Decembar

Da li o Jehova isi le moć te vazdel okolen kola mulje? Naravno! Ov tano „Svemoćno“ (Otkr. 1:8). Ov isi le moć te uništini sa pe dušmanen, pa čak hem o meribe (1. Kor. 15:26). Pana jekh razlog sose šaj te verujina so o Jehova šaj te uskrsnini okolen kola mulje tano so ov pamtini sa o buća. Ov svako ćereni vićini ko anav (Is. 40:26). Isto ađahar, pamtini sa okolen so mulje (Jov 14:13; Luka 20:38). Ov pamtini čak hem o najtikno detalji olendar. Na primer, sar izgledinđe, save manuša hine hem save iskustvija ili uspomene hine len. Amen šaj te ova sigurna so o Jehova ka vazdel e mulen odolese so isi le hem želja hem moć te ćerel odova. Pana jekh razlog sose verujinaja ko odova obećanje tano sose o Jehova već ćerđa odova. Ko purano vreme, ov disave verno manušenđe hem e Isusese dinđa moć te vazden e mulen (w23.04 9-10 ¶7-9).

Ako vaćeraja ko jekh taktično hem blago način, o manuša ka oven pospremna te nastavinen o razgovor. Naravno, ako neko mangela samo te raspravini pe amencar ili te marel amenđe muj, amen na mangaja te nastavina odova razgovor (Posl. 26:4). Ama, but manuša nane asavke, u stvari but đene mangena te šunen amen. Ked hijan blago odova šaj but te pomožini tuće. Molin tut e Jehovase te del tut snaga te ove blago ked o manuša pućena tut disavo osetljivo pućibe ja ked kritikujinena tut. Ma bistri so ked hijan blago, odova šaj te sprečini o razlike ando mišljenja te pretvorinen pe ki rasprava. Ked hijan blago hem mothoveja poštovanje, odova šaj te pomožini e manušenđe te meninen po mišljenje amendar hem ando odova sostar i Biblija sikavi. Odolese, uvek ov spremno te branine amare verovanja, ama đi odova ka ćere, mothov „blagost hem hor poštovanje“ (1. Petr. 3:15). Mukh i blagost te ovel ti snaga (w23.09 19 ¶18-19).

Isi štar načinija sar šaj te mothova strpljenje. Sar prvo, i strpljivo osoba na holjani sigate. Ked avera ćerena diso so nervirini la, oj aćhola smirimi hem na ponašini pe premalo lende ađahar sar so on ponašinena pe premalo late (Izl. 34:6). Sar dujto, smireno ađićeri. Ako valjani diso te ađićeri pobuter nego so očekujinđa, asavki osoba trudini pe te aćhol smirimi hem te na holjani (Mat. 18:26, 27). Sar trito, nane sigutni. Naravno, disavo puti ka valjani te ćerel o buća ki sig. Ama, ked isi la disavo važno zadatko oj na počmini le bizo plan hem na siđari te završini le so posig. Umesto odova, odija osoba odvojini dovoljno vreme te planirini sar te ćerel odova zadatko. Palo odova, odvojini dovoljno vreme šukar te ćerel le. Sar štarto, istrajini ko po problemi bizo te žalini pe. Oj ka del sa pestar hem ponodri radosno te istrajini (Kol. 1:11). E Devlese sluge valjani te trudinen pe te mothoven strpljenje ko sa akala buća (w23.08 20-21 ¶3-6).

O najvažno razlog sose valjani te zaštitina amaro vilo tano sose o Jehova ispitini le. Odova značini so ov koro amende dikhela o buća kola o manuša našti te dikhen hem đanela save hijam andral. Ov ka mangel amen ako hem ponodri razmislinaja ando olese savetija kola šaj te pomožinen amen te dobina o večno životi (Jov. 4:14). Amen na ka mukha than e Bengese hem olese lošno svetose te ćhiven disave lošna buća ki amari godi (1. Jov. 5:18, 19). Ked hijam paše e Jehovaja, amaro mangipe hem poštovanje premalo leste barjola. Odolese so na mangaja te povredina amare Dade, čak ni ki godi na ka avel amenđe te ćera odova soj tano lošno. I Marta, jekh phen andi Hrvatska koja hine ko iskušenje te ćerel nemoral, phenela: „Hine maje pharo te razmislinav ando odova soj tano ispravno hem te borinav man protiv i želja te ćerav odova soj tano neispravno. Ama, o strahopoštovanje premalo Jehova zaštitinđa man.“ Sar šaj hem amen te zaštitini? I Marta phenela so hor razmislinđa kola posledice bi ovena la ako bi ćerela odova soj tano pogrešno. Hem amen šaj te ćera odova (w23.06 20-21 ¶3-4).

