Ο Πρώτος Γράμμας σο Γραφιντάς ο Πέτρος
5 Οτθάρ, αφού ισινόμ με-ντα πρεσβύτερος ντα ντικχλόμ οντουλά σο τσσιντιντάς ο Χριστός ντα κα λαβ γιεκ τουμέντζαρ ι δόξα σο κα σικάντιβελ, βακεράβα ακαβά* κο πρεσβύτεροι σο ισί τουμέντε: 2 Τι αβέν τσομπάνια κο μπρακέ κι Ντεβλέσκε σο μουκχλάς-λεν τουμαρέ βαστέντε. Σαρ πρεσβύτεροι,* αρακχαβέν-λεν, όχι ζορίσαρ, αλλά αντράλ τουμαρέ γκίσταρ σόσκε ανταβά μανγκέλα ο Ντεβέλ. Μα κερέν-λες για τι κερδίνεν πράγματα τουμαρέ νεαυτόσκε, αλλά κερέν-λες σαρέ τουμαρέ γκίσαρ. 3 Μα τι αβέν σαρ αρχηγοί σο ζορισκιαρένα οντουλέν σο μουκχλάς ο Ντεβέλ τουμαρέ βαστέντε,* αλλά τι αβέν λατσσό παράδειγμας ι μπρακένγκε. 4 Ντα κάνα κα σικάντιβελ ο αρχηγός ι τσομπανίγκο, κα λεν ο δοξασμέ στεφάνι σο να χαλάντιβελα.
5 Αντικάς τουμέν-ντα ο τερνέ, τι ντεν καν ι πφουρέν.* Σαρέ τουμέν όμως τι σικαβέν ότι ισινέν ταπεινοί οντουλέντζαρ σο κερένα* ο εκ ι γιαβερέσκε, σόσκε ο Ντεβέλ τζάλα κόντρα κο μπαρικανέ, αλλά σικαβέλα μπαρό λατσσιπέ κο ταπεινοί.
6 Οτθάρ, ντεν καν ι ζουρανέ Ντεβλές* για τι βάντελ-τουμέν οπρέ κάνα κα αβέλ ο βακίτι. 7 Ντα μουκχέν οπρά-λέστε σο-ντα στεναχώρια* τθερένα, σόσκε βοβ πφαμπόλα τουμένγκε. 8 Τι ατσσόν γκοντιαβέρ,* τι αβέν τζανγκαντέ! Τουμαρό ντουσμάνι,* ο Μπενγκ, κερέλα σαρ εκ άγριος λιοντάρι σο ισί μποκχαλό ντα ρόντελα τι αρακχέλ εκχέ τζενές για τι χαλ-λες. 9 Αλλά τζαν λέσαρ κόντρα ντα τι ατσσόν σταθεροί κι πίστη, σόσκε τζανένα ότι σαρέ τουμαρέ πφραλά κο ντουνιάς τσσίντενα οντουλά σο τσσίντενα τουμέν. 10 Ανταλά σο τσσίντενα κα ατσσόν για χάνικ. Σοράν όμως, ο Ντεβέλ σο σικαβέλα μπαρό λατσσιπέ κάθε τροπόσαρ κα σικλιαρέλ-τουμέν* ντιπ λατσσές. Βοβ ντινάς-τουμέν βίκος τι αβέν κι δόξα σο τθερέλα ντα σο ατσσόλα για πάντα. Κα κερέλ-τουμέν τι αβέν σταθεροί, κα κερέλ-τουμέν ζουρανέ, κα τσσουβέλ τουμένγκε ζουρανέ θεμέλια. 11 Η ζορ τι αβέλ λέστε για πάντα. Αμήν.
12 Αντράλ κατά Σιλουανός,* σο ισί πιστός πφραλ, γραφιντόμ τουμένγκε χάνικ λάφια για τι νταβ-τουμέν ζορ ντα για τι κεράβ-τουμέν τι αβέν σίγουροι ότι ο μπαρό λατσσιπέ σο σικαντάς τουμένγκε ο Ντεβέλ ισί αληθινός. Ατσσόν σταθεροί ανταλέστε. 13 Κερέλα τουμένγκε σελιάμι* οντιά σο ισί κι Βαβυλώνα ντα σο τραμπίντιλι κατά Ντεβέλ σαρ τραμπίντιλεν τουμέν-ντα. Κερέλα τουμένγκε σελιάμι ο Μάρκος-ντα σο ισί μο τσσαβό. 14 Χαιρετίνεν ο εκ ι γιαβερές αντράλ τουμαρέ γκίσταρ.*
Σαρέ τουμέν σο ισινέν μαθητές ι Χριστόσκε τι τθερέν ειρήνη.