O Jehova zaštitinđa e Josafate

O Josafat, o kralj ki Juda, uništinđa sa e Valese oltarija hem idolija ki odija phuv. Ov manglja o manuša te đanen e Jehovase zakonija. Odolese bićhalđa knezija hem Levitija te sikaven sa e narodo ki Juda ando akala zakonija.

O narodija so hine paše, darandilje te napadinen e Juda sose đanđe so o Jehova arakhi pe narodo. Čak, legarđe poklonija e Josafatese. Ama, palo disavo vreme, o Moavcija, o Amoncija hem o manuša so živinđe ko Sir ćedinđe pe te borinen pe protiv i Juda. O Josafat đanđa so valjani lese e Jehovasi pomoć. Odolese naredinđa sa o murša, o đuvlja hem o ćhave te aven ko Jerusalim. Anglo celo narodo, molinđa pe: „Jehova, bizo tute našti te pobedina. Molinaja tut, phen amenđe so te ćera.“

O Jehova odgovorinđa ki akija molitva hem phenđa: „Ma daran, me ka pomožinav tumen. Samo astaren tumare thana, terđoven hem dikhen sar ka spasinav tumen.“ Sar o Jehova spasinđa len?

Tajsato dive, sabale, o Josafat birinđa jekh grupa pevačija hem phenđa lenđe te đan angli vojska. On đelje ando Jerusalim ko than kuri valjanđe te maren pe. Odova than vićinđa pe Tekoja.

Đi o pevačija radosno hvalinđe e Jehova ko celo glaso, o Jehova borinđa pe pe narodose. Ov ćerđa o Moavcija hem o Amoncija te oven odobor bunime so počminđe te maren pe maškaro peste hem nijekh olendar na aćhilo đivdo. Ama, o Jehova zaštitinđa pe narodo, e vojnikonen hem e sveštenikonen. Sa o manuša so živinđe ko avera thana šunđe so ćerđa o Jehova hem haljilje so o Jehova pana arakhi pe narodo. O Jehova hem avdije arakhi pe narodo hem olese na valjani pomoć ando manuša.