Da li ka mukhe diso te ćhinavi tut te đa palo Isus?

1. So šaj iznenadinđa tut ked počminđan te vaćere averenđe andi Biblija?

DA LI setineja tut ko vreme ked prvo puti upoznajinđan i istina? Hine but lokho te haljove sa odova so sikljiljan andi Biblija. Mislinđan so sare ka mangen odova so tu sikljoveja. Hijan le uverimo so odova so sikljiljan andi Biblija šaj te pomožini averenđe te ovel len šukar životi akana, ama hem šukar nada asi budućnost (Ps. 119:105). Odolese, vaćerđan te amalenđe hem te familijaće odova so sikljiljan. Ama, so ulo? Iznenadinđan tut so but đene na manglje te šunen tut.

2-3. So but manuša ko e Isuseso vreme mislinđe olestar hem ando odova so ov sikavđa?

² Niko amendar na valjani te ovel iznenadimo ked avera na mangena te prihvatinen odova so propovedinaja. Ko e Isuseso vreme, but manuša na manglje te šunen, čak iako ov ćerđa čudija kolencar mothovđa so o Devel bićhalđa le. Na primer, o Isus uskrsninđa e Lazare. Odova hine jekh čudo kova hem o protivnikija dikhlje. Ama, o jevrejska vođe na verujinđe soj tano o Isus, o Mesija. Umesto odova, on čak manglje te mudaren hem e Isuse hem e Lazare (Jov. 11:47, 48, 53; 12:9-11).

³ O Isus đanđa so but manuša na ka verujinen soj tano ov o Mesija (Jov. 5:39-44). Ov phenđa e Jovanese učenikonenđe: „Bahtalo tano okova kova sebepi moklo na perela andi vera“ (Mat. 11:2, 3, 6). Sose odobor but manuša odbacinđe e Isuse?

4. So ka dikha ko akava članko?

⁴ Ko akava hem ko aver članko ka dikha nekobor razlogija sose but manuša ko prvo veko na verujinđe ko Isus. Isto ađahar, ka dikha sose but manuša avdije na mangena te šunen odova so vaćeraja andi Biblija. Ko krajo, ka dikha sar odova so isi amen zorali vera šaj te pomožini amenđe te na ćhinava te đa palo Isus.

(1) O THAN KAJ O ISUS BARILO

5. Sose disave mislinđe so o Isus našti te ovel o Mesija?

⁵ But manuša odbacinđe e Isuse sebepi odova kaj barilo. On haljilje so o Isus hine šukar učitelj hem so ćerđa čudija, ama olenđe ov hine samo jekhe stolareso ćhavo. Ov hine ando Nazaret, a but đene mislinđe so odija diz na hine odobor važno. Odova mislinđa čak hem o Natanailo kova ulo e Isuseso učeniko. Ov phenđa: „Da li šaj diso šukar te avel ando Nazaret?“ (Jov. 1:46) O Natanailo šaj na manglja odija diz ja šaj hine le ki godi o proročanstvo ando Mihej 5:2, premalo kova o Mesija valjanđa te bijanđol ko Vitlejem, a na ko Nazaret.

6. So valjanđa te pomožini e manušenđe ko e Isuseso vreme te haljon so ov hine o Mesija?

⁶ So i Biblija phenela? O prorok Isaija phenđa so e Isusese neprijateljija na ka obratinen pažnja ko detaljija ando e Mesijaso životi (Is. 53:8). But ando odola detaljija hine prorokujime. Ako bi o manuša ko e Isuseso vreme istražinena odova, on bi haljona so o Isus hine bijando ko Vitlejem hem hine potomko ando kralj David (Luka 2:4-7). Znači, o Isus bijandilo ko than kova hine prorokujimo ko Mihej 5:2. Tegani, so hine o problemi? O manuša sigate anđe o zaključko. Na lelje ko obzir sa o činjenice. Odolese, on odbacinđe e Isuse.

