Ο Δεύτερος Γράμμας σο Μπουτσσάντιλο κο Κορίνθιοι

6 Καζόμ κεράσα μπουτί γιεκ ι Ντεβλέσαρ, βακεράσα τουμένγκε ακαβά-ντα: Μα μπιστρέν σόσκε ντιντιλό τουμέντε ο μπαρό λατσσιπέ ι Ντεβλέσκο.* 2 Επειδή βοβ βακερέλα: «Κο βακίτι σο σικαβάβα λατσσιπέ ασουντόμ-τουτ ντα κο ντιβές σο σώναβα βοηθιντόμ-τουτ». Άκ’! Ακανά ισί ο βακίτι σο σικαβέλα αμένγκε λατσσιπέ ο Ντεβέλ. Άκ’! Ακανά ισί ο ντιβές σο σώνελα-αμέν.

3 Καεκχέ τροπόσαρ να κεράσα ι γιαβερέν τι προσβαλίντιβεν* για μα τι βακερέλ καέκ μπέτι λάφια για την υπηρεσία σο κεράσα. 4 Αλλά σικαβάσα ότι ισινάμ υπηρέτες ι Ντεβλέσκε κάθε τροπόσαρ: νταϊντίνασα μπουτ πράγματα, τθεράσα στεναχώριες, νακχάσα δύσκολα ντιβεσά ντα προβλήματα. 5 Νταπένα-αμέν, τσσουβένα-αμέν κι φυλακή, γκιντίντιβενα μπουτ τζενέ για τι τζαν αμέντζαρ κόντρα, κεράσα πφαρί μπουτί, ισί ντιβεσά σο ατσσάσα τζανγκαντέ ντα ντιβεσά σο να τθεράσα τι χας. 6 Τθεράσα εκ πάκι ζωή, τζανάσα ι αλήθεια ι Ντεβλέσκι, κεράσα υπομονή, σικαβάσα λατσσιπέ, οδηγίντιβασα κατά άγιος πνεύμας ντα μανγκάσα μπαγιά ι γιαβερέν σαρέ αμαρέ γκίσαρ.* 7 Βακεράσα ι αλήθεια, ντάσα μπέσα κι ζορ κι Ντεβλέσκι ντα τθεράσα αμαρέ δεξί ντα αριστερέ βαστέστε όπλα σο βοηθίνενα-αμέν τι κεράς λατσσέ πράγματα.* 8 Ντικχάσα τι κερέν αμένγκε σαρ σαρ* αλλά εμ μα τι σεβάνεν-αμέν ιτς, τι βακερέν μπέτι λάφια αμένγκε αλλά εμ τι ισαρέν-αμέν. Πακιάνα ότι ισινάμ τζενέ σο χουχαβένα, αλλά αμέν βακεράσα ι αλήθεια, 9 τζενέ σο να τζανένα-λεν ο γιαβερά, αλλά ο Ντεβέλ τζανέλα-αμέν, τζενέ σο ερεσένα κο μεριπέ,* αλλά άκ’! να μουλάμ, τζενέ σο λένα τιμωρία, αλλά να μουνταρένα-αμέν. 10 Πακιάνα ότι ισινάμ στεναχωριμέ, αλλά αμέν χαιρίνασα πάντα, ισινάμ τσορορέ, αλλά κεράσα χουλανέ μπουτέ τζενέν, να τθεράσα τίποτα, αλλά τθεράσα σαρέ ο πράγματα.

11 Πφραλάλεν σο μπεσένα κι Κόρινθος, να γκεραντάμ τίποτα τουμένταρ αλλά τσσουντάμ-τουμέν ντιπ αντρέ* αμαρέ γκίστε. 12 Αμέν σικαβάσα τουμένγκε σαρί αμαρί αγάπη, αλλά τουμέν να σικαβένα-λα αμένγκε σαρί. 13 Βακεράβα-λες τουμένγκε ανταβά σαρ τι αβένας μο τσσαβέ. Κερέν-λες τουμέν-ντα ανταβά. Τσσουβέν-αμέν ντιπ αντρέ* τουμαρέ γκίστε.

14 Μα τι αβέν εκ* οντουλέντζαρ σο να πακιάνα κο Χριστός. Σο σχέση τθερέλα η δικαιοσύνη ντα ο πφιρνιπέ;* Ή σο σχέση τθερέλα ο φως ντα ο καρανίκι; 15 Αβέλα-πες τι συμφωνίνεν ο Χριστός ντα ο Μπενγκ;* Ή σο μπουτί τθερένα γιεκ εκ πιστός τζενό ντα εκ τζενό σο να πακιάλα κο Χριστός; 16 Ντα σο μπουτί τθερένα ο είδωλα αντρέ κο ναός κι Ντεβλέσκο; Αμέν ισινάμ ναός ι τζουβντέ Ντεβλέσκο, σόσκε ο Ντεβέλ βακερντάς: «Κα μπεσάβ* λέντζαρ ντα κα αβάβ πασέ λέντε. Με κα αβάβ λένγκο Ντεβέλ, ντα βον κα αβέν μο λαός». 17 «“Οτθάρ, νικιόν λένταρ ντα νασέν”, βακερέλα ο Ιεχωβά,* “ντα τσσιναβέν τι ασταρέν οντουβά σο ισί μαγαριμέ”», «“ντα με κα δεχτίναβ-τουμέν”». 18 «“Με κα αβάβ τουμαρό ντατ, ντα τουμέν κα αβέν μο τσσαβέ ντα μο τσσαγιά”, βακερέλα ο Ιεχωβά,* σο Ισί ο Πο Ζουρανό».