O Isus merela ki Golgota

O sveštenička poglavarija legarđe e Isuse ki Pilatesi palata. O Pilat pućlja len: „Savi optužba isi tumen protiv akava manuš?“ On phenđe: „Ov phenela soj tano kralj!“ Tegani o Pilat pućlja e Isuse: „Da li tu hijan o judejsko kralj?“ O Isus odgovorinđa lese: „Mo Kraljevstvo nane deo ando akava sveto.“

Tegani o Pilat bićhalđa e Isuse ko Irod, kova hine vladari ki Galileja, te dikhel da li ov ka arakhi diso protiv oleste. Ama, o Irod na arakhlja ništa hem odolese bićhalđa le palem ko Pilat. O Pilat phenđa e narodose: „Ni o Irod, ni me na arakhljam ništa protiv akava manuš. Me ka oslobodinav le.“ O narodo pištinđa: „Mudar le! Mudar le!“ O vojnikija marđe e Isuse bičeja, ćhungarđe le hem khuvđe le. Ćhivđe lese ko šero jekh kruna koja hine ćerdi ando kare hem marđe lese muj ađahar so phenđe: „Šukar dive, judejsko kraljo.“ O Pilat palem phenđa e narodose: „Akava manuš na ćerđa nisavo lošnipe.“ Ama, on pištinđe: „Ćhiv le ko stubo!“ Odolese, o Pilat naredinđa o Isus te ovel mudardo.

O vojnikija lelje e Isuse hem legarđe le ko than kova vićinđa pe Golgota, kovinđe le ko stubo hem o stubo vazdinđe upre. O Isus molinđa pe: „Mo Dad, oprostin lenđe, sose na đanena so ćerena.“ O manuša asandilje e Isusese hem phenđe: „Ako hijan e Devleso Ćhavo, hulji kotar stubo! Spasin kokri tut.“

Jekh ando zločincija kova hine uzo leste ko stubo phenđa lese: „Setin tut koro mande ked ka ave ko to Kraljevstvo.“ O Isus obećinđa lese: „Tu ka ove mancar ko raj.“ Po podne, ki celo phuv hine tomnina koja trajinđa trin satija. Nekobor učenikija terdilje uzo stubo, a maškaro olende hine hem i Marija, e Isusesi daj. O Isus phenđa e Jovanese te brinini pe olatar sar pe dajatar.

Ko krajo, o Isus phenđa: „Ćerđum sa so rodinđan mandar!“ Teljarđa po šero hem mulo. Ko odova trenutko, hine jekh baro zemljotres. Ko hram, i phari zavesa koja odvojini i Svetinja upro svetinje, pharavdilji ko ekvaš. Jekh vojniko phenđa: „Ov ćaće hine e Devleso Ćhavo.“