I holi šaj te ovel but opasno

Palo odova so o Adam hem i Eva ikljilje ando Eden, hine len but ćhave. Olengo prvo ćhavo, o Kain, ulo zemljoradniko, a olengo dujto ćhavo, o Avelj, arakhlja bakren.

Jekh dive, o Kain hem o Avelj dinđe žrtve e Jehovase. Da li đaneja soj tani i žrtva? Odova tano ked diso dela pe sar poklon e Devlese. Ked o Jehova dikhlja e Aveljesi žrtva but radujinđa pe, ama ked dikhlja e Kajinesi žrtva, na radujinđa pe. Odolese, o Kain but holjanđa. O Jehova vaćerđa e Kainese so sebepi i holi šaj te ćerel diso lošno. Ama, o Kain na šunđa le.

Jekh dive, o Kain phenđa e Aveljese: „Ava mancar ko polje.“ Ked reslje uduri, o Kain napadinđa pe phrale hem mudarđa le. So ćerđa o Jehova sebepi odova? O Jehova kazninđa le ađahar so bićhalđa le dur andi olesi porodica. O Kain na isminđa više te irini pe ćhere.

So sikljovaja ando akava? Hem amen šaj te počmina te holjana ako nane sa sar so amen mangaja. Ako dikhaja so amari holi barjola ja ako neko avela te phenel amenđe so hijam but holjame, tegani sigate valjani te ćera diso, angleder so odola osećanja ka oven odobor bare so našti te kontrolišina len.

Odolese so o Avelj manglja e Jehova hem ćerđa odova soj tano šukar, o Jehova niked na ka bistrel le. Ov ka vazdel e Avelje ked i phuv ka ovel raj.