Mothov poštovanje premalo avera

1. Sose tano amenđe drago ked avera poštujinena amen? (Poslovice 22:1)

DA LI tano tuće drago ked avera poštujinena tut? Naravno. Sare isi amen potreba te ova poštujime. Odova ćerela amen te ova bahtale. Odolese, i Biblija phenela so „averengo poštovanje vredini pobuter ando srebro hem ando zlato“. (Čitin Poslovice 22:1.)

2-3. Sose nane uvek lokho te mothova poštovanje hem sostar ka vaćera ko akava članko?

² Nane uvek lokho te mothova poštovanje averenđe. Jekh razlog tano sose dikhaja olenge mane. Isto ađahar, živinaja ko sveto kuri but manuša na mothovena poštovanje jekh jekhese. Ama, amen valjani te ova averćhane olendar. Sose? Odolese so o Jehova mangela te mothova poštovanje sa e manušenđe (1. Petr. 2:17).

³ Ko akava članko ka dikha so značini te poštujina averen hem sar šaj te mothova poštovanje amare (1) ćherutnenđe, (2) phralenđe hem phenjenđe hem (3) okolenđe kola nane Svedokija. Isto ađahar, ka dikha sar šaj te mothova poštovanje hem ked odova nane lokho.

SO ZNAČINI TE MOTHOVA POŠTOVANJE AVERENĐE?

4. So značini te poštujina averen?

⁴ So značini o lafi poštovanje? O lafi „poštovanje“ najangleder odnosini pe ko odova sar dikhaja upri disavi osoba. Amen šaj poštujinaja disave osoba sebepi olake osobine, odova so ćerđa ja olako položaj. Ama, odova lafi odnosini pe hem ko odova sar postupinaja premali disavi osoba. Ked nekas poštujinaja, tegani premali odija osoba ponašinaja amen ađahar oj te osetini so amen ceninaja la. Naravno, sa odova valjani te ovel iskreno hem te avel ando vilo (Mat. 15:8).

5. So ka pomožini amen te poštujina averen?

⁵ O Jehova mangela te poštujina averen. Na primer, ov amendar očekujini te poštujina o vlastija (Rimlj. 13:1, 7). Ama, neko šaj te phenel: „Nane maje pharo te poštujinav averen sa đi odova zaslužinena.“ Da li valjani ađahar te razmislina? Na. Amen haljovaja so valjani te poštujina averen na sebepi odova so on ćerena ja na ćerena, već odolese so mangaja e Jehova hem mangaja te ugodina lese (Is. Nav. 4:14; 1. Petr. 3:15).

6. Da li šaj ćaće te mothova poštovanje nekase ko amen na poštujini? Objasnin. (Dikh i slika.)

⁶ Disave šaj pućena pe: „Da li šaj ćaće te poštujinav nekas ko man na poštujini?“ Ja, šaj. Aće nekobor primerija. O kralj Saul ponizinđa pe ćhave e Jonatane anglo sa o manuša (1. Sam. 20:30-34). Ama, o Jonatan poštujinđa pe dade hem hine zajedno oleja ko maribe sa đi o krajo (Izl. 20:12; 2. Sam. 1:23). O prvosveštenik o Ilije phenđa e Anaće soj tani mati (1. Sam. 1:12-14). Ama, i Ana mothovđa lese poštovanje ked vaćerđa oleja, iako sa o manuša ko Izrael đanđe so o Ilije sar dad hem sar prvosveštenik na ispuninđa po zadatko (1. Sam. 1:15-18; 2:22-24). O manuša ki Atina vređinđe e Pavle hem phenđe lese so samo borborini (Dela 17:18). Ama, o Pavle đi vaćerđa olencar mothovđa lenđe baro poštovanje (Dela 17:22). Akala primerija mothovena so amaro mangipe premalo Jehova hem amari želja te ugodina lese šaj te podstakninen amen te mothova poštovanje averenđe čak hem ked odova nane lokho. Akana ka dikha kas valjani te poštujina hem sose.

