Sreda, 6. avgust
O drumo ando pravednikija tano sar i svetlost koja avela sabale, koja svetlini sa pobuter đi na phravđola o dive (Posl. 4:18)
Ko poslednja dive, e Jehovasi organizacija dela amen duhovno hrana koja pomožini amen te aćhova ko „Drumo andi svetost“ (Is. 35:8; 48:17; 60:17). Šaj te phena so svako ko počmini te proučini i Biblija isi le prilika te đal ko „Drumo andi svetost“. Disave manuša kratko đana ko odova drumo hem palo odova mukhena le. A disave tane odlučna te đan ko odova drumo sa đi na resena ko po cilj. Ama, kova tano olengo cilj? Okolen so isi len nebesko nada, o „Drumo andi svetost“ legari ko „Devleso raj“ kova tano ko nebo (Otkr. 2:7). A okolen so isi len nada so ka živinen ki phuv, odova drumo legari đi i savršenost koja ka dobinen ko krajo andi Hiljadaberšengi vladavina. Ako tu avdije đaja ko odova drumo, ma irin tut palal, ma mukh odova drumo sa đi na reseja ko nevo sveto! (w23.05 17 ¶15; 19 ¶16-18).
Četvrtak, 7. avgust
Amen mangaja, sose ov prvo manglja amen (1. Jov. 4:19)
Ked ka razmisline so sa o Jehova ćerđa tuće, tu ka osetine bari zahvalnost hem ka ovel tut bari želja te predajine to životi olese (Ps. 116:12-14). Ki Biblija pisini so „svako šukar hem savršeno poklon“ avela ando Jehova (Jak. 1:17). Jekh ando najbare poklonija tani i žrtva ando oleso Ćhavo, o Isus Hrist. Zamislin samo kobor tano šukar odova poklon. Sebepi i otkupnina, šaj te ove paše e Jehovaja hem šaj te ovel tut večno životi (1. Jov. 4:9, 10). To predanje e Jehovase tano najšukar način te mothove kobor hijan zahvalno aso najbaro mangipe kova mothovđa tuće hem aso sa avera buća kola dinđa tut (Pon. zak. 16:17; 2. Kor. 5:15; w24.03 5 ¶8).
Petak, 8. avgust
Okova kova ćerela odova soj tano ispravno, darala ando Jehova (Posl. 14:2)
Ked dikhaja kobor baro nemoral isi avdije, osetinaja amen isto sar o Lot. Ov „patinđa sebepi o lošna manuša kola ćerđe grešna postupkija bizi lađ“, odolese so đanđa so asavke buća o Devel but mrzini (2. Petr. 2:7, 8). Odolese so hine le strahopoštovanje hem mangipe premalo Devel, o Lot mrzinđa o lošna buća kola ćerđe o manuša ko odova vreme. Avdije, hem amen živinaja maškaro manuša kola hari ili hić na poštujinena e Jehovase moralna merilija. Ama, amen ipak šaj te aćhova čista anglo Jehovase jaćha ađahar so ka barjaćera amaro mangipe hem strahopoštovanje premalo leste (Posl. 14:2). O Jehova pomožini amen te ćera odova ađahar so ohrabrini amen prekali knjiga Poslovice. Sarinenđe šaj te pomožinen o savetija kola arakhaja ki odija knjiga. Ako isi amen strahopoštovanje premalo Jehova, amen na ka opravdina o lošna buća kola ćeraja (w23.06 20 ¶1-2; 21 ¶5).