Koj tane o anđelija hem so on ćerena?

O Jehova mangela te penđara olese porodica koja tani ko nebo. O anđelija, kola tane vićime „e Devlese ćhave“, tane deo andi odija porodica (Jov 38:7). So i Biblija vaćeri ando anđelija? Sar on utičinena upro manuša? Da li tane sa o anđelija deo andi Devlesi porodica?

1. Koj tane o anđelija?

O Jehova ćerđa e anđelen angleder te ćerel i phuv. On živinena ko nebo hem našti te dikha len (Jevrejima 1:14). Ko nebo isi but anđelija hem svako olendar tano posebno (Otkrivenje 5:11). On „šunena [e Jehovase] zapovestija hem ćerena odova so ov phenela“ (Psalam 103:20). Ko purano vreme, o Jehova dijekh puti bićhalđa e anđelen te vaćeren e manušenđe olese lafija, te pomožinen olese slugenđe hem te spasinen len. Avdije, o anđelija legarena e Devlese slugen đi o manuša kola ćaće mangena te penđaren e Devle.

2. Koj tano o Beng hem o demonija?

Disave anđelija na aćhilje verna e Jehovase. O prvo anđeo kova pobuninđa pe protiv oleste hine o „Beng hem Satana, kova hovavi celo sveto“ (Otkrivenje 12:9). Sebepi so manglja te vladini upro avera, ov ćhivđa e prvo manušen, a palo odova hem disave anđelen te pobuninen pe protiv o Devel. Odola anđelija vićinena pe demonija. O Jehova fordinđa len kotar nebo ki phuv hem pana hari ka uništini len. (Čitinen Otkrivenje 12:9, 12.)

3. Sar o Beng hem o demonija hovavena e manušen?

O Beng hem o demonija hovavena bute manušen prekalo okultizam. O okultizam tano ked neko gatini, ćerela mađije, bahini, vaćeri so značinena o sune hem avera buća. Disave đana ko manuša aso kola verujinena so isi len moć te saćaren len. A avera mangena te ćhiven e manušen te verujinen so šaj te vaćeren e mulencar. Ama, o Jehova phenela amenđe: „Ma roden pomoć okolendar kola phenena so vaćerena e mulencar, hem ma roden savet okolendar kola phenena so đanena so ka ovel ki budućnost“ (Levitska 19:31). O Jehova dinđa te pisinen pe akala lafija sose mangela te arakhi amen ando Beng hem ando demonija. On tane e Devlese dušmanija hem mangena te povredinen amen.

SIKLJOV POBUTER

4. O anđelija pomožinena e manušenđe te penđaren e Jehova

Iako o anđelija na propovedinena lično e manušenđe, on legarena amen đi o manuša kola mangena te sikljon ando Devel. Čitinen Otkrivenje 14:6, 7, hem palo odova vaćeren ando akala pućiba:

• Sose valjani amenđe e anđelengi pomoć đi propovedinaja?

• Sar osetineja tut ked đaneja so o anđelija legarena amen đi o manuša kola mangena te sikljon diso pobuter andi Biblija? Sose osetineja tut ađahar?

5. Cide tut ando okultizam

O Beng hem o demonija tane e Jehovase dušmanija. On tane hem amare dušmanija. Čitinen Luka 9:38-42, hem palo odova vaćeren ando akava pućibe:

• So ćerena o demonija e manušencar?

Amen na mangaja te mukha o demonija te utičinen upro amaro životi. Čitinen Ponovljeni zakoni 18:10-12, hem palo odova vaćeren ando akala pućiba:

• Sar o demonija pokušinena te utičinen upro amende? Kola buća dikhljan so o manuša ćerena odothe kuri tu živineja?

• Da li tano šukar so o Jehova zabranini te ćeren pe asavke buća? Sose mislineja ađahar?

Dikhen o VIDEO, hem palo odova vaćeren ando akala pućiba:

VIDEO: „Suprotstavinen tumen e Bengese“ (5:02)

• So mislineja, da li odova so i Palesa phanlja ko pe bebako vas šaj hine te zaštitini la? Sose mislineja ađahar?

• So i Palesa valjanđa te ćerel te šaj te ovel zaštitimi ando demonija?

Pana kotar purano vreme, o prava hrišćanija uvek suprotstavinđe pe e demonenđe. Čitinen Dela apostolska 19:19 hem 1. Korinćanima 10:21, hem palo odova vaćeren ando akava pućibe:

• Sose tano važno te uniština sa so isi amen, a so avela ando okultizam?

6. Tu šaj te pobedine e Benge hem olese demonen

Upro demonija vladini o Beng. Ama, e anđelen kola aćhilje verna e Devlese, predvodini o arhanđeo Mihailo, kova tano aver anav aso Isus. Kobor tano zoralo o Mihailo? Čitinen Otkrivenje 12:7-9, hem palo odova vaćeren ando akala pućiba:

• Koj tano pozoralo: o Mihailo hem olese anđelija ja o Beng hem olese demonija?

• So mislineja, da li e Isusese učenikija valjani te daran ando Beng hem ando olese demonija?

Tu šaj te pobedine e Benge hem olese demonen. Čitinen Jakovljeva 4:7, hem palo odova vaćeren ando akava pućibe:

• Sar šaj te zaštitine tut ando Beng hem ando olese demonija?

SO SIKLJILJAM

O anđelija kola tane verna e Jehovase pomožinena amen. O Beng hem olese demonija tane e Jehovase dušmanija hem prekalo okultizam hovavena e manušen.

Te ponovina

• Sar o anđelija pomožinena e manušenđe te penđaren e Jehova?

• Koj tano o Beng hem olese demonija?

• Sose valjani te cida amen ando okultizam?

RODE POBUTER

Dikh sar đanaja soj tano o Isus o arhanđeo Mihailo.

„Koj tano o arhanđeo Mihailo?“ (članko ko amaro sajt)

Dikh so mothovi amenđe so o Beng ćaće postojini.

„Da li o Beng ćaće postojini?“ (članko ko amaro sajt)

Čitin sar jekh romni oslobodinđa pe ando demonengo uticaj.

„Oj haljilji sose živini“ (Stražarska kula, 1. jul 1993)