37. LEKCIJA

So i Biblija vaćeri andi buti hem ando pare?

Štampimo izdanje

Da li podijekh puti sikirineja tut sebepi i buti ja sebepi o pare? Nane lokho te brinina amen andi amari porodica hem te ćhiva e Jehova ko prvo than. Ama, ki Biblija šaj te arakha šukar savetija kola šaj te pomožinen amen.

1. So i Biblija vaćeri kotar buti?

O Jehova mangela te uživina ki amari buti. Ki Biblija pisini so „nane ništa pošukar kotar odova o manuš. . . te uživini ki pi buti“ (Propovednik 2:24). O Jehova tano but bućarno. Ov tano bahtalo ked hijam hem amen bućarne sar oleste. Isto ađahar, ked ćeraja buti amen hijam bahtale.

Važno tano te ćerel pe buti. Ama, niked na valjani te mukha i buti te ovel amenđe považno kotar odova te služina e Jehovase (Jovan 6:27). Ako e Jehova ćhivaja ko prvo than, ov ka del amen sa so valjani amenđe.

2. Sar valjani te dikha ko pare?

I Biblija phenela so „o pare arakhena amen.“ Ama, isto ađahar, oj phenela so o pare našti te ćeren amen bahtale (Propovednik 7:12). Odolese, na valjani te manga o pare, već valjani „te ova zadovoljna odoleja so isi amen.“ (Čitinen Jevrejima 13:5.) Ked hijam zadovoljna odoleja so isi amen, ka ova bahtale hem na ka manga sa pobuter hem pobuter te ovel amen. Na ka khuva ko dugija (Poslovice 22:7). Isto ađahar, na ka ćhela kocka hem na ka verujina ked neko obećini amenđe so sigate šaj te zaradina bare pare, sose đanaja kobor opasno šaj te ovel odova.

3. Sar šaj te mothova so hijam phravde vastese?

O Jehova tano phravde vasteso. Ked hijam phravde vastese hem ked hijam spremna te delina averencar odova so isi amen, amen hijam sar oleste (1. Timoteju 6:18). Amen šaj te ova phravde vastese ked daja amare dobrovoljna prilogija hem ked pomožinaja okolenđe kase odova valjani, posebno amare phralenđe hem phenjenđe. E Jehovase nane važno kobor daja već sose daja. Ked ando vilo daja averenđe, amen ka ova bahtale hem ka ćera e Jehova te ovel bahtalo. (Čitinen Dela apostolska 20:35.)

SIKLJOV POBUTER

Sar valjani te dikha ki buti hem sose tano važno te ova zadovoljna odoleja so isi amen?

4. Ked hijam bućarne, amen mothovaja savo tano amaro Devel

Amaro amalipe e Jehovaja valjani te utičini ko odova sar dikhaja ki amari buti. Dikhen o VIDEO, hem palo odova vaćeren ando akala pućiba:

VIDEO: Služin e Jehovase celone vileja (4:39)

Sar o Džejson dikhlja ki pi buti hem sar ponašinđa pe ki buti? So sikljiljan olestar?
So pomožinđa e Džejsonese te ćhivel i buti ko ispravno than?

Čitinen Kološanima 3:23, 24, hem palo odova vaćeren ando akava pućibe:

Sose tano važno sar dikhaja ki buti?

Kolaž: Jekhe manušese i buti tani ko prvo than. 1. Ov ćerela buti ki kancelarija. 2. Ov ćerela buti iako oleso radno vreme nakhlja. 3. Sa olese kolege đelje ćhere, samo ov pana ćerela buti. 4. Ked alo ćhere kokri hala maro.

Važno tano te ćera buti. Ama, niked na valjani te mukha i buti te ovel amenđe považno ando Jehova

Kolaž: Odova isto manuš arakhi vreme aso považna buća. 1. Ov ćerela buti ki kancelarija. 2. Palo radno vreme ikljola andi kancelarija. 3. Ko sastanko ov vazdela po vas. 4. Kasnije hala maro pe romnjaja hem pe ćhavencar.

5. Ov zadovoljno odoleja so isi tut

But manuša mangena te ovel len so pobuter pare. Ama, i Biblija mothovi so valjani te ćera diso aver. Čitinen 1. Timoteju 6:6-8, hem palo odova vaćeren ando akava pućibe:

So i Biblija phenela amenđe te ćera?

Amen šaj te ova bahtale, čak ked nane amen but. Dikhen o VIDEO, hem palo odova vaćeren ando akala pućiba.

VIDEO: Ov zadovoljno odoleja so isi tut (3:20)

Sose tane akala porodice but bahtale iako nane len but pare?

So ako već isi tut but, ama mangeja te ovel tut pana pobuter? O Isus vaćerđa jekh priča koja mothovi sose na valjani ađahar te razmislina. Čitinen Luka 12:15-21, hem palo odova vaćeren ando akava pućibe:

So sikljiljan andi akija Isusesi priča? (Dikhen o 15. stih)

Čitinen Poslovice 10:22 hem 1. Timoteju 6:10 hem uporedinen akala duj stihija. Palo odova vaćeren ando akala pućiba:

So mislineja, soj tano považno: te ove amal e Jehovaja ili te ovel tut but pare? Sose mislineja ađahar?
Kola problemija šaj te ovel amen ako prastaja palo pare?

6. O Jehova ka del amen odova so valjani amenđe

Ked aćhovaja bizi buti hem ked nane amen pare, tegani šaj te dikhel pe kobor tano baro amaro poverenje ko Jehova. Dikhen o VIDEO kova mothovi so šaj te ćera ked isi amen asavke problemija hem palo odova vaćeren ando akala pućiba.