7. Sose avdije but manuša odbacinena e Jehovase svedokonen?

⁷ Da li hem avdije dikhaja isto problemi? Ja. But ando e Jehovase svedokija nane barvale ili ugledna manuša. Odolese, but manuša mislinena „so on nane obrazovana hem soj tane obična manuša“ (Dela 4:13). Disave mislinena so e Jehovaso narodo našti te sikavi averen andi Biblija odolese so na završinđe disave bare religiozna škole. Avera mislinena so e Jehovase svedokija tane američko religija, iako samo oko 14 posto ando e Jehovase svedokija živinena ki Amerika. Isto ađahar, disave šunđe so e Jehovase svedokija na verujinena ko Isus. Beršencar, o manuša phenena so hijam sekta, američka špijunija ja ekstremistija. Odolese so šunđe asavke buća hem so na đanena koj tano ćaće e Jehovaso narodo, but manuša na mangena te oven e Jehovase svedokija.

8. Premalo Dela apostolska 17:11, so o manuša valjani te ćeren ako mangena te đanen koj tano avdije ćaće e Devleso narodo?

⁸ So šaj te pomožini nekase te đanel koj tane ćaće e Jehovase svedokija? O manuša valjani te proverinen da li odova so šunđe tano tačno. Odova ćerđa hem e biblijako pisco o Luka. Ov „pažljivo istražinđa sa andi početka.“ Ov manglja o manuša te uverinen pe soj tano ćaće odova so šunđe ando Isus (Luka 1:1-4). O Judejcija andi Verija ćerđe isto odova so ćerđa o Luka. Ked prvo puti šunđe i šukar vest ando Isus, on proverinđe ko hebrejska spisija da li odova so šunđe tano ćaće. (Čitin Dela apostolska 17:11.) Isto ađahar, hem o manuša valjani te ćeren odova. Odova so šunđe ando e Devleso narodo valjani te uporedinen odoleja so pisini ki Biblija. Uzo odova, on valjani te istražinen so e Jehovase svedokija ćerđe ko amaro vreme. Ako sa odova temeljno istražinena, on na ka dozvolinen o predrasude ja odova so averendar šunđe te korjaćeri len.

(2) O ISUS ODBINĐA TE ĆEREL ČUDIJA TE BI MOTHOVI SOJ TANO OV O MESIJA

9. So ulo ked o Isus odbinđa te mothovi znak ando nebo?

⁹ Disavenđe ko e Isuseso vreme na hine dovoljno odova so ov sikavđa. On rodinđe olestar te dokažini lenđe soj tano ov o Mesija ađahar so bi mothovi lenđe znak ando nebo (Mat. 16:1). On šaj rodinđe odova sebepi so pogrešno haljilje o lafija ando Danilo 7:13, 14. Ama, tegani na hine vreme te ispunini pe odova proročanstvo. Odova so o Isus sikavđa len, valjanđa te ovel dovoljno te šaj te uverinen pe soj tano ov o Mesija. Ama, ked ov odbinđa te mothovi lenđe znak ando nebo, on više na manglje te šunen le (Mat. 16:4).

10. Sar o Isus ispuninđa odova so o prorok Isaija pisinđa ando Mesija?

¹⁰ So i Biblija phenela? Ando Mesija o prorok Isaija pisinđa: „Na ka pištini niti ka vazdel po glaso, oleso glaso na ka šunđol ko ulice“ (Is. 42:1, 2). Đi o Isus ćerđa pi služba, ov na privucinđa averengi pažnja. Ov na ćerđa bare hramija, na manglja te uravi disave šeja kola uravđe o religiozna vođe niti manglja o manuša te koristinen disavi posebna titula đi vaćerđe oleja. Đi trajinđa oleso suđenje, o Isus na manglja te ćerel disavo čudo anglo kralj Irod koleja bi oduševini le, iako oleso đivdipe hine ki opasnost (Luka 23:8-11). Đi hine ki phuv, ov ćerđa disave čudija, ama olesi glavno buti hine te propovedini i šukar vest. Ov phenđa pe učenikonenđe: „Odolese aljum“ (Mar. 1:38).