MOTHOV POŠTOVANJE TE ĆHERUTNENĐE

7. Sose šaj te ovel pharo te mothova poštovanje amare ćherutnenđe?

⁷ Sose šaj te ovel pharo? Amen hijam but vreme amara porodicaja. Đanaja olenge šukar osobine, ama hem olenge mane. Disave tane naborme hem pharo tano amenđe te brinina amen olendar ja tane anksiozna. Avera šaj čak te phenen ja te ćeren diso so šaj but te povredini amen. Umesto te trudinen pe o ćher te ovel than ando mir, on ćerena o ćher te ovel than andi kavga, sose na poštujinena jekh jekhe. Nažalost, sebepi odova nane len sloga maškaro peste. Sar so o artritis na mukhela o telo normalno te funkcionišini, ađahar hem ked o ćherutne na poštujinena jekh jekhe našti te oven ko jekhipe. O artritis našti te lečini pe, ama amen šaj te sikljova te poštujina jekh jekhe.

8. Sose tano važno te mothova poštovanje amare ćherutnenđe? (1. Timoteju 5:4, 8)

⁸ Sose valjani te mothova poštovanje? (Čitin 1. Timoteju 5:4, 8.) O apostol Pavle ko po prvo lil kova pisinđa e Timotejese phenđa so o ćherutne valjani te brininen pe jekh jekhestar. Ov phenđa so amen na ćereja odova samo odolese so odija tani amari dužnost, već odolese so hijam verna e Devlese. Odova značini so amen brininaja amen kotar amare ćherutne odolese so mangaja e Jehova hem odolese so upro odova dikhaja sar deo andi amari služba olese. O Jehova ćerđa e porodica (Ef. 2:19; 3:14, 15). Odolese ked mothovaja poštovanje amare ćherutnenđe, amen u stvari poštujinaja e Poglavare andi porodica, e Jehova. Ćaće isi amen baro razlog te mothova poštovanje amare ćherutnenđe!

9. Sar o rom hem i romni šaj te mothoven poštovanje jekh jekhese? (Dikh o slike.)

⁹ Sar šaj te mothova poštovanje? O rom kova poštujini pe romnja mothovi so cenini la hem ked tane kokri hem anglo avera (Posl. 31:28; 1. Petr. 3:7). Ov niked na marela la, na ponizini la hem na ćhivela la te osetini pe soj tani nisose. Amaro phral o Arijela, kova živini ki Argentina, phenela: „Odolese soj tani mi romni nabormi, podijekh puti phenela diso so povredini man. Ked odova ovela, haljovava so na mislinđa ćaće odova so phenđa. Tegani pokušinava te setinav man ko stih andi 1. Korinćanima 13:5, kova podstaknini man te mothovav laće poštovanje đi vaćerava olaja hem te na ovav holjamo upro late“ (Posl. 19:11). I romni koja poštujini pe rome vaćeri šukar olestar anglo avera (Ef. 5:33). Na kritikujini le, na marela lese muj hem na vićini le disave uvredljivo anavencar sose haljola so asavko ponašanje tano sar rđa koja rumini o brak (Posl. 14:1). Jekh phen andi Italija, kaso rom tano anksiozno, phenela: „Podijekh puti mislinava so mo rom but brinini pe aso disave buća. Angleder, ko me lafija hem ko mo muj šaj hine te dićhol so na poštujinava le. Ama, so pobuter družinđum man okolencar kola đi vaćerđe averendar mothovđe poštovanje hem me hijum le podstaknimi te mothovav pana pobaro poštovanje me romese.“

10. Sar o ćhave šaj te mothoven poštovanje pe roditeljenđe?

¹⁰ Ćhavalen, poštujinen o pravilija kola ćhivena tumare roditeljija (Ef. 6:1-3). Đi vaćerena olencar, mothoven lenđe poštovanje (Izl. 21:17). Sar tumare roditeljija phurjovena, šaj ka valjani pana pobuter te pomožinen len. Odolese, den sa tumendar te ćeren odova. Te dikha o primer andi Marija, kaso dad nane e Jehovaso svedoko. Ked naborsalo, e Marijaće hine but pharo te brinini pe olestar sose ov pe lafencar hine but povredini la. Oj phenela: „Molinđum man e Jehovase, na samo te osetinav poštovanje premalo lese, već hem te mothovav lese odova. Razmislinđum ako o Jehova rodela mandar te poštujinav le, sigurno hijum so hem ka del man snaga te ćerav odova. Sar đelo o vreme, haljiljum so na valjani mo dad te menini pe te šaj me te mothovav lese poštovanje.“ Ked amen poštujinaja amare ćherutnen, čak hem ked odova nane lokho, amen poštujinaja e Jehova kova ćerđa e porodica.

