O Isus ulo Mesija

O Jovan propovedinđa: „Avela neko koj tano pobaro mandar.“ Ked o Isus hine le oko 30 berš, andi Galileja alo ki reka Jordan, kaj o Jovan krstinđa e manušen. O Isus manglja o Jovan te krstini le, ama ov phenđa lese: „Me našti te krstinav tut. Tu valjani man te krstine.“ O Isus phenđa lese: „O Jehova mangela tu te krstine man.“ Ađahar, on khuvđe ki reka Jordan hem o Jovan ćhivđa e Isuse celo talo pani.

Ked ikljilo kotar pani, o Isus molinđa pe. Tegani, o nebo phravdilo hem e Devleso duho huljilo upro leste sar golubi. Palo odova, o Jehova ando nebo phenđa: „Tu hijan mo manglo Ćhavo, tu hijan pali mi volja.“

Ked e Jehovaso duh huljilo upro Isus, ov ulo Hrist ja Mesija. Ando tegani, o Isus počminđa te ćerel po zadatko sebepi kova o Jehova bićhalđa le ki phuv.

Samo so krstinđa pe, o Isus đelo ki pustinja hem uduri aćhilo 40 dive. Ked irinđa pe, đelo ko Jovan te dikhel le. Ked o Jovan dikhlja sar o Isus avela koro leste, phenđa: „Akava tano e Devleso Bakro prekalo kaste ka oven oprostime e manušenge grehija.“ Akale lafencar o Jovan mothovđa e manušenđe soj tano o Isus, o Mesija. Da li đaneja so ulo e Isuseja đi hine ki pustinja? Hajde te dikha.