Oktobar

Da li tano tuće podijekh puti pharo te ove poslušno e Jehovase? E kraljese e Davidese podijekh puti hine pharo hem odolese molinđa e Devle: „Ćhiv ano mande i želja te šunav tut“ (Ps. 51:12). O David manglja e Jehova. Ama, ipak hine lese pharo te šunel le. Disavo puti odova hem amenđe šaj te desini pe. Sose? Sar prvo, amen nasledinđam o greh hem pharo tano te ova poslušna. Sar dujto, o Satana pokušini te utičini upro amende te pobunina amen protiv o Jehova sar ov so ćerđa (2. Kor. 11:3). Sar trito, amen hijam okružime e manušencar kola isi len buntovno stav, avere lafencar, okružime hijam „e duhoja kova akana delujini upro okola kola tane neposlušna“ (Ef. 2:2). Odolese, valjani te borina amen protiv amari nesavršenost, protiv o Beng hem protiv akava sveto te šaj te ova poslušna e Jehovase hem okolenđe kase ov dinđa autoritet (w23.10 6 ¶1).

So šaj te sikljova ando čudo ked o Isus ćerđa ando pani te ovel vino? Sikljovaja so značini te mothovi pe poniznost. O Isus na hvalinđa pe so ćerđa odova čudo. So god ćerđa, ov niked na hvalinđa pe. Umesto odova, ov ponizno phenđa so sa i slava pripadini olese Dadese (Jov. 5:19, 30; 8:28). Ako oponašinaja e Isuse ađahar so hijam ponizna, ni amen na ka hvalina amen odoleja so ćeraja. Valjani te ova zahvalna so isi amen čast te služina e Devlese (Jer. 9:23, 24). Odolese sa i slava hem i čast mothovaja e Jehovase, sose olese pripadini. Ćaće, amen ništa našti te ćera bizi Jehovasi pomoć (1. Kor. 1:26-31). Ked hijam skromna, tegani na ka vazda amen sebepi so pomožinaja averenđe. Amen hijam bahtale so đanaja so o Jehova dikhela hem cenini odova so ćeraja (Uporedin e stihonencar ando Matej 6:2-4; Jevr. 13:16). Ćaće, amen ugodinaja e Jehovase ked hijam ponizna sar o Isus (1. Petr. 5:6; w23.04 4 ¶9; 5 ¶11-12).

O apostol Pavle podstakninđa e hrišćanen te dikhen averengi korist. Sar šaj amen te primenina akava savet ked hijam ko sastanak? Ađahar so na ka bistra so isto sar amen hem avera mangena te komentarišinen. Razmislin kotar akava primer. Da li tu ked bešeja te amaleja vaćereja odobor but so to amal na avela đi o lafi? Naravno so na. Tu mangeja o solduj te vaćeren. Isto ađahar, ked hijam ko sastanak, amen mangaja te mukha hem avera te komentarišinen. U stvari, jekh ando najšukar način sar šaj te ohrabrina amare phralen hem phenjen, tano ađahar so ka da len prilika te komentarišinen (1. Kor. 10:24). Odolese ked tane amare komentarija kratka, amen mukhaja than averenđe te komentarišinen. Čak hem ked isi tut kratko komentari, ma vaćer ando but buća. Ako vaćereja sa so pisini ko odlomko, tegani na ka ovel so te phenen avera (w23.04 22-23 ¶11-13).

Ked amare okolnostija meninena pe, na valjani te bistra kobor tano važno hem ponodri te pomožina averenđe, pogotovo ađahar so ka đa ki služba. Amen valjani te ova prilagodljiva ki služba. Đi propovedinaja, resaja e manušen kola avena andi različito kultura hem na verujinena ko ista buća. O apostol Pavle hine prilagodljivo hem oleso primer šaj but te pomožini amen. O Isus ćhivđa e Pavle te ovel „apostol kova tano bićhaldo avere narodonđe“ (Rimlj. 11:13). Sebepi odova zadatko, ov šaj hine te propovedini e Jevrejenđe, e Grkonđe, e manušenđe kola završinđe bare škole, e manušenđe kola živinđe ko gav, kola hine ki vlast hem e kraljenđe. Te šaj te resel o ćaćipe ko olengo vilo, o Pavle hine „sarinenđe [. . .] sa“ (1. Kor. 9:19-22). Ov razmislinđa andi olengi kultura, kotar avena hem ko so verujinena. Odova pomožinđa lese te ovel prilagodljivo. Hem amen šaj te ova pošukar ki služba ako hijam prilagodljiva hem ako razmislinaja sar šaj ko najšukar način te pomožina e manušenđe (w23.07 23 ¶11-12).