O Isus đanđa so e Jehovasi namera tani te cidel i lađ kotar po sveto anav. Odolese, ov sikavđa pe učenikonen te molinen pe ađahar: „Amaro Dad, kova hijan ko nebo, nek svetini pe to anav“ (Mat. 6:9). O Isus đanđa so i najvažno buti tani te posvetini pe e Jehovaso anav. Niko na posvetinđa e Devleso anav sar o Isus. Ama, ked olese dušmanija astarđe le, on optužinđe le so na mothovi poštovanje aso Devleso anav. O Isus đanđa soj tano najbaro greh te vaćeri protiv pe Dadeso sveto anav. Ov hine but uznemirimo so ka ovel nepravedno osudimo sebepi odova. Odova šaj hine o glavno razlog sose hine lese „but pharo“ nekobor satija angleder te astaren le (Luka 22:41-44; w24.02 11 ¶11).

Đi prastaja ki trka aso životi, amen valjani e Jehova hem e Isuse te manga pobuter andi amari familija (Mat. 10:37). Ama, odova na značini so na valjani te ispunina amare odgovornostija ki porodica. U stvari, te šaj o Jehova hem o Isus te oven zadovoljna amencar, svako amendar valjani te ispunini pi uloga koja isi le ki porodica (1. Tim. 5:4, 8). Ako ka ćera odova, amen ka ova pobahtale. O Jehova kova ćerđa i porodica đanela so oj šaj te ovel bahtali samo ako o rom hem i romni mangena pe hem poštujinena pe, ako o roditeljija mangena hem šukar vaspitinena pe ćhaven hem ako o ćhave šunena pe roditeljen (Ef. 5:33; 6:1, 4). Savi god uloga isi tut ki porodica, trudin tut te primenine o savetija ando Devleso Lafi. De sa tutar šukar te koristine amare publikacije. Odothe isi praktična predlogija sar šaj te primenine e biblijake načelija (w23.08 28 ¶6-7).

Jekh phen valjani te sikljol te ćerel disave praktična buća. O buća kola o ćhaja sikljona đi tane tikne, ka koristini lenđe celo životi. Na primer, sikljov šukar te čitine hem te pisine. Ko disave kulture, nane odobor važno jekh đuvli te đanel te čitini hem te pisini. Ama, amenđe e hrišćanenđe tano odova but važno (1. Tim. 4:13). Odolese, iako nane lokho, de sa tutar te sikljove šukar te čitine hem te pisine. Sar ka pomožini tuće odova? Ked đaneja te čitine hem te pisine šaj polokho te arakhe buti. Isto ađahar, ka ovel tuće polokho te proučine e Devleso Lafi hem te sikave averen ando Devel. Soj tano najšukar, đi ka čitine e Devleso Lafi hem hor ka razmisline, odova ka pomožini tut te ove pana popaše e Jehovaja (1. Tim. 4:15; w23.12 20 ¶10-11).

Molin tut e Jehovase te pomožini tut ked isi tut kušnje. Sar nesavršena manuša, amen svako dive borinaja amen odoleja te na ćera diso soj tano pogrešno. Ama, o Satana dela sa pestar te ovel amenđe sa popharo. Jekh način sar ćerela odova tano ađahar so mangela te meljaćeri amari godi prekali nemoralno zabava. Sebepi odova šaj te ova melale anglo Jehova hem šaj lokho te ćera disavo ozbiljno greh (Mar. 7:21-23; Jak. 1:14, 15). Amenđe valjani e Jehovasi pomoć te borina amen te na ćera odova soj tano pogrešno. Ked o Isus sikavđa pe učenikonen sar te molinen pe, ov phenđa: „Ma mukh te pera ko iskušenje, nego cide amen ando Beng“ (Mat. 6:13). O Jehova mangela te pomožini amenđe. Ama, amen valjani te molina le aso odova (w23.05 6-7 ¶15-17).

