Novembar

Ako hijan roditelj, pomožin te ćhavenđe te pripreminen pe komentarija premalo pe berša. Disavo puti, iako ki kula razmotrinena pe disave ozbiljna teme, sar soj tane o problemija ko brako ja o teme ando moral, verovatno isi jekh ja duj odlomkija ko kola šaj te komentarišinen te ćhave. Isto ađahar, pomožin te ćhavenđe te haljon sose o phral našti te del len komentari svako puti ked vazdena po vas. Ađahar ka pomožine len te na ovel lenđe pharo ked avera ka dobinen prilika te komentarišinen (1. Tim. 6:18). Sare šaj te pripremina komentarija kola ka hvalinen e Jehova hem ka ohrabrinen amare phralen hem phenjen (Posl. 25:11). Disavo puti, ked ko komentari mangeja kratko te phene to iskustvo, ma vaćer but tutar (Posl. 27:2; 2. Kor. 10:18). Umesto odova, vaćer ando Jehova, ando oleso Lafi hem ando oleso narodo (Otkr. 4:11; w23.04 24-25 ¶17-18).

O mangipe tano but važno sose pomožini amen te aćhova đangavde hem trezvena (Mat. 22:37-39). O mangipe premalo Devel pomožini amen te istrajina đi propovedinaja, iako šaj te oven amen problemija (2. Tim. 1:7, 8). Odolese so mangaja okolen kola na služinena e Jehovase, amen svedočinaja hem prekalo telefoni ja lila. Amen na našalaja amari nada so jekh dive on ka meninen pe hem ka počminen te ćeren odova soj tano šukar (Jezek. 18:27, 28). Amen mangaja hem amare phralen hem phenjen. Odova mothovaja ked „tešinaja hem zorjaćeraja jekh jekhe“ (1. Sol. 5:11). Sar so o vojnikija ko maribe jekh jekhese pomožinena hem amen hrabrinaja jekh jekhe. Isto ađahar, ni amen niked namerno na ka povredina amare phralen niti ka irina o lošno lošnipaja (1. Sol. 5:13, 15). Isto ađahar, amen mothovaja mangipe ađahar so poštujinaja okolen kola predvodinena ki skupština (1. Sol. 5:12; w23.06 10 ¶6; 11 ¶10-11).

Jekh način sar šaj te zorjaćera amari vera tano ađahar so ka razmislina andi otkupnina. I otkupnina uverini amen so o Devel sigurno ka ispunini sa pe obećanja. Ked razmislinaja odolestar sose o Jehova dinđa i otkupnina hem kobor bari žrtva ćerđa, amen pana pobuter verujinaja so ov ka ispunini po obećanje so ka živina večno. Sose šaj te phena odova? So i otkupnina sa uključinđa? O Jehova bićhalđa pe prvobijande Ćhave, koleja hine but paše, te avel ando nebo ki phuv sar savršeno manuš. Ki phuv, o Isus hine le razna pharipa. Ko krajo, but patinđa hem mulo. Kobor samo bari cena o Jehova platinđa! O Jehova niked ne bi mukhela pe Ćhave te patini hem te merel samo te bi amen jekh kratko vreme živinaja šukar (Jov. 3:16; 1. Petr. 1:18, 19). Odolese so dinđa pe mangle Ćhave, šaj te ova sigurna so o Jehova ka del amen o večno životi (w23.04 24-25 ¶17-18).

Da li o Jehova isi le želja te vazdel okolen so mulje? Naravno. Ov dinđa nekobor manuša ki Biblija te pisinen ando oleso obećanje so ka vazdel e mulen (Is. 26:19; Otkr. 20:11-13). A ked o Jehova diso obećini, ov odova uvek ispunini (Is. Nav. 23:14). O Jehova jedva ađićeri te vazdel okolen so mulje. Razmislin ando Jovese lafija. Ov hine sigurno so ako merela, o Jehova jedva ka ađićeri palem te dikhel le (Jov 14:14, 15, fusn.). O Jehova isi le bari želja palem te dikhel sa pe slugen kola mulje. Odolese, ov jedva ađićeri te irini len ko životi saste hem bahtale. So ka ovel okolencar kola mulje, a na hine len prilika te upoznajinen o ćaćipe? O Jehova mangela hem olen te uskrsnini (Dela 24:15). Ov mangela te del len prilika te oven olese amala hem te živinen večno (Jov. 3:16; w23.04 9 ¶5-6).