11. Kola pogrešna očekivanja disave manuša isi len avdije?

¹¹ Da li hem avdije dikhaja isto problemi? Ja. Avdije but manuša tane oduševime ked dikhena disavi bari crkva koja tani but skupo ukrasimi, ja ked dijekh svešteniko akhari but bari titula, ja ked ićerena pe disave ceremonije kolengo poreklo ja značenje but manuša bisterđe. Ama, o manuša kola prisustvujinena ko odola verska službe na sikljona ništa ando Devel ja andi olesi namera. Okola kola avena ko amare sastankija sikljona so o Jehova rodela amendar hem sar šaj te ićera amen ko odova. Amare Dvorane tane čista hem skromna hem nane but skupa. Okola kola predvodinena na uravena pe ko disave posebna šeja, niti isi len disave bare titule. Odova so sikljovaja hem ko so verujinaja avela andi Biblija. Ama, ipak but manuša odbacinena amari poruka sose mislinena so amaro način sar služinaja e Devlese tano but jednostavno hem so odova so amen sikavaja nane odova so on mangena te šunen.

12. Premalo Jevrejima 11:1, 6 so valjani te ćera te šaj te zorajćera amari vera?

¹² So šaj te pomožini amen te na našala amari vera? O apostol Pavle e hrišćanenđe kola živinđe ko Rim phenđa: „I vera avela palo odova so šunaja i poruka, a i poruka širini pe ked vaćeri pe ando Hrist“ (Rimlj. 10:17). Odolese, amen valjani te zorjaćera amari vera ađahar so ka proučina e Devleso Lafi, a na ađahar so ka učestvujina ko disave religiozna ceremonije aso kola i Biblija vaćeri so nane ispravna, kobor god šaj on te izgledinen šuže hem zanimljiva. Amen valjani te zorjaćera amari vera ađahar so šukar ka penđara e Devleso Lafi sose „bizi vera tano nemoguće te ugodini pe e Devlese.“ (Čitin Jevrejima 11:1, 6.) Odolese, amenđe na valjani disavo posebno znak ando nebo kova ka uverini amen so arakhljam o ćaćipe. Ako temeljno proučinaja e Devleso Lafi, amen ka uverina amen so arakhljam o ćaćipe hem ka cida amendar bilo koja sumnja.

(3) O ISUS NA IĆERĐA PE KO BUT JEVREJSKA OBIČAJA

13. Sose but manuša odbacinđe e Isuse?

¹³ Ked o Isus hine ki phuv, e Jovanese učenikija hine zbunime odolese so e Isusese učenikija na postinđe. O Isus phenđa lenđe so nane len razlog te postinen đi tano ov pana đivdo (Mat. 9:14-17). O fariseja hem avera protivnikija osudinđe e Isuse odolese so ov na ićerđa pe ko olenge običaja hem tradicije. On holjanđe ked ov saćarđa e nabormen ko Sabat (Mar. 3:1-6; Jov. 9:16). Ki jekh strana, on hine ponosna ko odova te phenen so ićerena o Sabat, a ki aver strana na hine lenđe problemi te dozvolinen e manušenđe te biknen ko hram. On hine but holjame ked o Isus osudinđa len sebepi odova (Mat. 21:12, 13, 15). Isto ađahar, ked o Isus propovedinđa disavenđe ki sinagoga, ko Nazaret, on hine but holjame odolese so o Isus koristinđa disave primerija andi e Izraelcengi istorija kola mothovđe soj tane sebična hem so nane len vera (Luka 4:16, 25-30). But manuša odbacinđe e Isuse odolese so ov na ćerđa o buća kola on manglje (Mat. 11:16-19).

14. Sose o Isus osudinđa e manušenge običaja?

¹⁴ So i Biblija phenela? O Jehova prekalo poklo proroko o Isaija phenđa: „Akava narodo mothovi maje čast pe lafencar hem slavini man pe mujeja, ama olengo vilo tano dur mandar. Darana mandar samo sebepi o manušikane zapovestija ando kola tane sikavde“ (Is. 29:13). O Isus hine u pravu ked osudinđa o običaja aso kola i Biblija phenela soj tane pogrešna. Okola kola sikavđe so o pravilija hem o tradicije tane považna nego i Biblija, odbacinđe e Jehova hem okole kas ov bićhalđa, e Mesija.