Ked o rom hem i romni ceninena po amalipe e Jehovaja, on tane spremna te primeninen olese savetija. Odova ka pomožini lenđe te rešinen hem te ciden pe ando problemija, sebepi kola šaj olengo mangipe te šudrol. O manuša kola tane paše e Jehovaja, dena sa pestar te oponašinen le hem te razvijinen o osobine kola ov isi le. Odolese, on trudinena pe te oven šukar, strpljiva hem te oprostinen jekh jekhese (Ef. 4:32–5:1). Ked o rom hem i romni mothovena asavke osobine, olengo mangipe ovela pana pobaro. Jekh phen koja vićini pe Lena, koja tani ko brak pobuter ando 25 berš, phenela: „Lokho tano te mange hem te poštujine e duhovno manuše.“ Te razmotrina jekh primer andi Biblija. Ando sa e Davidese potomkija, o Jehova birinđa e Josife hem e Marija te oven e Isusese roditeljija. Sose? Odolese so on hine paše e Jehovaja hem ov đanđa so on uvek ka ćhiven le ko prvo than ko po brak (w23.05 21 ¶3-4).

Iako amaro vođa, o Isus, tano savršeno, o phralja kola predvodinena ki phuv nane. Šaj te ovel amenđe pharo te šuna len, posebno ked phenena amenđe te ćera diso so amen na mangaja. O apostol Petar dobinđa jekh uputstvo kova ki početka na hine lese lokho te šunel. Ked o anđeo phenđa lese te hal o životinje kola hine nečista premalo Jehovaso zakon, ov odbinđa hem odova na jekhvar već trivar (Dela 10:9-16). Sose? Odova nevo uputstvo na hine lese logično. Ov sikljilo te ćerel o buća ko jekh aver način. Ki aver strana, o apostol Pavle hine „spremno te šunel“, ked o starešine ko Jerusalim phenđe lese te lel peja štare manušen te đal ko hram hem odothe obredno te čistini pe te šaj te mothovi averenđe so ov poštujini o Zakon. O Pavle đanđa so o hrišćanija na valjani više te ićeren pe ko odova Zakon hem so ov na ćerđa ništa pogrešno. Ama, ipak šunđa odova so phenđe lese te ćerel. Tajsato dive, o Pavle legarđa odole manušen peja hem obredno čistinđa pe olencar (Dela 21:23, 24, 26). Odolese so šunđa e phralenge uputstvija, o Pavle pomožinđa te ovel jekhipe ki skupština (Rimlj. 14:19, 21; w23.10 10 ¶15-16).

Šaj ni ki godi ne bi avela tuće so jekh ando važna osobine aso amalipe tani i dar. Ama, okola kola mangena te oven paše e Jehovaja valjani te daran olestar ili te ovel len strahopoštovanje. Bizo obzir kobor berš služinaja e Jehovase, sare amen valjani te ovel amen dar ando Jehova ja strahopoštovanje. Ama, so značini te ovel amen dar ando Devel? Jekh manuš kova isi le ispravno dar ando Jehova, mangela le hem na mangela te ćerel diso so šaj te rumini olengo amalipe. O Isus hine le asavki „dar ando Devel“, avere lafencar hine le strahopoštovanje (Jevr. 5:7). Ov na darandilo ando Jehova sebepi i kazna (Is. 11:2, 3). Umesto odova, ov but manglja e Jehova hem manglja te šunel le (Jov. 14:21, 31). Sar o Isus hem amen valjani te ovel amen strahopoštovanje premalo Devel sebepi soj tano manglo, mudro, pravedno hem moćno. Isto ađahar, đanaja so o Jehova but mangela amen hem olese tano važno sar amen reagujinaja ked sikavi amen. Odoleja so ćeraja šaj te ćera o Jehova te ovel bahtalo ili te osetini dukh ko vilo (Ps. 78:41; Posl. 27:11; w23.06 14 ¶1-2; 15 ¶5).