Sar šaj te zorjaćere ti nada? Ako isi tut nada so zauvek ka živine ki phuv, tegani čitin o stihija kola vaćerena ando raj hem razmislin olendar (Is. 25:8; 32:16-18). Isto ađahar, razmislin savo ka ovel o životi ko nevo sveto. Zamislin so već hijan ko raj. Ako redovno odvojinaja vreme te razmislina odolestar sar ka ovel amenđe ko raj, tegani amare problemija ka oven „trenutna hem lokhe“ (2. Kor. 4:17). I nada koja o Jehova dela amen šaj te zorjaćeri amen te istrajina ko pharipa. Ov već dinđa amen but buća kola pomožinena amen te ova zorale. Odolese, ked valjani amenđe pomoć te ispunina disavo pharo zadatko, te istrajina ki kušnja ja te aćhova radosna, amen valjani te molina amen e Jehovase hem te proučina oleso Lafi. Isto ađahar, valjani te dozvolina e phralenđe hem e phenjenđe te ohrabrinen amen. But tano važno te odvojina vreme te razmislina andi nada ki budućnost. Ako sa akava ćeraja, o Jehova obećini so ka zorjaćeri amen prekali „pi slavno moć hem ka del amen snaga koja valjani amenđe te šaj strpljivo hem radosno te istrajina ko sa“ (Kol. 1:11; w23.10 17 ¶19-20).

Ki molitva, amen šaj aso but buća te zahvalina amen e Jehovase. Odolese so svako šukar poklon avela olestar, amen šaj te zahvalina amen olese asi svako šukar buti koja isi amen (Jak. 1:17). Na primer, šaj te zahvalina amen asi šuži phuv hem aso šukar buća kola ćerđa amenđe. Isto ađahar, šaj te zahvalina amen lese so dinđa amen životi, porodica, amalen hem nada asi budućnost. Uzo odova, but hijam lese zahvalna so šaj te ova olese amala. Sare amen valjani te trudina amen te razmislina aso so šaj te zahvalina amen e Jehovase. Živinaja ko sveto kuri o manuša nane zahvalna. But putija, o manuša samo razmislinena odolestar sar šaj te dobinen odova so valjani lenđe, a na ando odova sar šaj te mothoven soj tane zahvalna aso buća kola isi len. Ako počminaja te razmislina sar olende, tegani amare molitve ka oven sar jekh spisko kuri pisini samo odova so valjani amenđe. Odolese, te na avel đi odova, valjani hem ponodri te mothova kobor hijam zahvalna e Jehovase aso sa o buća kola ćerela amenđe (Luka 6:45; w23.05 4 ¶8-9).

Sar amaro manglo Dad, e Jehovase nane sa jekh ked dikhela sar patinaja (Is. 63:9). Ipak, na ćhinavi sa amare kušnje kola podijekhvar šaj te oven sar reka ja jag (Is. 43:2). Ama, ov dela amen po lafi so ka pomožini amen hem so na ka mukhel o kušnje te ćeren amenđe trajno šteta. Isto ađahar, ov prekalo po sveti duh ka pomožini amen te istrajina (Luka 11:13; Fil. 4:13). Odolese, šaj te ova uverime so ka del amen odova so valjani amenđe te aćhova lese verna. O Jehova očekujini amendar te ovel amen poverenje upro leste (Jevr. 11:6). Disavo puti, šaj te mislina so amare problemija tane odobor bare so našti te ikljova ko krajo olencar. Čak šaj te počmina te sumnjina ko odova da li o Jehova ka pomožini amenđe. Ama, i Biblija uverini amen so uzi Jehovasi pomoć, šaj hem ko „zido“ te uklja (Ps. 18:29). Odolese, umesto te mukha amare sumnje te barjon, amen valjani te molina amen hem te ovel amen poverenje so o Jehova ka odgovorini ko amare molitve (Jak. 1:6, 7; w23.11 22 ¶8-9).