O manuša kola tane blaga nane slaba, već zorale. Valjani amenđe bari snaga te šaj te aćhova smirime ked isi amen disavi phari situacija. I blagost tani plod ando Devleso duho (Gal. 5:22, 23). O grčko lafi asi „blagost“ disavo puti hine koristimo te opisini e divljo graste kova tano pripitomimo. Zamislin jekhe divljo graste kova neko pripitominđa. Iako tano akana pitomo, ov tano pana zoralo. Sar amen sar manuša šaj te ova blaga, ama ko isto vreme zorale? Odova našti te ćera kokri. Valjani te molina amen e Jehovase aso oleso sveti duh te pomožini amen te razvijina akija osobina. But iskustvija mothovena so odova šaj te ćerel pe. Na primer, but phralja hem phenja hine blaga ked avera protivinđe pe olenđe. Odova pomožinđa averenđe te ovel len pana pošukar mišljenje ando Jehovase svedokija (w23.09 15 ¶3).

Ki jekh vizija, o apostol Jovan dikhlja sar 24 starešine služinena e Jehovase ko nebo. On hvalinena e Devle hem phenena soj tano dostojno te primini „i slava, i čast hem i moć“ (Otkr. 4:10, 11). Isto ađahar, hem o verna anđelija isi len but razlogija te hvalinen e Jehova. On tane oleja ko nebo hem but šukar đanena savo tano. Dikhena sar mothovi pe osobine ko odova so ćerela. Ked dikhena sar postupini averencar, odova podstaknini len te hvalinen le (Jov 38:4-7). Isto ađahar, hem amen valjani te hvalina e Jehova ko amare molitve ađahar so ka phena lese so posebno sviđini pe amenđe koro leste hem sose poštujinaja le. Ked čitineja hem proučineja e Devleso Lafi, trudin tut te dikhe kola e Jehovase osobine posebno sviđinena pe tuće (Jov 37:23; Rimlj. 11:33). Palo odova, vaćer lese odova ki molitva. Amen šaj te hvalina e Jehova hem odolese so pomožini amenđe hem sa amare phralenđe (1. Sam. 2:1, 2; w23.05 3-4 ¶6-7).

Ko 1919. berš o Baro Vavilon više na hine le moć upro Devleso narodo. Ko odova berš, o Isus ćhivđa e „verno hem razborito robe“ kova pomožinđa e iskreno manušenđe te đan ko „Drumo andi svetost“ (Mat. 24:45-47; Is. 35:8). Sebepi i buti koja ćerđe disave verna manuša angleder, okola so počminđe te đan ko odova drumo šaj hine te sikljon pobuter ando Jehova hem andi olesi namera (Posl. 4:18). Isto ađahar, šaj hine te ćeren disave promene ko po životi te šaj te ćeren odova so o Jehova rodela olendar. O Jehova na očekujinđa ando po narodo kotar jekh puti te ćeren sa odola promene, već hari pohari. Kobor samo bahtale ka ova ked sare ka ćera o buća kola hvalinena amare Devle! Svako drumo valjani redovno te održini pe. Kotar 1919. berš ko „Drumo andi svetost“ pana ćerela pe buti hem odolese šaj but manuša te ikljon ando Baro Vavilon (w23.05 17 ¶15; 19 ¶16).

O Vodeće telo lično dinđa obuka okolenđe so služinena sar olenge pomoćnikija ko različita odeljenja. Odola pomoćnikija već akana isi len but odgovornostija ki organizacija. On tane već spremna te brininen pe ando avera bakre palo odova so o pomazanikija ka đan ko nebo. Ked o poslednjo pomazaniko ka ovel lendo ko nebo, hari angleder te završini pe i bari nevolja, e Jehovaso narodo akate ki phuv ka nastavini verno te služini lese. Amen đanaja so ko odova vreme i koalicija ando narodija, koja ki Biblija vićini pe Gog ando Magog, ka napadini e Devlese narodo (Jezek. 38:18-20). Ama, odova napad na ka ovel uspešno hem na ka ćhinavi e Devlese narodo verno te služini lese. O Jehova sigurno ka izbavini pe narodo. Ki vizija, o apostol Jovan dikhlja sar o „baro mnoštvo“ avela andi „bari nevolja“ (Otkr. 7:9, 14). Amen hijam sigurna so o Jehova ka spasini pe slugen (w24.02 5-6 ¶13-14).

