Septembar

O Devel dinđa e Isusese moć te rešini sa e manušenge problemija. Prekalo čudija kola ćerđa, o Isus mothovđa so ov šaj te rešini sa amare problemija kola amen kokri našti te rešina. Na primer, ov isi le moć te oslobodini amen ando greh sebepi kova hijam naborme hem meraja (Mat. 9:1-6; Rimlj. 5:12, 18, 19). Olese čudija mothovena so ov šaj te saćari svako nabormipe hem čak te vazdel e mulen (Mat. 4:23; Jov. 11:43, 44). Isto ađahar, ov šaj te smirini o oluje hem te oslobodini amen ando lošna duhija (Mar. 4:37-39; Luka 8:2). But tano utešno so đanaja so o Jehova dinđa e Isusese asavki bari moć! Šaj te ova uverime so o Jehova ka ispunini sa odova so phenđa ked ka avel oleso Kraljevstvo. O čudija kola o Isus ćerđa đi hine ki phuv, mothovena amenđe so ka ćerel ki budućnost sar Kralj ko Devleso Kraljevstvo (w23.04 3 ¶5-7).

Ako ki ti skupština isi but objaviteljija, šaj na dobineja često komentari ked vazdeja to vas. Ako ja, šaj alo tuće ki godi više te na de komentari. Ama, ma ćhinav te pokušine te de komentari. Aso svako sastanak šukar tano te spremine nekobor komentarija. Ako na dobinđan komentari ki početka, šaj ka dobine pokasno. Ked spremineja i Stražarsko kula, razmislin sar tano svako odlomko povezimo e temaja ando članko. Ked ćereja odova, šaj te ovel tut jekh but šukar komentari. Isto ađahar, šaj te spremine komentari ko odlomkija kola vaćerena ando pohor buća kola nane lokho te objasninen pe. Sose? Odolese so tegani verovatno na ka vazden but đene po vas. Ama, so te ćere ako na dobineja komentari? Tegani, angleder o sastanko vaćer e phralese kova vodini o sastanko ko kova odlomko mangeja te komentarišine (w23.04 21-22 ¶9-10).

O Josif uvek ićerđa pe ko Jehovase smernice hem sebepi odova hine but šukar rom. O Jehova najhari trin putija dinđa le disave smernice so te ćerel pe porodicaja. Svako puti, o Josif šunđa e Jehova, čak hem ked na hine lese lokho (Mat. 1:20, 24; 2:13-15, 19-21). Ađahar, ov šaj hine te štitini e Marija hem te brinini pe olatar. Sebepi sa odova so ćerđa, i Marija pana pobuter manglja le hem poštujinđa le. Romalen, oponašinen e Josife, ađahar so andi Biblija ka roden savetija sar te brininen tumen andi tumari porodica. Ked primeninena odola savetija, iako nane tumenđe lokho, tegani zorjaćerena tumaro brak hem mothovena so mangena tumare romnjen. Jekh phen kotar Vanuatu, koja tani ko brak pobuter ando 20 berš, phenela: „Ked mo rom rodela pomoć ando Jehova hem ićeri pe ko olese smernice, me pana pobuter poštujinava le, osetinava man so hijum sigurno hem isi man poverenje so uvek ka anel šukar odluke“ (w23.05 21 ¶5).

O Judejcija kola irinđe pe ko Izrael valjanđe te oven e Devleso „sveto narodo“ (Pon. zak. 7:6). Ama, odova na značinđa so na valjanđe te ćeren promene te šaj te oven šukar anglo Jehovase jaćha. But Judejcija bijandilje ko Vavilon hem izgleda so but olendar počminđe te razmislinen sar o Vaviloncija. Beršencar palo odova so o Judejcija irinđe pe ko Izrael, o namesnik, o Nemija hine but razočarimo ked haljilo so o ćhave kola bijandilje ko Izrael čak ni na sikljilje i hebrejsko ćhib (Pon. zak. 6:6, 7; Nem. 13:23, 24). Sar šaj hine akala ćhave te mangen e Jehova hem te služinen lese ako na haljona i hebrejsko ćhib ki koja uglavnom hine pisimo e Devleso Lafi? (Jezd. 10:3, 44). Akala Judejcija valjanđe te ćeren bare promene, ama but polokho bi ovela lenđe te ćeren odova ko Izrael kuri o narodo počminđa te služini e Jehovase ko ispravno način (Nem. 8:8, 9; w23.05 15 ¶6-7).