Akala stihija but šukar opisujinena soj tano o pravo mangipe. O lafija ando akala stihija tane but ohrabrujuća okolenđe kola tane ko brak, sose mothovena so olengo mangipe šaj te trajini večno. Da li o mangipe maškaro rom hem i romni ka trajini večno, zavisini ando odova kobor trudinena pe. Aće jekh primer: I jag šaj te thabljol sa đi neko ćhivela kašta. Ako niko na ćhivela kašta, i jag ka aćhol. Isto ađahar, o mangipe maškar o rom hem i romni šaj te ovel zoralo samo ako on zorjaćerena po brak. Disavo puti, o mangipe maškar o rom hem i romni šaj te šudrol, pogotovo ako isi len finansijska problemija, problemija sastipaja, ja problemija đi barjaćerena pe ćhaven. Te ne bi aćhola „o plamen kova avela ando Jah“, o rom hem i romni valjani te zorjaćeren po amalipe e Jehova (w23.05 20-21 ¶1-3).

So valjani te ćera te šaj te ova hrabra? Amare roditeljija šaj te podstakninen amen te ova hrabra. Ama, našti olendar te nasledina odija osobina. Jekh manuš valjani te sikljol te ovel hrabro. Odova tano isto sar ked sikljola disavi nevi veština. Jekh način sar šaj te sikljol odija veština tano ađahar so ka dikhel so oleso učitelj ćerela hem palo odova ka oponašini oleso primer. Isto ađahar, amen šaj te ova hrabra ked pažljivo posmatrinaja sar avera mothovena odija osobina hem palo odova oponašinaja olengo primer. Sar o Danilo, hem amen valjani šukar te penđara e Devleso Lafi. Valjani te ova paše e Jehovaja hem te phrava lese amaro vilo ki molitva. Isto ađahar, valjani te ovel amen pouzdanje upro Jehova hem te ova uverime so uvek ka pomožini amen. Tegani, ked amari vera ka ovel ko ispit, amen ka ova hrabra. But putija avera poštujinena e hrabro manušen. Isto ađahar, o hrabra manuša šaj te pomožinen nekase te penđari e Jehova. Ćaće, isi amen but šukar razlogija te ova hrabra (w23.08 2 ¶2; 4 ¶8-9).

O grčko lafi kova ko akava stih prevodini pe sar „proverinen“ koristinđa pe te opisini o način sar o manuša proverinđe o metalija. Odolese, amen valjani odova so šunaja ja čitinaja uvek te proverina da li tano ćaće. Odova pana považno ka ovel amenđe sar tani i bari nevolja sa popaše. Umesto te verujina ko sa so avera phenena, amen valjani te koristina amari sposobnost te razmislina hem te uporedina odova so čitinaja ja šunaja odoleja so i Biblija hem e Jehovasi organizacija phenena. Ked ka ćera odova, o lafija kola ka aven ando demonija na ka prevarinen amen (Posl. 14:15; 1. Tim. 4:1). Amen đanaja so e Devleso narodo ka preživini i bari nevolja. Ama, niko amendar na đanela so anela o tajsato dive (Jak. 4:14). Odolese, bilo te ova đivde ked ka avel i bari nevolja ja meraja angleder, ako đi o krajo ando amaro životi aćhovaja verna, amen ka dobina o večno životi. Hajde sare te da sa amendar hor te razmislina andi amari nada hem te ova spremna aso Jehovaso dive! (w23.06 13 ¶15-16).

Amen na đanaja sar disave biblijake proročanstvija ka ispuninen pe (Dan. 12:8, 9). Ama, odova so na đanaja sar tačno ka ispuninen pe o proročanstvija na značini so na ka ispuninen pe. Šaj te ova sigurna so o Jehova ka pomožini amen te haljova odova so valjani te đana ko pravo vreme, sar so ćerđa ko purano vreme. O narodija ka proglasinen „mir hem sigurnost“ (1. Sol. 5:3). Palo odova, o politička sile ka napadinen i hovavni religija hem ka uništinen la (Otkr. 17:16, 17). On ka napadinen e Devlese narodo (Jezek. 38:18, 19). Akala događaja ka legaren đi odova te počmini o maribe, o Armagedon (Otkr. 16:14, 16). Šaj te ova sigurna so sa akava ka ovel pana hari. Đi na avela odova vreme, hajde sare te mothova so hijam zahvalna amare nebesko Dadese ađahar so ka obratina pažnja ko proročanstvija hem ađahar so ka pomožina averenđe te ćeren odova (w23.08 13 ¶19-20).