MOTHOV POŠTOVANJE PREMALO TE PHRALJA HEM TE PHENJA

11. Sose šaj te ovel amenđe pharo te poštujina e phralen hem e phenjen?

¹¹ Sose šaj te ovel pharo? O phralja hem o phenja dena sa pestar te ićeren pe ko biblijake merilija. Ama, podijekh puti neko olendar šaj te ovel neljubazno, pogrešno te procenini amen hem te nervirini amen. Ako neko „uvredini“ amen, šaj te ovel amenđe pharo te poštujina le (Kol. 3:13). So šaj tegani te pomožini amen?

12. Sose tano važno te mothova poštovanje e phralenđe hem e phenjenđe? (2. Petrova 2:9-12)

¹² Sose valjani te mothova poštovanje? (Čitin 2. Petrova 2:9-12.) Ko po dujto lil, o apostol Petar phenđa so disave hrišćanija ko prvo veko na mothovđe poštovanje đi vaćerđe ando starešine kolenđe o Devel mothovđa čast. So ćerđe o anđelija ked dikhlje odova? Odolese so poštujinena e Jehova, na vaćerđe nijekh lafi kova šaj hine te povredini len. Zamislin odova! O savršena anđelija na vaćerđe nijekh lošno lafi ando odola ponosna manuša. Umesto odova, on mukhlje e Jehovase te sudini lenđe hem te ukorini len (Rimlj. 14:10-12; uporedin e stihoja andi Judina 9). Kobor šukar buća sikljovaja olendar! Ako valjani te mothova poštovanje amare protivnikonenđe, kobor tek valjani te mothova poštovanje amare phralenđe. Odolese, valjani te da sa amendar te poštujina jekh jekhe (Rimlj. 12:10). Ađahar ka mothova poštovanje e Jehovase.

13-14. Sar šaj te mothova poštovanje e phralenđe hem e phenjenđe? Vaćer jekh primer. (Dikh o slike.)

¹³ Sar šaj te mothova poštovanje? Phraljalen kola služinena sar starešine, ked valjani te sikaven nekas, ćeren odova uvek mangipaja (Filim. 8, 9). Ked valjani te den savet, oven ljubazna hem ma ćeren odova ked hijen holjame. Phenjalen, tumen šaj but te pomožinen avera te poštujinen jekh jekhe ki skupština ađahar so na ka vaćeren negativno averendar hem nikas na ka ogovorinen (Titu 2:3-5). Sare valjani te mothova poštovanje e starešinenđe ađahar so ka sarađujina olencar hem ađahar so ka zahvalina amen olenđe so trudinena pe te predvodinen ko sastankija, ki služba hem so pomožinena okolenđe kola pođinđe ko „pogrešno drumo“ (Gal. 6:1; 1. Tim. 5:17).

¹⁴ Asi amari phen i Rosio hine but pharo te poštujini jekhe starešina kova dinđa la savet. Oj phenela: „Mislinđum so hine neljubazno premalo mande. Ćhere vaćerđum negativno olestar. Iako trudinđum man te na mothovav odova, me mislinđum so ov na mangela te pomožini maje hem odolese na šunđum oleso savet.“ So pomožinđa laće? Oj pana phenela: „Đi čitinđum i Biblija, resljum ki 1. Solunjanima 5:12, hem 13. Ked haljiljum so na mothovava poštovanje odole phralese, mi savest počminđa but te mučini man. Molinđum man e Jehovase hem počminđum ko amare publikacije te istražinav hem te rodav disavi konkretno buti koja ka pomožini man te meninav mo stav. Odova pomožinđa man te haljovav so o problemi na hine ko odova phral nego me hijum le ponosno. Akana haljovava so valjani te ovav ponizno te šaj te poštujinav averen. Pana valjani te ćerav buti ko odova, ama đi trudinava man te mothovav poštovanje, osetinava so hijum ko mir e Jehovaja.“