So šaj te ćera te dobina sveti duh? Šaj te molina amen e Jehovase aso odova, te proučina oleso Lafi hem te ova deo andi olesi organizacija. Sa akava ka pomožini amen te barjaćera o „plod ando duho“ (Gal. 5:22, 23). O Devel dela po duho samo okolenđe kola isi len čista mislija hem postupkija. Ov na dela amen po duho ako isi amen melale mislija hem ćeraja odova soj tano melalo anglo lese jaćha (1. Sol. 4:7, 8). Ako mangaja te dobina sveti duh, amen na valjani te dikha „upro proročanstvija [. . .] sar diso bezvredno“ (1. Sol. 5:20). Ko akava stih o lafi „proročanstvija“ odnosini pe ko Jehovase poruke kola dela amen prekalo po duho, sar na primer so ka avel oleso dive hem kobor tano o kraj paše. Amen na valjani te mislina so o Armagedon na ka avel đi amen hijam đivde. Umesto odova, amen mothovaja so ađićeraja le hem soj tano but paše ađahar so daja sa amendar amare „delija te oven sveta“ hem ađahar so ćeraja odova soj tano čisto anglo Jehovase jaćha (2. Petr. 3:11, 12; w23.06 12 ¶13-14).

So valjani te ćera ako ko amaro uređaj kotar jekhvar pojavini pe pornografsko slika? Amen valjani odmah te cida odija slika hem te na dikha la. Polokho ka ovel amenđe te ćera odova ako setinaja amen kobor tano amenđe vredno amaro amalipe e Jehovaja. Čak iako disave slike nane pornografska, ipak šaj te ćeren te oven amen disave nemoralna mislija. Sose na valjani te dikha odova? Odolese so na mangaja ni ki godi te avel amenđe diso soj tano nemoralno (Mat. 5:28, 29). O Dejvid, jekh starešina kotar Tajland, phenela: „Me pućava man: ’Čak iako disave slike šaj nane pornografska, da li bi o Jehova ovela bahtalo ako bi me dikhava len?‘ Ked ađahar razmislinava, odova pomožini man mudro te postupinav.“ I dar te na ćera diso so ka dukhavi e Jehova šaj te pomožini amenđe te postupina mudro. O strahopoštovanje premalo Jehova tano „prvo so e manušese valjani te šaj te ovel le mudrost“ (w23.06 23 ¶12-13).

O „sobe“ šaj te odnosinen pe ko skupštine. Đi ka trajini i bari nevolja, o Jehova obećini so ka zaštitini amen ako aćhovaja ko jekhipe amare phralencar hem phenjencar. Pana akana valjani te da sa amendar te barjaćera amaro mangipe premalo phralja hem phenja sose amaro spasenje šaj ka zavisini odolestar. „E Jehovaso baro dive“ ka anel pharipe sa e manušenđe (Sof. 1:14, 15). Tegani, hem e Jehovase narodose ka ovel pharo. Ama, ako akana pripreminaja amen, tegani ka ovel amen mir hem ka šaj te pomožina averenđe. Save god problemija te oven amen, ka ovel amen snaga te istrajina. Ked amare phralja hem phenja ka oven len problemija, ka da sa amendar te pomožina len ađahar so ka mothova saosećanje. Ako akana mangaja amare phralen hem phenjen hem tegani ka mothova lenđe mangipe. O Jehova ka nagradini amen ađahar so ka del amen večno životi ko sveto kuri sa o katastrofe hem o nevolje ka oven bisterde (Is. 65:17; w23.07 7 ¶16-17).