Nažalost, kobor god bari želja te ovel amen ili kobor god te ova disciplinovana, ipak šaj diso te ćhinavi amen. Na primer, o „događaija kola na očekujinaja“ šaj te len amaro vreme kova valjani amenđe te ispunina amaro cilj (Prop. 9:11). Šaj isi amen disavo pharipe sebepi kova hijam obeshrabrime hem kova lela amari snaga (Posl. 24:10). Isto ađahar, sebepi so hijam nesavršena šaj te ćera disave greške kola šaj te ćhinaven amen te ispunina amare ciljija (Rimlj. 7:23). Ili šaj hijam samo umorna (Mat. 26:43). So šaj te pomožini amenđe te ikljova ko krajo akale problemencar? Ako isi diso so ćhinavi tut te ispunine te duhovna ciljija, odova na značini so valjani te odustajine. Ki Biblija pisini so ka ovel amen problemija. Ama, šaj te ispunina amare ciljija iako isi amen problemija. Ked daja sa amendar te ispunina amaro cilj, iako nane amenđe lokho, tegani mothovaja so mangaja te radujina e Jehova (w23.05 30 ¶14-15).

I pionirsko služba pomožini jekhe terne phralese te sikljol sar te sarađujini različito manušencar. Isto ađahar, pomožini lese te sikljol sar mudro te koristini o pare hem te na trošini pobuter nego so zaradini (Fil. 4:11-13). Jekh šukar način sar šaj te pripremine tut asi punovremeno služba tano ađahar so ka ove pomoćno pioniri. I pionirsko služba šaj te phravel tuće avera udara asi punovremeno služba, sar soj tano te ćere buti ki gradnja ja ko Betel. O phralja valjani te ovel len cilj te ispuninen o uslovija te služinen sar starešine. Ki Biblija pisini so jekh phral kova isi le asavko cilj „but šukar služba mangela“ (1. Tim. 3:1). Angleder te služini sar starešina, jekh phral valjani te ispunini o uslovija te služini sar sluga pomoćnik. O sluge pomoćnikija pomožinena e starešinenđe ko but praktična načinija. On zajedno ponizno služinena pe phralenđe hem pe phenjenđe hem revno učestvujinena ki služba (w23.12 28 ¶14-16).

O kralj Josija hine le 16 berš ked počminđa te rodel e Jehova. Ov manglja te sikljol ando Jehova hem te ćerel olesi volja. Ama, oleso životi na hine lokho. Ko odova vreme, but manuša služinđe e hovavne devlenđe. Odolese, o Josija valjanđa te ovel hrabro hem te ćhinavi e manušen te ćeren odova. Angleder so pherđa 20 berš, o Josija počminđa te cidel e hovavne devlen ando izraelsko narodo (2. Let. 34:1, 2). Čak hem ako hijan but terno, tu šaj te oponašine e Josijaso primer ađahar so ka sikljove ando Jehova hem ando olese osobine. Odova ka podstaknini tut te predajine tut olese. Sar odova ka utičini upro to životi? O Luka, kova krstinđa pe ked hine le 14 berš, phenela: „Ando akana, me ka ćhivav e Jehova ko prvo than ko mo životi hem ka dav sa mandar te ćerav le bahtalo“ (Mar. 12:30). Ako hem tu ka ćere odova, tegani ka dikhe save šuže blagoslovija ka oven tut (w23.09 11 ¶12-13).

