Avgust

Ko akava stih šaj te dikha duj važna buća. Sar prvo, o pravedna manuša isi len pharipa. Sar dujto, o Jehova ikali amen ando odola pharipa. Sar ćerela odova? Jekh način tano ađahar so pomožini amen te dikha realno ko buća kola desinena pe amenđe. O Jehova phenela so ka uživina đi služinaja lese, ama ov na phenela so akana na ka oven amen problemija (Is. 66:14). Ov podstaknini amen te razmislina andi budućnost ked ka uživina ko životi ađahar sar so ov mangela (2. Kor. 4:16-18). A đi odova vreme na avela, ov pomožini amen te aćhova lese verna svako dive (Tužb. 3:22-24). So šaj te sikljova ando Jehovase sluge kotar purano vreme hem kotar amaro vreme? Amen šaj te oven amen disave neočekivana problemija. Ama, ako uzdajina amen ko Jehova, ov uvek ka pomožini amen (Ps. 55:22; w23.04 14-15 ¶3-4).

Amen šaj but te sikljova ando Josif hem andi Marija. On hine spremna te ćeren odova so o vlastija rodinđe olendar, iako na hine lenđe lokho (Luka 2:1-6). I Marija hine ko enjato masek ked oj hem o Josif morandilje te mothoven pi poslušnost okolenđe soj tane ki vlast. O car Avgust anđa jekh zakon premalo kova sare valjanđe te đan ko popis ko than kuri bijandilje. O Josif hem i Marija morandilje te đan ko Vitlejem kova hine 150 kilometrija dur olendar. Odova drumo na hine hić lokho, naročito e Marijaće. On brininđe pe ando Marijako sastipe hem andi beba. Sigurno pućlje pe so ako i Marija ka bijani đi tane ko drumo. Đanaja so oj ko po vođi akharđa e Mesija. O Josif hem i Marija hine len razlogija te brininen pe, ama ipak šunđe o zakon. O Jehova blagoslovinđa olengi poslušnost. I Marija reslja bezbedno ko Vitlejem, bijanđa jekha saste beba hem čak pomožinđa te ispunini pe jekh biblijako proročanstvo (Mih. 5:2; w23.10 8 ¶9; 9 ¶11-12).

So šaj te ćere ako isi tut but bari trema te de komentari? But šaj te pomožini tut ako ka pripreminen tut šukar (Posl. 21:5). Ako šukar đaneja o materijali, ka ovel tuće polokho te komentarišine. Isto ađahar, te komentarija valjani te oven kratka (Posl. 15:23; 17:27). Ako tane te komentarija kratka, ka ovel tut pohari trema. Ako deja jekh tikno komentari hem vaćereja te lafencar, odova ka mothovi so šukar spreminđan tut hem šukar haljoveja odova sostar vaćeri pe ko materijali. So ako probinđan diso ando akala predlogija, ama našti te de pobuter ando jekh ja duj komentarija? Ov sigurno so o Jehova cenini to trud (Luka 21:1-4). Ov na rodela te ćere pobuter ando odova so šaj (Fil. 4:5). Dikh so šaj te ćere, ćhiv tuće cilj hem molin tut e Jehovase te pomožini tut te na ovel tut trema. Ki početka, to cilj šaj te ovel te de samo jekh kratko komentari (w23.04 21 ¶6-8).

O apostol Pavle uporedini amen e vojnikoja kova tano spremno hem uravdo aso maribe. Kotar vojniko uvek ađićeri pe te ovel spremno aso maribe. Slično tano hem amencar. Amen hijam spremna aso Jehovaso dive ađahar so akharaja o oklop andi vera hem ando mangipe hem i kaciga andi nada. Sar so o oklop štitini e vojnikoso vilo ađahar i vera hem o mangipe štitinena amaro simbolično vilo. Odola osobine ka pomožinen amen hem ponodri te služina e Jehovase hem te sledina e Isuse. Sebepi i vera, amen hijam sigurna so o Jehova ka nagradini amen sose rodaja le celone vileja (Jevr. 11:6). I vera ka podstaknini amen te aćhova verna e Isusese, čak hem ko pharipa. Odolese, te šaj te zorjaćera amari vera, valjani te sikljova kotar amare phralja sar on istrajinđe ked hine progonime hem ked hine len finansijska problemija. Šaj te cida amen kotar zamka ando materijalizam ađahar so ka oponašina okolen kola pojednostavinđe po životi te šaj te ćhiven o Kraljevstvo ko prvo than (w23.06 10 ¶8-9).

