Ciden tumen andi tama – aćhoven ki svetlost

1-2. (a) Kaj hine o Pavle ked pisinđa lil e phralenđe ko Efes? (b) Ando kola pućiba ka vaćera akana?

ĐI HINE phanlo ko jekh ćher ko Rim, o apostol Pavle manglja te ohrabrini pe phralen hem pe phenjen. Ov našti hine te đal koro lende, odolese pisinđa lenđe lila. Ov pisinđa e skupštinaće ko Efes jekh lil maškaro 60. hem 61. berš ki n. e. (Ef. 1:1; 4:1).

² Skoro deš berš angleder, o Pavle kratko hine ko Efes hem odothe propovedinđa i šukar vest (Dela 19:1, 8-10; 20:20, 21). Ov but manglja e phralen hem manglja te pomožini lenđe te aćhon verna e Jehovase. Ama, sose e pomazanikonenđe pisinđa lil andi „tama“ hem andi „svetlost“? So šaj sare amen te sikljova kotar odova savet? Hajde te dikha o odgovor ko akala pućiba.

KOTAR TAMA KI SVETLOST

3. Kola lafija o Pavle koristinđa ko lil kova pisinđa e hrišćanenđe ko Efes?

³ O Pavle e hrišćanenđe ko Efes pisinđa: „Hijen le ki tama, a akana hijen ki svetlost“ (Ef. 5:8). Ov akate koristinđa o lafija sar soj tane „tama“ hem „svetlost“ te mothovi kobor bari promena morandilje te ćeren o hrišćanija ko Efes. Akana ka dikha sose o Pavle phenđa lenđe so angleder hine ki „tama.“

4. Ko kova način o manuša ko Efes hine ki tama?

⁴ Hovavni religija. Angleder so upoznajinđe o ćaćipe hem so ulje hrišćanija, o manuša ko Efes hine ki hovavni religija hem verujinđe ki magija. Ki odija diz hine o poznato hram andi Artemida upro kola o manuša ko odova vreme dikhlje sar jekh ando efta neverovatna buća kola o manuš ćerđa. Uduri đelje te služinen e idolenđe. O zanatlije zaradinđe but pare ando odova so ćerđe hem bikinđe figurice kotar boginja Artemida hem olako hram (Dela 19:23-27). Isto ađahar, ko Efes but manuša bavinđe pe magijaja (Dela 19:19).

5. Ko kova pana način o manuša kotar Efes hine ki tama?

⁵ Nemoral. O manuša ko Efes ćerđe baro nemoral hem hić na lađandilje sebepi odova. O pogrdno govor šaj hine te šunel pe ko pozorište hem čak ko disave religiozna praznikija (Ef. 5:3). But olendar našalđe „svako moralno osećaj“. Akala lafija doslovno značinena „na osetinđe nisavi dukh“ (Ef. 4:17-19). Angleder te haljon e Jehovase merilija ando odova soj tano pogrešno a soj tano ispravno, olengi savest na mučinđa len ked ćerđe diso soj tano lošno. Isto ađahar, na razmislinđe sar o Jehova osetini pe sebepi odova. Odolese, o Pavle phenđa soj tane „ki tomnina hem [so] na ka dobinen o životi kova dela o Devel.“

6. Sose o Pavle šaj hine te phenel so o manuša kotar Efes „akana hine ki svetlost“?

⁶ Disave manuša kotar Efes na aćhilje ki tama. O Pavle pisinđa so on „akana hine ki svetlost, sose hine ko jekhipe e Gospodeja“ (Ef. 5:8). On počminđe te živinen premalo odova so pisini ko Devleso Lafi kova hine sar svetlo kova vodinđa len (Ps. 119:105). Aćhavđe o buća kola ćerđe ki hovavni religija hem više na ćerđe nemoral. Počminđe te „oponašinen e Devle“ hem dinđe sa pestar te služinen e Jehovase hem te ćeren le te ovel bahtalo (Ef. 5:1).

7. Ko kova način tani amari situacija slično sar okolengi kola živinđe ko Efes?

⁷ Angleder te penđara o ćaćipe hem amen hijam le ki tama. Disave amendar slavinđe o religiozna praznikija, a avera živinđe nemoralno. Ama, ked haljiljam e Jehovase merilija ando odova soj tano pogrešno hem ispravno, amen meninđam amen. Počminđam te živina ađahar sar so o Jehova rodela amendar. Odolese hijam bahtale (Is. 48:17). Ama, nane uvek lokho te cida amen ando odola buća, avere lafencar, te cida amen andi tama hem „te aćhova ki svetlost“. Sar šaj te ćera odova?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