Ked o kralj Ozija ulo moćno, ov bisterđa so o Jehova dinđa le sa odova so hine le. So sikljovaja olestar? Na valjani te bistra so o blagoslovija hem o zadatkija avena ando Jehova. Umesto te hvalina amen sebepi o buća kola ćeraja, valjani te ova zahvalna e Jehovase so pomožini amen te ćera sa odova (1. Kor. 4:7). Amen valjani te ova ponizna hem te priznajina so hijam nesavršena hem so podijekh puti valjanena amenđe ozbiljna savetija. Jekh phral kova isi le prekalo 60 berš, pisinđa: „Ked avera primetinena me greške, sikljiljum te na povredini man hem te na obeshrabrini man odova. Ked dobinava disavo ozbiljno savet aso me ćhavorikane greške kola podijekh puti ćerava, pokušinava te popravinav man hem te nastavinav hem ponodri te dav e Jehovase mo najšukar.“ Ako šunaja e Jehova hem hijam ponizna, amen ka ovel amen ćaće bahtalo životi (Posl. 22:4; w23.09 10 ¶10-11).

O hrišćanija ko prvo veko valjanđe te oven istrajna. Uzo odova so hine len pe problemija sar sa avera manuša, on hine len problemija hem odolese so hine hrišćanija. But olendar na hine len samo progonstvo kotar jevrejska religiozna vođe hem kotar rimsko vlast, već hem kotar pi porodica (Mat. 10:21). Isto ađahar, podijekh puti hem ki skupština morandilje te borinen pe te na utičinen upro lende o otpadnikija hem odova so on sikavđe (Dela 20:29, 30). Ama, odola verna hrišćanija istrajinđe (Otkr. 2:3). Sar? Razmislinđe ando primerija kola vaćerena andi istrajnost, sar soj tano o primer ando Jov (Jak. 5:10, 11). Molinđe pe e Jehovase asi snaga (Dela 4:29-31). Isto ađahar, razmislinđe odolestar sar o Jehova ka nagradini len sebepi olengi istrajnost (Dela 5:41). Amen isto šaj te istrajina ko amare pharipa ako kotar Biblija hem amare publikacije proučinaja o primerija ando manuša kola hine istrajna (w23.07 3 ¶5-6).

O Jehova hem o Isus na ka odustajinen amendar. Palo odova so odrekninđa pe ando Isus, o Petar valjanđa te odlučini da li ka aćhol e Isuseso sledbeniko. O Isus usrdno molinđa pe e Jehovase te na slaboni e Petaresi vera. Ov phenđa e Petarese so molinđa pe aso odova hem mothovđa lese so isi le poverenje upro leste so ov šaj te zorjaćeri pe phralen (Luka 22:31, 32). Akala e Isusese lafija sigurno but značinđe e Petarese. Ked valjani te ana disavi važno odluka ko životi, o Jehova šaj prekalo starešine te uverini amen so šaj te aćhova lese verna (Ef. 4:8, 11). Sar so o Jehova brininđa pe ando Petar hem ando avera apostolija, ađahar šaj te brinini pe hem amendar ako ćhivaja i služba ko prvo than (w23.09 24-25 ¶14-15).

O Jehova dikhela hem o najtikne buća kola ćeraja averenđe. Ov upro odova dikhela sar žrtva hem sar dugo kova ka irini lenđe. Ako angleder služinđan sar sluga pomoćnik ja starešina, ma bistri so o Jehova pamtini sa so tu angleder ćerđan hem so odova ćerđan ando mangipe (1. Kor. 15:58). Isto ađahar, dikhela o mangipe kova tu akana mothoveja. O Jehova mangela te barjaćera amaro mangipe premalo leste hem premalo amare phralja hem phenja. Amaro mangipe premalo Jehova šaj te barjaćera ađahar so redovno ka čitina e Devleso Lafi hem hor ka razmislina ando odova so čitinđam hem redovno ka molina amen. O mangipe premalo phralja hem phenja šaj te barjaćera ađahar so ka pomožina len ko praktična načinija. Sar amaro mangipe barjola, amen ka ova sa popaše hem e Jehovaja hem amare phralencar hem phenjencar. A odova amalipe šaj te trajini zauvek (w23.07 10 ¶11; 11 ¶13; 13 ¶18).