Ked o apostol Pavle pisinđa lil e phralenđe ko Solun, i skupština postojinđa pohari ando jekh berš. O phralja kola predvodinđe na hine odobor zrela hem šaj ćerđe disave greške. Ama, ipak zaslužinđe avera te poštujinen len. Sar i bari nevolja avela sa popaše, amen šaj ka zavisina ando amare lokalna starešine, čak hem pobuter nego akana sose on ka den amen smernice. Šaj o phralja kotar glavno sedište na ka šaj te den amen smernice niti o phralja kotar podružnica. Sebepi odova, but tano važno akana te manga hem te poštujina amare starešinen. So god te ovel, hajde sare te ova trezvena, te na dikha olenge mane, već sar o Jehova prekalo Isus vodini akale verna manušen. Sar so i kaciga štitini e vojnikoso šero, ađahar amari nada ando spasenje štitini amare mislija. Ako tani amari nada zorali, amen šaj te haljova so akava sveto nane le so te del amen (Fil. 3:8). Amari nada pomožini amen te ovel amen mir (w23.06 11-12 ¶11-12).

Okola so šunena e „romnja koja tani bigođali“ valjani te odlučinen da li ka prihvatinen olako poziv ili ka odbacinen le. Isi but važna razlogija sose valjani te cida amen ando nemoral. I „bigođali romni“ koja pomini pe ko Poslovice phenela: „O ćordane panja tane gudle“ (Posl. 9:17). Soj tane odola „ćordane panja“? Ki Biblija o seksualna odnosija ko brako tane uporedime e svežo panjeja (Posl. 5:15-18). O rom hem i romni kola tane venčime, šaj te uživinen ko seksualna odnosija. Ama, odova nane ađahar e „ćordane panjencar“. O ćordane panja šaj te odnosinen pe ko seksualna odnosija avrijal ando brak. O manuša kola ćerena nemoral mangena odova te garaven averendar, isto sar so jekh ćor mangela te garavi averendar ked diso ćorela. O „ćordane panja“ šaj te izgledinen soj tane gudle ako okola so ćerena nemoral mislinena so niko na ka saznajini aso odova. Ama, odova nane ađahar. On hovavena kokri pes! O Jehova sa dikhela. Nane ništa pološno, nego ked neko našalji po amalipe e Jehovaja. A odova nane hić gudlo (1. Kor. 6:9, 10; w23.06 22 ¶7-9).

Ama, so ako palo disavo vreme osetineja so na molineja tut ando vilo hem so na uživineja više ki služba? Ako odova desini pe palo to krštenje, ma mislin so o Jehova lelja tutar po duho ja odbacinđa tut. Tu hijan nesavršeno manuš hem te osećanja šaj te meninen pe. Ako osetineja so na hijan više odobor revno, razmislin ando apostol Pavle. Ov manglja te oponašini e Isuse, ama đanđa so podijekh puti na ka ovel le bari želja te ćerel odova so valjani. O Pavle hine odlučno te ćerel po zadatko bizo obzir sar osetinđa pe ko odova momenti. Isto ađahar, ma mukh te nesavršena osećanja te anen odluke umesto tute. Ov odlučno te ćere odova soj tano ispravno, bizo obzir sar osetineja tut (1. Kor. 9:16; w24.03 11-12 ¶12-13).

Amen šaj te mothova mangipe premalo amare phralja hem phenja ađahar so ka ova olencar amala (2. Kor. 6:11-13). But amendar služinena ko skupštine kuri o phralja hem o phenja isi len različito poreklo hem razlikujinena pe jekh jekhestar. Amen šaj te zorjaćera amaro mangipe premalo lende ađahar so ka dikha kola šukar osobine isi len. Ked upro avera dikhaja ađahar sar so o Jehova dikhela, tegani mothovaja so mangaja len. Ki bari nevolja, ka ovel but važno te mothova mangipe e phralenđe hem e phenjenđe. Sar o Jehova ka zaštitini amen ked ka avel i bari nevolja? Razmislin so o Jehova ko purano vreme phenđa pe narodose te ćerel ked o Vavilon hine napadimo: „Hajde, mo narodo, khuven ko tumare sobe kaj ka oven ko sigurno hem phanen o udara palo tumende. Garaven tumen samo hari đi na nakhela o gnev“ (Is. 26:20). Izgleda so hem amen ka valjani te šuna asavke smernice ki bari nevolja (w23.07 6-7 ¶14-16).