Ked o apostol Pavle vaćerđa andi vera, andi nada hem ando mangipe, ov phenđa: „A najbaro maškaro olende tano o mangipe“ (1. Kor. 13:13). Sose o Pavle phenđa akava? Ki budućnost više na ka valjani amenđe vera ko Devlese obećanja niti nada so odola obećanja ka ispuninen pe, odolese so tegani već ka oven ispunime. Ama, uvek ka valjani amenđe mangipe premalo Jehova hem amare phralja hem phenja. U stvari, amen uvek ka valjani te barjaćera amaro mangipe. Isto ađahar, o mangipe mothovi so hijam prava hrišćanija. O Isus phenđa pe apostolenđe: „Premalo odova sare ka đanen so hijen me učenikija, ako mangena jekh jekhe“ (Jov. 13:35). Uzo odova, o Pavle phenđa so „o mangipe ćerela [amen te ova] ko jekhipe“ (Kol. 3:14). O apostol Jovan pisinđa e hrišćanenđe: „Okova so mangela e Devle valjani te mangel hem pe phrale“ (1. Jov. 4:21). Ked mothovaja mangipe jekh jekhese ađahar mothovaja so mangaja e Devle (w23.11 8 ¶1, 3).

Amaro hrišćansko đivdipe i Biblija uporedini jekha trkaja. Okola kola završinena odija trka, sar nagrada ka dobinen o večno životi (2. Tim. 4:7, 8). Amen valjani te da sa amendar hem ponodri te prasta, odolese so o krajo andi odija trka tano but paše. O apostol Pavle kova završinđa odija trka phenđa so valjani te ćera te šaj hem amen te završina la. Ov phenđa „te forda svako teret [. . .] hem istrajno te prasta i trka koja tani anglo amende.“Ked o Pavle pisinđa „te forda svako teret“ da li ov mislinđa so jekh hrišćanin na valjani te akhari nisavo teret? Na. Ov mislinđa so valjani te forda o nepotrebno teret. Asavko teret šaj te usporini amen ki trka hem te umorini amen. Te šaj te istrajina, amen valjani te haljova da li akharaja disavo nepotrebno teret hem odmah te cida le amendar. Ama, isi hem teret kova valjani te akhara a odova na isminaja te forda sose ako odova ćeraja, amen na ka aćhova ki trka aso životi (2. Tim. 2:5; w23.08 26 ¶1-2).

I razumnost ka pomožini amen te poštujina averengo mišljenje. Na primer, disave phenja volinena te šminkinen pe, a avera na. Disave hrišćanija uživinena umereno te pijen alkohol, a avera odlučinđe hić te na pijen. Sare mangaja te ovel amen šukar sastipe, ama ko različito način brininaja amendar. Ako mislinaja so uvek hijam u pravu hem probinaja averen te ubedina te ćeren odova so amen ćeraja, šaj te spotaknina len hem te ćera podele ki skupština. A odova sigurno na mangaja te ćera (1. Kor. 8:9; 10:23, 24). O Jehova na phenela amenđe sar te urava amen, ama dinđa amen načelija kola šaj te primenina. Valjani te urava amen ko način kova ka mothovi so hijam e Devlese sluge hem so hijam razumna, skromna hem razborita (1. Tim. 2:9, 10). Odolese, na mangaja te privucina pažnja odoleja so uravaja hem sar ka namestina amare bala (w23.07 23-24 ¶13-14).

O Jehova koristini o primer ando duj simbolična romnja te mothovi amenđe sar šaj te ovel amen bahtali budućnost. Okola so prihvatinena o poziv andi „bigođali romni“ trudinena pe te arakhen zadovoljstvo ko nemoral. Olenge postupkija legarena len „hor ko grobo“ (Posl. 9:13, 17, 18). A okola so prihvatinena o poziv andi romni koja predstavini i „ćaćutni mudrost“ akana uživinena (Posl. 9:1). Amen sikljovaja te manga odova so o Jehova mangela hem te mrzina odova so ov mrzini (Ps. 97:10). Isto ađahar, hijam but bahtale so šaj hem averen te vićina te prihvatinen o poziv andi „ćaćutni mudrost“. Amen hijam sar o sluge kola vićinena „kotar najuće thana ki diz: ’Koj tano neiskusno, nek avel akari!‘ “ Amen hem okola so prihvatinena akava poziv, nane amen korist samo akana. Ako hijam istrajna, odova šaj te pomožini amenđe zauvek te živina đi phiraja „ko drumo andi razboritost“ (Posl. 9:3, 4, 6; w23.06 24 ¶17-18).