Svako hrišćanin valjani te odlučini sar ka brinini pe ando po sastipe. Ked o hrišćanija odlučinena savo lečenje ka prihvatinen, on šunena e Devleso zakon kova vaćeri so na valjani te len rat hem te ćeren spiritizam (Dela 15:20; Gal. 5:19, 20). Ama, sa avera buća ando odova sar ka lečinen pe, kokri odlučinena. Bizo obzir so odlučinaja, valjani te poštujina averengo pravo te odlučinen sar ka lečinen pe. Odolese, na valjani te bistra akala štar buća: (1) Samo e Devleso Kraljevstvo ka anel savršeno sastipe (Is. 33:24). (2) Svako hrišćanin valjani te ovel uverimo soj tano olese najšukar (Rimlj. 14:5). (3) Na valjani te osudina averen, ama ni te spotaknina len odoleja so odlučinaja (Rimlj. 14:13). (4) O hrišćanija mothovena mangipe hem haljona so o jekhipe ki skupština tano považno ando olengo lično mišljenje (Rimlj. 14:15, 19, 20; w23.07 24 ¶15).

Da li mangeja e Jehova? Naravno. But manuša ko purano vreme isto manglje e Jehova (Ps. 104:33, 34). But olendar ćerđe bare žrtve te šaj te služinen lese. Odova ćerđe hem o nazireja ko purano vreme. O nazireja hine revna Izraelcija kola ćerđe disave žrtve te šaj te služinen e Jehovase ko posebno način. Premalo Mojsijeso zakon jekh murš ili jekh đuvli šaj hine te del jekh posebno zavet so ka služini sar nazirej jekh određeno vreme (Br. 6:1, 2). Sebepi akava zavet, on ićerđe pe ko disave buća ko kola avera Izraelcija na valjanđe. Sose jekh Izraelco odlučinđa te ovel nazirej? Verovatno ko odova podstakninđa le o mangipe premalo Jehova hem i zahvalnost aso sa odova so o Jehova ćerđa lese (Pon. zak. 6:5; 16:17; w24.02 14 ¶1-2).

Ki Biblija, o hebrejsko lafi asi „vernost“ ja „verno mangipe“ značini te ova potpuno predana, privržena hem odana. Asavko mangipe o Devel mothovi pe slugenđe. Odova isto lafi koristini pe te opisini pe o mangipe kova olese sluge mothovena jekh jekhese (2. Sam. 9:6, 7). Sar đala o vreme, amari vernost premalo leste šaj te ovel sa pobari. Akana ka dikha sar e Danilosi vernost ulji pana pobari. But putija, e Danilosi vera hine ko ispit. Jekh ando najbaro ispit hine ked hine le prekalo 90 berš. O službenikija kola služinđe e kraljese na manglje e Danilo hem na poštujinđe olese Devle. Sebepi odova, ćerđe plan te mudaren le. On ćhivđe e kralje te ćhivel jekh zabrana sebepi koja o Danilo mora te odlučini da li ka šunel e kralje ili pe Devle. Te šaj te mothovi soj tano verno e kraljese, o Danilo valjanđa 30 dive te na molini pe e Jehovase. Ama, ov na ćerđa odova (Dan. 6:12-15, 20-22; w23.08 5 ¶10-12).

O Jehova mangela te istrajina hem te mothova mangipe amare phralenđe hem phenjenđe. Ako jekh phral ja phen povredini amen, na valjani te mislina so manglje namerno te ćeren odova, već so na razmislinđe angleder diso te phenen (Posl. 12:18). O Jehova mangela pe verna slugen, iako isi len mane. Ov na odustajini amendar ked ćeraja greške niti ićeri i holi (Ps. 103:9). Ćaće tano but važno te oponašina amare mangle Dade, e Jehova hem te oprostina okolenđe kola povredinđe amen (Ef. 4:32–5:1). Ma bistri so sar tano o kraj sa popaše amen valjani te aćhova paše amare phralencar hem phenjencar. Šaj te ađićera so ka ovel baro progonstvo. Čak šaj te ova ko phanlipe sebepi amari vera. Tegani, amare phralja hem phenja but ka valjanen amenđe (Posl. 17:17; w24.03 15-16 ¶6-7).

