Ked tano pravo vreme te vačeri pe?

1. So sikljovaja kotar o Propovednik 3:1, 7?

DISAVE amendar volinena but te vačeren, a disave volinena te trajinen. Sar so phenela o stiho ko kova temeljini pe amari tema, isi vreme ked vačeri pe hem vreme ked trajini pe. (Čitinen Propovednik 3:1, 7.) Ipak, možda bi mangaja disave amare phralja hem phenja te vačeren poviše, a disave hari manje.

2. Ko isi le pravo te čhivel merilija odolestar ked hem sar valjani te vačera?

² Sposobnost te vačera tano dar kova dindža amendže o Jehova (Izl. 4:10, 11; Otkr. 4:11). Prekalo poklo Lafi, ov sikavi amen sar odova dar te koristina ko ispravno način. Ko akava članko, disave primerija andi Biblija ka pomožinen amendže te haljova ked tano vreme te vačera, a ked te trajina. Isto adžahar, ka dikha sar upro Jehova utičini odova sar vačeraja averencar. Najangleder, hajde te dikha ked valjani te vačera.

KED VALJANI TE VAČERA?

3. Premalo Rimljanima 10:14, ked valjani te ova spremna te vačera ando Jehova hem ando oleso Kraljevstvo?

³ Uvek valjani te ova spremna te vačera ando Jehova hem ando oleso Kraljevstvo. (Mat. 24:14; čitinen Rimljanima 10:14.) Ked čeraja adžahar, amen oponašinaja e Isuse. Jekh ando najvažna razlogija sose o Isus alo ki phuv hine te vačeri e manušendže o čačipe kotar poklo Dad (Jov. 18:37). Ama, na valjani te bistra so sar vačeraja tano isto adžahar važno. Odolese, dži vačeraja averendže ando Jehova, amen mora te mothova „blagost hem hor poštovanje“. Isto adžahar, valjani te la ko obzir sar osetinena pe hem ko so verujinena (1. Petr. 3:15). Tegani, na samo so ka vačera odole osobaja, nego hem ka sikava la hem možda ka uspina te resa dži olako vilo.

4. Premalo Poslovice 9:9, sar odova so vačeraja šaj te pomožini averendže?

⁴ O starešine valjani te oven odlučna te den savet jekhe phraljese ja jekha phenjače ked odova tano potrebno. Naravno, on ka birinen pravo vreme ked ka čeren odova te na bi ovela lendže neprijatno. Možda ka ovel potrebno te adžičeren ked ka oven kokri. Dži vačerena olencar, o starešine uvek dena sa pestar te mothoven so poštujinena olengo dostojanstvo. Ama, ked valjani, on tane odlučna te mothoven lendže e biblijake načelija kola ka pomožinen lendže te postupinen mudro. (Čitinen Poslovice 9:9.) Sose tano odobor važno te ova hrabra ked valjani te vačera? Akana ka dikha duj različita situacije. Ki jekh situacija ka dikha jekhe manuše kova valjandža te ukorini pe čhaven, a ki dujto situacija ka dikha sar jekh romni vačerdža jekhe budućo kraljeja so andža jekh pogrešno odluka.

5. Ki koja situacija o Ilije propustindža ozbiljno te vačeri pe čhavencar hem te ukorini len?

⁵ O prvosvešteniko Ilije hine le duj čhave kas but manglja. Ama, on duj na poštujindže e Jehova. On služindže sar sveštenikija ko sveto šatori, a odova hine but bari odgovornost. On duj koristindže po autoritet ko pogrešno način, mothovdže baro nepoštovanje premalo o žrtve kola dindže pe e Jehovase hem javno čerdže blud (1. Sam. 2:12-17, 22). Premalo e Mojsijeso zakon, e Ilijese čhave valjandže te oven mudarde, ama olengo dad, o Ilije hine but popustljivo premalo lende adžahar so samo blago ukorindža len hem dozvolindža lendže hem ponodri te služinen ko sveto šatori (Pon. zak. 21:18-21). Sar o Jehova dikhlja upro način sar o Ilije reagujindža? Ov phendža e Ilijese: „Sose te čhavendže mothoveja pobari čast nego li maje?“ O Jehova palo odova odlučindža te mudari akale duje lošna čhaven (1. Sam. 2:29, 34).

