43. ČLANKO PROUČIBASE
ĐILI 41 Molinava tut Devla te šune man
Ma bistri te moline tut averenđe
Molinen tumen jekh jekhese. E pravednikosi molitva koja avela ando vilo isi la bari snaga (JAK. 5:16)
SO KA SIKLJOVA?
Sose tano važno te molina amen averenđe hem sar šaj te ćera odova?
1. Sar đanaja so amare molitve tane važna e Jehovase?
I MOLITVA tani jekh but šužo poklon. Razmislin akalestar. O Jehova dinđa razna zadatkija e anđelenđe (Ps. 91:11). Isto ađahar, dinđa bare odgovornostija hem e Isusese (Mat. 28:18). Ama, ko šunela amare molitve? O Jehova odlučinđa odova ov te ćerel. Ki Biblija pisini so ov lično šunela amare molitve (Ps. 65:2).
2. Ko so tano o apostol Pavle šukar primer?
2 Iako šaj te phena e Jehovase sa so mučini amen, amen šaj te molina amen hem aso avera. O apostol Pavle ćerđa odova. Na primer, ov pisinđa e skupštinaće ko Efes: „Uvek pominava tumen ko me molitve“ (Ef. 1:16). Ov molinđa pe hem aso pojedincija. Na primer, e Timotejese phenđa: „Zahvalno hijum e Devlese [. . .] hem uvek pominava tut ko me usrdna molitve kola bićhalava hem diveste hem raćate“ (2. Tim. 1:3). O Pavle šaj hine te molini pe aso pe problemija (2. Kor. 11:23; 12:7, 8). Ama, ov odvojinđa vreme te molini pe averenđe.
3. Sose šaj te bistra te molina amen averenđe?
3 Podijekh puti šaj te bistra te molina amen averenđe. Sose? Amari phen i Sabrinaa, phenela: „Amen uvek negde siđaraja hem odobor šaj te razmislina ando amare problemija so molinaja amen samo aso odova so amenđe valjani.“ Da li odova desinđa pe hem tuće? Ako ja, akava članko šaj te pomožini tut. Akana ka dikha (1) sose tano važno te molina amen averenđe hem (2) sar šaj odova te ćera.
SOSE TANO VAŽNO TE MOLINA AMEN AVERENĐE?
4-5. Sose šaj te phena so amare molitve isi len bari snaga? (Jakovljeva 5:16)
4 I molitva aso avera „isi la bari snaga“. (Čitin Jakovljeva 5:16.) Da li šaj amare molitve te utičinen ko odova te menini pe nekasi situacija? Ja, šaj. O Isus đanđa so o Petar pana hari ka odreknini pe olestar hem odolese phenđa: „Molinđum man tuće ti vera te na slaboni“ (Luka 22:32). Isto ađahar, o apostol Pavle đanđa kobor i molitva šaj te utičini upri nekasi situacija. Ked hine nepravedno phanlo ko Rim, ov pisinđa e Filimonese: „Nadinava man so me molitve ka oven uslišime, pa ka irinav man koro tumende“ (Filim. 22). Ađahar hem hine. Sigate palo odova, o Pavle hine oslobodimo hem šaj hine te nastavini te propovedini.
5 Naravno, odova na značini so o Jehova uvek ka ćerel odova so amen molinaja le. Ov dikhela kobor tano amenđe važno odova aso so molinaja amen hem disavo puti odlučini te uslišini amen. Odolese so odova đanaja, amen šaj te molina amen lese ando vilo hem ko olese vasta te mukha amare problemija (Ps. 37:5; 2. Kor. 1:11).
6. Sar šaj upro amende te utičini odova so molinaja amen averenđe? (1. Petrova 3:8)
6 Odova pomožini amen te ova „samilosna“. (Čitin 1. Petrova 3:8.) I samilosno osoba dikhela ked avera patinena hem mangela te pomožini len (Mar. 1:40, 41). Jekh starešina, kova vićini pe Majkl, phenela: „Ked molinava man aso odova so valjani averenđe, tegani hijum svesno sovaja borinena pe hem mangava len pana pobuter. Osetinava man popaše olencar, iako on šaj na đanena odova.“ Jekh aver starešina, kova vićini pe Ričard, phenela sar olese pomožini ked molini pe averenđe. Ov phenela: „Ked molinaja amen nekase, hijam podstaknime te ćera diso te pomožina le. Ked ko praktično način ćeraja diso e osobaće asi koja molinđam amen, odova tano ka phene pomožinđam amari molitva te ovel uslišimi.“
7. Sar odova so molinaja amen averenđe pomožini amen te na razmislina samo ando amare problemija? (Filipljanima 2:3, 4; dikh o slike.)