Ked e Devleso Lafi vaćeri ando verna manuša, olenđe često phenela pe soj tane but zorale. Ama, čak hem i najzorali osoba na osetinđa pe uvek zorali. Na primer, o kralj David podijekh puti osetinđa pe „zoralo sar planina“, ama ki aver situacija „ukljinđa [le] i dar“ (Ps. 30:7). O Samson hine but zoralo odolese so o Jehova dinđa le po sveti duh. Ama, đanđa so bizo sveti duh, ov ka ovel slabo „sar svako aver manuš“ (Sud. 14:5, 6; 16:17). Akala verna manuša hine zorale samo odolese so o Jehova dinđa len snaga. O apostol Pavle priznajinđa so valjani lese snaga ando Jehova (2. Kor. 12:9, 10). Ov hine le problemija pe sastipaja (Gal. 4:13, 14). Isto ađahar, hine lese pharo te ćerel odova soj tano ispravno (Rimlj. 7:18, 19). Disavo puti hine zabrinuto hem darandilo so ka ovel oleja (2. Kor. 1:8, 9). Ama, ked hine slabo, ov hine zoralo. Sose? Odolese so o Jehova dinđa le snaga te istrajini ko pharipa (w23.10 12 ¶1-2).

Ako podijekh puti mislineja so na vredineja, ma bistri so o Jehova privucinđa tut koro peste (Jov. 6:44). Ov dikhela odova soj tano šukar koro tute, čak iako tu na dikheja odova. Isto ađahar, ov tačno đanela savo manuš hijan (2. Let. 6:30). Odolese, šaj te verujina ked phenela so hijam lese dragocena (1. Jov. 3:19, 20). Disave amendar angleder te upoznajinen o ćaćipe šaj ćerđe disave buća sebepi kola pana osetinena krivica (1. Petr. 4:3). Avera kola verno služinena e Jehovase šaj pana borinena pe protiv disave slabostija. Sar tano tuvaja? Da li podijekh puti mislineja so o Jehova našti te oprostini tuće? Ako ja, tegani šaj te utešini tut odova so hem avera e Jehovase verna sluge osetinđe pe ađahar. Na primer, o apostol Pavle osetinđa pe but lošno ked razmislinđa ando pe greške (Rimlj. 7:24). Naravno, ov kajinđa pe hem krstinđa pe. Ama, pese phenđa soj tano „najtikno maškaro apostolija“ hem soj tano „najbaro“ grešniko (1. Kor. 15:9; 1. Tim. 1:15; w24.03 27 ¶5-6).

Jekh buti koja šaj te sikljova ando Joasese lošna odluke tani so valjani te birina amalen kola šukar ka utičinen upro amende, okolen kola mangena e Jehova hem kola mangena te ćeren le te ovel bahtalo. Amen šaj te ova amala okolencar kola tane phureder ja tikneder amendar. Ma bistri so o Joas hine but poterno kotar po amal o Jodaj. Odolese, ked birineja amalen puć tut: „Da li pomožinena man te zorjaćerav mi vera ko Jehova? Da li ohrabrinena man te živinav premalo Devlese merilija? Da li vaćerena ando Jehova hem ando odova so sikljona kotar Biblija? Da li poštujinena e Devlese moralna merilija? Da li vaćerena maje samo odova so mangava te šunav ili tane hrabra hem dena man savet ked odova tano potrebno?“ (Posl. 27:5, 6, 17). Iskreno, ako te amala na mangena e Jehova, na valjanena tuće. Ama, ako isi tut amala kola mangena e Jehova, on uvek ka oven odothe hem ka pomožinen tut (Posl. 13:20; w23.09 9-10 ¶6-7).

E slovoja „alfa“ počmini o grčko alfabet, a e slovoja „omega“ završini pe. Odolese, ked phenela „me hijum Alfa hem Omega“, o Jehova pomožini amen te haljova so ked diso počmini, ov odova hem ka završini. Palo odova so stvorinđa e Adame hem e Eva, o Jehova phenđa lenđe: „Nek ovel tumen but ćhave hem tumendar nek oven but manuša, pheren i phuv hem vladinen upro late“ (Post. 1:28). Ko odova trenutko, o Jehova ka phene vaćerđa: „Alfa.“ Olesi namera ka ispunini pe ked o savršena hem o poslušna e Adamese hem e Evake potomkija ka pheren i phuv hem ka ćeren la te ovel raj. Ked e Jehovasi namera ka ispunini pe, ov ka phene ka vaćeri: „Omega.“ Palo odova so ćerđa o nebo, i phuv hem sa so isi koro lende, o Jehova vaćerđa diso so mothovi amenđe so olesi namera sigurno ka ispunini pe. Ov dinđa amen garancija so olesi namera e manušencar hem e phuvjaja sigurno ka ispunini pe ko krajo ando eftato dive (Post. 2:1-3; w23.11 5 ¶13-14).