6. So sikljovaja ando Ilije?

⁶ Sikljovaja jekh but važno pouka ando Ilije. Ako saznainaja so jekh amaro amal ja neko kotar amari porodica grešindža, amen mora te vačera oleja hem te podsetina le ko e Jehovase merilija. Palo odova, valjani te ova sigurna so odija osoba ka vačeri hem e starešinencar, sose tane on manuša kas o Jehova dindža amendže te bi brininena pe amendar (Jak. 5:14). Niked na mangaja te mothova pobari čast amare amalese ja nekase kotar amari porodica nego li e Jehovase, sar so o Ilije čerdža. Niked ma te bistre, so iako valjani hrabrost te bi nekase vačeraja so grešindža, o trud uvek isplatini pe. Dikh akana koja razlika hine maškaro o Ilije hem jekh Izraelka kaso nav hine i Avigeja.

7. Sose i Avigeja vačerdža e Davideja?

⁷ I Avigeja hine dindi ko jekh barvalo manuš kova hine le bari phuv. Oleso nav hine o Naval. Disavo vreme, dži našlje kotar o Saul, o David hem olese manuša hine e Navalese pastirencar hem štitindže e Navalese stada ando razbojnikija. Da li o Naval mothovdža zahvalnost sebepi olengi pomoć? Na. Ked o David bičhaldža pe manušen te roden ando Naval hari maro hem pani olendže, o Naval holjandža hem pištindža upro lende (1. Sam. 25:5-8, 10-12, 14). Sebepi asavki e Navalesi reakcija, o David odlučindža te mudari svakone murše ko e Navaleso čher (1. Sam. 25:13, 22). Da li alo dži odova? Na, sose i Avigeja haljilji so akana tano pravo vreme te vačeri. Oj hrabro ikljilji anglo 400 manuša kola hine bokhale, holjame hem kola hine len oružje, te bi vačeri e Davideja.

8. So sikljovaja kotar e Avigejako primer?

⁸ Ked reslja e Davide, i Avigeja vačerdža oleja odvažno, uverljivo hem hine la hor poštovanje. Iako i Avigeja na čerdža odova problemi, oj izvinindža pe e Davidese. Oj phendža e Davidese so džanela soj tano ov šukar manuš hem so ka čerel ispravno buti. Isto adžahar, uzdajindža pe upro Jehova (1. Sam. 25:24, 26, 28, 33, 34). Ako dikhaja so neko čerela diso so ljegari dži o greh, valjani te oponašina e Avigejako primer hem hrabro te mothova lese odova (Ps. 141:5). Dži čeraja odova, valjani te poštujina odola osoba, ama ki aver strana valjani hem te ova odlučna. Ked hijam ljubazna dži daja e osobače potrebno savet, amen odoleja mothovaja so hijam iskrena amala (Posl. 27:17).

9-10. So o starešine valjani te len u obzir ked dena savet nekase?

⁹ O starešine posebno valjani te oven hrabra ked valjani te vačeren nekasa ko čerdža diso pogrešno (Gal. 6:1). On tane ponizna hem svesna tane so jekh dive hem olendže ka ovel potrebno te dobinen savet nekastar. Ama, odova na ka čhinavi len te den savet okolese kase valjani (2. Tim. 4:2; Titu 1:9). Ked dena savet dijekhe phraljese, on dena sa pestar te koristinen poklo dar govora adžahar so šukar hem strpljivo sikavena le. On mangena pe phralje hem odolese mangena te pomožinen lese (Posl. 13:24). Ama, najvažno tano te mothoven čast e Jehovase odoleja so ičerena pe ko lese merilija hem so arakhena i skupština kotar o lošna buča (Dela 20:28).