Sar osetineja tut ked to kolega ja to amal ki škola pućela tut diso ando te verovanja? Da li isi tut trema? But amendar isi len. Ama, asavko pućibe šaj te pomožini amen te haljova so odija osoba ćaće mislini ja ko so verujini. Ked odova đanaja, tegani tano polokho te vaćera lenđe i šukar vest. Podijekh puti, neko šaj te pućel disavo pućibe odolese so na složini pe amencar ja mangela te raspravini pe. Odova na valjani te iznenadini amen, sose but manuša šunđe pogrešna informacije ando odova ko so verujinaja (Dela 28:22). Isto ađahar, amen živinaja ko „poslednja dive“ kuri but manuša tane „nespremna aso bilo savo dogovor“ hem čak tane okrutna (2. Tim. 3:1, 3). Šaj pućeja tut: „Sar šaj te ovav ljubazno hem taktično ked neko mangela te raspravini pe mancar ando odova ko so verujinava?“ I blagost ka pomožini tuće. I blago osoba šaj te aćhol mirno ked neko mangela te nervirini la ili ked nane sigurno sar te odgovorini ko disavo pućibe (w23.09 14 ¶1-2).

Ponekad, e Jehovasi organizacija savetujini amen te arakha amen ando materijalizam hem ando avera buća kola šaj te ćhiven amen te ćera diso so o Jehova na mangela. Ako hem ko akala buća sledinaja e Jehovaso vođstvo, ka ova but blagoslovime, ka ovel amen čisto savest hem ka izbegina but problemija (1. Tim. 6:9, 10; Is. 48:17, 18). Šaj te ova sigurna so o Jehova ki bari nevolja hem đi ka trajini e Hiljadaberšengi vladavina ka koristini e manušen te del amen vođstvo. Da li tegani ka sledina olese uputstvija iako šaj na ka sviđinen pe amenđe? But ka zavisini ando odova da li akana prihvatinaja e Jehovaso vođstvo. Odolese, valjani te da sa amendar uvek te sledina e Jehovaso vođstvo hem te poštujina e manušen kolen ov ćhivđa te brininen pe amendar (Is. 32:1, 2; Jevr. 13:17). Đi odova ćeraja isi amen šukar razlogija te ovel amen poverenje upro amaro Vodiči, o Jehova, kova pomožini amen te cida amen andi duhovno opasnost hem igari amen đi ko nevo sveto (w24.02 25 ¶17-18).

O apostol Pavle hine bahtalo đi služinđa e Jehovase, ama na hine lese uvek lokho. Često morandilo te putujini but dur, a tegani na hine lokho te putujini pe. Đi putujinđa, o Pavle hine ki opasnost ando reke „hem ki opasnost ando razbojnikija“. Isto ađahar, nekobor putija olese dušmanija čak marđe le (2. Kor. 11:23-27). Uzo odova, o phralja na ceninđe uvek odova so o Pavle pomožinđa lenđe (2. Kor. 10:10; Fil. 4:15). So pomožinđa e Pavlese te nastavini te služini e Jehovase? Ov sikljilo but buća e Jehovastar kotar oleso Lafi hem kotar po iskustvo oleja. Odova uverinđa le so o Jehova mangela le (Rimlj. 8:38, 39; Ef. 2:4, 5). Sebepi odova, hem ov but manglja e Jehova. Odova mangipe mothovđa ađahar so pomožinđa olese slugenđe (Jevr. 6:10; w23.07 9 ¶5-6).

