno phenaja e Jehovase so mislinaja hem so osetinaja, odova ćerela amen te ova popaše oleja. Odolese, so šaj te pomožini amen te molina amen ko asavko način?

⁷ Razmislin ando Jehovase osobine.a So pobuter razmislinaja ando Jehovase osobine, pana pobuter ka ova slobodna te phena lese sostar razmislinaja hem sar osetinaja amen (Ps. 145:8, 9, 18). Te dikha o primer andi phen i Kristin, kaso dad hine nasilno. Oj phenela: „Hine maje pharo te dikhav upro Jehova sar upro mo Dad hem te vaćerav oleja. Mislinđum so na hijum dovoljno šukar hem so odolese o Jehova našti te mangel man.“ Kola e Jehovase osobine pomožinđe olaće? Oj phenela: „Često razmislinđum ando Jehovaso verno mangipe. Odova uverinđa man so ov mangela man. Đanđum so niked na ka mukhel man hem so uvek ka pomožini man. Čak ako perava, ov ka vazdel man. Odova pomožini man te vaćerav e Jehovaja hem ked hijum bahtali hem ked hijum tužno.“

8-9. Sose tano šukar angleder te razmislina so ka phena ki molitva? Vaćer jekh primer.

⁸ Razmislin ando odova so ka phene. Angleder so ka moline tut, šaj te puće tut disave pućiba. Na primer: „Savo problem trenutno isi man? Da li isi neko kase valjani te oprostinav? Da li akana sigende meninđa pe diso ko mo životi hem valjani maje e Jehovasi pomoć aso odova?“ (2. Kralj. 19:15-19). Isto ađahar, ma bistri sar o Isus sikavđa amen te molina amen. Ov phenđa so šaj te molina amen te svetini pe e Devleso anav, te avel oleso Kraljevstvo hem te ovel olesi volja (Mat. 6:9, 10).

⁹ Ked amara phenjaće e Aliskaće o doktorija phenđe so olako rom isi le rak ko šero, olaće hine but pharo te molini pe. Oj phenela: „Odobor hijum le uznemirimi so našti hine jasno te razmislinav so te phenav e Jehovase.“ So pomožinđa laće? Oj phenela: „Angleder te molinav man, razmislinđum so te phenav e Jehovase ki molitva hem odova pomožinđa maje te na razmislinav samo mandar ja ando me romeso nabormipe. Ked ćerđum odova, hine man mir hem šaj hine te vaćerav e Jehovaja hem ando avera buća.“

10. Sose na valjani te siđara đi molinaja amen? (Dikh o slike.)

¹⁰ Ma siđar ked molineja tut. Tačno tano so čak o kratka molitve šaj te ćeren amen te ova paše e Jehovaja. Ama, ked odvojinaja vreme podugo te molina amen, tegani šaj te vaćera e Jehovase pobuter ando odova sar osetinaja amen.b O Ilajđa, e Aliskako rom phenela: „Trudinava man nekobor putija ko dive te molinav man e Jehovase. Ama, osetinava man popaše e Jehovaja ked odvojinava vreme hari pobuter te vaćerav oleja. Ov tano strpljivo hem na siđari man te završinav mi molitva hem šaj te phenav lese sa so mangava.“ Odolese trudin tut te ćere akava: Odvojin vreme te moline tut podugo, čak hem ko glaso hem arakh than kuri ništa na ka smetini tut. De sa tutar odova te ćere redovno.

RAZMISLIN ANDO MOLITVE KOLA TANE PISIME KI BIBLIJA

11. Sar šaj te pomožinen tut o molitve kola tane pisime ki Biblija? (Dikh o okvir „Da li osetineja tut sar olende?“)

¹¹ Šaj but te pomožini tut ako razmislineja ando molitve, đilja hem psalmija kola tane pisime ki Biblija. Đi ka dikhe sar o verna sluge vaćerđe ando pe mislija hem osećanja e Jehovase, ka ove podstaknimo te phrave lese to vilo. Isto ađahar, šaj ka sikljove disave neve izrazija kola šaj te koristine ko te molitve. Verovatno ka arakhe disave molitve kola odnosinena pe ko te okolnostija.

