POSETIN E OSOBA
LEKCIJA 8
Ov strpljivo
Načelo: O mangipe tano strpljivo (1. Kor. 13:4)
So o Isus ćerđa?
1. Dikh o VIDEO ja čitin Jovan 7:3-5 hem 1. Korinćanima 15:3, 4, 7. Palo odova, razmislin ando akala pućiba:
a. Sar e Isusese phralja ki početka reagujinđe ko odova sostar sikavđa?
b. So mothovi so o Isus na odustajinđa ando po phral o Jakov?
So sikljovaja ando Isus?
2. Amen valjani te ova strpljiva odolese so disave manušenđe valjani poviše vreme te bi prihvatinena i šukar vest.
Oponašin e Isuse
3. Koristin različita načinija. Ako i osoba na prihvatini odmah e biblijako kurs, ma insistirin ko odova. Ked šaj, koristin disave videa ili člankija te pomožine la te haljol sar izgledini jekh biblijako kurs hem sar šaj te pomožini la.
4. Ma uporedin e manušen. Svako osoba tani različito. Ako tano nekase andi ti porodica ili e osobaće kola posetineja pharo te počmini te proučini ili te prihvatini disavo biblijako sikljovibe, razmislin sose tano ađahar. Da li disavo verovanje andi olaki religija tano olaće but važno? Da li isi la disavo pharipe andi pi familija ili ando pe komšije? De la vreme te razmislini odolestar so vaćereja hem te dikhel kobor tano važno odova so pisini ki Biblija.
5. Molin tut asi zainteresovano osoba. Molin tut e Jehovase te pomožini tut te ove pozitivno hem taktično. Rode e Jehovastar te pomožini tut te haljove ked i osoba nane ćaće zainteresovano hem ked više na valjani te posetine la (1. Kor. 9:26).