¹⁰ Dži akana vačerdžam kotar odova ked valjani te vačera. Ama, podijekh puti tano najšukar te na phena ništa. So šaj te ovel problemi ko asavke situacije?

KED VALJANI TE TRAJINA?

11. Koja ilustracija koristindža o Jakov hem sose tani oj šukar?

¹¹ Nane uvek lokho te pazina so ka vačera. O Jakov, e biblijako pisco, šukar objasnindža odova ked upotrebindža jekh ilustracija. Ov phendža: „Sose sare često grešinaja. Ako neko na grešini ko lafija, ov tano savršeno manuš, kova tano sposobno te kontrolišini hem celo telo. Ked čhivaja dizginja e grastendže ko muj te bi ovena amendže poslušna, tegani kontrolišinaja hem celo olengo telo“ (Jak. 3:2, 3). O dizginja (uzde) čhivena pe e grastese ko šero hem jekh deo ko muj. Ked o jahači stegini o dizginja šaj te usmerini e graste ja te zaustavini le. Ako o jahači mukhela o dizginja, o gras šaj te počmini te ripini hem tegani šaj te povredinen pe hem o gras hem o jahači. Isto adžahar, ako na kontrolišinaja amaro vačeriba, amare lafija šaj te čeren but problemija. Hajde te dikha disave situacije kuri bi valjani „te stegina amare dizginja“ hem te kontrolišina amaro vačeriba.

12. Ked tano vreme te kontrolišina amari čhib hem te na vačera but?

¹² Sar reaguineja ked džaneja so to phral ja ti phen džanela dijekh poverljivo informacija? Na primer, ako resaja nekas ko živini ki phuv kuri tano amaro delo zabranimo, da li hijam ko iskušenje te puča le te vačeri amendže ando odova sar čerela pe amaro delo ki odija phuv? Sigurno isi tut šukar namera ked odova pučeja. Amen mangaja amare phraljen hem brininaja amen olendar. Isto adžahar, mangaja te molina amen e Jehovase aso konkretna buča kola valjanena lendže. Ama, odova tano vreme ked valjani te kontrolišina amari čhib hem te na vačera but. Ako terinaja nekas te phenel amendže odova soj tano poverljivo, na mothovaja mangipe – ni premali odija osoba ni premalo phralja hem phenja kola uzdajinena pe upro leste so ov na ka phenel odova. Šaj te phena, so niko amendar na mangela te čhivel e phraljen hem e phenjen, kola živinena ko phuvja kuri tano amaro delo zabranimo, ki pana pophari situacija. Isto adžahar, o phralja kola služinena ko odola phuvja na ka vačeren ando detaljija sar amare phralja uduri džana ki služba hem sar ičerena o sastankija hem o kongresija.

13. Premalo Poslovice 11:13, so o starešine na valjani te čeren hem sose?

¹³ But tano važno o starešine te primeninen e biblijako načelo ando Poslovice 11:13. (Čitinen.) Odova šaj te čeren adžahar so o poverljiva informacije na ka vačeren e manušendže kola nane len pravo te džanen odova. Odova šaj te ovel pharo, posebno ako o starešina tano ženimo. Ko brak, olengo šukar odnos temeljini pe ko razgovorija kotar olenge razmisliba, osećanja hem brige. Ama, jekh starešina haljola so mora te arakhi o poverljiva informacije ando phralja hem phenja. Ako ne bi čerela odova, ov bi našalji olengo poverenje hem avera ne bi poštujinena le više. O naimenujime phralja ki skupština na valjani te oven „dujemujengo“ (1. Tim. 3:8). Odova značini so o poverljiva informacije na ka phenen nikase. Odolese, jekh starešina kova mangela pe romnja, na ka vačeri olaja ando poverljiva informacije kola oj na valjani te džanel.

14. Sar i romni kotar jekh starešina šaj te pomožini lese avera te poštujinen le?

¹⁴ I romni mangela avera ki skupština te poštujinen olake rome. Odolese na ka terini le te vačeri olače o poverljiva informacije. Ked i romni na čerela odova, oj na samo so ka ovel podrška pe romese nego hem ka poštujini okolen kola hine len poverenje te vačeren oleja. Soj tano najvažno, o Jehova ka ovel bahtalo ked ka dikhel so i romni dela sa pestar ki skupština te ovel mir hem jekhipe (Rimlj. 14:19).