Ov penđarutno sar razumno manuš. Šaj te puće tut: „Da li o manuša dikhena man sar neko koj tano razumno, spremno te popustini hem tolerantno? Ili dikhena man sar neko koj tano strogo, grubo, okrutno hem tvrdoglavo? Da li insistirinava avera te ćeren o buća ađahar sar so me mislinava so valjani te ćeren pe? Ili šunava averen hem popustinava ked odova tano moguće?“ So pobuter oponašinaja e Jehova hem e Isuse, pana pobuter ka ova razumna. Amen valjani te ova razumna ked amare okolnostija meninena pe. Odola promene šaj te anen amenđe problemija kolendar na razmislinđam. Na primer, šaj kotar jekhvar te naborsaljova, te menini pe i ekonomsko situacija ko sveto ja i vlada hem odova te anel amenđe bare pharipa (Prop. 9:11). Isto ađahar, šaj te ovel amenđe pharo čak ked menini pe amaro zadatko ki organizacija. Save god pharipa te oven amen, šaj te prilagodina amen ko neve okolnostija ako ćeraja akala štar buća: (1) prihvatin i nevi situacija, (2) razmislin andi budućnost, (3) ov pozitivno hem (4) ćer diso averenđe (w23.07 21-22 ¶7-8).

O prorok Danilo hine terno ked o Vaviloncija lelje le hem legarđe le dur kotar oleso ćher ko Jerusalim te ovel robo. Iako hine terno, o vavilonska službenikija primetinđe so ov hine averćhane ando avera. On dikhlje so ov tano bizi mana, so šukar izgledini hem so avela andi jekh važno familija (1. Sam. 16:7). Odolese, on dinđe le obuka te služini ki palata (Dan. 1:3, 4, 6). O Jehova na manglja le sose hine šužo ja so hine le bari odgovornost ki palata, već sebepi odova savo manuš birinđa te ovel. Ov verovatno hine le oko 20 berš ked o Jehova phenđa lese soj tano pravedno sar o Noje hem o Jov, o manuša kola beršencar verno služinđe lese (Post. 5:32; 6:9, 10; Jov 42:16, 17; Jezek. 14:14). O Jehova manglja e Danilo celo oleso đivdipe (Dan. 10:11, 19; w23.08 2 ¶1-2).

Ked mangeja te ćine jekh ćher tu mangeja te khuve ki svako soba hem te dikhe svako detalji. Diso slično šaj te ćera ked čitinaja hem proučinaja e Devleso Lafi. Ako samo sigate čitinaja, amen ka sikljova samo o „osnovna buća kotar Devlese sveta lafija“ (Jevr. 5:12). Ama, sar so valjani te khuva andre ko ćher te šaj te đana savo tano, isto ađahar valjani pažljivo te proučina i Biblija te šaj te haljova la. Jekh šukar način sar šaj te ćera odova tano ađahar so ka dikha sar tane povezime o različita delija andi olaki poruka. Svako amendar valjani te trudini pe te haljol na samo ko so verujini već hem sose verujini. Te šaj potpuno te haljova disavo detalji ando Devleso Lafi, amen valjani te sikljova o hor ćaćipa andi Biblija. O apostol Pavle podstakninđa e hrišćanen hor te proučinen e Devleso Lafi te šaj potpuno te haljoven „kobor tano buvlo, dugačko, ućo hem hor o ćaćipe“. Palo odova, on šaj hine te oven „ukorenime hem utemeljime ki vera“ (Ef. 3:14-19). Amen valjani te ćera isto odova (w23.10 18 ¶1-3).