I samokontrola tani sposobnost te kontrolišina amare osećanja hem odova so ćeraja. Ama, i samokontrola šaj te podstaknini amen te ćera odova soj tano šukar, posebno ked isi amen disavo pharo zadatko ja ked nane amen želja te ćera le. Ama ma bistri so i samokontrola tani plod ando duho. Odolese molin tut e Jehovase te pomožini tut te šaj te barjaćere akija osobina (Luka 11:13; Gal. 5:22, 23). Ma ađićer te oven tut savršena okolnostija. Ko akava sveto, našti te očekujina savršena okolnostija. Ako ađićeraja len, šaj niked nane te ispunina amare ciljija. Šaj nane amen želja te ispunina amaro cilj odolese so izgledini amenđe soj tano but pharo. Ako hem tu ađahar osetineja tut, sose ne bi to cilj podelineja ko nekobor tikne ciljija? Na primer, ako isi tut cilj te razvijine disavi osobina, sose ne bi počmineja te mothove la ko disave tikne buća? Ako isi tut cilj te čitine celo Biblija, sose ne bi ki početka odvojineja samo nekobor minutija aso odova? (w23.05 29 ¶11-13).

Ko poslednja dive, e Jehovasi organizacija dela amen duhovno hrana koja pomožini amen te aćhova ko „Drumo andi svetost“ (Is. 35:8; 48:17; 60:17). Šaj te phena so svako ko počmini te proučini i Biblija isi le prilika te đal ko „Drumo andi svetost“. Disave manuša kratko đana ko odova drumo hem palo odova mukhena le. A disave tane odlučna te đan ko odova drumo sa đi na resena ko po cilj. Ama, kova tano olengo cilj? Okolen so isi len nebesko nada, o „Drumo andi svetost“ legari ko „Devleso raj“ kova tano ko nebo (Otkr. 2:7). A okolen so isi len nada so ka živinen ki phuv, odova drumo legari đi i savršenost koja ka dobinen ko krajo andi Hiljadaberšengi vladavina. Ako tu avdije đaja ko odova drumo, ma irin tut palal, ma mukh odova drumo sa đi na reseja ko nevo sveto! (w23.05 17 ¶15; 19 ¶16-18).

Ked ka razmisline so sa o Jehova ćerđa tuće, tu ka osetine bari zahvalnost hem ka ovel tut bari želja te predajine to životi olese (Ps. 116:12-14). Ki Biblija pisini so „svako šukar hem savršeno poklon“ avela ando Jehova (Jak. 1:17). Jekh ando najbare poklonija tani i žrtva ando oleso Ćhavo, o Isus Hrist. Zamislin samo kobor tano šukar odova poklon. Sebepi i otkupnina, šaj te ove paše e Jehovaja hem šaj te ovel tut večno životi (1. Jov. 4:9, 10). To predanje e Jehovase tano najšukar način te mothove kobor hijan zahvalno aso najbaro mangipe kova mothovđa tuće hem aso sa avera buća kola dinđa tut (Pon. zak. 16:17; 2. Kor. 5:15; w24.03 5 ¶8).

Ked dikhaja kobor baro nemoral isi avdije, osetinaja amen isto sar o Lot. Ov „patinđa sebepi o lošna manuša kola ćerđe grešna postupkija bizi lađ“, odolese so đanđa so asavke buća o Devel but mrzini (2. Petr. 2:7, 8). Odolese so hine le strahopoštovanje hem mangipe premalo Devel, o Lot mrzinđa o lošna buća kola ćerđe o manuša ko odova vreme. Avdije, hem amen živinaja maškaro manuša kola hari ili hić na poštujinena e Jehovase moralna merilija. Ama, amen ipak šaj te aćhova čista anglo Jehovase jaćha ađahar so ka barjaćera amaro mangipe hem strahopoštovanje premalo leste (Posl. 14:2). O Jehova pomožini amen te ćera odova ađahar so ohrabrini amen prekali knjiga Poslovice. Sarinenđe šaj te pomožinen o savetija kola arakhaja ki odija knjiga. Ako isi amen strahopoštovanje premalo Jehova, amen na ka opravdina o lošna buća kola ćeraja (w23.06 20 ¶1-2; 21 ¶5).