12. So šaj te puće tut đi razmislineja andi disavi molitva?

¹² Đi čitineja disavi molitva koja tani pisimi ki Biblija, šaj te puće tut: Ko vaćerđa akala lafija? Save okolnostija tegani hine le? Da li hem me ađahar osetinava man? So šaj te sikljovav kotar akija molitva? Te šaj te dobine odgovor ko akala pućiba, šaj ka valjani dodatno te istražine. Ama, ko krajo odova but ka pomožini tuće. Akana ka dikha nekobor primerija.

13. So sikljovaja andi Anaki molitva? (1. Samuilova 1:10, 11; dikh i slika.)

¹³ Čitin 1. Samuilova 1:10, 11. Ked i Ana phenđa akija molitva, oj hine la duj bare problemija. Sar prvo, oj našti hine te oven la ćhave. Sar dujto, olake romesi aver romni ćerđa lako životi te ovel but pharo (1. Sam. 1:4-7). Ako hem tu isi tut problemi kova dugo trajini, so šaj te sikljove andi Anaki molitva? Oj odvojinđa vreme hem phenđa e Jehovase sa so hine la ko vilo. Palo odova hine laće but polokho (1. Sam. 1:12, 18). Amen isto šaj te osetina amen but pošukar ako fordaja amaro „pharipe upro Jehova“, avere lafencar ako phravaja lese amaro vilo hem phenaja lese sa so mučini amen (Ps. 55:22).

14. (a) So pana sikljovaja ando Anako primer? (b) Sar amare molitve šaj te oven pošukar ako razmislinaja ando molitve kola tane pisime ki Biblija? (Dikh i fusnota.)

¹⁴ Palo nekobor berš so bijandilo o Samuilo, i Ana legarđa le ko prvosvešteniko o Ilija (1. Sam. 1:24-28). Ki pi molitva, oj zahvalinđa pe e Jehovase so pomožini pe verna slugenđe hem so brinini pe olenđe (1. Sam. 2:1, 8, 9).c I Ana hine la pana problemija ko životi. Ama, umesto te razmislini samo ando odola problemija, oj pobuter razmislinđa ando odova sar o Jehova pomožinđa laće. So šaj amen te sikljova odolestar? Amenđe ka ovel polokho te ikljova ko krajo amare problemencar ako dikhaja sar o Jehova đi akana pomožinđa amenđe.

15. So šaj te sikljova andi Jeremijasi molitva? (Jeremija 12:1)

¹⁵ Čitin Jeremija 12:1. E Jeremijase hine but pharo ked dikhlja sar o lošna manuša napredujinena. Isto ađahar, ov često hine obeshrabrimo sose avera Izraelcija marđe lese muj (Jer. 20:7, 8). Amen šaj te haljova sar osetinđa pe sose ni amenđe nane lokho ked neko marela amenđe muj ja dikhaja sar o nepravedna manuša napredujinena. Iako o Jeremija mothovđa e Jehovase kobor tano lese pharo, ov niked na krivinđa e Jehova sebepi odija nepravda. Ked dikhlja so o Jehova ukorinđa pe narodo, oleso pouzdanje upro leste hine pana pobaro (Jer. 32:19). Amen isto šaj slobodno te vaćera e Jehovase sa so mučini amen hem te ova sigurna so ov ko pravo vreme ka ispravini sa i nepravda.

16. So šaj te sikljova andi molitva koja pisinđa o Leviti? (Psalam 42:1-4; dikh o slike.)

¹⁶ Čitin Psalam 42:1-4. Akija đili pisinđa jekh Leviti kova našti hine te đal ko hram zajedno avere Izraelcencar. Ov pisinđa sar osetinđa pe sebepi odova. Možda hem amen osetinaja amen sar oleste odolese so našti te ikljova ando ćher sebepi o nabormipe ili odolese so hijam ko zatvor sebepi amari vera. Šaj podijekh puti hijam bahtale, a podijekh puti tužna. Ama, bizo obzir sar osetinaja amen, valjani te vaćera e Jehovaja odolestar. Odova ka pomožini amen te haljova sose ađahar osetinaja amen hem te dikha averćhane ki amari situacija. Na primer, o Leviti haljilo so isi hem avera načinija sar šaj te slavini e Jehova (Ps. 42:5). Isto ađahar, razmislinđa odolestar sar o Jehova brininđa pe olese (Ps. 42:8). Ako molinaja amen e Jehovase ando vilo, odova ka pomožini amen te haljova amare osećanja, te ovel amen mir hem snaga te istrajina.