MOTHOV POŠTOVANJE OKOLENĐE KOLA NANE SVEDOKIJA

15. Sose šaj te ovel amenđe pharo te mothova poštovanje okolenđe kola nane Svedokija?

¹⁵ Sose šaj te ovel pharo? But putija resaja e manušen kolen na zanimini o ćaćipe (Ef. 4:18). Disave olendar ni na mangena te šunen odova sostar vaćeraja. Šaj amare kolege ki buti ja amare amala ki škola tane gruba premalo amende. Ja šaj amaro šef ja nastavniko niked nane zadovoljno amencar. Sebepi odova, šaj više na poštujinaja len niti premalo lende ponašinaja amen ađahar sar so bi mangaja on te ponašinen pe premalo amende.

16. Sose tano važno te mothova poštovanje okolenđe kola pana na služinena e Jehovase? (1. Petrova 2:12; 3:15)

¹⁶ Sose valjani te mothova poštovanje? Na valjani te bistra so o Jehova dikhela sar ponašinaja amen premalo okola kola pana na služinena lese. O apostol Petar podsetinđa disave hrišćanen so olengo šukar ponašanje šaj te podstaknini averen te „slavinen e Devle“. Odolese, ov savetujinđa len so ked braninena pi vera uvek valjani te „mothoven blagost hem hor poštovanje“. (Čitin 1. Petrova 2:12; 3:15.) Ked avdije valjani te branina amare verovanja anglo disavo sudija ja anglo avera manuša, amen uvek valjani te mothova poštovanje. O Jehova dikhela hem šunela so hem sar diso phenaja. Akava tano ćaće baro razlog te mothova poštovanje okolenđe kola nane Svedokija.

17. Sar šaj te mothova poštovanje premalo okola so nane Svedokija?

¹⁷ Sar šaj te mothova poštovanje? Đi propovedinaja, amen niked na mangaja o manuša te osetinen so nane vredna odolese so na đanena odobor andi Biblija. Amen haljovaja soj tane on but važna e Devlese hem odolese valjani te dikha len sar pobare amendar (Ag. 2:7; Fil. 2:3). Ako neko uvredini tut sebepi te verovanja, ma irin lese ađahar so ka phene diso so ka peravi le (1. Petr. 2:23). Ako phenđan diso bizo te razmisline, odmah izvinin tut. Sar šaj te mothove poštovanje okolenđe kasa ćereja buti? Ov bućarno radniko hem trudin tut te dikhe o šukar buća ko te kolege hem ko manuša aso kola ćereja buti (Titu 2:9, 10). Ked hijan pošteno hem bućarno radniko, tu šaj ka ugodine e manušenđe, a šaj hem na. Ama, ov sigurno so uvek ka ugodine e Devlese (Kol. 3:22, 23).

18. Sose tano aso amaro šukaripe te mothova poštovanje averenđe?

¹⁸ Isi amen but razlogija te mothova poštovanje averenđe. Sar so dikhljam ko akava članko, ked mothovaja poštovanje amare ćherutnenđe, amen mothovaja čast e Poglavarese andi porodica, e Jehovase. Isto ađahar ked mothovaja poštovanje e phralenđe hem e phenjenđe, amen mothovaja čast amare nebesko Dadese. A ked mothovaja poštovanje okolenđe kola nane Svedokija, amen ađahar šaj te podstaknina len hem on jekh dive te slavinen e Devle. Čak ako disave manuša niked na ka mothoven amenđe poštovanje, amen valjani uvek te poštujina len. Sose? Odolese so o Jehova ka blagoslovini amen. Ov obećinđa: „Me ka mothovav čast okolenđe kola maje mothovena čast“ (1. Sam. 2:30).