Ki Biblija isi amen but primerija ando manuša kola hine strpljiva. Šukar bi ovela te proučina odola izveštaja. Na primer, iako o David hine pomazimo te ovel budućo kralj ko Izrael ked hine but terno, ov morandilo beršencar te ađićeri angleder so ulo kralj. O Simeon hem i Ana verno služinđe e Jehovase đi ađićerđe te avel o obećimo Mesija (Luka 2:25, 36-38). Đi proučineja asavke izveštaja, razmislin ando akala pućiba: So pomožinđa akale manušese te ovel strpljivo? Sar pomožinđa lese odova so hine strpljivo? Sar šaj te oponašinav le? Isto ađahar, šaj te sikljove hem ando okola kola na hine strpljiva (1. Sam. 13:8-14). Šaj te puće tut: „Sose hine nestrpljiva? Kola lošna buća desinđe pe lenđe odolese so na hine strpljiva?“ (w23.08 25 ¶15).

O Petar hine verno manuš hem na mukhlja ništa te ćhinavi le te sledini e Isuse. Jekh puti, o Isus phenđa diso so olese učenikija na haljilje (Jov. 6:68). On na ađićerđe o Isus te objasnini lenđe so odola lafija značinena, već samo ćhinavđe te sledinen le. Ama, o Petar na ćerđa odova. Ov haljilo so samo o Isus šaj te ovel le o „lafija ando večno đivdipe“. Ki rat angleder te merel, o Isus đanđa so o Petar hem avera apostolija ka aćhaven le. Ama, ipak hine sigurno so o Petar ka irini pe lese hem ka aćhol lese verno (Luka 22:31, 32). O Isus haljilo so e „manušeso vilo tano spremno, ama oleso telo tano slabo“ (Mar. 14:38). Odolese, čak hem palo odova so o Petar odrekninđa pe olestar, o Isus na odustajinđa kotar akava apostol. Ked uskrsninđa, ov pojavinđa pe e Petarese hem odova izgleda ked o Petar hine kokri (Mar. 16:7; Luka 24:34; 1. Kor. 15:5). Šaj samo te zamislina kobor odova ohrabrinđa akale apostole, kova hine but tužno sebepi odova so ćerđa (w23.09 22 ¶9-10).

O Devel oprostini ja ućhari o grehija ando manuša kola isi len vera. Ov potpuno oprostini lenđe. Asavke manuša, odolese so isi len vera, anglo Jehovase jaćha tane pravedna (Ps. 32:1, 2). Iako o Devel upro Avraham, David hem avera verna sluge dikhlja sar pravedna manuša, on ipak hine nesavršena. Ama, sebepi olengi vera o Jehova upro lende dikhlja sar nedužna manuša, posebno ked uporedinđa len okolencar kola na služinena lese (Ef. 2:12). Ko lil kova pisinđa e hrišćanenđe ko Rim, o apostol Pavle objasninđa so valjani te ovel amen vera te šaj te ova e Devlese amala. O Avraham hem o David sebepi pi vera hine e Devlese amala. Hem amen šaj te ova olese amala ako isi amen vera (w23.12 3 ¶6-7).

Avdije, sare isi amen bari čast te služina e Jehovase ađahar so koristinaja amaro vreme, snaga hem materijalna buća te ćhiva o Kraljevstvo ko prvo than. Amen šaj te mothova so ceninaja i čast te služina e Jehovase ađahar so ka da lese amaro najšukar ki služba. Ko krajo ando po lil e Jevrejenđe, o Pavle pisinđa hem ando buća kola valjani uvek te ćera đi služinaja e Devlese (Jevr. 10:22-25). Ov phenđa so valjani te molina amen, te propovedina, te đa ko sastankija hem te ohrabrina jekh jekhe „sa pobuter so dikhaja soj tano [e Jehovaso] dive popaše“. Ko krajo ando izveštaj kotar Otkrivenje, e Jehovaso anđeo phenđa: „E Devlese klanin tut“ (Otkr. 19:10; 22:9). Odolese, niked na valjani te bistra sa akala buća kola sikljiljam ando Jehovaso duhovno hram hem kobor bari čast isi amen te služina lese (w23.10 29 ¶17-18).