Te putujini pe kotar Vavilon đi o Izrael na hine hić lokho hem odova šaj hine te trajini oko štar masek. Ama, o Jehova obećinđa e Izraelcenđe so ka cidel lendar sa o pharipa đi ka putujinen. O verna Judejcija đanđe so ako ka irinen pe ko Izrael, o blagoslovija kola ka dobinen ka oven pobare ando žrtve kola ka ćeren. Jekh ando blagoslovija hine so ko Izrael šaj hine slobodno te služinen e Jehovase. Ko Vavilon na hine nijekh oltari e Jehovase. Na hine nijekh oltari kaj šaj hine te den žrtve sar so hine pisimo ko Mojsijeso zakon, niti hine organizujimo o sveštenikija te ćeren odova. Isto ađahar, ko Vavilon hine pobuter manuša kola služinđe e hovavne devlenđe nego okola kola poštujinđe e Jehova hem olese merilija. Odolese, but Judejcija kola hine verna e Jehovase jedva ađićerđe te irinen pe ko Izrael kaj šaj hine palem te služinen e Jehovase ko ispravno način (w23.05 14-15 ¶3-4).

Te šaj te živina „sar o ćhave andi svetlost“ amenđe valjani e Jehovaso sveti duh. Sose? Odolese so na ka ovel amenđe lokho te aćhova čista ko akava nemoralno sveto (1. Sol. 4:3-5, 7, 8). E Jehovaso duho šaj te pomožini amen te borina amen protiv odova sar razmislini akava sveto. Isto ađahar, e Devleso duho šaj te pomožini amen te ana „svako vrsta ando šukaripe [hem] andi pravednost“ (Ef. 5:9). Jekh način sar šaj te dobina sveti duh tano ađahar so ka molina amen. O Isus phenđa so o Jehova „ka del sveti duh okolenđe kola molinena le aso odova“ (Luka 11:13). Isto ađahar, o sveti duh šaj te dobina ađahar so ka hvalina e Jehova ko sastankija zajedno amare phralencar hem phenjencar (Ef. 5:19, 20). Sebepi e Jehovaso sveti duh, amen šaj te živina ko način kova tano ugodno e Devlese (w24.03 23-24 ¶13-15).

Da li bi valjani te ove pana postrljivo? Ako tano ađahar, molin tut aso odova. O strpljenje tano plod ando Jehovaso sveti duh (Gal. 5:22, 23). Ako ki disavi situacija tano pharo te mothova strpljenje, šaj te roda e Jehovastar oleso „sveti duh“ te pomožini amen te ova strpljiva (Luka 11:13). Isto ađahar, šaj te roda e Jehovastar te pomožini amen te dikha ko buća ađahar sar so ov dikhela. Pali molitva valjani te da sa amendar svako dive te mothova strpljenje. So pobuter molinaja amen hem trudinaja amen te ova strpljiva, odija osobina pana poviše ka astari koreno ko amaro vilo hem ka ovel deo andi amari ličnost. Isto ađahar, šaj te pomožini amen hem ako razmislinaja ando biblijake primerija. I Biblija vaćeri ando but manuša kola hine strpljiva. Ked razmislinaja olendar, šaj te sikljova sar šaj te mothova strpljenje (w23.08 22 ¶10-11).

O Isus uverinđa e Petare so o Jehova ka brinini pe olestar. Ked uskrsninđa, ov ćerđa pana jekh čudo. Tegani, o Petar hem avera apostolija astarđe bute maćhen (Jov. 21:4-6). Akava čudo sigurno uverinđa e Petare so e Jehovase nane pharo te brinini pe ando olese materijalna potrebe. Šaj akava apostol tegani setinđa pe ko Isusese lafija so o Jehova ka brinini pe ando okola kola „najangleder rodena o Kraljevstvo“ (Mat. 6:33). Sa akava pomožinđa e Petarese te ćhivel i služba ko prvo than ko po životi, a na i buti. Ki Pedesetnica ko 33. berš, o Petar dinđa temeljno svedočanstvo hem ađahar pomožinđa bute manušenđe te prihvatinen i šukar vest (Dela 2:14, 37-41). Palo odova, pomožinđa e Samarićanenđe hem averenđe kola na hine Jevreja te sikljon ando Isus hem te sledinen le (Dela 8:14-17; 10:44-48). O Jehova koristinđa e Petare ko jekh šukar način hem ađahar šaj hine te pomožini bute manušenđe te oven deo andi hrišćansko skupština (w23.09 20 ¶1; 23 ¶11).