Ki Biblija isi pana primerija ando avera terne kola hine paše e Jehovaja, kolen ov manglja hem kola hine len bahtalo životi. O David hine jekh olendar. Ked hine terno, ov birinđa te služini e Jehovase hem kasnije ulo verno kralj (1. Kralj. 3:6; 9:4, 5; 14:8). Ked proučineja ando David, oleso primer šaj te ohrabrini tut verno te služine e Jehovase. Isto ađahar, šaj te ohrabrini tut o primer ando Marko hem ando Timotej. On počminđe te služinen e Jehovase ked hine but terne hem nastavinđe verno te služinen lese. Sar akana koristineja to životi ka utičini ko odova savi budućnost ka ovel tut. Ako oslonineja tut upro Jehova, a na upro to đandipe, ov ka pomožini tut te ane mudra odluke. Tu šaj te ovel tut bahtalo životi. Ma bistri, o Jehova cenini odova so ćereja olese. Nane pošukar način te koristine to životi nego te služine amare nebesko Dadese, e Jehovase (w23.09 13 ¶18-19).

O apostol Pavle đanđa so olese phralja hem phenja tane nesavršena. Na primer, ked alo ki skupština ko Jerusalim disave olendar darandile olestar (Dela 9:26). Kasnije, disave vaćerđe lese palo dumo sose manglje te ćhiven averen te našaljen po poverenje upro leste (2. Kor. 10:10). O Pavle dikhlja sar jekh starešina anđa pogrešno odluka sebepi koja šaj hine avera te spotakninen pe (Gal. 2:11, 12). Isto ađahar, oleso saradnik, o Marko, but razočarinđa le (Dela 15:37, 38). Sebepi sa akala buća, ov šaj hine te cidel pe ando phralja hem te na družini pe olencar sose but povredinđe le. Ama, ov pozitivno razmislinđa ando pe phralja hem phenja hem nastavinđa te služini e Jehovase verno. Ama, so pomožinđa le te ovel istrajno? O Pavle manglja e phralen hem e phenjen. O mangipe pomožinđa lese te na usredsredini pe ko olenge mane, nego ko olenge šukar osobine (w24.03 15 ¶4-5).

But izveštaja ki Biblija mothovena amenđe kobor tani akija osobina vredno. Te dikha e Isakeso primer. Ked selinđa pe ki filistejsko phuv, ki dolina Gerar, olese zavidna komšije phanlje o bunarija kola olese dadese sluge hanđe. Umesto te borini pe aso pe pravija, o Isak selinđa pe pekle porodicaja ko aver than hem hanđa avera bunarija (Post. 26:12-18). Ama, o Filistejcija phenđe so hem odola bunarija tane olenge odolese soj tane ki olengi phuv. O Isak mirno reagujinđa (Post. 26:19-25). So pomožinđa lese te ovel blago čak hem ked avera hine odlučna te provocirinen le? Ov but razmislinđa ando pe roditeljengo primer. Kotar Avraham sikljilo sar ko mirno način te rešini diso, a andi Sara sikljilo so valjani te ovel le „mirno hem blago duh“ (1. Petr. 3:4-6; Post. 21:22-34; w23.09 15 ¶4).

O Jehova bićhalđa pe Ćhave te avel ki phuv, te sikavi e manušen ando odova Kraljevsto hem te otkupini amen ando greh hem ando meribe. Palo odova so uskrsninđa, o Isus irinđa pe ko nebo te vladini sar Kralj ko Devleso Kraljevstvo. I glavno tema andi Biblija tani te posvetini pe e Jehovaso anav prekalo Kraljevstvo ko kova ka vladini o Hrist, kova ka ispunini e Devlesi namera e phuvjaja. E Jehovasi namera našti te menini pe. Ov obećini amenđe so ka ćerel sa odova so phenđa (Is. 46:10; Jevr. 6:17, 18). I phuv ka ovel raj kuri e Adamese hem e Evake savršena hem pravedna potomkija „zauvek ka živinen“ (Ps. 22:26). Ama, odova nane sa. Ov ka ćerel sa olese sluge kola tane ko nebo hem ki phuv te oven ko jekhipe. Tegani sare ka oven podložna e Devlese, pe Vrhovno Vladarese (Ef. 1:8-11). Ćaće oduševini amen odova sar o Jehova ka ispunini pi namera (w23.10 20 ¶7-8).

