Ο Πρώτος Γράμμας σο Γραφιντάς ο Πέτρος
3 Με το ίδιος τρόπος τουμέν, τζουβλιάλεν, τι ντεν καν τουμαρέ ρομές. Αντικάς, άμα βοβ να ντέλα καν κο λάφι κι Ντεβλέσκο, τι βοηθίνεν-λες τι ντελ καν, όχι τουμαρέ λαφίντζαρ, αλλά οντουλέντζαρ σο κερένα. 2 Ανταβά κα αβέλ-πες επειδή κα ντικχέν πουμαρέ γιακχίντζαρ τουμαρί λατσσί* συμπεριφορά ντα τουμαρό μπαρό σεβασμός. 3 Για τι αβέν σουκάρ, μα ντεν μπαρί σημασία οντουλέντε σο ντικχίντιβενα, σαρ ισί ο κχουιπέ ι μπαλένγκο,* ο χρυσά ή ο σέα σο ισί σουκάρ. 4 Αλλά ντεν σημασία σαρ ισινέν αντρέ τουμαρέ γκίστε. Για τι αβέν σουκάρ, τθερέν ηρεμία ντα κοβλό γκι. Ανταβά τθερέλα μπαρί αξία κο γιακχά κι Ντεβλέσκε ντα ισί κάτι σο να χαλάντιβελα. 5 Ανταλέ τροπόσαρ ισινέ σουκάρ κο πουρανέ μπρεσά ο άγια τζουβλιά σο τθερένας ελπίδα κο Ντεβέλ. Ντα αντικάς ντένας καν πουμαρέ ρομές, 6 σαρ η Σάρρα ντέλας καν κο Αβραάμ ντα βακερέλας λέσκε «κύριε». Τουμέν κα αβέν σαρ η Σάρρα, άμα κα κερέν ο λατσσιπέ ντα να κα μουκχέν καέκ πράγμας τι νταραβέλ-τουμέν.
7 Με το ίδιος τρόπος τουμέν, μουρσάλεν, τι σικαβέν τουμαρέ ρομνιάκε ότι αγαβένα λάκο γκι.* Τι σικαβέν λάκε σεβασμός, σόσκε ο τζουβλιά νανέ αζόμ ζουρανέ,* ντα ο Ντεβέλ ντινάς* λέντε-ντα ο δώρος ι ζωγιάκο σαρ ντινάς-λες τουμέντε. Άμα να κα κερέν-λεν ανταλά, ο Ντεβέλ να κα ασουνέλ τουμαρέ προσευχές.
8 Πφραλάλεν, σαρέ τουμέν τι αβέν ενωμέ οντουλέντε σο σκεφτίνενα,* τι αγαβέν ι γιαβερέν,* τι μανγκέν ι γιαβερέν σαρ μανγκένα τουμαρέ πφραλέν, τι αγαβέν ι γιαβερένγκι ντουκχ ντα τι αβέν ταπεινοί. 9 Μα κερέν τουμέν-ντα γκεραλιπέ* οντουλέσκε σο κερέλα τουμένγκε γκεραλιπέ ντα μα προσβαλίνεν οντουλές σο προσβαλίνελα-τουμέν. Οκιά μπάνταρ, ντεν ζαμ οντουλέ τζενές, σόσκε ο Ντεβέλ τραμπιντάς-τουμέν για τι ακολουθίνεν ανταβά ντρομ. Αντικάς, ο Ντεβέλ κα κερέλ λατσσέ πράγματα τουμένγκε.