Oko duj berš palo odova so o Vaviloncija uništinđe o Jerusalim. O kralj Navuhodonosor dikhlja jekh strašno suno ando jekh baro kip. Ov phenđa so ka mudari sa pe mudra manušen, pa hem e Danilo, ako na phenena lese so dikhlja ko suno hem so značini odova suno (Dan. 2:3-5). O Danilo valjanđa diso sigate te ćerel, sose but manuša šaj hine te meren. Ov „đelo ko kralj hem zamolinđa le te del le vreme te šaj te mothovi lese so značini o suno“ (Dan. 2:16). Uzo odova so hine hrabro, o Danilo hine le hem bari vera. Sose phenaja odova? Ki Biblija nigde na pisini so o Danilo angleder phenđa so značinena o sune. Odolese ov phenđa pe amalenđe te „molinen pe e nebesko Devlese te mothovi lenđe milost hem te otkrijini lenđe odija tajna“ (Dan. 2:18). O Jehova odgovorinđa ko olenge molitve. Uzi Jehovasi pomoć, o Danilo šaj hine te phenel e kraljese so značini oleso suno. Ađahar, o Danilo hem olese amala aćhilje đivde (w23.08 3 ¶4).

Razmislin sose tano šukar te ove strpljivo. Ked hijam strpljiva, amen hijam pobahtale hem posmirime. O strpljenje šukar utičini upro amaro sastipe. Ked hijam strpljiva averencar, isi amen pana pošukar odnos olencar hem ki skupština isi pana pobaro jekhipe. Ako neko nervirini amen, na ka holjana sigate hem na ka ćera o problemi te ovel pana pobaro (Ps. 37:8, fusn.; Posl. 14:29). Ama soj tano najvažno, ked hijam strpljiva, amen oponašinaja amare nebesko Dade hem ovaja pana popaše oleja. Ćaće, o strpljenje tani but šukar osobina koja but pomožini amen! Iako nane uvek lokho te ova strpljiva, uzi Jehovasi pomoć amen šaj hem ponodri te razvijina akija osobina. Đi strpljivo ađićeraja te avel o nevo sveto, amen šaj te ova sigurna so „e Jehovase jaćha tane upro okola kola darana olestar, upro okola so osloninena pe ko oleso verno mangipe“ (Ps. 33:18). Odolese, sare valjani te ova odlučna te urava amen ko strpljenje (w23.08 22 ¶7; 25 ¶16-17).

O Jakov phenđa so o manuš šaj te vaćeri so isi le vera, ama olese delija na mothovena odova (Jak. 2:1-5, 9). Na primer, ov vaćerđa andi jekh osoba koja dikhela pe phrale ja phenja so nane len so te uraven ja so te han, ama na pomožini len. Čak iako odija osoba phenela so isi la vera, olake delija mothovena so nane la. Sar so o Jakov phenđa, „ađahar tano hem e veraja, ako na mothovi pe ko delija, muli tani“ (Jak. 2:14-16). O Jakov pominđa e Rava sar neko ko pi vera mothovđa ko delija (Jak. 2:25, 26). Oj šunđa ando Jehova hem haljilji so ov pomožini e Izraelcenđe (Is. Nav. 2:9-11). Olake delija mothovđe so isi la vera. Sebepi pi vera, oj zaštitinđa duje uhoden. Odolese, akija nesavršeno romni koja na hine Izraelka, anglo Jehova hine pravedno isto sar o Avraham. Olako primer mothovi kobor tano važno amari vera te mothova ko delija (w23.12 5-6 ¶12-13).

Amen na mangaja te haljova samo o osnovna buća ando Devleso Lafi. E Jehovaso sveti duh šaj te pomožini amen te haljova hem „e Devlese hor buća“ (1. Kor. 2:9, 10). Sose ne bi ko to lično proučibe istražineja diso so šaj te pomožini tut te ove popaše e Jehovaja? Na primer, šaj te istražine sar o Jehova mothovđa po mangipe pe slugenđe ko purano vreme hem sar odova mothovi so hem tut mangela. Ja šaj te proučine odolestar sar o Jehova manglja o Izraelcija te služinen lese ko purano vreme hem uporedin odova sar o Jehova mangela amen te služina lese. Isto ađahar, šaj detaljno te proučine o proročanstvija kola o Isus ispuninđa đi hine ki phuv. Tu šaj te uživine đi ka proučine asavke pohor buća ađahar so ka koristine o Indeks ando publikacije hem o Vodič kotar publikacije ando Jehovase svedokija. Ako hor proučineja i Biblija, odova šaj te zorjaćeri ti vera hem te pomožini tut te đane „koj tano o Devel“ (Posl. 2:4, 5; w23.10 18-19 ¶3-5).