Sare amen mangaja hem ponodri te „mothova mangipe jekh jekhese“. Ama, but tano važno te na bistra o upozorenje kova o Isus phenđa: „Ko but đene o mangipe ka šudrol“ (Mat. 24:12). O Isus na manglja te phenel so but ando olese učenikija ka ćhinaven te mothoven mangipe. Ama, valjani te pazina o sveto te na utičini upro amende sose but manuša nane len mangipe jekh premalo aver. Nek ovel amen akava ki godi đi ka razmotrina o odgovor ko pućibe: Sar šaj te đana da li amaro mangipe premalo phralja tano zoralo? Jekh način sar šaj te dikha kobor tano zoralo amaro mangipe premalo phralja hem phenja tano ađahar so ka razmislina sar reagujinaja ko disave situacije (2. Kor. 8:8). Jekh situacija pominđa o apostol Petar: „A najangleder, but mangen jekh jekhe, sose o mangipe ućhari but grehija“ (1. Petr. 4:8). Odova sar ka reagujina ked amare phralja grešinena ili povredinena amen, ka mothovi amenđe kobor tano baro amaro mangipe premalo lende (w23.11 10-11 ¶12-13).

Amen našti te šuna e Isusesi zapovest ando mangipe ako samo disavenđe ki skupština mothovaja mangipe, a disavenđe na. Naravno, sar o Isus hem amen šaj te ova nekasa popaše, a averencar na odobor (Jov. 13:23; 20:2). Ama, o apostol Petar setinćeri amen so valjani te mothova „phralikano mangipe“ sa amare phralenđe hem phenjenđe sose tane deo andi amari porodica (1. Petr. 2:17). O Petar podstakninđa amen „hor te manga jekh jekhe celone vileja“ (1. Petr. 1:22). Akala lafija značinena te manga čak okolen kase tano amenđe pharo te mothova mangipe. Na primer, so ka ćere ako jekh phral holjanćeri tut ili povredini tut? Amari prvo reakcija šaj te ovel te irina lese ki isto mera. Ama, o Petar sikljilo ando Isus so odova nane ugodno e Devlese (Jov. 18:10, 11). O Petar pisinđa: „Ma irinen o lošnipe e lošnipaja niti i uvreda asi uvreda. Umesto odova, tumen blagoslovinen len“ (1. Petr. 3:9). Ked isi tut hor mangipe, odova ka podstaknini tut te ove ljubazno hem obzirno (w23.09 28-29 ¶9-11).

But tano zanimljivo te dikhe sar jekh tikno sigate barjola. Amenđe šaj te dićhol so ov ništa na ćerela. Ama, te šaj jekh hrišćanin te ovel zrelo odova na ovela prekali rat (1. Kor. 13:11; Jevr. 6:1). Te šaj te ispunini odova cilj, valjani te ovel le šukar amalipe e Jehovaja. Isto ađahar, valjani lese e Jehovaso duho te šaj te razvijini disave osobine, te ovel le disave veštine hem te pripremini pe aso buća kola ađićerena le ki budućnost (Posl. 1:5). O Jehova ćerđa e prvo murše hem e prvo đuvlja (Post. 1:27). Naravno, o murš hem i đuvli tane različita ko fizičko pogled. Ama, različita tane hem ko avera buća. Na primer, o Jehova dinđa disave odgovornostija e muršese hem e đuvljaće. A te šaj te ispuninen len, valjani lenđe disave osobine hem veštine (Post. 2:18; w23.12 18 ¶1-2).

Da li o Isus manglja avera te koristinen e Devleso anav? Ja. Disave religiozna vođe verujinđe so e Devleso anav tano odobor sveto so na valjani te izgovorini pe. Ama, o Isus na mukhlja i tradicija te ćhinavi le te slavini pe Dadeso anav. Te dikha so hine ked ko gerasinsko područje saćarđa jekhe manuše ko kova hine demonija. O manuša ko odova than but darandilje hem molinđe e Isuse te đal pese hem ov đelo (Mar. 5:16, 17). Ama, ov manglja odola manuša te đanen aso Jehovaso anav. Odolese phenđa e manušese kole saćarđa te vaćeri e manušenđe na so o Isus ćerđa, već so o Jehova ćerđa (Mar. 5:19). O Isus mangela hem amen ko celo sveto te vaćera e manušenđe ando olese Dadeso anav (Mat. 24:14; 28:20). Ked odova ćeraja, amen ugodinaja amare Kraljese, e Isusese (w24.02 10 ¶10).