10 Ισί γραμμέ ακαβά: «Κον μανγκέλα τι απολαμβάνελ ι ζωή ντα τι ντικχέλ λατσσέ ντιβεσά πρέπει τι αρακχαβέλ πι τσσιπ για μα τι βακερέλ γκεραλέ πράγματα ντα πο βουστά για μα τι χουχαβέν. 11 Τι νασέλ ντουρ κατά γκεραλιπέ ντα τι κερέλ ο λατσσιπέ. Τι προσπαθίνελ μπουτ τι τθερέλ ειρήνη ι γιαβερέντζαρ ντα τι ατσσικιαρέλ-λα. 12 Ο γιακχά ι Ιεχωβάσκε* ισί οπράλ κο δίκαιοι ντα ο κανά λέσκε ασουνένα κάνα μολίνενα-λες.* Αλλά βουρτίνελα πο ντουμό ο Ιεχωβά* οντουλένγκε σο κερένα γκεραλέ πράγματα».
13 Οτθάρ, κον κα κερέλ τουμένγκε ζιάνι άμα κα κερέν ο λατσσιπέ σαρέ τουμαρέ γκίσαρ; 14 Αλλά ατζέ-ντα άμα τσσίντενα μπουτ επειδή κερένα δίκαια πράγματα, ισινέν ευτυχισμέ. Όμως, μα νταρέν οντουλέ πραγμάσταρ σο νταρένα ο τζενέ* ντα μα αγχώνεν. 15 Αλλά τι σεβάνεν ι Χριστός σαρ Κύριος αντρέ τουμαρέ γκίστε, τι αβέν πάντα έτοιμοι τι κερέν λάφι οντουλένγκε σο πακιάνα ανγκλάλ σαρέ κο τζενέ σο πουτσένα-τουμέν ανταλένγκε. Κερέν-λες όμως ανταβά κοβλέ γκίσαρ ντα με μπαρό σεβασμός.
16 Τι ατσσικιαρέν πάκι συνείδηση,* ντα αντικάς, σο-ντα βακερένα τουμένγκε οντουλά σο τζάνα τουμέντζαρ κόντρα πουμαρέ λαφίντζαρ τι λατζάν, επειδή τουμέν κερένα λατσσέ πράγματα σαρ μαθητές ι Χριστόσκε. 17 Άμα τσσίντενα μπουτ ντα ο Ντεβέλ μουκχέλα τι αβέλ-πες ανταβά, ισί πο λατσσές τι τσσίντεν μπουτ επειδή κερένα ο λατσσιπέ παρά επειδή κερένα ο γκεραλιπέ. 18 Εκ δίκαιος τζενό, ο Χριστός, μουλό σάντε εκ φαρ άδικε τζενένγκε ντα ελευθερωντάς-λεν κατά αμαρτίες. Κερντάς-λες ανταβά για τι γκερέλ-τουμέν κο Ντεβέλ. Βοβ μουλό σαρ τζενό ντα τζουβντιλό με ουράνιος σώμας. 19 Ντα ανταλέ σωμάσαρ, γκιλό κο άγγελοι* σο ισινέ φυλακισμέ για τι βακερέλ λένγκε ι τιμωρία σο κα λεν. 20 Βον κο ντιβεσά σο τζουβντιόλας ο Νώε να ντινέ καν. Αζομάν ο Ντεβέλ μπεσέλας με υπομονή,* καζόμ λατσσάρντιβελας η κιβωτός. Αντρέ κι κιβωτός τσσουντέ-πες σάντε οχτώ τζενέ,* ντα αντικάς νακχλέ αντράλ κατά πανί ντα σωσάλε.
21 Ανταβά σο αβιλό-πες αζομάν μανγκέλα τι σικαβέλ ο μπολντιπέ σο σώνελα τουμέν-ντα ακανά επειδή τθερένα πίστη ότι ο Ιησούς Χριστός ιστίντιλο κατά μουλέ. Ο μπολντιπέ νανέ για τι νασκιαρέλ ο μαγαριπέ κατά σώμας, αλλά για τι μανγκέν κατά Ντεβέλ πάκι συνείδηση. 22 Ο Χριστός ισί δεξιά κατά Ντεβέλ, σόσκε γκιλό κο ουρανός, ντα οτθέ ντένα-λες καν άγγελοι, οντουλά σο κερένα κουμάντος ντα οντουλά σο τθερένα ζορ.