SAR UPRO JEHOVA UTIČINI ODOVA SAR VAČERAJA AVERENCAR?

15. Sar o Jehova reagujindža ko lafija kola vačerdže e Jovese trin amala hem sose?

¹⁵ Kotar e biblijaki knjiga Jov, šaj but te sikljova kotar odova sar hem ked te vačera. Palo sa o phare situacije kola o Jov doživindža, alje o štar manuša te utešinen le hem te den lese savet. Ko početko, on but trajindže. Ama, o lafija kola phendže palo odova mothovdže so akala trin manuša, o Elifas, o Vildad hem o Sofar, na razmislindže ando odova sar te pomožinen e Jovese. Umesto odova, on razmislindže sar te dokažinen so o Jov čerdža diso pogrešno. Iako diso so phendže hine čače adžahar, but buča kola vačerdže kotar o Jov hem o Jehova na hine šukar hem tačna. On optužindže e Jove soj tano lošno manuš (Jov 32:1-3). Sar o Jehova reagujindža? Ov but holjandža hem phendža lendže soj tane bezumna. Palo odova phendža lendže te roden ando Jov te molini pe olendže (Jov 42:7-9).

16. So sikljovaja kotar lošno primer kova mothovdže o Elifas, o Vildad hem o Sofar?

¹⁶ Šaj but buča te sikljova kotar o lošno primer kova mothovdže o Elifas, o Vildad hem o Sofar. Sar prvo, na valjani te sudina amare phraljendže (Mat. 7:1-5). Umesto odova, angleder te vačera, valjani pažljivo te šuna len. Jedino tegani ka haljova ki koja situacija nalazinena pe (1. Petr. 3:8). Sar dujto, ked vačeraja mora te ova sigurna so amare lafija tane ljubazna hem tačna (Ef. 4:25). Hem sar trito, e Jehovase tano but važno sar vačeraja averencar.

17. So sikljovaja kotar o primer kova ačhavdža amendže o Elijuj?

¹⁷ O štarto manuš kova alo te posetini e Jove hine o Elijuj, e Avrahameso rođak. Dži o Jov hem olese trin amala vačerdže, o Elijuj samo šundža. Ov pažljivo obratindža pažnja ko olenge lafija. Odova pomožindža lese te mothovi saosećanje hem te del iskreno savet e Jovese kova ka pomožini lese te menjini poklo stav (Jov 33:1, 6, 17). Najvažno buti e Elijujese hine te proslavini e Jehova, a na averen ja kokri pes (Jov 32:21, 22; 37:23, 24). O Elijuj ačhavdža amendže but šukar primer. Isi vreme ked valjani samo te trajina hem te šuna (Jak. 1:19). Isto adžahar, sikljovaja so ked daja nekase savet, najvažno cilj valjani te ovel te proslavina e Jehova, a na kokri amen.

18. Sar šaj te mothova so ceninaja o dar kova o Jehova dindža amendže?

¹⁸ Šaj te mothova so ceninaja amaro dar te vačera ked primeninaja e biblijake savetija ando odova sar hem ked valjani te vačera. O mudro kralj Solomon pisindža: „Sar o zlatna phabaja ko srebrna čare, asavke tane o lafija vačerde ko pravo vreme“ (Posl. 25:11). Ked pažljivo šunaja averen dži vačerena hem ked razmislinaja angleder te vačera, amare lafija šaj te oven sar odola zlatna phabaja – vredna hem šuže. Tegani, bizo obzir da li vačeraja but ja hari, amare lafija ka izgradinen averen hem o Jehova ka ovel ponosno upro amende (Posl. 23:15; Ef. 4:29). Čače, na postojini pošukar način te mothova so ceninaja odova dar kova o Jehova dindža amendže.