O politička nemirija hem o proročanstvo andi Biblija

Ked tani i politika ko pućibe, o manuša isi len različito mišljenje. On na podržinena disave zakonija kola utičinena ko olengo životi hem podijekh puti nasilno mothovena so isi len različito političko mišljenje. Ki vlada, o članija andi skupština hem avera zvaničnikija but putija isi len suprotno mišljenje hem niko na mangela te popustini. Sebepi odova, i vlada našti te ćerel pi buti.

Posebno tane važna o politička nemirija ki Amerika hem ki Britanija (o Ujedinjeno Kraljevstvo). Sose? Odolese so i Biblija mothovi so o politička nemirija ko odola phuvja ka oven ko isto vreme ked e Devleso Kraljevstvo potpuno ka menini i situacija ki phuv.

Politička nemirija „ko poslednja dive“

Ki biblijsko knjiga Danilo isi jekh zanimljivo proročanstvo. Ko odova proročanstvo, o Devel mothovđa „so ka ovel ko poslednja dive.“ Odova proročanstvo kova o Danilo pisinđa odnosinđa pe ki budućnost ked ka oven bare promene ki phuv (Danilo 2:28).

O Devel dinđa e vavilonsko kraljese te dikhel ko suno odova biblijako proročanstvo. Ov dikhlja jekh baro kip kova hine ćerdo ando različita metalija. Kasnije, o prorok Danilo objasninđa so odova kip predstavini različita svetska sile kola jekh vreme ka vladinen, a palo odova ka peren.a Ko krajo, o kip ka ovel uništimo ked ka khuvel le jekh bar, kova predstavini e Devleso Kraljevstvo (Danilo 2:36-45).

Premalo odova proročanstvo, e Devleso Kraljevstvo ka cidel sa o manušikane vlastija. Kotar isto odova Kraljevstvo o Isus vaćerđa ked sikavđa pe učenikonen te molinen pe ađahar: „Nek avel to Kraljevstvo“ (Matej 6:10).

Ama kaj ko proročanstvo dićhola so ka oven politička nemirija? Zapazin so o stopala ando kip „hine mešime sastroneja hem glinaja“ (Danilo 2:33). Avera delovija ando kip hine ćerde samo kotar jekh metali. Ama odova so o stopala hine mešime, mothovi so jekh svetsko sila ka ovel averćhane. Sar? E Daniloso proročanstvo objasnini:

Premalo akava proročanstvo, ki akija svetsko sila koja tani predstavimi stopalencar, ka oven bare politička nemirija. Oj na ka aćhol zorali sebepi o manuša upro kola vladini.

E Daniloso proročanstvo ispunini pe ko amaro vreme

O stopala ando kip predstavinena e najmoćno svetsko sila ko amaro vreme, a odija tani i Anglo-Amerika, ja i Amerika hem i Britanija. Sar o avdisutne događaija mothovena so odova tano tačno?

O stopala ando kip tane „mešime sastroneja hem glinaja“, a odija kombinacija ćerela o stopala te oven slaba (Danilo 2:42). Avdije, hem i Amerika hem i Britanija tane slaba sebepi o podele maškaro manuša. Ko solduj phuvja, o manuša nasilno protestujinena hem borinena pe aso pe pravija. Okola kas o manuša birinđe te aven ki vlast, but putija nane len zajedničko rešenje aso disave problemija. Sebepi so o manuša tane odobor podelime, o solduj phuvja našti te ićeren pe ki pi politika hem te ćeren okova so odlučinđe.

Te dikha pana disave detaljija ando Daniloso proročanstvo hem sar on ispuninena pe:

Proročanstvo: „Odova kraljevstvo ka ovel podelimo, ama jekh deo ka ovel zoralo sar sastron“ (Danilo 2:41).

So značini: Iako ki Amerika hem ki Britanija isi podele sebepi razna buća, o solduj phuvja isi len zorali hem bari vojska. Sebepi odova, o odluke kola on anena utičinena ko celo sveto hem odolese šaj te phenel pe so odova kraljevstvo ja svetsko sila tani sar sastron.

Sar ispunini pe?

Ko 2023. berš, i Amerika hem i Velika Britanija trošinđe ki vojska hem ko oružje pobuter ando 12 phuvja kola tane ki lista (Stokholmsko međunarodno institut aso mirovna istraživanja).