Šaj ti porodica protivinđa pe tuće ja žrtvujinđan disave materijalna buća te šaj te ćhive o Kraljevstvo ko prvo than (Mat. 6:33). Ako tano ađahar, tegani ov sigurno so o Jehova dikhela sa so ćereja olese (Jevr. 6:10). Verovatno uverinđan tut sar ispuninđe pe akala e Isusese lafija: „Verujinen maje, nane niko ko aćhavđa po ćher, ja pe phralen, ja pe phenjen, ja pe daja, ja pe dade, ja pe ćhaven, ja pe njive sebepi moklo ja sebepi i šukar vest, a akana ko akava vreme, te na dobini 100 puti poviše hem ćhera, hem phralja, hem phenja, hem daja, hem ćhave, hem njive, ama zajedno odoleja hem o progonstvo, a ko vreme so avela večno životi“ (Mar. 10:29, 30). O blagoslovija kola dobinđan sigurno tane pobare andi bilo koja žrtva koja ćerđan (Ps. 37:4; w24.03 9 ¶5).

Ked ki Judeja hine baro bokhalipe, o phralja kotar skupština ki Antiohija ki Sirija „svako kobor šaj hine te del, odlučinđe te bićhalen pomoć e phralenđe kola živinena ki Judeja“ (Dela 11:27-30). Iako o phralja kuri hine baro bokhalipe hine but dur olendar, odova na ćhinavđa e hrišćanen andi Antiohija te pomožinen pe phralenđe (1. Jov 3:17, 18). Avdije šaj te mothova saosećanje ked o phralja doživinena disavi prirodno katastrofa. Odova šaj te ćera ađahar so ka puća amare starešinen sar šaj konkretno te pomožina, ka molina amen e phralenđe hem ka da prilogija. Isto ađahar, amare phralja hem phenja šaj na ka ovel len o osnovna buća. Odolese ka valjani te mothova saosećanje ađahar so ka pomožina len. Tegani amaro Kralj, o Isus Hrist, ked ka avel te sudini e manušenđe, ka vićini amen te nasledina o Kraljevstvo (Mat. 25:34-40; w23.07 4 ¶9-10; 6 ¶12).

O Isus mothovđa soj tano razumno sar po Dad. Ov hine bićhaldo ki phuv te propovedini „e našalde bakrenđe ando izraelsko narodo“. Ama, đi ćerđa odova zadatko hine razumno. Jekh puti, jekh romni koja na hine Izraelka pućlja le te saćari olake ćhaja ani koja hine jekh demoni. O Isus mothovđa soj tano saosećajno ađahar so saćarđa lake ćhaja (Mat. 15:21-28). Te dikha jekh aver primer. Ki početka andi pi služba ki phuv, o Isus phenđa: „Ko odreknini pe mandar [. . .] hem me ka odrekninav man olestar“ (Mat. 10:33). Ama, o Isus na odrekninđa pe ando Petar ked ov odrekninđa pe olestar. O Isus đanđa so e Petarese tano but žao sebepi odova so ćerđa hem soj tano verno manuš. Palo odova so uskrsninđa, o Isus pojavinđa pe e Petarese hem verovatno tegani phenđa lese so oprostinđa lese hem so pana mangela le (Luka 24:33, 34). O Isus hem o Jehova tane razumna. O Jehova očekujini hem amen te ova razumna (w23.07 21 ¶6-7).

Sose šaj te ova sigurna so o Jehova ka ispunini po obećanje ando raj? Sar prvo, o Jehova dela odova obećanje. Ko Otkrivenje pisini: „Okova so bešela ko presto vaćerđa: ’Dikh, sa nevo ćerava.‘ “ Ov isi le mudrost, moć hem želja te ispunini po obećanje. Sar dujto, o Jehova đanela so oleso obećanje sigurno ka ispunini pe. Odolese, ov vaćeri: „Ko akala lafija šaj te verujini pe hem ćaćutne tane [. . .] Ispuninđe pe!“ Sar trito, e Jehova ništa našti te ćhinavi te završini diso so počminđa. Odolese, ov vaćeri: „Me hijum Alfa hem Omega“ (Otkr. 21:6). O Jehova ka mothovi so o Satana tano hovavno hem so našti te ćhinavi le te ispunini po obećanje. Odolese, ked neko phenela tuće: „Akala buća tane but šukar. Ama, me našti te verujinav so odova ćaće ka ovel“, čitin hem objasnin lese o stihija ando Otkrivenje 21:5, 6. Mothov sar o Jehova dinđa amen dokazija so ka ispunini pe obećanja (Is. 65:16; w23.11 7 ¶18-19).

