Celone vileja mangen jekh jekhe

1. Koja važno zapovest o Isus dindža pe učenikonedže? (Dikh i slika ko početko ando akava časopis.)

JEKH rat angleder te merel, o Isus dindža pe učenikonendže jekh važno zapovest. Ov phendža lendže: „Sar so me mangljum tumen, adžahar hem tumen mangen jekh jekhe.“ Isto adžahar, ov phendža: „Palo odova sarine ka džanen so hijen me učenikija, ako isi tumen mangipe maškaro tumende“ (Jov. 13:34, 35).

2. Sose tano važno te mothova mangipe jekh jekhese?

² O Isus phendža so sare jasno ka dikhen koj tane olese učenikija ako on mangena e manušen ko način ko kova ov manglja len. Adžahar hine ko prvo veko, ama adžahar tano hem avdije. Odolese tano but važno te manga jekh jekhe, čak hem ked odova tano pharo.

3. So ka dikha ko akava članko?

³ Sebepi so hijam nesavršena, nane uvek lokho te manga jekh jekhe celone vileja. Ipak, mora te trudina amen te oponašina e Hriste. Ko akava članko, ka dikha sar o mangipe pomožini amen te da sa amendar te ova ko mir averencar, te ova nepristrasna hem te ova gostoljubiva. Dži proučineja akava članko, puč kokri tut: „So šaj te sikljovav kotar phralja hem phenja kola hem ponodri mothovdže so mangena jekh jekhe, iako odova na hine lokho?“

DE SA TUTAR TE OVE KO MIR AVERENCAR

4. Premalo Matej 5:23, 24, sose valjani te pomirina amen amare phraljeja ja e phenjaja?

⁴ O Isus sikavdža amen kobor tano važno te pomirina amen nekasa ko isi le diso protiv amende. (Čitinen Matej 5:23, 24.) Ov phendža so ako mangaja te ugodina e Devlese, valjani te ova ko šukar odnos averencar. O Jehova tano bahtalo ked amen daja sa amendar te pomirina amen amare phraljencar. Ako hem ponodri ičeraja holi ano amende hem na mangaja te pomirina amen e phraljeja, tegani o Jehova na ka prihvatini amari služba koja čeraja olese (1. Jov. 4:20).

5. Sose e Markose na hine lokho te pomirini pe jekhe phraljeja?

⁵ Disavo puti nane lokho te pomirina amen nekasa. Sose? Te dikha so desindža pe e Markose.b O Marko hine povredimo ked jekh phral kritikujindža le hem vačerdža lošna buča olestar averendže ki skupština. Sar o Marko reagujindža? Ov phenela: „Holjandžum upro leste hem hijum le grubo.“ Kasnije, e Markose hine žao sebepi so ponašindža pe adžahar, pokušindža te izvinini pe e phraljese hem te pomirini pe oleja. Iako o Marko trudisalo, akava phral na manglja te pomirini pe oleja. Ki početka, o Marko mislindža: „Sose me te trudinav man ked ov na mangela te pomirini pe?“ Ama, o Marko vačerdža e pokrajinsko nadglednikoja hem ov ohrabrindža le te na odustajini. So o Marko čerdža?

6. (a) So čerdža o Marko te šaj te pomirini pe e phraljeja? (b) Sar o Marko primenindža o savet ando Kološanima 3:13, 14?

⁶ Ked o Marko hari pobuter razmislindža pestar, haljilo so valjani te ovel ponizno, te na mislini soj tano ov pošukar ando avera hem so valjani te menjini po stav (Kol. 3:8, 9, 12). Ov palem dželo ko odova phral hem ponizno priznajindža so na valjandža te ponašini pe adžahar hem izvinindža pe lese sebepi poklo ponašanje. Isto adžahar, o Marko pisindža lese nekobor lila ko kola phendža soj tano olese žao hem so palem mangela te oven amala. Čak, nekobor putija dindža le disave tikne poklonja, aso kola džandža so ka sviđinen pe lese. Nažalost, odova phral na manglja te oprostini lese hem pana hine holjamo. Ama, o Marko hem ponodri ičerdža pe ki e Isusesi zapovest koja phenela te mangel pe phralje hem te oprostini. (Čitinen Kološanima 3:13, 14.) Čak hem ked avera na mangena te pomirinen pe amencar, o mangipe ka podstaknini amen te ova spremna hem ponodri te oprostina olendže hem te molina amen palem te ovel amen šukar odnos olencar (Mat. 18:21, 22; Gal. 6:9).

7. (a) Ko so o Isus podstaknindža amen? (b) Ki koja phari situacija hine jekh phen?