But manuša đanena so amenđe valjanena o vlastija hem so valjani te šuna disave zakonija kola o „vlastija“ ćhivđe. Ama, odola ista manuša mislinena so isi len pravo te na šunen o zakonija kola na sviđinena pe lenđe ili aso kola on mislinena soj tane nepravedna. Ki Biblija pisini so sebepi o vlastija ko sveto isi patnja, so o Satana kontrolišini len hem so pana hari ka oven uništime (Ps. 110:5, 6; Prop. 8:9; Luka 4:5, 6). Isto ađahar, i Biblija phenela so ko suprotstavini pe e vlastenđe, suprotstavini pe okolese ko ćhivđa len. O Jehova dozvolinđa o vlastija te postojinen te šaj te ovel disavo redo ki phuv. Odolese, valjani te da len odova so pripadini lenđe. Odova značini te platina amare takse, te poštujina len hem te ova lenđe poslušna (Rimlj. 13:1-7). Disavo puti, odova šaj te ovel amenđe pharo sose mislinaja soj tane nepoštena hem so rodena amendar but pare. Ama, amen hijam lenđe podložna sose o Jehova phenela amenđe te ćera odova sa đi na rodena amendar diso so nane premalo olese zakonija (Dela 5:29; w23.10 8 ¶9-10).

Ked o Samson bijandilo, o Filistejcija vladinđe upro Izraelcija hem ćerđe lenđe bare pharipa (Sud. 13:1). O Izraelcija but patinđe sose o Filistejcija hine but okrutna premalo lende. Odolese, o Jehova birinđa e Samsone te „izbavini e Izraelcen ando Filistejenge vasta“ (Sud. 13:5). Te šaj te ćerel odova, o Samson morandilo te oslonini pe upro Jehova. Akana ka razmotrina jekh situacija ando Samsoneso životi koja mothovi kobor uzdajinđa pe upro Jehova. Jekh puti, i filistejsko vojska alji ki Lehija, koja verovatno hine ki Juda, te zarobini e Samsone. O manuša andi Juda darandile. Odolese odlučinđe te predajinen e Samsone. E Samsonese manuša phanlje le duje neve šelencar hem igarđe le ko Filistejcija (Sud. 15:9-13). Ama, e „Jehovaso duh dinđa snaga“ e Samsonese hem oslobodinđa pe ando odola šele. Palo odova, ov „dikhlja e heresi vilica, dolinđa la hem olaja mudarđa 1 000 manušen“ (Sud. 15:14-16; w23.09 2 ¶3-4).

O Jehova šaj te birini različita drumija te šaj te ispunini pi namera hem uvek tano uspešno odolese so „ćerđa sa te služini asi olesi namera“ (Posl. 16:4). Ki Biblija pisini so e Jehovasi namera tani „večno“ (Ef. 3:11). Odija namera tani večno sose o Devel mukhlja te nakhel but vreme đi potpuno na ispunini pe. Isto ađahar, sa odova so ka ćerel ka trajini večno. Ama, soj tani e Jehovasi namera hem so ov ćerđa te šaj te ispunini la? O Devel phenđa e prvo manušenđe koja tani olesi namera olencar. Ov phenđa lenđe: „Nek ovel tumen but ćhave hem tumendar nek oven but manuša, pheren i phuv hem vladinen upro late [. . .] hem upro stvorenja ki phuv“ (Post. 1:28). Ked o Adam hem i Eva grešinđe, sa o manuša nasledinđe o greh. Ama, o Jehova na meninđa pi namera. Ov samo meninđa o način sar ka ispunini pi namera. Ov odmah odlučinđa so ka ćerel jekh Kraljevstvo ko nebo prekalo kova ka ispunini pi namera e manušencar hem e phuvjaja (Mat. 25:34; w23.10 20 ¶6-7).

O Jehova šaj te pomožini amen te istrajina. Odova na ka ovel uvek lokho, posebno ako već jekh vreme borinaja amen jekhe problemeja. Disavo puti, amare slabostija šaj te oven pophare ando okola kolencar o Petar borinđa pe. Ama, o Jehova dela amen snaga te istrajina (Ps. 94:18, 19). Te dikha jekh primer. Jekh phral beršencar angleder te penđari o ćaćipe hine homoseksualco. Ama, ov potpuno meninđa po životi hem počminđa te živini premalo Jehovase merilija. Ipak disavo puti palem hine le pogrešna želje. So pomožinđa lese te istrajini? Ov phenela: „O Jehova zorjaćeri amen. Uzi Jehovasi pomoć, sikljiljum soj tano moguće hem ponodri te služina e Jehovase ađahar sar so ov mangela. Iako isi man mane, o Jehova hem ponodri zorjaćeri man“ (w23.09 23 ¶12).

