46. LEKCIJA
Sose valjani te predajine tut e Devlese hem te krstine tut?
Jekh osoba predajini po životi e Jehovase ađahar so ki molitva phenela so jedino olese ka služini hem so ka ćerel odova so ov mangela (Psalam 40:8). Palo disavo vreme odija osoba krstini pe hem ađahar mothovi averenđe so predajinđa po životi e Jehovase. Odija tani i najvažno odluka koja valjani te ane ko životi. Ama, so šaj te podstaknini tut te ane asavki odluka?
1. Sose predajinaja amaro životi e Jehovase?
Amen predajinaja amaro životi e Jehovase sebepi so mangaja le. (1. Jovanova 4:10, 19). Ki Biblija pisini: „Mang e Jehova, te Devle, sa te vileja, sa te dušaja, sa te gođaja hem sa te snagaja“ (Marko 12:30). Amen mothovaja so mangaja e Devle na samo odoleja so vaćeraja, već hem odoleja so ćeraja. Sar so jekh ćhavo hem jekh ćhaj lena pe sebepi so mangena pe, ađahar hem amen predajinaja amaro životi e Jehovase hem krstinaja amen sebepi so mangaja le.
2. Kola šukar buća ka ovel tut ako krstineja tut?
Ked ka krstine tut, ka ove deo andi Jehovasi porodica. Ko but načinija ka osetine so o Jehova mangela tut hem ka ove pana popaše oleja. (Čitinen Malahija 3:16-18.) Ked tano o Jehova to Dad, tegani ko celo sveto ka ovel tut phralja hem phenja kola mangena ole hem tut. (Čitinen Marko 10:29, 30.) Ama, isi nekobor buća kola valjani te ćere angleder te krstine tut. Valjani te sikljove ando Jehova, te mange le hem te verujine ko oleso Ćhavo. Ko krajo, valjani te predajine to životi e Jehovase. Ked ka ćere sa akala buća hem ked ka krstine tut, ka ove ko drumo kova legari ko životi. E Devleso Lafi phenela so o „krštenje. . . akana hem tumen spasini“ (1. Petrova 3:21).
SIKLJOV POBUTER
Sose tano važno te predajine to životi e Jehovase hem te krstine tut?
3. Svako amendar mora te odlučini kase ka služini
Ko purano vreme, disave Izraelcija mislinđe so šaj te služinen hem e Jehovase hem e hovavne devlese e Valese. Ama, o Jehova prekalo po proroko o Ilija phenđa so našti ađahar. Čitinen 1. Kraljevima 18:21, hem palo odova vaćeren ando akava pućibe:
Koja odluka o Izraelcija morandilje te anen?
Sar o Izraelcija, hem amen mora te odlučina kase ka služina. Čitinen Luka 16:13, hem palo odova vaćeren ando akala pućiba:
Sose našti te služina hem e Jehovase hem nekase averese?
Sar šaj te mothova so služinaja samo e Jehovase?
4. Razmislin odolestar kobor o Jehova mangela tut
O Jehova dinđa amen but buća. Ama, so šaj amen te da olese? Dikhen o VIDEO.
Sar o Jehova mothovđa tuće po mangipe? Čitinen Psalam 104:14, 15 hem 1. Jovanova 4:9, 10, hem palo odova vaćeren ando akala pućiba:
Aso kola buća posebno hijan zahvalno e Jehovase?
So mislineja ando Jehova ked razmislineja odolestar?
Ked dobinaja disavo poklon, mangaja te mothova so hijam zahvalna okolese kova dinđa amen odova poklon. Čitinen Ponovljeni zakoni 16:17, hem palo odova vaćeren ando akava pućibe:
Ked razmislineja kotar sa odova so o Jehova ćerđa tuće, ko so podstaknini tut odova?
5. Ked ka predajine tut e Jehovase ka ovel tut bare blagoslovija
But manuša mislinena so ka ove bahtalo ako isi tut but pare, šukar buti ja ako hijan penđardo. Ama, da li tano odova ađahar? Dikhen o VIDEO, hem palo odova vaćeren ando akala pućiba:
Iako amaro phral o Andrej manglja te ćhelel fudbal, sose ipak ćhinavđa odoleja?
Ov odlučinđa te živini aso Jehova, a na aso fudbal. So mislineja, da li anđa šukar odluka? Sose?
Angleder te ovel hrišćanin, o Pavle manglja te ovel baro manuš. Odolese, đelo ki jekh bari škola kuri sikljilo o jevrejsko zakon ko jekh but penđardo učitelj. Ama, ked ulo hrišćanin, ov sa odova mukhlja palo peste. Da li pokajinđa pe sebepi odova? Čitinen Filipljanima 3:8, hem palo odova vaćeren ando akala pućiba:
Sose e Pavlese odova so angleder ćerđa hine sar đubre?
So dobinđa umesto odola buća?
Ked to životi ka ovel pošukar: ked ka služine e Jehovase ja ked ka ćere avera buća ko to životi?
O Pavle hine spremno te našali but buća, ama ked ulo hrišćanin ov dobinđa pana pobuter
AKO NEKO PHENELA: „Me đanava so akava tano ćaćipe, ama na hijum spremno te krstinav man.“
So mislineja, sose tano šukar te predajine to životi e Jehovase?
SO SIKLJILJAM
O mangipe premalo Jehova podstaknini amen te predajina amaro životi olese hem te krstina amen.
Te ponovina
Sose o Jehova zaslužini te služina lese celone vileja?
Sar o Jehova blagoslovini pe slugen kola krstinena pe?
Da li hem tu mangeja te predajine to životi e Jehovase?
RODE POBUTER
Dikh sose jekh pevačica hem jekh ragbista ulje e Jehovase svedokija.
O terne pućena – So te ćerav me životoja? – So hine angleder? (6:54)
Dikh nekobor razlogija sose valjani te predajine to životi e Jehovase.
„Sose valjani te predajine to životi e Jehovase?“ (Stražarska kula, 15. januar 2010)
Šun akija đili hem dikh kobor tane bahtale okola so predajinđe po životi e Jehovase.
Ko iskustvo „Beršencar razmislinđum ando odova sose hijam akate?“, dikh so pomožinđa jekha romnjaće te haljol soj tano olaće najvažno ko životi.
„I Biblija pomožini e manušenđe te menjinen po životi“ (Stražarska kula, 1. novembar 2012)