⁷ O Isus podstaknindža amen te ponašina amen premalo avera adžahar sar so amen mangaja on te ponašinen pe premalo amende. Ov phendža so na valjani te manga samo okolen kola mangena amen (Luka 6:31-33). So ako neko ki skupština na mangela te pozdravini pe tuvaja? Akava na desini pe često, ama dikh so ulo e Larače. Oj phenela: „Jekh phen na manglja te vačeri mancar, ama me na džandžum sose. Hine maje but pharo hem na hine man želja te džav ko sastankija.“ Ki početka, i Lara mislindža: „Me na čerdžum lače ništa lošno. Avera ki skupština isto phenena so oj ponašini pe čudno.“

8. So i Lara čerdža te šaj te pomirini pe e phenjaja hem so šaj te sikljova olatar?

⁸ I Lara čerdža diso te šaj te pomirini pe akale phenjaja. Oj molindža pe e Jehovase hem odlučindža te vačeri olaja. On vačerdže ando problemi, zagrlindže jekh jekha hem pomirisalje. Dičhilo so sa tano šukar. I Lara vačeri: „Kasnije, odija phen mothovdža isto stav kova hine la angleder. Odova but obeshrabrindža man.“ Najangleder, i Lara mislindža so šaj te ovel bahtali samo ako odija phen menjini po stav. Ko krajo, i Lara haljilji so najšukar so šaj te čerel tano hem ponodri te mothovi o mangipe akale phenjače hem „ando vilo“ te oprostini lače (Ef. 4:32–5:2). I Lara hine la ki godi so o mangipe „na pamtini o lošnipe.“ O mangipe „sa podnosini, sa verujini, uvek nadini pe, sa trpini“ (1. Kor. 13:5, 7). I Lara više na brinindža pe kotar odova problemi. Sar nakhlo o vreme, odija phen hine pošukar premalo late. Ked trudineja tut te pomirine tut te phraljeja ja te phenjaja hem ponodri mothoveja lendže mangipe, tegani šaj te ove sigurno so „o Devel kova mangela hem dela mir ka ovel tuvaja“ (2. Kor. 13:11).

OV NEPRISTRASNO

9. Premalo Dela apostolska 10:34, 35, sose valjani te ova nepristrasna?

⁹ O Jehova nane pristrasno. (Čitinen Dela apostolska 10:34, 35.) Ked hijam nepristrasna, amen mothovaja so hijam olese čhave. Isto adžahar, ičeraja amen ki zapovest te manga amare pašutnen sar kokri amen hem čeraja ko odova te ovel amen mir amare phraljencar hem phenjencar (Rimlj. 12:9, 10; Jak. 2:8, 9).

10-11. So pomožindža e Rutače te borini pe protiv pekle negativna osećanja?

¹⁰ Disavendže nane lokho te oven nepristrasna. Te dikha so ulo e phenjače koja vičini pe Ruta. Ked oj hine tinejdžer, jekh romni koja hine kotar aver phuv čerdža diso lošno so but povredindža e Ruta hem olake porodica. Sar odova utičindža upro late? I Ruta phenela: „Mrzindžum sa so hine povezimo odole phuvjaja. Mislindžum so sa o manuša kotar odija phuv tane ista, pa čak hem o phralja hem o phenja.“ So pomožindža e Rutače te borini pe protiv pe negativna osećanja?

¹¹ I Ruta haljilji so valjani te trudini pe te na razmislini negativno. Oj čitindža o iskustvija hem o izveštaja ando Godišnjak kova vačeri kotar odija phuv. Oj phenela: „Trudisaljum te razmislinav pozitivno ando manuša kola hine kotar odija phuv. Primetindžum so odola phralja hem phenja tane revna ki služba e Jehovase. Haljiljum so hem on tane deo ando e Jehovaso narodo.“ Palo disavo vreme, i Ruta haljilji so valjani te čerel diso pobuter. Oj phenela: „Ked god resljum e phraljen ja e phenjen kotar odija phuv, dindžum sa mandar te ovav olencar amal. Vačerdžum olencar hem trudisaljum te pendžarav len pošukar.“ Dži soste odova andža? I Ruta phenela: „Sar nakhlo o vreme, me negativna osećanja našaldilje.“

12. Kova problemi hine la i Sara?

¹² Disave manuša šaj te ovel len predrasude iako nane svesna so u stvari isi len. I Sara mislindža so nane la predrasude, odolese so na dikhlja ki koja nacija neko pripadini, kobor pare isi le ja kobor odgovornostija isi le ki organizacija. Ama, oj phenela: „Haljiljum so isi man predrasude.“ Sar odova? I Sara avela kotar porodica ki koja sare završindže bare škole hem odolese manglja te družini pe samo e manušencar kola isto adžahar hine len bare škole. Jekh puti, čak phendža jekhe phraljese: „Me družinava man okolencar kola isi len bare škole, a na družinava man okolencar kola nane školujime.“ Kotar odova dičhola so i Sara morandilji te menjini po stav. Sar?