„Britansko-američko saradnja ki odbrana... tano najzoralo partnerstvo kova šaj te ovel maškaro duj phuvja. Koristinaja najneve ideje hem najnevi tehnologija... Sa ćeraja zajedno hem borinaja amen zajedno“ (Strateško komanda kotar ministarstvo andi odbrana ando Ujedinjeno Kraljevstvo, april 2024).

Proročanstvo: „Odova so o naja ka oven jekh deo ando sastron hem jekh deo andi glina značini so odova kraljevstvo ko isto vreme ka ovel hem zoralo hem slabo“ (Danilo 2:42).

So značini: Iako i Amerika hem i Britanija isi len zorali vojska, on našti te ćeren sa so mangena sebepi olengi politika. Ked nane len podrška ando manuša, on našti te ispuninen pe planija.

Sar ispunini pe?

„Disave stručnjakija asi politika phenena so sebepi o podele ki vlada, i Amerika našti te ćerel odova so obećini averenđe“ (The Wall Street Journal).

„Ki Britanija hine but politička nemirija, kola angleder na hine. Sebepi odova, o manuša ki vlada našti te ćeren disave promene te bi pomožinena e manušenđe (Institut asi vlada).

Proročanstvo: „On [odova kraljevstvo ja svetsko sila] ka oven mešime e manušencar, ama na ka ićeren pe zajedno (Danilo 2:43, fusnota).

So značini: O obična manuša phenena po mišljenje, ama ko krajo ni on ni okola soj tane ki vlast nane zadovoljna.

Sar ispunini pe?

„Avdije but Amerikancija tane razočarime ki politika hem nane len šužo mišljenje ando političarija“ (Istraživačko centar Pju).

„O manuša ki Britanija nane len poverenje ki vlast hem ko političarija sar so hine len angleder 50 berš“ (National Centre for Social Research).

Sar e Daniloso proročanstvo ka ispunini pe ki budućnost?

Premalo Daniloso proročanstvo, i Anglo-američko svetsko sila ka vladini ko vreme ked e Devleso Kraljevstvo ka cidel sa o manušikane vlastija (Danilo 2:44).

Ko proročanstvo kova pisini ko Otkrivenje, a kova vaćeri kotar isto odova vreme, dikhaja so o „kraljija ando celo sveto“ ka ćeden pe protiv o Jehova.b Odova maribe vićini pe Armagedon hem „ka ovel ko baro dive ando Svemoćno Devel“ (Otkrivenje 16:14, 16; 19:19-21). Ko akava maribe, o Jehova ka uništini sa o manušikane vlastija hem palo odova na ka postojini više nijekh svetsko sila koja tani predstavimi kipeja ando Daniloso proročanstvo.

Ako mangeja te đane diso pobuter, čitin o članko „Soj tano o Armagedon?“

Sar e Daniloso proročanstvo utičini ko amaro životi?

I Biblija tačno mothovi so ki Amerika hem ki Britanija ka oven politička nemirija. Odova so sikljoveja andi Biblija šaj te pomožini tuće averćhane te dikhe ko buća kola desinena pe.

• Ka haljove sose o Isus na mangela olese učenikija te mešinen pe ki politika (Jovan 17:16). Isto ađahar ka haljove sose o Isus, kas o Devel ćhivđa te ovel vladari ko oleso Kraljevstvo, phenđa: „Mo Kraljevstvo nane deo kotar akava sveto“ (Jovan 18:36).

• Ka dikhe sose šaj te ove sigurno so pana hari e Devleso Kraljevstvo ka cidel sa e manušenge problemija hem ka del e manušenđe sa odova so o Devel kotar početko manglja (Otkrivenje 21:3, 4).

• Više na ka dara da li amari phuv ka ovel uništimi ja ando odova so ađićeri amen ki budućnost (Psalam 37:11, 29).

E Daniloso proročanstvo mothovi so i Anglo-američko svetsko sila, koja tani ko proročanstvo mothovdi sar stopala, ka ovel poslednjo svetsko sila koja ka vladini upro manuša. Palo odova, upri celo phuv ando nebo ka vladini jekh savršeno vlast – e Devleso Kraljevstvo.

Ako mangeja te đane so odova kraljevstvo ka ćerel e manušenđe, dikh o video Soj tano e Devleso Kraljevstvo?