O Jehova dinđa akava obećanje e Avrahamese ked hine le 75 berš, tegani ov pana na hine le ćhave. Da li o Avraham dikhlja sar o Jehova ispuninđa akava obećanje? Palo odova so nakhlja i reka Eufrat, ov ađićerđa 25 berš hem tek tegani bijandilo oleso ćhavo o Isak. Onda, nakhlje 60 berš ked bijandilje olese unukija, o Jakov hem o Isak (Jevr. 6:15). O Avraham na dikhlja so ando olese potomkija ulo baro narodo hem so nasledinđe i Obećimi phuv. Ama, đi hine đivdo ov hine paše e Jehovaja (Jak. 2:23). Ked ka uskrsnini, ov sigurno ka ovel but bahtalo ked ka šunel so sebepi olesi vera hem strpljenje hine blagoslovimo celo narodo ki phuv (Post. 22:18). So sikljovaja ando oleso primer? Šaj akana na dikhaja sar ispuninena pe sa e Jehovase obećanja. Ama, šaj te ova sigurna so ako hijam strpljiva sar o Avraham, o Jehova but ka blagoslovini amen akana, a ko nevo sveto so avela pana pobuter (Mar. 10:29, 30; w23.08 24 ¶14).

Ked hine terno, o Ozija hine ponizno hem sikljilo „te daral ando ćaćutno Devel“. Ov živinđa 68 berš hem ko pobaro deo ko oleso životi o Jehova blagoslovinđa le (2. Let. 26:1-4). Porazinđa bute dušmanen hem šukar zaštitinđa o Jerusalim (2. Let. 26:6-15). Sigurno hine but bahtalo so o Jehova pomožinđa lese te ćerel sa odova (Prop. 3:12, 13). O kralj Ozija obično hine vaćeri averenđe so valjani te ćeren. Šaj sebepi odova mislinđa so šaj te ćerel sa so mangela. Jekh dive odlučinđa te khuvel ko Jehovaso hram hem pokušinđa te tharel o kad ko oltari. Ama, odova našti hine te ćeren o kraljija (2. Let. 26:16-18). Odolese, o prvosveštenik o Azarija pokušinđa te ćhinavi le, ama o Ozija but holjanđa. Nažalost, ov na aćhilo verno e Jehovase hem sebepi odova o Devel kazninđa le ađahar so hine le guba (2. Let. 26:19-21). Kobor averćhane bi ovela oleso životi ked bi aćhola ponizno! (w23.09 10 ¶9-10).

Čak hem palo odova so hine pomazimo, o Petar morandilo te borini pe pekle manencar. Ko 36. berš, o Devel bićhalđa le ko Kornelije kova na hine Jevrejin. Tegani, o Devel pomazinđa e Kornelije pe sveto duhoja, sova mothovđa so na ćerela razlika maškar o manuša hem so okola kola nane Jevreja šaj te oven deo andi hrišćansko skupština (Dela 10:34, 44, 45). Palo odova, o Petar počminđa te hal maro olencar, diso so angleder niked na ćerđa. Ama, disave hrišćanija kola hine Jevreja mislinđe so on hem okola so na hine Jevreja na valjani te han maro zajedno. Ked neko ko ađahar mislinđa bi avela ki Antiohija, o Petar bi ćhinavi te hal maro e phralencar kola na hine Jevreja, sose verovatno darandilo te na povredini e phralen kola hine Jevreja. Ked o Pavle dikhlja so o Petar ćerela, ov ispravinđa le anglo sarinende (Gal. 2:13, 14). Ama, iako ćerđa akija greška, o Petar na odustajinđa (w23.09 22 ¶8).

Valjani te ove iskreno tuvaja hem te dikhe kaj valjani te popravine tut, ama ma obeshrabrin tut. „O Gospod tano šukar“ hem ov ka pomožini tut te popravine tut (1. Petr. 2:3). O Petar uverini amen: „O Devel [. . .] ka završini tumari obuka đi o krajo. Ov ka zorjaćeri tumen, ka pomožini tumenđe te aćhon verna hem ka pomožini tumenđe te na peren“ (1. Petr. 5:10). Jekh puti o Petar mislinđa so nane dostojno te ovel uzo Isus (Luka 5:8). Ama, uzi Jehovasi hem Isusesi pomoć, o Petar istrajinđa hem verno sledinđa e Isuse. Sebepi odova, o Jehova dozvolinđa e Petarese te „khuvel ko večno Kraljevstvo ando amaro Gospod hem Spasitelj o Isus Hrist“ (2. Petr. 1:11). Odija hine ćaće jekh but šuži nagrada! Ako hem tu sar o Petar istrajineja hem dozvolineja e Jehovase te obučini tut hem tu ka dobine o večno životi. Sebepi ti „vera ka ove spasimo“ (1. Petr. 1:9; w23.09 31 ¶16-17).