Ked o Jevreja reslje ko Jerusalim, upro lende utičinđa i ekonomsko hem i političko situacija koja hine but lošno. Uzo odova, protivinđe pe lenđe hem o okolna narodija. Odolese, disavenđe hine but pharo te den sa pestar te učestvujinen ko odova te obnovini pe e Jehovaso hram. Odolese o Jehova bićhalđa duje prorokonen e Ageje hem e Zaharija te pomožinen e narodose te oven palem revna. Odola duj prorokija but ohrabrinđe e narodo (Ag. 1:1; Zah. 1:1). Ama oko 50 berš palo odova so o Jevreja alje ko Jerusalim, e narodose palem valjanđa ohrabrenje. Tegani, o Jezdra kova hine vešto prepisivači ando Devleso Zakon, kotar Vavilon đelo ko Jerusalim te ohrabrini e Devlese narodo hem te podstaknini len te ćhiven e Jehova ko prvo than ko po životi (Jezd. 7:1, 6). Odova so o Agej hem o Zaharija phenđe e Devlese narodose but pomožinđa len te ovel len poverenje upro Jehova ked hine len pharipa. Isto ađahar, odova šaj te pomožini hem amenđe te ovel amen poverenje upro Jehova đi nakhaja disavo pharipe (Posl. 22:19; w23.11 14-15 ¶2-3).

Sar mothovaja so mangaja e phralen hem e phenjen? Jekh način tano ađahar so tešinaja len. I saosećajnost ka podstaknini amen te utešina amare phralen hem phenjen (1. Sol. 4:18). Ked oprostinaja lenđe, čak ked odova nane lokho, amaro mangipe ka ovel sa pozoralo. Sose tano avdije posebno važno te manga jekh jekhe? Zapazin so o Petar phenđa: „O krajo ando sa o buća tano paše. Odolese [. . .] but mangen jekh jekhe“ (1. Petr. 4:7, 8). Sar tano o krajo ando akava lošno sveto sa popaše, so šaj te očekujina? O Isus phenđa pe učenikonenđe: „Sa o narodija ka mrzinen tumen sebepi mo anav“ (Mat. 24:9). Te šaj te aćhova verna e Jehovase ko akava vreme, valjani te ova ko jekhipe. Ako mangaja amare phralen hem phenjen, o Satana niked na ka šaj te odvojini amen odolese so o mangipe povezini amen (Fil. 2:1, 2; w23.11 13 ¶18-19).

O ćaćipe ando Devleso Lafi isi le bari moć. Ked sikavaja e manušen ando Jehova, amen šaj te dikha sar o ćaćipe utičini upro lende. On više na verujinena ko Bengese hovajba hem počminena te dikhen e Devlese but šuže osobine. Oduševinena pe ked dikhena kobor tano moćno o Devel (Is. 40:26). On stekninena poverenje upro Devel sebepi olesi savršeno pravda (Pon. zak. 32:4). Isto ađahar, sikljona but andi olesi mudrost (Is. 55:9; Rimlj. 11:33). Utešini len odova so o Devel tano mangipe (1. Jov. 4:8). Sar ovena popaše e Jehovaja, olengi nada so ka živinen večno ovela sa pozorali. Ćaće tani bari čast te pomožina e manušenđe te oven paše amare nebesko Dadeja. Ked odova ćeraja, o Jehova dikhela amen sar pe „saradnikija“ (1. Kor. 3:5; w24.02 12 ¶15).

Ako proučineja i Biblija ja bariljan ko ćaćipe, da li razmislineja odolestar te krstine tut. Odova tano but šukar cilj! Angleder te krstine tut, valjani te predajine to životi. Sar predajineja tut e Jehovase? Ki jekh molitva obećineja so ka služine samo olese hem so olesi volja ka ćhive ko prvo than. Isto ađahar, obećineja lese so hem ponodri ka mange le „celone vileja, celona dušaja, celona gođaja hem celona snagaja“ (Mar. 12:30). O predanje tano maškaro tute hem o Jehova. Ki aver strana, o krštenje tano javno hem mothovi averenđe so već predajinđan tut e Jehovase. To predanje tano jekh posebno obećanje hem valjani te trudine tut te ispunine le sar so o Jehova očekujini tutar te ćere odova (Prop. 5:4; w24.03 2 ¶2; 3 ¶5).