CIDE TUT ANDI TAMA

8. Premalo Efešanima 5:3-5, sostar o manuša ko Efes morandilje te ciden pe?

⁸ Čitin Efešanima 5:3-5. Te šaj te ciden pe andi tama, o hrišćanija ko Efes morandilje hem ponodri te odbacinen o postupkija kola nane ugodna e Jehovase. Uzo odova so valjanđe te ciden pe ando nemoralna buća, on valjanđe te ciden pestar hem o pogrdno govor. O Pavle phenđa lenđe so valjani te ciden pe ando odola buća ako mangena te dobinen o „nasledstvo ko Hristeso hem e Devleso Kraljevstvo.“

9. Ko so valjani te pazina?

⁹ Amen valjani hem ponodri te pazina „te na ćera o buća kola tane deo andi tama“ (Ef. 5:11). Ako jekh manuš dikhela, šunela, ja vaćeri ando melale ja nemoralna buća šaj lokho te perel ki zamka te ćerel odova soj tano lošno (Post. 3:6; Jak. 1:14, 15). Ki jekh phuv, but phralja hem phenja počminđe te dopisinen pe prekalo društvena mreže. Ki početka, but olendar vaćerđe ando duhovna buća. Ama, hari pohari počminđe te vaćeren ando buća kola o Jehova na mangela. Uglavnom olenge teme hine ando seks. Nekobor ando odola phralja hem phenja priznajinđe so sebepi odola razgovorija kasnije ćerđe nemoral.

10. So o Beng mangela te ćhivel amen te mislina? (Efešanima 5:6)

¹⁰ E Satanaso sveto mangela te hovavi amen, te ćhivel amen te verujina so odova so o Jehova phenela soj tano nemoralno hem melalo u stvari nane pogrešno (2. Petr. 2:19). Odova na iznenadini amen. O Beng uvek manglja te bunini e manušen te na ćeren razlika maškaro odova soj tano šukar hem lošno (Is. 5:20; 2. Kor. 4:4). Odolese, nane čudno so ko but filmija, emisije ja veb-sajtija isi buća kola tane protiv e Jehovase pravedna merilija. O Beng mangela te ćhivel amen te mislina so o nemoralna postupkija nane diso sostar valjani te cida amen, već so valjani te uživina ko odova hem so nane opasna. (Čitin Efešanima 5:6.)

11. Sar e Andželako iskustvo mothovi soj tano mudro te primenina o savet kotar Efešanima 5:7? (Dikh i slika.)

¹¹ O Beng mangela te družina amen e manušencar kola na ka pomožinen amen te ićera amen ko Jehovase merilija. Odolese, o Pavle phenđa e manušenđe ko Efes: „Ma te ovel tumen ništa olencar“, avere lafencar, okolencar kola ćerena odova soj tano lošno anglo Devlese jaćha (Ef. 5:7). Amen valjani pana pobuter te pazina nego o manuša ko Efes, odolese so avdije na provodinaja vreme e manušencar samo uživo, već hem prekalo društvena mreže. I Andželaa, koja živini ki Azija, haljilji kobor opasna šaj te oven o društvena mreže. Oj phenela: „Hari pohari počminđa te menini pe mo način sar razmislinava. Sigate palo odova, više na hine maje problemi te oven man amala kola na poštujinena e Jehovase načelija. Ko krajo, počminđum te mislinav so o životi kova nane ugodno e Jehovase tano šukar.“ Ama, o starešine pomožinđe e Andželaće te ćerel promene koro peste. Oj phenela: „Akana mi godi pherava duhovno bućencar, a na odoleja so isi ko društvena mreže.“

12. So ka pomožini amen te ićera amen ko Jehovase merilija?

¹² Amen valjani te borina amen protiv o stavija kola isi len o manuša ko akava sveto. On phenena so o nemoral tano šukar, ama amen đanaja so odova nane ađahar (Ef. 4:19, 20). Odolese, šukar tano te puća amen: „Da li cidava man kotar odova bizi potreba te družinav man me kolegencar ki buti, me amalencar ki škola ja averencar kola na poštujinena e Jehovase pravedna merilija? Da li hijum hrabro hem ićerava man ko Jehovase merilija, iako avera šaj te maren maje muj?“ Sar so pisini ki 2. Timoteju 2:20-22 amen valjani te pazina čak hem đi birinaja amenđe amalen ki skupština. Sose? Odolese so disave na ka pomožinen amen te aćhova verna e Jehovase.

ŽIVINEN „SAR O ĆHAVE ANDI SVETLOST“

13. So značini te živina „sar o ćhave andi svetlost“? (Efešanima 5:7-9)

¹³ O Pavle ohrabrinđa e hrišćanen ko Efes na samo hem ponodri te ciden pe andi tama već hem te živinen „sar o ćhave andi svetlost“. (Čitin Efešanima 5:7-9.) Odova značini so uvek valjani te živina sar hrišćanija. Jekh način sar šaj te ispunina odova cilj tano ađahar so redovno ka čitina hem ka proučina e Devleso Lafi hem amare publikacije. Posebno tano važno te obratina pažnja ko Isusese sikljoviba hem primer, sose ov hine „o svetlo e svetoso“ (Jov. 8:12; Posl. 6:23).