15. Sose but manuša avdije na mangena e Jehovase svedokonen?

¹⁵ Da li hem avdije dikhaja isto problemi? Ja. But manuša avdije tane holjame sose e Jehovase svedokija na slavinena olencar disave buća, sar soj tane o rođendanja ja o Božić. Avera tane holjame sose o Svedokija na učestvujinena ko disave državna praznikija ja na ićerena disave običaja aso parujbe sose i Biblija phenela soj tane pogrešna. On holjanena odolese so verujinena so olengo način sar služinena e Devlese tano ispravno. Ama, on našti te ugodinen e Devlese ako tane olenđe považna o tradicije, nego li odova so i Biblija sikavi (Mar. 7:7-9).

16. Premalo Psalam 119:97, 113, 163-165, so valjani te ćera, a so valjani te odbacina?

¹⁶ So šaj te pomožini amen te na našala amari vera? Amen valjani te barjaćera amaro mangipe premalo e Jehovase zakonija hem načelija. (Čitin Psalam 119:97, 113, 163-165.) Ako mangaja e Jehova, amen ka odbacina svako običaj kova nane pali olesi volja. Amen na ka mukha ništa te ovel amenđe považno ando amaro mangipe premalo Jehova.

(4) O ISUS NA MANGLJA TE MENJINI I VLAST

17. So but manuša ko e Isuseso vreme očekujinđe te ćerel o Mesija?

¹⁷ Disave manuša ko e Isuseso vreme manglje ov odmah te menjini i vlast. On očekujinđe o Mesija te oslobodini len andi rimsko vlast. Ama, ked manglje te ćhiven e Isuse te ovel kralj, ov odbinđa (Jov. 6:14, 15). O sveštenikija hem avera darandilje so o Isus ka menjini i vlast. Odolese so o Rimljanja bi tegani holjanena hem bi lena i vlast ando sveštenikija koja dinđe len. Bute manušen zaniminđa i politika hem odolese odbacinđe e Isuse.

18. Upro kola proročanstvija ando Mesija but manuša na obratinđe pažnja?

¹⁸ So i Biblija phenela? Iako but proročanstvija phenena so o Mesija ko krajo ka ovel ratniko kova pobedini, avera proročanstvija mothovđe so ov najangleder valjani te merel aso amare grehija (Is. 53:9, 12). Tegani, sose o Jevreja hine len asavke pogrešna očekivanja? Odolese so na obratinđe pažnja ko proročanstvija kola na obećinđe lenđe so olenge problemija ka oven rešime odmah (Jov. 6:26, 27).

19. Sose but manuša avdije na mangena te šunen odova sostar vaćeraja?

¹⁹ Da li hem avdije dikhaja isto problemi? But manuša avdije na mangena te šunen amen sebepi so na mešinaja amen ki politika. On ađićerena amendar te glasina. Ama, amen haljiljam so premalo e Jehovase merilija ako bi glasinaja disave manušese, amen ađahar odbacinaja e Jehova, sar amare vladare (1. Sam. 8:4-7). Isto ađahar, o manuša mislinena so amen valjani te gradina škole, bolnice ja diso aver te šaj te mothova so mangaja te pomožina e manušenđe. Odolese, on na mangena te šunen odova sostar amen vaćeraja sose amen trudinaja amen te propovedina i šukar vest, a na te rešina o problemija kola isi ko sveto.

20. Premalo Matej 7:21-23 koja buti valjani te ovel amenđe najvažno?

²⁰ So šaj te pomožini amen te na našala amari vera? (Čitin Matej 7:21-23.) Amen daja sa amendar te ćera o zadatko kova o Isus dinđa amen (Mat. 28:19, 20). Na valjani te trudina amen te rešina o politička problemija ko sveto. Amen mangaja e manušen hem brininaja amen sebepi so isi len problemija. Ama, đanaja so najšukar način sar šaj te pomožina len tano ađahar so ka vaćera lenđe ando e Devleso Kraljevstvo hem so ka pomožina len te oven šukar amala e Jehovaja.

21. So valjani te ova odlučna te ćera?

²¹ Ko akava članko razmotrinđam štar buća sebepi kola o manuša ko e Isuseso vreme odbacinđe le, a sebepi kola but manuša avdije odbacinena e Isusese sledbenikonen. Ama, da li samo akala buća valjani te izbegnina? Na. Ko aver članko ka razmotrina pana štar buća sebepi kola o manuša odbacinđe e Isuse. Odolese, hajde te ova odlučna niked te na odbacina e Isuse hem te da sa amendar amari vera te ovel zorali!