Sar odova so ka ove paše e Devleja ka utičini ko to životi?

Đi akana sikljiljam disave buća kola šaj te pomožinen amenđe te haljova koj tano o Devel. Najangleder, andi Biblija dikhljam so oleso anav tano Jehova hem so ov tano mangipe. Isto ađahar, dikhljam so ov već ćerđa hem so pana ka ćerel e manušenđe. Ama, odova nane sa. Isi pana but buća kola valjani te sikljova ando Devel. Sose tano važno odova te ćere?

O Jehova obećini so „ako rodeja le, ka mukhel tut te arakhe le“ (1. Letopisa 28:9). Ako rodeja le hem ako trudineja tut te penđare le, tu ka ove paše amal oleja (Psalam 25:14). Sar odova ka utičini upro tute?

Ka ove ćaće bahtalo. Ki Biblija pisini so o Jehova tano „bahtalo Devel“ (1. Timoteju 1:11). Ako trudineja tut te ove paše oleja hem te živine premali olesi volja, odova šukar ka utičini ko to sastipe hem ki ti psiha (Psalam 33:12). Isto ađahar, ka ovel tut bahtalo životi sose ka cide tut ando lošna buća hem ka sikljove te slažine tut averencar. Tegani, hem tu ka phene odova so o psalmista phenđa: „Maje tano šukar te ovav paše uzo Devel“ (Psalam 73:28).

Ka osetine so o Devel brinini pe tutar. O Jehova obećinđa: „Ka dav tut savet, mi jakh ka ovel upro tute“ (Psalam 32:8). Odova značini so o Jehova brinini pe ando svako manuš kova služini lese hem so dela le okova so valjani lese (Psalam 139:1, 2). Ked ka ove paše amal e Devleja, ka uverine tut so ov uvek brinini pe tutar.

But šuži budućnost. Uzo odova so već akana šaj te ovel amen bahtalo životi, o Jehova dela amen hem but šuži budućnost (Isaija 48:17, 18). Ki Biblija pisini: „A te šaj te dobinen večno životi, valjani šukar te penđaren tut, e jedino ćaćutne Devle, hem okole kas bićhalđan, e Isuse Hriste“ (Jovan 17:3). Ko akala phare dive, i nada koja o Devel dela amen tani sar jekh „zoralo sidro“ sose dela amen stabilnost (Jevrejima 6:19).

Akala tane samo nekobor razlogija sose valjani te penđara e Devle hem te ova paše oleja. Ako mangeja te đane pobuter, slobodno vaćer nekasa ando Jehovase svedokija ja đa ko jw.org.