17. (a) So šaj te sikljova andi Jonasi molitva? (Jona 2:1, 2) (b) Sar šaj disave lafija ando psalmija te pomožinen amen ked isi amen disavi phari situacija? (Dikh i fusnota.)

¹⁷ Čitin Jona 2:1, 2. O prorok Jona vaćerđa akija molitva đi hine ko maćheso vođi. Iako hine neposlušno e Jehovase, ov hine sigurno so o Jehova ka šunel oleso glaso. Đi molinđa pe e Jehovase, koristinđa but izrazija ando psalmija kola verovatno šukar đanđa.d Ked razmislinđa olendar, ov hine sigurno so o Jehova ka pomožini lese. Ko slično način, ako pamtinaja disave stihija andi Biblija hem amen šaj te setina amen koro lende hem te utešinen amen ked molinaja amen e Jehovase ki disavi phari situacija.

HEM PONODRI MOLIN TUT E JEHOVASE ANDO VILO

18-19. Ko so uverinena amen o stihija ando Rimljanima 8:26, 27, ako amenđe podijekh puti pharo te phena e Jehovase sar osetinaja amen? Vaćer jekh primer.

¹⁸ Čitin Rimljanima 8:26, 27. Podijekh puti šaj hijam odobor zabrinuta so na đanaja sar te objasnina e Jehovase sar osetinaja amen. Tegani, šaj te pomožini amen e Jehovaso sveti duh kova šaj te zauzmini pe amenđe. So odova značini? Prekalo po duho, o Jehova podstakninđa e manušen ki Biblija te pisinen but molitve. Odolese, ked amen na đanaja so te phena e Jehovase, ov ka prihvatini odola molitve sar lična amare hem ka odgovorini amenđe.

¹⁹ Akija misao pomožinđa amara phenjaće andi Rusija koja vićini pe Jelena. Ola i policija astarđa sose molinđa pe hem čitinđa i Biblija. Odija situacija hine laće odobor stresno so hine laće pharo te molini pe. Oj phenela: „Ked hine maje but pharo hem ked na đanđum aso so te molinav man, setinđum man so o Jehova šaj te prihvatini o molitve kola tane pisime ki Biblija sar ka phene tane me molitve. Odova but utešinđa man ki odija phari situacija.“

20. So šaj te pomožini amen te molina amen ked hijam ko stres?

²⁰ Ked hijam ko stres, šaj te ovel amenđe pharo te ovel amen koncentracija đi molinaja amen. So šaj te pomožini amen? Šaj te šuna audio-snimkija ando psalmija angleder te molina amen. Isto ađahar, šaj te pisina amare osećanja ko jekh lil, sar so ćerđa o kralj David (Ps. 18, 34, 142; o uvodija). Naravno, nane pravilija kola mothovena amenđe so valjani te ćera angleder te molina amen (Ps. 141:2). Odolese, ćer odova so tuće ka ovel najšukar.

21. Sose šaj te molina amen celone vileja?

²¹ But tano utešno odova so o Jehova haljola sar osetinaja amen angleder bilo so te phena lese (Ps. 139:4). Ama, ov mangela te šunel sar osetinaja amen hem kobor isi amen poverenje upro leste. Odolese, ma bezdin tut te moline tut te nebesko Dadese. Sikljov ando molitve kola tane pisime ki Biblija. Molin tut celone vileja. Vaćer e Jehovaja hem ked hijan tužno hem ked hijan bahtalo. Ov tano to pravo amal hem odolese uvek ka ovel othe tuće!