Ko sveto šatori hine jekh ogradimo dvorište kuri o sveštenikija šaj hine te ćeren pi buti. Ko odova dvorište, hine jekh baro bakarno oltari aso žrtve paljenice hem jekh umivaoniko ando bakar ko kova hine pani. Odole panjeja o sveštenikija šaj hine te thoven pe vasta hem pe pre angleder te ćeren pi sveto služba (Izl. 30:17-20; 40:6-8). Avdije, o pomazanikija verno služinena e Jehovase ki phuv ko unutrašnjo dvorište ando duhovno hram. O baro umivaoniko e panjeja, kova hine ko sveto šatori hem kasnije ko hram, setinćeri e pomazanikonen hem amen so valjani te aćhova moralno hem duhovno čista. Ama, kuri o „baro mnoštvo“ služini e Jehovase? O apostol Jovan ki vizija dikhlja sar on „terdilje anglo presto [. . .] hem sar služinena [e Devlese] dive hem rat“. O „baro mnoštvo“ odova ćerela akate ki phuv ko spoljašnjo dvorište ando duhovno hram (Otkr. 7:9, 13-15). Amen hijam but zahvalna e Jehovase so dinđa amen prilika te služina lese ko oleso duhovno hram (w23.10 28 ¶15-16).

Jekh način sar o Jehova zorjaćeri amen tano prekalo starešine (Is. 32:1, 2). Odolese, ked hijan but zabrinuto, vaćer lenđe sar osetineja tut. Ako nudinena tuće pomoć, prihvatin odova olendar. Prekalo lende, o Jehova šaj te zorjaćeri tut. O obećanja kola isi amen ko Devleso Lafi šaj te den amen nada hem snaga bilo te ovel amen nada so ka živina ko nebo ja ki phuv (Rimlj. 4:3, 18, 19). Sebepi odija nada, amen šaj te istrajina ked isi amen kušnje, te propovedina i šukar vest hem te ćera amare zadatkija ki skupština (1. Sol. 1:3). Odija isto nada zorjaćerđa hem e Pavle. Podijekh puti hine ki „neizvesnost“, hine „progonimo“ hem o problemija „peravđe“ le. Čak oleso životi hine ki opasnost (2. Kor. 4:8-10). O Pavle hor razmislinđa andi pi nada hem odova dinđa le snaga te istrajini (2. Kor. 4:16-18). I nebesko nada odobor hine lese važno so hine spremno te istrajini ko bilo kova pharipe te šaj te dobini pi nagrada. Odolese so hor razmislinđa andi pi nebesko nada, ov šaj hine te „obnovini pe ando dive ko dive“ (w23.10 15-16 ¶14-17).

Ked molineja tut, razmislin da li tano akana pravo vreme o Jehova te odgovorini ki ti molitva? Amen šaj mislinaja so o Jehova valjani odmah te odgovorini ko amare molitve. Ama, ov đanela ked tano pravo vreme te pomožini amen (Jevr. 4:16). Ked na dobinaja odmah o odgovor ko amare molitve, šaj te mislina so e Jehovaso odgovor tano: „Na“. Ama, oleso odgovor šaj te ovel: „Na pana“. Na primer, jekh phral molini e Jehova te saćari le. Ama nisar nane pošukar. Ako bi o Jehova saćari le, ađahar so bi ćerela disavo čudo, o Satana bi phenela so odova phral služini e Jehovase samo odolese so saćarđa le (Jov 1:9-11; 2:4). Ama, o Jehova već odredinđa o vreme ked ka cidel sa o nabormipa (Is. 33:24; Otkr. 21:3, 4). Đi tegani, amen našti te ađićera kotar Jehova te ćerel disavo čudo. Odolese, odova phral šaj te molini e Jehova te del le snaga hem mir te šaj te istrajini ko po nabormipe hem ponodri verno te služini lese (w23.11 24 ¶13).