7 Odova pomožini amen ispravno te dikha ko amare problemija. (Čitin Filipljanima 2:3, 4.) Odolese so celo sveto tano ko Lošnonese vasta sare isi amen problemija (1. Jov. 5:19; Otkr. 12:12). Ama, ked isi amen navika te molina amen averenđe, odova ka podsetini amen so „ista patnje doživinena hem [amare] phralja ko celo sveto“ (1. Petr. 5:9). Jekh pionirka, koja vićini pe Ketrin, phenela: „Ked molinava man averenđe odova setinćeri man so hem avera isi len problemija. Odova pomožini man te na razmislinav odobor ando me problemija.“
Ked molinaja amen averenđe, na razmislinaja odobor ando amare problemija (Dikh o 7. odlomko)d
OLENĐE VALJANENA AMARE MOLITVE
8. Kase šaj te molina amen?
8 Kase šaj te molina amen? Šaj te molina amen asi bari grupa ando phralja hem phenja. Na primer, okolenđe kola isi len problemi sastipaja, e ternenđe kolenđe marena muj ki škola ja tane ki kušnja te ćeren diso soj tano pogrešno hem okolenđe kola isi len disavo pharipe sebepi o phuripe. But phralja hem phenja isi len protivljenje andi porodica ja ando vlastija (Mat. 10:18, 36; Dela 12:5). Disave morandilje te mukhen pe ćhera sebepi o politička nemirija, a disave doživinđe prirodna katastrofe. Amen šaj na penđaraja odole phralen hem phenjen. Ama, ked molinaja amen olenđe, amen mothovaja so ićeraja amen ki Isusesi zapovest: „Mangen jekh jekhe“ (Jov. 13:34).
9. Sose valjani te molina amen e phralenđe kola predvodinena ki organizacija hem olenge romnjenđe?
9 Isto ađahar, šaj te molina amen hem e phralenđe kola predvodinena ki Jehovasi organizacija. A odola tane o phralja ko Vodeće telo, olenge pomoćnikija, o phralja kotar Odbor andi podružnica, o nadglednikija ko Betel, o pokrajinska nadglednikija, o starešine hem o sluge pomoćnikija. But olendar isi len pe pharipa, ama on trudinena pe te pomožinen amen (2. Kor. 12:15). Na primer, jekh pokrajinsko nadgledniko, kova vićini pe Mark, phenela: „But maje pharo so hijum dur ando me roditeljija kola tane phure. On isi len problemija e sastipaja. Iako mi phen hem olako rom brininena pe olendar, maje tano but pharo so me na hijum othe te pomožinav len pobuter.“ Bizo obzir da li hijam svesna kola pharipa isi len o phralja kola predvodinena, amen valjani te molina amen olenđe (1. Sol. 5:12, 13). Isto ađahar, šaj te molina amen hem olenge romnjenđe sose podržinena len ko olenge zadatkija.
10-11. Da li tane e Jehovase ugodna amare molitve iako na molinaja amen nekase konkretno? Objasnin.
10 Sar so dikhljam đi akana, amen često molinaja amen asi bari grupa ando phralja hem phenja. Na primer, čak iako na razmislinaja nekastar konkretno, šaj te molina amen o Jehova te pomožini okolen soj tane ko phanlipe ja te utešini okolen kola našalđe nekas kas but manglje. Jekh starešina kova vićini pe Donald, phenela: „Isi amen odobor phralja hem phenja kola isi len pharipa so disavo puti molinaja amen sarinenđe.“
11 Da li tane asavke molitve ugodna e Jehovase? Naravno! Amen na đanaja so valjani svakone phralese ja phenjaće. Odolese tano šukar te molina amen sarinenđe (Jov. 17:20; Ef. 6:18). Asavke molitve tane dokaz so mangaja „sa e phralen“ (1. Petr. 2:17).
KED MOLINEJA TUT AVERENĐE
12. Sar odova so ka primetina averenge problemija ka pomožini amen te ova konkretna ko amare molitve?
12 Primetin averenge problemija. Uzo odova so ka moline tut sarinenđe, šukar tano hem te pomine nekas ko anav. Na primer, da li neko ki ti skupština tano ozbiljno nabormo? Da li disave ternja osobaće tano pharo odolese so isi la pritisak ki škola? Da li neko kokri barjaćeri pe ćhaven hem pharo lese te vaspitini len hem te usmerini len „premali Jehovasi volja“? (Ef. 6:4). Ako primetineja sovaja avera borinena pe, to mangipe premalo lende ka ovel pana pobaro hem ka ovel tut pana pobaro saosećanje so ka podstaknini tut te moline tut olenđe (Rimlj. 12:15).b
13. Sar šaj te molina amen okolenđe kolen na penđaraja?
13 Molin tut averenđe ko anav. Odova šaj te ćera čak hem ako na penđaraja len. Na primer, razmislin ando amare phralja hem phenja kola tane ko phanlipe ko Krim, ki Eritreja, ki Rusija hem ko Singapur. Ko amaro sajt jw.org, šaj te arakha olenge anava.c Jekh pokrajinsko nadgledniko, kova vićini pe Brajan, phenela: „Ked ko jekh lil pisinava o anava ando amare phralja hem phenja kola tane ko phanlipe, tegani maje polokho te setinav man upro lende hem te pominav len ki molitva.“
14-15. So valjani te ćera te šaj te ova konkretna ko amare molitve?