Terne phraljalen, tumen na ka oven prekali rat zrela hrišćanija. Najangleder, mora te birinen šukar primerija kola ka oponašinen, te sikljon te ovel tumen sposobnost te razmislinen, te oven pouzdana, te sikljon disave praktična buća hem te pripreminen tumen asi budućnost. Ked razmislineja ando sa odova so valjani te ćere, šaj mislineja so odova tano but pharo. Ama, tu šaj te uspine. Ma bistri so o Jehova mangela te pomožini tut (Is. 41:10, 13). Isto ađahar, te phralja hem te phenja ki skupština ka pomožinen tut. Ked oveja zrelo hrišćanin, to životi ovela but šužo hem ispunimo. Terne phraljalen, but mangaja tumen! Nek o Jehova blagoslovini tumen đi dena sa tumendar te oven zrela hrišćanija (w23.12 29 ¶19-20).

Zamislin so hijan ko druženje e phralencar hem e phenjencar. Uživinena zajedno hem ko krajo ćerena jekh slika. U stvari, tu ćereja pana duj slike, te ovel tut rezerva ako i prvo na ikljilji šukar. Akana isi tut trin slike. Ama, primetineja so jekh phral ki jekh slika na ikljilo šukar. So ka ćere odola slikaja? Ka brišine la, sose isi tut pana duj slike kuri sare ikliljen šukar, pa hem odova phral. Šaj te phena so akala slike tane sar o uspomene kola isi amen amare phralencar hem phenjencar. Obično isi amen šukar uspomene olencar. Ama, šaj dijekhvar jekh phral ja phen phenđa ja ćerđa diso so na hine baš šukar. So valjani te ćera? Sose na pokušinaja te brišina odova andi amari godi sar so bi brišinaja jekh ando odola trin slike (Ef. 4:32). Amen šaj te bistra o tikne greške kola ćerđe amare phralja hem phenja sose pamtinaja o šukar uspomene kola isi amen olencar. Odola uspomene tane but skupocena (w23.11 12-13 ¶16-17).

O grčka lafija kola akate koristinđe pe odnosinena pe ko odova so i romni valjani pe urajbaja te mothovi poštovanje averenđe hem te lel ko obzir so avera mislinena. Kobor samo hijam ponosna upro amare phenja kola ićerena pe ko akava savet hem uravena pe skromno. I razboritost tani aver osobina koja mothovena o zrela phenja. Soj tani i razboritost? Odija tani sposobnost te đana soj tano ispravno, a soj tano pogrešno hem ko krajo te ana mudro odluka. Te dikha o primer andi Avigeja. Olako rom anđa lošno odluka koja šaj hine te utičini upro celo oleso ćher. I Avigeja odmah reagujinđa sose hine razborito. Oj đanđa so valjani te ćerel hem ađahar spasinđa buten (1. Sam. 25:14-23, 32-35). Isto ađahar, i razboritost pomožini amen te đana ked te vaćera, a ked te ćutina. Odija osobina pomožini amen te brinina amen averendar, ama te na mešina amen ko olenge privatna buća (1. Sol. 4:11; w23.12 20 ¶8-9).

O apostol Pavle akala lafija pisinđa e hrišćanenđe ko Rim. Ki odija diz o phralja hem o phenja već sikljilje ando Jehova hem ando Isus, hine len vera hem ulje hrišćanija. Odolese, o Devel proglasinđa len „pravedna“ sebepi olengi vera hem pomazinđa len sveto duhoja (Rimlj. 5:1). On jedva ađićerđe te dobinen pi nagrada hem hine sigurna so ka dobinen la. O Pavle kasnije pisinđa e pomazanikonenđe ko Efes andi olengi nada. On valjanđe te dobinen i „nagrada aso sveta“ (Ef. 1:18). Isto ađahar, ov phenđa e hrišćanenđe ko Kolos so ka dobinen pi nagrada. Ov phenđa lenđe: „[Nadinena tumen] so ka dobinen okova so tumenđe garavi pe ko nebo“ (Kol. 1:4, 5). Sa o pomazanikija isi len nada so ka živinen večno ko nebo kuri ka vladinen e Isuseja (1. Sol. 4:13-17; Otkr. 20:6; w23.12 9 ¶4-5).