Amen hijam but bahtale so hijam deo andi Jehovasi porodica ko akala phare dive. O životi ko akava sveto tano sa popharo. Ama, o Jehova pomožini amen prekalo amare phralja hem phenja (Ps. 133:1). Ov pomožini amen te ovel amen bahtali porodica (Ef. 5:33–6:1). Isto ađahar, dela amen mudrost te đana so te ćera ked isi amen problemija hem dela amen mir. Amen valjani te da sa amendar hem ponodri te služina e Jehovase. Sose? Odolese so disavo puti šaj te povredini amen neko ando phralja hem phenja ja šaj te razočarina amen odolese so ćerđam disavi greška, pogotovo ako ćerđam la nekobor putija. Amen valjani te istrajina ki služba e Jehovase ked (1) amaro phral ja phen povredini amen, (2) ked amaro bračno drug razočarini amen ja (3) ked hijam razočarime sebepi amare greške (w24.03 14 ¶1-2).

Sar đala o vreme, ka šune disave iskustvija kotar phralja hem phenja kola odlučinđe te ćeren diso pobuter ki služba e Jehovase. Šaj đelje ki Škola aso objavitelja ando Kraljevstvo ja đelje te živinen odothe kuri tani pobari potreba. Ako šaj te ćhive tuće asavko cilj, odova tano but šukar. E Jehovaso narodo tano spremno te proširini pi služba (Dela 16:9). Ama, so ako tu našti te ćere odova? Ma mislin so pohari vredineja ando okola so šaj te ćeren odova. Najvažno tano te istrajina đi o krajo (Mat. 10:22). Ma bistri so tu radujineja e Jehova ked ćereja sa so šaj ko te okolnostija. Odova tano jekh važno način sar sledineja e Isuse hem palo krštenje (Ps. 26:1; w24.03 10 ¶11).

Amaro nebesko Dad dela amen po lafi so ka oprostini amenđe ako kajinaja amen (Ps. 86:5). Odolese, ako ćaće kajinđam amen, šaj te ova uverime so ov ka oprostini amenđe. Ov niked na rodela amendar pobuter ando odova so šaj te da le. Cenini so god ćeraja, sa đi tano odova ando vilo. Isto ađahar, razmislin ando primerija kotar Biblija ando manuša kola celone vileja verno služinđe lese. Na primer, razmislin ando apostol Pavle. Ov beršencar hine but revno, but putujinđa hem pomožinđa bute skupštinenđe. Ama, ked o buća ko oleso životi meninđe pe hem ked našti hine više te propovedini sar angleder, da li o Jehova na hine više zadovoljno oleja? Na. Ov hem ponodri ćerđa sa so šaj hem o Jehova blagoslovinđa le (Dela 28:30, 31). Isto ađahar, našti uvek isto te da e Jehovase, ama odova soj tano olese važno tano sose diso ćeraja (w24.03 27 ¶7, 9).

O Isus aćhavđa amenđe baro primer ko odova sar valjani te molina amen e Jehovase. Ked hine ki phuv, ov često molinđa pe e Jehovase. Ov but putija hine le buti hem uzo leste uvek hine manuša. Odolese, valjanđa te odvojini vreme te ovel kokri te šaj te molini pe (Mar. 6:31, 45, 46). Podijekh puti, uštinđa rano sabalje te šaj te ćerel odova. Jekh puti, molinđa pe celo rat angleder te anel jekh važno odluka (Luka 6:12, 13). I rat angleder te merel, nekobor putija molinđa e Jehova te pomožini lese te ćerel o najpharo zadatko kova dobinđa (Mat. 26:39, 42, 44). Kotar Isuseso primer sikljovaja so, kobor god te ovel amen buti, valjani redovno te molina amen. Sar o Isus, hem amen valjani te odvojina vreme asi molitva. Šaj te molina amen rano sabalje ja kasno raćate. Ađahar šaj te mothova kobor hijam zahvalna e Jehovase aso akava but šužo poklon (w23.05 3 ¶4-5).