14 Ov konkretno. O Majkl, kole angleder pominđam, phenela: „Ked ko amaro sajt čitinava ando phralja kola tane ko phanlipe, zamislinava sar bi maje ovela te ovav ko olengo than. Đanava so bi brininava man andi mi romni hem so bi mangava te ovel la sa so valjani laće. Odova pomožini maje te đanav aso so konkretno te molinav man e ženime phralenđe kola tane ko phanlipe“ (Jevr. 13:3, fusn.).
15 Ako trudinaja amen te zamislina sar tano amare phralenđe hem phenjenđe ko zatvor, odova ka pomožini amen te đana aso so pana te molina amen olenđe. Na primer, šaj te molina amen o čuvarija te oven ljubazna premalo lende ja o manuša kola isi len disavo autoritet te mukhen len te ovel len Biblija hem slobodno te propovedinen (1. Tim. 2:1, 2). Isto ađahar, šaj te molina amen e phralenđe hem e phenjenđe andi olengi skupština te oven ohrabrime olenge primereja ja o manuša kola nane Svedokija te dikhen olengo šukar ponašanje hem te šunen i šukar vest (1. Petr. 2:12). Šaj te ćera diso slično hem ked molinaja amen aso phralja hem phenja kola isi len avera pharipa. Ako primetinaja save problemija isi len amare phralja, pominaja len ko anav ki molitva hem molinaja amen aso diso konkretno odoleja ka mothova so mangaja jekh jekhe (1. Sol. 3:12).
OV SKROMNO ĐI MOLINEJA TUT
16. Sar šaj te ova skromna ko amare molitve? (Matej 6:8)
16 Sar so dikhljam, amare molitve šaj te utičinen ko odova te menini pe nekasi situacija. Ama, ipak valjani te ova skromna. Ked molinaja amen, na phenaja ništa nevo so o Jehova već na đanela niti valjani te phena lese sar valjani te rešini disavi situacija. Ov đanela so valjani olese slugenđe angleder te oven svesna ando odova. (Čitin Matej 6:8.) Tegani, sose valjani te molina amen averenđe? Uzo sa o razlogija kola dikhljam ko akava članko, odova tano diso so ćerena o manuša kola brininena pe averendar. O mangipe podstaknini amen te molina amen jekh jekhese. O Jehova tano but bahtalo ked dikhela so olese sluge mothovena mangipe sar oleste.
17-18. Vaćer jekh primer kova mothovi sar o Jehova osetini pe ked molinaja amen amare phralenđe hem phenjenđe?
17 Čak iako na dićhola so amare molitve utičinena ko odova te menini pe nekasi situacija, on mothovena kobor mangaja amare phralen hem phenjen. A o Jehova baš ko odova obratini pažnja. Aće jekh primer. Zamislin jekha porodica koja isi la duj ćhave, jekh ćhaj hem jekh ćhavo. O ćhavo tano but nabormo. I ćhaj molini pe dade: „Molinava tut, pomožin me phralese. Ov tano but nabormo.“ O dad već đanela so valjani te ćerel, ov but mangela pe ćhave hem šukar brinini pe olestar. Ama, šaj samo te zamislina kobor tano bahtalo ked dikhela so olesi ćhaj odobor brinini pe ando po phral hem molini le te pomožini lese.
18 Ko slično način, o Jehova podstaknini amen te brinina amen hem te molina amen jekhe jekhese. Ked ćeraja odova, amen mothovaja so na brininaja amen samo amendar, već hem ando amare phralja, a o Jehova baš ko odova obratini pažnja (2. Sol. 1:3; Jevr. 6:10). Isto ađahar, sar so dikhljam ko akava članko amare molitve šaj te utičinen ko odova te menini pe nekasi situacija. Odolese, hajde te da sa amendar te molina amen jekh jekhese.
ĐILI 101 Te sarađujina ko jekhipe
a Disave anava tane menime.
b Ko amaro sajt dikh o video Takeši Šimizu: Jehova sluša molitve
c O anava ando phralja hem phenja kola tane ko phanlipe šaj te arakhe ko amaro sajt ko članko „Jehovini svedoci zatvoreni zbog svojih verovanja – razne zemlje“.
d SO DIKHAJA KO SLIKE: O phralja hem o phenja molinena pe averenđe iako hem on isi len pe problemija.