13. So sikljovaja kotar o način sar i Sara menindža po stav?

¹³ Jekh pokrajinsko nadgledniko pomožindža e Sarače te razmislini kotar poklo stav. Oj phenela: „Ov pohvalindža man sose hijum revno ki služba, so dava šukar komentarija hem so šukar pendžarava i Biblija. Palo odova phendža maje so sar amaro džandipe ovela pobaro, isto adžahar valjani pana pobuter te mothova poniznost, skromnost hem milosrđe“. I Sara primenindža oleso savet. Oj phenela: „Haljiljum so i najvažno buti tani te ovav ljubazno hem te mangav e manušen.“ Odolese, oj počmindža averčhane te dikhel ko pe phralja hem phenja. Oj phenela: „Trudindžum man te dikhav sebepi kola osobine o Jehova cenini len.“ Sar tano amencar? Niked na mangaja te mislina so amen hijam pošukar ando avera odolese so hijam školujime. Ako „mangaja sa e phraljen“, na ka ova pristrasna (1. Petr. 2:17).

OV GOSTOLJUBIVO

14. Premalo Jevrejima 13:16, so o Jehova mislini amendar ked hijam gostoljubiva?

¹⁴ O Jehova but cenini ked hijam gostoljubiva. (Čitinen Jevrejima 13:16.) Ov dikhela so odova tano jekh način sar služinaja olese, posebno ked pomožinaja okolendže kola nane len (Jak. 1:27; 2:14-17). Odolese, e Devleso Lafi podstaknini amen: „Oven gostoljubiva“ (Rimlj. 12:13). Ked hijam gostoljubiva, amen averendže mothovaja so čače brininaja amen olendar, so mangaja len hem so mangaja te ova olenge amala. O Jehova but cenini ked maškaro amende delinaja odova so isi amen te ha ja te pija ja ked družinaja amen e phraljencar (1. Petr. 4:8-10). Ama, disave buča šaj te čhinaven amen te ova gostoljubiva.

15-16. (a) Sose disave ustručinena pe te vičinen nekas te aven koro lende? (b) So pomožindža e Editače te ovel spremno te mothovi i gostoljubivost?

¹⁵ Sebepi amare okolnostija, šaj ustručinaja amen te vičina nekas te avel koro amende. Te dikha o primer kotar jekh udovica, koja vičini pe Edita. Angleder te ovel Svedoko, oj na manglja but te družini pe e manušencar. Oj mislindža so avera isi len pošukar okolnostija te vičinen averen koro peste.

¹⁶ Ked krstisalji, i Edita menindža po način sar razmislini. Oj čerdža diso te šaj te mothovi i gostoljubivost. Oj phenela: „Ked čerdža pe nevi dvorana, jekh starešina vačerdža maje, so jekh bračno par valjani te avel te pomožini ki gradnja. Pučlja man da li šaj te soven koro mande duj kurče. Setindžum man sar o Jehova blagoslovindža e udovica andi Sarepta“ (1. Kralj. 17:12-16). I Edita phendža so šaj te aven koro late. Ama, da li o Jehova blagoslovindža la? Oj phenela: „On na ačhilje koro mande duj kurče, nego duj masek. Dži hine koro mande, amen uljam but šukar amala.“ Isto adžahar, i Edita ulji pošukar averencar ki skupština. Akana oj tani pionir hem uživini ked pali služba o phralja hem o phenja kola hine olaja, avena koro late. Oj phenela: „Ked diso dava, osetinava man šukar! Ama, isto adžahar, hem dobinava but blagoslovija“ (Jevr. 13:1, 2).

17. So haljilje o Luka hem olesi romni?

¹⁷ Amen šaj već hijam gostoljubiva, ama da li šaj te ova pana pobuter? Na primer, o Luka hem olesi romni tane gostoljubiva. On uvek hine len običaj te vičinen pe roditeljen, e familija, pe šukar amalen, e pokrajinsko nadgledniko hem olese romnja te aven koro lende. Ama, o Luka phenela: „Haljiljam so amen vičindžam samo okolen kola hine amencar paše.“ So pomožindža e Lukase hem olese romnjače te oven pana pobuter gostoljubiva?

18. So pomožindža e Lukase hem olese romnjače te oven pana pobuter gostoljubiva?

¹⁸ O Luka hem olesi romni menindže po stav ked razmislindže ando akala e Isusese lafija: „Ako mangena samo okolen kola tumen mangena, savi nagrada zaslužinena aso odova?“ (Mat. 5:45-47). On haljilje so valjani te oponašinen e Jehova, kova tano velikodušno premalo sarinende. Odolese, odlučindže te vičinen e phraljen hem e phenjen kolen na vičindže angleder. O Luka phenela: „Akana sarine uživinaja ked hijam zajedno. Amen hrabrinaja jekh jekhe, uljam popaše e Jehovaja hem jekh jekheja.“

19. (a) Sar šaj te mothova so hijam e Isusese učenikija? (b) So hijan odlučno te čere?

¹⁹ Ko akava članko dikhljam so ako celone vileja mangaja jekh jekhe, tegani ka da sa amendar te ova ko mir averencar, te ova nepristrasna hem te ova gostoljubiva. Amen valjani te borina amen protiv o negativna osećanja hem ando vilo te manga amare phraljen hem e phenjen. Ked čeraja odova, amen ka ova bahtale hem ka mothova so čače hijam e Isusese učenikija (Jov. 13:17, 35).