So značini te ove hrišćanin – so phenela i Biblija odolestar?

But manuša phenena soj tane hrišćanija, ama lošno ponašinena pe. Disave tane sebična, nepoštena, neljubazna, a disave nane verna pe romese ja romnjaće. Sebepi odova, disave manuša pućena pe: „So ćaće značini te ove hrišćanin?“

So ćaće značini te ove hrišćanin?

Lokho tano samo neko te phenel soj tano hrišćanin. Ama, odova nane dovoljno. Premali Biblija, hrišćanin tano neko koj tano učeniko ando Isus Hrist (Dela apostolska 11:26). Kokri o Isus phenđa: „Ako ka ićeren tumen ko me sikljoviba, ćaće hijen me učenikija“ (Jovan 8:31). Naravno, niko našti savršeno te ićeri pe ko Isusese sikljoviba. Ama, jekh hrišćanin dela sa pestar te ićeri pe ko olese sikljoviba hem te živini premalo odova. Aće, disave primerija.

O prava hrišćanija mothovena mangipe

So o Isus phenđa: „Dava tumen nevi zapovest: Mangen jekh jekhe. Sar so me mangljum tumen, ađahar hem tumen mangen jekh jekhe. Premalo odova sare ka đanen so hijen me učenikija, ako mangena jekh jekhe“ (Jovan 13:34, 35).

So o Isus ćerđa: O Isus mothovđa mangipe sa e manušenđe, bizo obzir koj tane, kotar avena ja da li tane barvale ja ćorore. Ov saćarđa e nabormen, parvarđa e bokhalen hem čak dinđa po životi e manušenđe (Matej 14:14-21; 20:28).

Save tane o prava hrišćanija: O prava hrišćanija mothovena mangipe ađahar soj tane phravde vastese, na ćerena razlika maškaro manuša hem spremno oprostinena averenđe. On pomožinena e manušenđe ked valjani hem spremna tane te ćeren disave žrtve te bi pomožinena averenđe (1. Jovanova 3:16).

O prava hrišćanija tane poštena

So o Isus phenđa: „Me hijum [...] o ćaćipe“ (Jovan 14:6).

So o Isus ćerđa: O Isus uvek vaćerđa o ćaćipe hem uvek hine pošteno. Ov niked na manglja te ćhivel e manušen te ćeren diso so na mangena ja te verujinen ko disavo hovajbe. Ov hine penđardo premalo po poštenje hem asavko hine čak hem ked hine le problemija sebepi odova (Matej 22:16; 26:63-67).

Save tane o prava hrišćanija: O prava hrišćanija na hovavena. On platinena pe računija, na ćorena hem penđarde tane sar poštena hem savesna radnikija (Rimljanima 13:5-7; Efešanima 4:28). On na prevarinena averen, na prepisinena ko testija, niti dena hovavne informacije ked pherena disave dokumentija (Jevrejima 13:18).

O prava hrišćanija mothovena šukaripe averenđe

So o Isus phenđa: „Aven koro mande sare kola hijen umorna hem opteretime, hem me ka zorjaćerav tumen. Len mo jaram upro tumende hem sikljoven mandar, sose me hijum blago hem ponizno ko vilo, hem ka ovel tumen nevi snaga. Sose mo jaram tano lokho hem mo pharipe šaj lokho te akharen“ (Matej 11:28-30).

So o Isus ćerđa: O Isus hine ljubazno hem svako manuš osetinđa pe prijatno uzo leste. O ćhave hine slobodna te aven koro leste hem ov mothovđa so mangela len, utešinđa okolen so hine ko pharipa hem mothovđa poštovanje e manušenđe (Marko 10:13-15; Luka 9:11).

Save tane o prava hrišćanija: O prava hrišćanija tane ljubazna hem šukar. On nane nekulturna, gruba hem na vređinena averen (Efešanima 4:29, 31, 32). On brininena pe averendar hem rodena prilike te pomožinen averenđe (Galatima 6:10).

O prava hrišćanija tane verna pe romese ja pe romnjaće

So o Isus phenđa: „So o Devel sastavinđa, o manuš te na ulavi“ (Marko 10:9).

So o Isus ćerđa: Iako o Isus na hine ko brako, ov phenđa so o murša hem o đuvlja valjani te oven verna jekh jekhese (Matej 19:9). Ov upozorinđa len ko buća kola šaj te legaren đi i preljuba hem đi odova te rumini pe jekh brako (Matej 5:28).

Save tane o prava hrišćanija: O prava hrišćanija trudinena pe te na ćeren diso sova ka mothoven so na poštujinena po brako (Jevrejima 13:4). Okola soj tane ko brako mothovena mangipe hem poštovanje jekh jekhese (Efešanima 5:28, 33).