O Samson ćerđa ozbiljno greška, ama na odustajinđa. Ov rodinđa prilika te ispunini po zadatko, te borini pe protiv o Filistejcija (Sud. 16:28-30). Ov molinđa e Jehova: „Mukh man te osvetinav man e Filistejenđe.“ O Jehova odgovorinđa ki olesi molitva hem dinđa le but bari snaga. Sebepi odova, o Samson mudarđa pobuter Filistejcen tegani nego iked angleder. Iako o Samson hine le bare posledice sebepi pi greška, ov na ćhinavđa te ćerel e Jehovasi volja. Čak iako sebepi disavi greška dobinaja ozbiljno savet ja našalaja amare odgovornostija, amen na valjani te odustajina. Ma bistri so o Jehova tano spremno te oprostini amenđe (Ps. 103:8-10). Iako ćerđam disavi greška, pana šaj te ova korisna e Jehovase sar so hine o Samson (w23.09 6 ¶15-16).

Ked hijam istrajna, o Jehova tano zadovoljno amencar. Odova na značini so e Jehovase tano drago ked isi amen problemija već tano bahtalo ked aćhovaja lese verna. But tano ohrabrujuće te đana so amari istrajnost radujini e Jehova (Ps. 5:12). Setin tut ki Avrahamesi istrajnost hem so o Jehova hine zadovoljno oleja. O Jehova phenđa lese soj tano oleso amal hem dikhlja le sar pravedno (Post. 15:6; Rimlj. 4:13, 22). O Jehova šaj hem amen ađahar te dikhel. O Devel nane zadovoljno amencar sebepi odova kobor buti ćereja ki olesi organizacija ili sebepi o odgovornostija kola isi amen. Ov tano zadovoljno amencar sebepi amari vernost hem istrajnost. Sare šaj te ova istrajna bizo obzir ko amare berša, okolnostija ili sposobnostija. Da li trenutno isi tut disavo pharipe? Ma bistri so e Jehova šaj te ćere bahtalo ađahar so ka aćhove lese verno. Ked haljovaja so o Devel tano zadovoljno amencar, amari nada ko olese obećanja šaj te ovel pana pozorali (w23.12 11 ¶13-14).

Jekh phral valjani te sikljol te šunel pažljivo hem te vaćeri ljubazno. O manuš kova šukar šunela, šaj te haljol sar aver osoba razmislini hem sar osetini pe (Posl. 20:5). Odova šaj te haljol hem kotar ton ando olako glaso, ando olake izrazija ko muj hem gestija. Tu našti te sikljove akava bizo te provodine vreme e manušencar. Ako uvek vaćereja e manušencar prekalo mejlija ili poruke, ka ovel tuće pharo te vaćere olencar uživo. Odolese, de sa tutar te iskoristine svako prilika te vaćere e manušencar uživo (2. Jov. 12). Jekh zrelo hrišćanin valjani te ovel sposobno te izdržini kokri pes hem pe porodica (1. Tim. 5:8). Uvek tano šukar te sikljove disavi veština koja ka pomožini tut te arakhe buti (Dela 18:2, 3; 20:34; Ef. 4:28). De sa tutar te ove penđardo sar bućarno ćhavo hem sar neko ko završini i buti đi o krajo. Ako ka ćere odova, verovatno ka arakhe buti hem na ka našale la (w23.12 27 ¶12-13).

Ked i Biblija vaćeri ando „Jehovaso dive“, tegani odova odnosini pe ko vreme ked o Jehova ka uništini pe dušmanen hem ka anel spasenje pe narodose. Ko purano vreme, o Jehova kazninđa disave narodon (Is. 13:1, 6; Jezek. 13:5; Sof. 1:8). Ko amaro vreme, „e Jehovaso dive“ ka počmini ked ka ovel napadimo o Baro Vavilon ja i hovavni religija hem ka završini pe e Armagedoneja. Te šaj te preživina odova dive, valjani akana te spremina amen. O Isus phenđa so valjani uvek te ova spremna asi „bari nevolja“, a odova tano jekh proces kova trajini (Mat. 24:21; Luka 12:40). Ked pisinđa po prvo lil e phralenđe ko Solun, o apostol Pavle koristinđa nekobor poređenja te šaj te pomožini lenđe te oven spremna aso Jehovaso baro dive ando sudo. O Pavle đanđa so e Jehovaso dive na ka avel tegani (2. Sol. 2:1-3). Ama, podstakninđa e phralen te pripreminen pe aso odova dive ka phene tajsa ka avel. Odova savet hem amen šaj te primenina (w23.06 8 ¶1-2).

