O maribe ko Blisko istok – so phenela i Biblija?

O manuša but brininena pe sebepi o sukob maškari Amerika, o Izrael hem o Iran. Da li i situacija ko sveto ka ovel pana pološno hem da li avera phuvja ka khuven ko odova sukob? Šaj li o vlastija te ćhinaven o mariba hem te anen mir ki phuv?

O manuša kolenđe tane penđarutne disave proročanstvija andi Biblija šaj pućena pe da li o maribe ko Blisko istok tano početak ando Armagedon kova pomini pe ki knjiga Otkrivenje.

Ama, so i Biblija phenela odolestar?

Da li o manušikane vlastija ka ćhinaven o maribe ko Blisko istok?

Ki Biblija pisini: „Ma uzdajinen tumen upro moćna manuša, niti ko bilo kova manuš, sose ov našti te anel tumenđe o spasenje“ (Psalam 146:3).

Amen na đanaja da li o manušikane vlastija ka uspinen te anen disavo mir ko Blisko istok. Ipak, i Biblija phenela so nijekh vladari, nijekh manušikani vlast hem nijekh manušikani organizacija našti te ćhinavi o mariba niti te anel trajno mir ki phuv. Jedino o Devel šaj te „ćhinavi o mariba ki celo phuv“ (Psalam 46:9).

• Ako mangeja te đane pobuter, čitin i Stražarsko kula e temaja „Ko ka ćhinavi o mariba?“

Da li o maribe ko Blisko istok mothovi so ispuninena pe e biblijake proročanstvija?

Ki Biblija pisini: „Ka šunen aso mariba hem vestija ando mariba. […] Ka uštel o narodo upro narodo hem o kraljevstvo upro kraljevstvo“ (Matej 24:6, 7).

O sukob ko Blisko istok mothovi so ćaće živinaja ko „krajo kotar akava sveto“ odnosno „ko poslednja dive“ (Matej 24:3; 2. Timoteju 3:1). O mariba kola avdije dikhaja mothovena so o Devel pana hari ka ćhinavi sa o mariba hem so ka cidel sa odova so anela patnja e manušenđe.

• Ako mangeja te đane pobuter, čitin o članko „Šta je znak ’poslednjih dana‘ ili ’vremena kraja‘?“

Da li o Armagedon ka počmini ko Blisko istok?

Ki Biblija pisini: „Odola nadahnuta objave ćedinđe len ko than kova ki hebrejsko ćhib vićini pe Armagedon“ (Otkrivenje 16:16).

O Armagedon nane maribe maškaro manušikane vlastija kova počmini ko Blisko istok. Odova tano maribe maškaro Devel hem sa o manušikane vlastija.

• Ako mangeja te đane pobuter, čitin o članko „Soj tano o Armagedon?“

So šaj te pomožini amenđe te na brinina amen but?

Ki Biblija pisini: „Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese hem zahvalinen tumen olese“ (Filipljanima 4:6).

O Jehovaa o Devel podstaknini amen te molina amen olese. Odolese so o Devel brinini pe amendar, ov ka šunel amare molitve hem ka pomožini amen te ikljova ko krajo odoleja so brinini amen (1. Petrova 5:7). Ov na samo so pomožini amenđe te haljova sose avdije o mariba ovena, već hem objasnini amenđe sar ka ćhinavi o mariba hem sar ka cidel sa i patnja hem i dukh (Otkrivenje 21:3, 4).

• Ako mangeja te đane pobuter sar o Devel pomožini amen, čitin o članko „Mogu li pronaći utehu u Svetom pismu?”