O grčko lafi „arakh“ koristinđa pe te opisujini e vojnikonen kola arakhena i diz hem zaštitinena la ando napadija. O manuša kola živinđe ki diz, osetinđe pe bezbedno hem sigurno odolese so đanđe so o vojnikija arakhena la. Isto ađahar, ked e Devleso mir arakhi amaro vilo hem amari godi, tegani osetinaja mir sose đanaja so hijam sigurna (Ps. 4:8). Sar i Ana, čak iako amari situacija na ka menini pe odmah, amen šaj te ovel amen mir ko vilo (1. Sam. 1:16-18). Ked isi amen mir, polokho tano jasno te razmislina hem te ana šukar odluke. So valjani te ćera te šaj te ovel amen mir ki godi hem ko vilo? Te molina amen olese sa đi na dobinaja oleso mir (Luka 11:9; 1. Sol. 5:17). Ako hem tu isi tut disave pharipa, istrajin ki molitva hem ka dikhe sar e Jehovaso mir ka arakhi ti godi hem to vilo (Rimlj. 12:12; w24.01 21 ¶5-6).

Te šaj te proslavini pe Dadeso anav, o Isus nakhlja bare pharipa. O manuša marđe lese muj, vređinđe le hem vaćerđe hovajbe olestar. Ov đanđa so ko sa šunđa pe Dade hem na hine sose te lađal (Jevr. 12:2). Isto ađahar, ov đanđa so o Satana direktno napadinđa le ko odola phare momentija (Luka 22:2-4; 23:33, 34). O Satana nadinđa pe so o Isus na ka aćhol poslušno pe Dadese. Ama, ov dokažinđa so o Satana tano hovavno hem so e Jehovase sluge šaj te aćhon verna čak hem ked lenđe najpharo. Da li tu mangeja te ćere bahtalo e Kralje, e Isuse? Ako ja, tegani hem ponodri hvalin e Jehovaso anav ađahar so ka pomožine e manušenđe te penđaren e Devle. Ađahar ka mothove so đaja palo Isusese korakija (1. Petr. 2:21). Sar oleste, hem tu ka radujine e Jehova hem ka mothove so o Satana tano hovavno (w24.02 11-12 ¶11-13).

Ko zadnja panđ berš, više ando jekh milioni manuša krstinđe pe. Ked predajinaja amaro životi e Jehovase, amen birinaja te ova e Isusese učenikija hem te ćhiva e Jehovasi volja ko prvo than. Sar ćeraja odova? O Isus phenđa: „Ako neko mangela te đal palo mande, nek odreknini pe kokri pestar“ (Mat. 16:24). O grčka lafija kola tane prevodime sar „nek odreknini pe kokri pestar“ šaj te oven prevodime hem sar „ov valjani te phenel na kokri pese“. Sar e Jehovaso predajimo sluga, tu ka valjani te phene na aso buća kola šaj te ćhinaven tut te ćere e Jehovasi volja (2. Kor. 5:14, 15). Odova značini so ka valjani te phene na aso „delija ando telo“, sar soj tano o nemoral (Gal. 5:19-21; 1. Kor. 6:18). Da li ka ovel tuće pharo te ićere tut ko akala zapovestija? Na, ako mangeja e Jehova hem ako hijan uverimo so olese zakonija tane aso to šukaripe (Ps. 119:97; Is. 48:17, 18; w24.03 2 ¶1; 3 ¶4).

O Jehova dela po sveti duh okolenđe kolencar tano zadovoljno (Mat. 12:18). Amen šaj te puća amen: „Da li mothovava o osobine kola tane plod ando Devleso sveti duh?“ Da li primetinđan so akana hijan postrpljivo averencar, nego angleder te penđare e Jehova? So pobuter trudineja tut te razvijine o osobine kola tane plod ando Devleso duho, ka ove posigurno so o Jehova tano zadovoljno tuvaja. Prekali otkupnina o Jehova oprostini o grehija okolenđe kolencar tano ov zadovoljno (1. Tim. 2:5, 6). Ama so ako tu pana mislineja so o Jehova nane zadovoljno tuvaja, iako verujineja ki otkupnina hem krstinđan tut? Ma bistri so amen našti uvek te uzdajina amen ko amare osećanja, ama odolese šaj uvek te uzdajina amen ko Jehova. Ov upro okola kola isi len vera ki otkupnina dikhela sar pravedna hem but ka blagoslovini len (Ps. 5:12; Rimlj. 3:26; w24.03 30 ¶15; 31 ¶17).