Ko 1978. berš ko Tokio gradinđa pe jekh but bari zgrada. O manuša pućlje pe da li odija zgrada ka izdržini, odolese so ki odija phuv but putija isi zemljotresija. Ama, so o inženjerija ćerđe te ne bi odija zgrada perela ked isi zemljotresija? On ćerđe te ovel dovoljno zorali, ama ko isto vreme hem fleksibilno te šaj te izdržini o zemljotres. O hrišćanija tane sar odija zgrada. Ama, ko kova način? Jekh hrišćanin valjani te ovel le ravnoteža maškaro odova ked valjani te ovel zoralo hem istrajno, a ked valjani te ovel prilagodljivo. Ov mothovi soj tano zoralo hem odlučno ked valjani te šunel e Jehovase zakonija hem merilija. Ov tano „spremno te šunel“ hem na ćerela kompromis, čak hem ked lese pharo. Ki aver strana, valjani te ovel razumno ili prilagodljivo ked odova tano moguće ili ked odova valjani (Jak. 3:17). Jekh hrišćanin kova sikljilo te ovel le asavki ravnoteža nane previše strogo ni previše popustljivo (w23.07 14 ¶1-2).

O Isus valjanđa te suprotstavini pe e Satanase kova manglja te ćhivel le te grešini e Devlese hem te na ovel lese verno (Mat. 4:1-11). E Satanaso cilj hine te ćhinavi e Isuse te platini i otkupnina. Đi hine ki phuv, o Isus hine le pana disave kušnje. Olese dušmanija progoninđe le, čak manglje te mudaren le (Luka 4:28, 29; 13:31). Isto ađahar, valjanđa te ovel strpljivo pe učenikonencar odolese so but putija ćerđe greške (Mar. 9:33, 34). Angleder te merel, ov hine mučimo hem marđe lese muj. Palo odova, hine mudardo sar zločinco hem hine le bare dukha (Jevr. 12:1-3). Angleder te merel, ko zadnjo deo ando pe kušnje, ov valjanđa te istrajini kokri bizi Jehovasi pomoć (Mat. 27:46). O Isus ćerđa bare žrtve te šaj te obezbedini i otkupnina. So pobuter razmislinaja ando odova, amaro mangipe premalo leste ovela pana pobaro (w24.01 10-11 ¶7-9).

O strpljenje šaj te pomožini amen te ova ko šukar odnosija averencar. Ako hijam strpljiva, pažljivo ka šuna averen đi vaćerena (Jak. 1:19). O strpljenje ka pomožini amen hem te ova ko mir averencar. Ked hijam ko stres, na ka reagujina but sigate hem na ka phena diso neljubazno. Isto ađahar, na ka holjana sigate ked avera povredinena amare osećanja. Umesto te irina o lošnipe, amen ka šuna o savet: „Podnosinen jekh jekhe hem ando vilo oprostinen jekh jekhese“ (Kol. 3:12, 13). O strpljenje šaj te pomožini amen hem te ana šukar odluke. Umesto te siđara, amen ka odvojina dovoljno vreme te razmislina savo izbor tano anglo amende hem te odlučina odova soj tano najšukar. Na primer, ako rodaja buti amen šaj mangaja te prihvatina i prvo buti koja arakhaja, čak iako odova ka značini te propustina nekobor sastankija ja te đa pohari ki služba. Ama, ako hijam strpljiva, ka odvojina dovoljno vreme te razmislina sar odija buti ka utičini upri amari porodica ja upri amari duhovnost. Ked hijam strpljiva, amen ka ana šukar odluke (w23.08 22 ¶8-9).

Šaj ka obeshrabrine tut so pana ka valjani te borine tut protiv o pogrešna želje. Ama, ako razmislineja ando obećanje kova dinđan e Jehovase ked predajinđan tut, ka ovel tut snaga te borine tut ked hijan ki disavi kušnja. Sar? Ked predajinđan tut e Jehovase, tu odrekninđan tut kokri tutar. Odova značini so odbacinđan sa o želje hem o ciljija kola nane premali Jehovasi volja (Mat. 16:24). Odolese, ked ka ovel tut disavi kušnja na ka puće tut da li te aćhove verno e Jehovase ili na. Tu već odlučinđan odova hem odlučno hijan te radujine le. Tegani ka ove sar o Jov, kova iako hine le bare pharipa, phenđa: „Sa đi na merava, na ka ćhinavav te ovav besprekorno“ (Jov 27:5; w24.03 9 ¶6-7).