14. Sar šaj o sveti duh te pomožini amen?

¹⁴ Te šaj te živina „sar o ćhave andi svetlost“ amenđe valjani e Jehovaso sveti duh. Sose? Odolese so na ka ovel amenđe lokho te aćhova čista ko akava nemoralno sveto (1. Sol. 4:3-5, 7, 8). E Jehovaso duho šaj te pomožini amen te borina amen protiv odova sar razmislini akava sveto. Isto ađahar, e Devleso duho šaj te pomožini amen te ana „svako vrsta ando šukaripe [hem] andi pravednost“ (Ef. 5:9).

15. Sar šaj te dobina sveti duh? (Efešanima 5:19, 20)

¹⁵ Jekh način sar šaj te dobina sveti duh tano ađahar so ka molina amen. O Isus phenđa so o Jehova „ka del sveti duh okolenđe kola molinena le aso odova“ (Luka 11:13). Isto ađahar, o sveti duh šaj te dobina ađahar so ka hvalina e Jehova ko sastankija zajedno amare phralencar hem phenjencar. (Čitin Efešanima 5:19, 20.) Sebepi e Jehovaso sveti duh, amen šaj te živina ko način kova tano ugodno e Devlese.

16. So ka pomožini amen te ana mudra odluke? (Efešanima 5:10, 17)

¹⁶ Ked valjani te ana disavi važno odluka, amen valjani te haljova soj tani „e Jehovasi volja“ hem palo odova ađahar te postupina. (Čitin Efešanima 5:10, 17.) Ked arakhaja disavo biblijako načelo kova primenini pe ki amari situacija, amen ađahar rodaja e Jehovaso mišljenje aso odova problemi. Ked ka primenina odola načelija, tegani šaj te ana šukar odluke.

17. Sar šaj mudro te koristina amaro vreme? (Efešanima 5:15, 16; dikh i slika.)

¹⁷ O Pavle phenđa e hrišćanenđe ko Efes mudro te koristinen po vreme. (Čitin Efešanima 5:15, 16.) O lošno, amaro dušmani o Satana, mangela te lel amaro vreme hem ađahar te na ovel amen vreme e Devlese (1. Jov. 5:19). Jekh hrišćanin lokho šaj ko prvo than te ćhivel o materijalna buća, o obrazovanje hem pi karijera hem te na razmislini sar šaj te koristini po vreme pobuter te služini e Jehovase. Ako ađahar ćerela, odova ka mothovi so počminđa te razmislini sar o manuša kola na služinena e Jehovase. Naravno, akala buća nane pogrešna, ama niked na valjani te oven amenđe ko prvo than ko amaro životi. Te šaj te živina „sar o ćhave andi svetlost“, amen valjani mudro te koristina amaro vreme, avere lafencar te razmislina soj tano amenđe ćaće važno.

18. So ćerđa o Donald te šaj pana pošukar te koristini po vreme?

¹⁸ Razmislin ando odova sar šaj pana pobuter te služine e Jehovase. Odolestar razmislinđa o Donald, kova živini ki Južno Afrika. Ov phenela: „Razmislinđum ando mo životi hem usrdno molinđum man e Jehovase te pomožini man te ćerav pana pobuter ki služba. Molinđum man te arakhav buti sebepi koja ka ovel man vreme pana pobuter te đav ki služba. Uzi Jehovasi pomoć, arakhljum maje asavki buti. Palo odova, mi romni hem me počminđam te služina e Jehovase ki punovremeno služba.“

19. Sar šaj hem ponodri te živina „sar o ćhave andi svetlost“?

¹⁹ O lil kova o Pavle pisinđa e hrišćanenđe ko Efes sigurno pomožinđa len te aćhon verna e Jehovase. Olese lafija šaj hem amenđe te pomožinen. Sar so sikljiljam, odova savet šaj te pomožini amen mudro te birina amari zabava hem amaro društvo. Isto ađahar, šaj te podstaknini amen hem ponodri te proučina i Biblija te šaj o svetlo ando ćaćipe hem ponodri te legari amen ko sa so ćeraja. Odova savet istaknini hem kobor tano važno o sveti duh kova šaj te pomožini amen te razvijina šukar osobine. Ako primeninaja odova so o Pavle pisinđa, ka ana mudra odluke kola tane premali Jehovasi volja. Ako ćeraja akala buća, amen ka cida andi tama kotar akava sveto hem ka aćhova ki svetlost!