O lafi „but“ kova o apostol Petar koristinđa doslovno značini „te raširina“. O dujto deo ando akava stiho phenela amenđe so šaj te ćera ako isi amen baro mangipe. Asavko mangipe šaj te ućhari but grehija kotar amare phralja hem phenja. Na primer, ako jekh astali tano but grebimo, amen šaj te la jekh stolnjako, te raširina le hem te ućhara odova so nane šukar. Isto ađahar, amen amare mangipaja šaj te „ućhara“ ili te oprostina na jekh, na duj, već but grehija kotar amare phralja. Amaro mangipe premalo phralja valjani te ovel but baro te šaj te oprostina lenđe – čak ked odova tano but pharo (Kol. 3:13). Ked oprostinaja averenđe, amen mothovaja so amaro mangipe tano zoralo hem so mangaja te ugodina e Jehovase (w23.11 11-12 ¶13-15).

Ked hine le 26 berš, o kralj Josija počminđa te obnovini o hram. Tegani „o sveštenik Helkija arakhlja i knjiga ando Jehovaso zakon kova hine dindo prekalo Mojsije.“ Ked šunđa so pisini ki odija knjiga, odmah ćerđa disave promene te šunel odova so pisini ko Zakon (2. Let. 34:14, 19-21). Da li čitineja i Biblija svako dive? Šaj već trudineja tut te ćere odova, ama da li uživineja đi čitineja? Da li obeležineja o stihija kola šaj te pomožinen tut? Ked hine le 39 berš, o Josija ćerđa jekh greška sebepi koja našalđa po životi. Umesto te oslonini pe upro Jehova, ov osloninđa pe upro peste (2. Let. 35:20-25). So šaj te sikljova akalestar? Bizo obzir kobor berš isi amen ili kobor berš hijam ki istina, amen valjani hem ponodri te roda e Jehova. Odova ćeraja ađahar so redovno molinaja amen aso oleso vođstvo, proučinaja oleso Lafi hem šunaja o savetija ando zrela hrišćanija. Tegani, verovatno na ka ćera bare greške hem ka ova bahtale (Jak. 1:25; w23.09 12 ¶15-16).

Ki Biblija pisini ando but šukar romnja kola manglje e Jehova hem verno služinđe lese. Odola romnja hine umerena hem verna ko sa (1. Tim. 3:11). Uzo odova, o phenja šaj ki pi skupština te arakhen phenjen kola ćaće mangena e Jehova hem kolendar šaj te sikljon but buća. Terne phenjalen, razmislinen ando disave phenja kaso primer šaj te oponašinen. Trudinen tumen te dikhen kola šukar osobine isi len hem sar šaj tumen te mothoven len. Jekh važno osobina koja valjani e hrišćanenđe te šaj te oven zrela tani i poniznost. Ako jekh phen tani ponizno, oj ka ovel la šukar amalipe e Jehovaja hem averencar. Na primer, i phen koja mangela e Jehova, ponizno ićeri pe ko načelo ando poglavarstvo kova dinđa olako nebesko Dad (1. Kor. 11:3). Odova načelo primenini pe ki skupština hem ki porodica (w23.12 18-19 ¶3-5).

O Jehova ando rom očekujini te mangel pe romnja hem te brinini pe aso olake materijalna, emocionalna hem duhovna potrebe. Ako razvijini sposobnost te razmislini, isi le poštovanje premalo romnja hem trudini pe te ovel pouzdano manuš, odova ka pomožini le te ovel šukar rom hem poglavari. Palo odova so khuvđan ko brako, šaj te ove dad. So šaj te sikljove ando Jehova kotar odova sar šaj te ove šukar dad? (Ef. 6:4). O Jehova otvoreno vaćerđa pe ćhavese e Isusese so mangela le hem soj tano premalo olesi volja (Mat. 3:17). Ako oveja dad, redovno vaćer te ćhavenđe kobor mangeja len. Često pohvalin len aso šukar buća kola ćerena. O dada kola oponašinena e Jehovaso primer, pomožinena pe ćhavenđe te oven zrela hrišćanija. Tu pana akana šaj te pripremine tut asi odija uloga ađahar so ka brinine tut averendar ki ti porodica hem ki skupština hem ađahar so ka sikljove te mothove lenđe so mangeja len hem so cenineja len (Jov. 15:9; w23.12 28-29 ¶17-18).