Ko svako brak isi problemija. Ki Biblija pisini so okola kola tane ko brak ka ovel len „neve problemija ko životi“ (1. Kor. 7:28). Sose? Odolese so o rom hem i romni tane nesavršena manuša, isi len različito karakter hem različita buća sviđinena pe ili na sviđinena pe lenđe. Isto ađahar, šaj avena ando različita kulture. Podijekh puti, primetinena disave osobine kola na primetinđe angleder te len pe. Akala buća šaj te ćeren problemija ko brak. Umesto te rešinen o problemija hem te haljon so o solduj tane nesavršena, on krivinena jekh jekhe. Šaj čak podijekh puti mislinena so najšukar rešenje tano te razvedinen pe ja te odvojinen pe. Ama, da li tano odova tačno? Na. O Jehova mangela o rom hem i romni te poštujinen olese merilija ando brak iako čak šaj isi len bare problemija ko brak (w24.03 16 ¶8; 17 ¶11).

Palo odova so predajinđan to životi e Jehovase hem krstinđan tut, nastavinđan te upoznajine e Jehova hem uljan pana popaše oleja. Odolese, ti nada ulji pana pozorali (Jevr. 5:13–6:1). Verovatno hem tu doživinđan disave buća kolendar vaćeri pe ko Rimljanima 5:2-4. Šaj hine tut razna kušnje, ama istrajinđan hem osetinđan so isi tut e Devleso priznanje. Odolese so uverinđan tut so o Jehova mangela tut, akana hijan pana posigurno so ka dobine odova so obećinđa. Ti nada ulji pozorali nego so hine ko početko. Oj tani tuće akana pana postvarno hem pana polično doživineja la. Ti nada utičini ko svako deo ko to životi. Na primer, sar ponašineja tut te porodicaja, save odluke aneja hem čak sar koristineja to vreme. O apostol Pavle phenela pana diso važno andi nada koja razvijinđan palo odova so dobinđan e Devleso priznanje. Ov uverini tut so ti nada ka ispunini pe (Rimlj. 15:13; w23.12 12-13 ¶16-19).

Ked isi amen disavo baro problemi, amaro razmislibe, amare postupkija hem osećanja meninena pe. Amare emocije tegani šaj te oven sar o brodo kas o talasija legarena akari-ukuri. Sar o Jehova pomožini amen ked osetinaja amen ađahar? Ov uverini amen so ka del amen snaga te na pera. Ked isi oluja ko more, o brodo šaj but te ljuljini pe. Ama, te šaj o brodo te aćhol stabilno, ov valjani talo pani ko solduj strane te oven le stabilizatorija. Odola stabilizatorija šaj te pomožinen e brodose te na ljuljini pe but. Ađahar o manuša ko brodo ka osetinen pe bezbedno. Ama, akala stabilizatorija šaj te oven korisna jedino ked o brod đala. Isto ađahar, o Jehova šaj te del amen snaga jedino ked amen nastavinaja te služina lese verno, iako isi amen pharipa (w24.01 22 ¶7-8).

Ked daraja, puć kokri tut: „So o Jehova već ćerđa maje?“ Razmislin ando odova so stvorinđa. Zapazin sar o Jehova brinini pe ando ćiriklja hem luluđa kola nane stvorime pali olesi slika hem našti te služinen lese. Šaj samo te zamislina kobor pobuter ka brinini pe amendar. Ked razmislinaja odolestar, amaro poverenje koro leste ka ovel pana pobaro (Mat. 6:25-32). Isto ađahar, razmislin odolestar sar o Jehova već pomožinđa pe slugenđe. Šaj te proučine disavo primer andi Biblija ja šaj te čitine disavo iskustvo ando Jehovase sluge kotar amaro vreme. Uzo odova, razmislin sar o Jehova već mothovđa so brinini pe tutar. Sar pomožinđa tuće te penđare o ćaćipe? (Jov. 6:44). Sar odgovorinđa ko te molitve? (1. Jov. 5:14). Sar svako dive pomožini tut odova so dinđa pe Ćhave tuće? (Ef. 1:7; Jevr. 4:14-16; w24.01 4 ¶6; 7 ¶17).