Da li sebepi o pare ovena sa o lošna buća?

So i Biblija phenela?

Na. But manuša avdije phenena so sebepi o pare ovena sa o lošna buća. I Biblija na vaćeri so o pare tane lošnipe hem so sebepi o pare ovena sa o lošna buća. U stvari, ki Biblija pisini so „o mangipe premalo pare tano koren ando svako lošnipe“ (1. Timoteju 6:10).

So i Biblija vaćeri ando pare?

I Biblija phenela so o pare šaj te koristinen amenđe ako mudro trošinaja len hem čak phenela soj tane zaštita (Propovednik 7:12). Isto ađahar, i Biblija mothovi soj tano šukar te ova phravde vastese, pa čak hem ked daja pare averenđe sar poklon (Poslovice 11:25).

Isto ađahar, i Biblija phenela so o pare na valjani te oven amenđe najvažna ko životi. Ki Biblija pisini: „Ko tumaro životi ma te ovel mangipe premalo pare, nego oven zadovoljna odoleja so isi tumen“ (Jevrejima 13:5). Valjani ispravno te dikha ko pare hem na valjani te ovel amen cilj te barvaljova. Ako isi amen odova so ćaće valjani amenđe – so te ha, so te urava hem kaj te živina – valjani te ova zadovoljna odoleja (1. Timoteju 6:8).

**Sose i Biblija phenela soj tano opasno te manga o pare?**

O manuša kola samo mangena te ovel len sa pobuter, na ka nasledinen o večno životi (Efešanima 5:5). Sose? Sar prvo, i pohlepa tani jekh vrsta ando idolopoklonstvo (Kološanima 3:5). Sar dujto, te šaj te ispuninen svako pikli želja, o pohlepna manuša na ićerena pe ko moralna merilija. Ko Poslovice 28:20 pisini: „Okova so siđari te barvaljol na ka aćhol nedužno.“ Sebepi i pohlepa, o manuša tane spremna ko razna zločinija sar soj tane i ucena, o ćoribe, i otmica pa čak hem o mudaribe.

Čak hem te na ćera diso lošno sebepi o mangipe premalo pare, ka ovel amen avera posledice. I Biblija phenela so „okola kola mangena te barvaljoven perena ko iskušenja hem ko zamke hem ko but nerazumna hem lošna želje“ (1. Timoteju 6:9).

Sose tano amare šukaripase odova so i Biblija vaćeri ando pare?

Ako na mukhaja sebepi o pare te našala amare moralna vrednostija, ka poštujina kokri amen hem o Devel uvek ka ovel spremno te pomožini amen. Okolenđe kola ićerena pe ko oleso Lafi, o Devel phenela: „Niked na ka aćhavav tut hem niked na ka irinav tuće mo dumo“ (Jevrejima 13:5, 6). Isto ađahar, ov phenela so „o verno manuš ka ovel le but blagoslovija“ (Poslovice 28:20).

E biblijake stihija kola vaćerena ando pare

Propovednik 7:12: „O pare arakhena amen.“

So odova značini: Ako mudro koristinaja o pare, ka osetina amen sigurno.

Luka 12:15: „Čak ked neko isi le but, oleso životi na zavisini odolestar so isi le.“

So odova značini: O pare nane najvažno buti ko životi hem na ka pomožinen amen te spasina amen.

1. Timoteju 6:10: „Sose o mangipe premalo pare tano koren ando svako lošnipe hem sebepi odova mangipe disave aćhavđe e Devle hem anđe pese but dukha.“

So odova značini: Nane pogrešno te ovel tut pare. Ama, o manuša kola mangena o pare hem kolenđe o pare tane najvažna ko životi samo ka ćeren pese but problemija. Na primer, i porodica šaj te raspadini pe ja šaj te naborsaljon sose but ćerđe buti samo te ovel len sa pobuter.

Jevrejima 13:5: „Ko tumaro životi ma te ovel mangipe premalo pare, nego oven zadovoljna odoleja so isi tumen.“

So odova značini: Umesto te ovel amenđe najvažno samo te barvaljova bizo obzir so ka ovel, mudro tano te ova zadovoljna ako isi amen odova so valjani amenđe.

Matej 19:24: „Polokho ka ovel i kamila te nakhel kotar e suvjaki rupa nego e barvalese te khuvel ko Devleso Kraljevstvo.“

So odova značini: O Isus samo so vićinđa jekhe terne barvale manuše te ovel oleso učenik. Ama, ov but manglja poklo barvalipe. Odole lafencar o Isus upozorinđa amen so ako tano o barvalipe amenđe ko prvo than, a na o Devel, šaj te našala i prilika te dobina o večno životi.