Iako verno služinaja e Jehovase, hem amen šaj te naborsaljova hem te oven amen pharipa sar sa avera manuša. Čak disave ka protivinen pe amenđe hem ka progoninen amen sose mrzinena e Devlese narodo. O Jehova na ka zaštitini amen ando sa odola problemija. Ama, ov obećini amenđe so ka pomožini amen (Is. 41:10). Uzi Jehovasi pomoć šaj te aćhova bahtale, te ana šukar odluke hem te aćhova lese verna. Ov obećini amenđe so ka del amen po mir (Fil. 4:6, 7). E Devleso mir odnosini pe ko mir kova isi amen ki godi hem ko vilo sose hijam paše amare nebesko Dadeja. Isto ađahar, odova „mir tano upreder odova so o manuš šaj te haljol“, so značini so asavko mir našti ni te zamislina. Da li disavo puti celone vileja molinđan tut e Jehovase hem palo odova osetinđan baro mir ko vilo? Odova tano sose o Devel dinđa tut mir (w24.01 20 ¶2; 21 ¶4).

O mangipe premalo Devel podstaknini e verna manušen te hvalinen oleso anav celone vileja. O kralj David đanđa so ked hvalinaja e Jehovaso anav, odova tano isto sar ked hvalinaja e Jehova. Ked šunaja o anav Jehova, ki godi avela amenđe jekh šukar osoba koja isi la šukar osobine hem sa o šukar buća so ćerđa. O David manglja premalo pe Dadeso anav te postupini sar premalo diso soj tano sveto hem te hvalini le. Odova manglja te ćerel celone vileja. Isto ađahar, o Levitija hvalinđe e Jehovaso anav. On priznajinđe so pe lafencar niked našti potpuno te hvalinen e Jehovaso sveto anav kobor ov odova zaslužini (Nem. 9:5). Sigurno asavke skromna hem iskrena hvale anđe radost e Jehovase (w24.02 9 ¶6).

Ako našti te ispunine disavo cilj, odova na značini so tu na vredineja anglo Jehovase jaćha (2. Kor. 8:12). Ma bistri odova so đi akana ćerđan. Ki Biblija pisini: „O Devel nane nepravedno te bistrel odova so ćerđan“ (Jevr. 6:10). Odolese, ni amen na valjani te bistra odova. Razmislin ando buća kola đi akana ćerđan – uljan paše e Jehovaja, propovedineja averenđe hem krstinđan tut. Sar so ispuninđan akala ciljija, ađahar šaj te ispunine hem o ciljija kola akana isi tut. Uvek trudin tut te dikhe sar o Jehova pomožini tut te ispunine to cilj hem odova ka ćerel tut but bahtalo (2. Kor. 4:7). Ako na odustajineja, ka dobine bare blagoslovija (Gal. 6:9; w23.05 31 ¶16-18).

O Jehova mangela te mothovi amenđe so mangela amen hem soj tano zadovoljno amencar. Ki Biblija isi amen duj situacije ked e Isusese phenđa soj tano oleso manglo Ćhavo hem soj tano pali olesi volja (Mat. 3:17; 17:5). Da li mangeja te šune sar o Jehova phenela tuće soj tano zadovoljno tuvaja? Ov na ka vaćeri tuvaja ando nebo, ama ka ćerel odova prekalo po Lafi. O Isus savršeno oponašinđa pe Dade. Odolese, ked čitinaja so o Isus phenđa pe učenikonđe, amen šaj te zamislina so o Jehova odola lafija phenela amenđe (Jov. 15:9, 15). O kušnje na značinena so o Jehova nane zadovoljno amencar. Umesto odova, dena amen prilika te mothova kobor tano baro amaro mangipe premalo Jehova hem kobor baro poverenje isi amen upro leste (Jak. 1:12; w24.03 28 ¶10-11).