Razmislin ando lafi „pherđa“ kotar akava stih. Ki originalno ćhib akava lafi prenosini i slika ando odova so e Jehovaso mangipe tano odobor zoralo soj tano sar potok kova đala hem pherela o vilo ando pomazanikija. Ćaće šuži slika koja mothovi kobor o Jehova mangela e pomazanikonen! O pomazanikija đanena so o Jehova mangela len (Jud. 1). O apostol Jovan, kova hem kokri hine pomazaniko, pisinđa: „Dikhen savo mangipe mothovđa amenđe o Dad! Phenđa amenđe so hijam olese ćhave“ (1. Jov. 3:1). Ama, da li o Jehova po mangipe mothovi samo e pomazanikonenđe? Na, ov mothovđa po mangipe sarinenđe. Soj tano o najbaro dokaz ando Jehovaso mangipe? Odova tani i otkupnina. Asavko mangipe niko niked na mothovđa (Jov. 3:16; Rimlj. 5:8; w24.01 28 ¶9-10).

Akava stih mothovi so pomožinđa e Davidese te pobedini pi dar. Iako hine ki opasno situacija, ov razmislinđa so o Jehova ka ćerel lese. O David đanđa so o Jehova ko pravo vreme ka spasini le hem so phenđa lese so ov ka ovel kralj ko Izrael (1. Sam. 16:1, 13). O David hine uverimo so o Jehova ka ispunini pe obećanja. So o Jehova obećinđa tuće? Našti te očekujina o Jehova te zaštitini amen ando sa amare problemija. Ama, save god problemija akana isi amen, o Jehova ka cidel len ko nevo sveto (Is. 25:7-9). Amaro Stvoritelj isi le moć te vazdel e mulen, te saćari amen hem te cidel sa okolen kola protivinena pe amenđe (1. Jov. 4:4; w24.01 6 ¶12-13).

Razmislin ando to predanje hem krštenje. Tu anđan odija odluka odolese so mangljan te ove ki Jehovasi strana. Počminđan te sikljove ando Jehova, te mange le hem te poštujine le sar te nebesko Dade. Barjaćerđan ti vera hem odova podstakninđa tut te pokajine tut. Ćhinavđan te ćere o buća kola ov mrzini hem počminđan te ćere odova so ov mangela. Osetinđan tut but šukar ked haljiljan so o Jehova oprostinđa te grehija (Ps. 32:2). Počminđan redovno te đa ko sastankija hem te vaćere averenđe odova so sikljiljan ando Jehova. Ked predajinđan to životi e Jehovase hem ked krstinđan tut, počminđan te đa ko drumo ando životi hem odlučno hijan te aćhove ko odova drumo (Mat. 7:13, 14). De sa tutar te aćhove zoralo, te šuna e Jehovase smernice hem te mothova so mangaja le (w23.07 17 ¶14; 19 ¶19).

Ked razmislineja ando to predanje, odova šaj te del tut snaga te aćhove verno e Jehovase ko kušnje. Na primer, da li bi flertujineja nekase romeja ja romnjaja? Sigurno na! Tu već obećinđan e Jehovase so niked na ka ćere diso ađahar. Ako na mukheja o pogrešna osećanja te astaren koreno ko to vilo, ka pomožine kokri tuće sose kasnije na ka valjani te borine tut protiv olende. Tu ka „cide tut kotar drumo ando rumime manuša“ (Posl. 4:14, 15). E Isuseso primer šaj but te pomožini tut. Ov hine odlučno te ugodini pe Dadese. Sar oleste, hem tu valjani te ove odlučno te ugodine e Jehovase (Mat. 4:10; Jov. 8:29). O problemija hem o kušnje dena tut prilika te mothove so hijan odlučno te sledine e Isuse. Šaj te ove sigurno so o Jehova ka pomožini tuće (w24.03 9-10 ¶8-10).