Ked o Solomon ulo kralj ko Izrael, o Jehova pućlja le: „So mangeja te dav tut?“ O Solomon phenđa: „Me hijum terno hem isi but buća kola na đanava. Molinava tut, te de man mudrost te šaj šukar te vodinav te narodo.“ O Jehova phenđa: „Odolese so rodinđan mudrost, ka ćerav te ove najmudro manuš ki celo phuv. Isto ađahar, ka ćerav te ove but barvalo. Hem ako hijan maje poslušno, ka živine but berša.“

O Solomon počminđa te ćerel o hram. Ov koristinđa o najšužo zlato, srebro, kaš hem bar. But iskusna murša hem đuvlja ćerđe buti ko hram. Palo efta berš, o hram hine završimo hem spremno te ovel posvetimo e Jehovase. Odothe hine oltari kuri hine o žrtve. O Solomon pelo ko koćija anglo oltari hem molinđa pe: „Jehova, akava hram nane tuće dovoljno baro ja dovoljno šužo, ama molinava tut prihvatin amare žrtve hem šun amare molitve.“ Da li e Jehovase sviđinđa pe o hram hem e Solomonesi molitva? Ked o Solomon završinđa i molitva, o Jehova mukhlja jag kotar nebo hem tharđa o žrtve ko oltari. Odoleja o Jehova mothovđa so prihvatini o hram so ćerđe. Ked o Izraelcija dikhlje odova, but radujinđe pe.

O kralj Solomon hine penđardo sar but mudro manuš ko celo Izrael hem ko but avera thana. O manuša alje ko Solomon te rešini olenge problemija. Čak, i kraljica andi Sava alji koro leste hem pućlja le phare pućiba te šaj te dikhel da li tano ćaće odova so vaćerena olestar. Ked šunđa olese odgovorija, oj phenđa: „Me na verujinđum ko odova so vaćerđe o manuša tutar, ama akana dikhava so hijan pana pomudro. To Devel, o Jehova, nagradinđa tut.“ O manuša ko Izrael živinđe but šukar hem hine bahtale. Ama, o buća meninđe pe.

Đi o Solomon služinđa e Jehovase, ko Izrael hine mir. Ama, o Solomon lelja pese but romnjen ando avera phuvja kola služinđe e idolenđe. Hari pohari, o Solomon meninđa pe hem ov počminđa te služini e idolenđe. Odolese, o Jehova holjanđa upro leste hem phenđa lese: „Ka lav o kraljevstvo tutar hem ka delinav le ko duj delija. O pobaro deo ka dav jekhe te slugase, a ti porodica ka vladini samo ko jekh potikno deo.“

O Jehova hem ko pana jekh način mothovđa so ćaće ka ćerel odova. Jekh e Solomoneso sluga, o Jerovoam, đelo ko drumo hem reslja e proroko, e Ahija. Tegani o Ahija pharavđa po ogrtači ko 12 kotora hem phenđa e Jerovoamese: „O Jehova ka lel o kraljevstvo andi Solomonesi porodica hem ka delini le ko duj delija. Le deš ando akala kotora sose tu ka ove kralj upro deš plemenija.“ Ked o Solomon šunđa odova, manglja te mudari e Jerovoame! Odolese o Jerovoam našlja ko Egipat. Palo disavo vreme, o Solomon mulo, a oleso ćhavo, o Rovoam, ulo kralj. Tegani o Jerovoam irinđa pe ko Izrael.

O starešine ko Izrael phenđe e Rovoamese: „Ako hijan šukar e manušencar, on ka oven tuće verna.“ Ama, olese poterne amala phenđe lese: „Mora te ove strogo e manušencar! Ćhiv len te ćeren pana pophari buti!“ O Rovoam šunđa olengo savet. Ov ponašinđa pe lošno e manušencar hem odolese on buninđe pe protiv oleste. On ćhivđe e Jerovoame te ovel kralj upro deš plemenija kola ulje penđarde sar kraljevstvo ando Izrael. O avera duj plemenija ulje penđarde sar kraljevstvo andi Juda hem aćhilje verna e Rovoamese. Ađahar o 12 plemenija ando Izrael hine delime.

O Jerovoam na manglja oleso narodo te đal ko Jerusalim te služini e Jehovase, sose o Jerusalim hine deo ando Rovoameso kraljevstvo. Ov darandilo so o narodo ka cidel pe olestar hem ka ovel ki Rovoamesi strana. Odolese, ćerđa duj zlatna telcija hem phenđa pe narodose: „O Jerusalim tano but dur. Akate služinen e Devlese.“ O manuša počminđe te služinen e zlatno telconenđe hem palem bisterđe e Jehova.