Soj tano greh?

So phenela i Biblija?

O greh tano svako postupak, osećanje ja misao koja nane premalo Devlese merilija. Odova značini so neko ćerela odova soj tano lošno anglo Devlese jaćha hem odoleja na ićeri pe ko Devleso zakon (1. Jovanova 3:4; 5:17). Isto ađahar, i Biblija phenela soj tano greh ked na ćeraja odova so đanaja soj tano ispravno (Jakovljeva 4:17).

Ko ćhibja ko kola hine pisimi i Biblija, o lafi kova prevodini pe sar greh značini „te promašini pe o cilj“. Na primer, jekh grupa ando vojnikija ko purano Izrael odobor hine vešta ked gađinđe e praćkaja so uvek tačno pogodinđe o cilj. Ked bi odova izraz doslovno prevodinaja ov bi značini so „na ćerđe greh“ (Sudije 20:16). Odolese, te ćere greh značini te promašine o cilj ja te na ićere tut ko Devlese savršena merilija.

Sar Stvoritelj, o Devel isi le pravo te odredini soj tano lošno, a soj tano šukar (Otkrivenje 4:11). Anglo leste hijam odgovorna aso odova so ćeraja (Rimljanima 14:12).

Da li tano moguće niked te na grešina?

Na. I Biblija phenela so „sare grešinđe hem na mothovena e Devlesi slava“ (Rimljanima 3:23; 1. Kraljevima 8:46; Propovednik 7:20; 1. Jovanova 1:8). Sose tano odova ađahar?

Ko početko, o prva manuša, o Adam hem i Eva hine bizo greh. On hine stvorime sar savršena manuša, premali Devlesi slika (Postanak 1:27). Sebepi so na šunđe e Devle, on našalđe po savršenstvo (Postanak 3:5, 6, 17-19). Palo odova, ked hine len ćhave, on prenosinđe o greh hem i nesavršenost upro lende (Rimljanima 5:12). Sar so phenđa o kralj David: „Sar bijandiljum krivo hijum aso greh“ (Psalam 51:5).

Da li tane disave grehija poozbiljna ando avera?

Ja. Na primer, i Biblija phenela so o manuša ko Sodom hine „but lošna“ hem so olenge grehija hine „but bare“ (Postanak 13:13; 18:20). Te dikha trin buća kola mothovena kobor tano ozbiljno nekaso greh.

1. Kobor tano baro odova greh? I Biblija upozorini amen te naša ando ozbiljna grehija sar soj tane o nemoral, idolopoklonstvo, ćoribe, maćovibe, mudaribe hem spiritizam (1. Korinćanima 6:9-11; Otkrivenje 21:8). I Biblija ćerela razlika maškaro akala grehija hem o grehija kola ćeraja nenamerno. Na primer, odoleja so ćeraja hem so vaćeraja šaj te povredina averen (Poslovice 12:18; Efešanima 4:31, 32). Ama, e Devleso Lafi podstaknini amen te na tiknjaćera amare greške sose on šaj te legaren amen đi o poozbiljna grehija (Matej 5:27, 28).

2. Sose tano ćerdo? Neko ćerela greh sose na đanela so o Devel rodela olestar (Dela apostolska 17:30; 1. Timoteju 1:13). Iako i Biblija na opravdini asavke grehija, oj ćerela razlika maškaro lende hem o grehija kola neko namerno ćerela (Brojevi 15:30, 31). O namerna grehija avena ando „lošno vilo“ (Jeremija 16:12).

3. Kobor putija tano ćerdo? I Biblija ćerela razlika maškaro odova ked neko samo jekh puti ćerđa disavo greh hem ked neko ćerela greh jekh pobaro period (1. Jovanova 3:4-8). Okola so namerno ćerena greh, iako đanena soj tano ispravno, ka oven osudime ando Devel (Jevrejima 10:26, 27).

Okola so ćerđe disavo ozbiljno greh šaj te ovel len but baro osećaj andi krivica. Na primer, o kralj David pisinđa: „Me grehija ćedisalje ko mo šero sar jekh baro pharipe, but tane manđe phare“ (Psalam 38:4). Ama, e Devleso Lafi dela amen uteha: „Nek o lošno manuš aćhavi po drumo hem pe mislija. Nek irini pe e Jehovase, amare Devlese, kova ka smilujini pe olese, sose ov spremno ka oprostini lese“ (Isaija 55:7).