„O Devel ando mangipe“ tano uvek amencar (2. Kor. 13:11). Ov svakonese mothovi pi briga. Uverime hijam so ako osloninaja amen upro Jehova ka „arakhi [amen] oleso verno mangipe“ (Ps. 32:10). So pobuter razmislinaja sar o Jehova mothovi amenđe po mangipe, ov ovela amenđe pana postvarno hem pana popaše hijam oleja. Amen šaj te molina amen olese hem te phena lese kobor valjani amenđe oleso mangipe. Šaj te phena lese sa so mučini amen hem te ovel amen poverenje so haljola amen hem soj tano spremno te pomožini amenđe (Ps. 145:19). Sar so ko jekh šudro dive i jag taćari amen, ađahar taćari amen hem e Jehovaso mangipe. Iako e Jehovaso mangipe tano but zoralo, ov tano hem nežno. Odolese, ov bahtalo sebepi so o Jehova mangela tut. Ama, hem tu šaj te phene: „Mangava e Jehova“ (Ps. 116:1; w24.01 31 ¶19-20).

O Isus na vaćerđa e manušenđe samo so e Devleso anav tano Jehova. O Jevreja kase o Isus propovedinđa već đanđe e Devleso anav. Ama, o Isus „objasninđa [. . .] savo tano o Devel“ (Jov. 1:17, 18). Na primer, ko hebrejsko deo pisini so o Jehova tano milosrdno hem samilosno (Izl. 34:5-7). O Isus odova potvrdinđa ked vaćerđa o poređenje ando buntovno ćhavo. Ko odova poređenje o dad dikhlja pe ćhave „đi pana hine dur“, prastandoj ikljilo anglo leste, zagrlinđa le, ćumudinđa le hem spremno oprostinđa lese. Sar o dad ando akava poređenje, hem o Jehova tano but milosrdno hem samilosno (Luka 15:11-32). O Isus ćaće pomožinđa e manušenđe te haljon savo tano o Jehova (w24.02 10 ¶8-9).

O Jehova osvežini hem utešini okolen kola isi len pharipa. Sar šaj sar o Jehova te mothova saosećajnost hem te utešina averen? Jekh način sar šaj te ćera odova tano te razvijina o osobine kola ka pomožinen amen te ova saosećajna hem te utešina averen. Kola tane odola osobine? So ka pomožini amen ando dive ko dive te zorjaćera amaro mangipe hem te „tešina jekh jekhe“? (1. Sol. 4:18). Amen valjani te razvijina samilost, phralikano mangipe hem šukaripe (Kol. 3:12; 1. Petr. 3:8). Sar akala osobine ka pomožinen amen? Ako isi amen akala osobine, ka ovel amen bari želja te utešina okolen kola isi len disave pharipa. Sar so o Isus phenđa: „O muj vaćeri odova soj tano o vilo pherdo. O šukar manuš vaćeri šukar buća sose ko vilo isi le šukar buća“ (Mat. 12:34, 35). Na valjani te bistra so jekh važno način sar šaj te mothova kobor mangaja e phralen tano ađahar so ka utešina len (w23.11 10 ¶10-11).

Ako mangaja te haljova e biblijake proročanstvija, amen valjani te roda pomoć. Na primer, zamislin so valjani te đa ko disavo nepoznato than, ama to amal kova putujini tuvaja but šukar đanela odova than. Ov đanela kaj tačno hijen hem kuri legari svako drumo. Sigurno hijan but bahtalo so ov manglja te avel tuvaja. O Jehova tano sar asavko amal. Ov but šukar đanela so ađićeri amen ki budućnost. Odolese, ako mangaja te haljova e biblijake proročanstvija amen valjani ponizno te molina e Jehova te pomožini amen (Dan. 2:28; 2. Petr. 1:19, 20). Sar jekh šukar roditelj, o Jehova mangela olese ćhave te ovel len šuži budućnost (Jer. 29:11). Avdije, o roditeljija našti te phenen pe ćhavenđe so ađićeri len ki budućnost, ama o Jehova šaj te phenel amenđe. Ov ko po Lafi dinđa te pisinen pe o proročanstvija te šaj te đana o važna događaja angleder te oven (Is. 46:10; w23.08 8 ¶3-4).