4 Καλέ Πραγματένγκε;
ΜΕΡΙΚΑ τζενέ βακερένα ότι ανταγιά ισί η προσευχή σο κερένα μπουτ φαρ ο Χριστιανοί. Είτε τθερένα δίκιος είτε όχι, η προσευχής σο σικλιαρντάς-αμέν ο Ιησούς, σο τζανάσα-λα εμ σαρ «Πάτερ Ημών»—ισί σίγουρα εκ κατά πο παρεξηγημέ προσευχές. Εκατομμύρια τζενέ ισί σικλέ τι κερέν ανταγιά προσευχή κάθε ντιβές, μπέκιμ μπουτ φαρ αντρέ κο ντιβές. Αλλά ο Ιησούς να μανγκέλας τι αβέλ πες κάτι ασακό. Σαρ τζανάσα-λες ανταβά;
Ακριβώς πριν τι βακερέλ ανταγιά προσευχή, ο Ιησούς βακερντάς: «Τουμαρέ προσευχιέντε, μα βακερέν εμ ο ίδια ντα ο ίδια». (Ματθαίος 6:7) Μήπως σοράν κερντάς ο αντίθετος οντουλέσταρ σο βακερντάς ντα σικλιαρντάς-λεν κάποια λάφια σο έπρεπε τι σικλιόν αβριάλ ντα τι βακερέλ-λεν μπουτ φαρ αντρέ κο ντιβές; Νάα! Ανταβά σο κερντάς ο Ιησούς ισινέ τι σικλιαρέλ-αμέν καλέ πραγματένγκε πρέπει τι προσευχίντιβας ντα τι σικαβέλ αμένγκε καλά ισί ο πο σημαντικά πράγματα σο πρέπει τι μανγκάς αντράλ κατά προσευχή. Για τι ντικχάς με προσοχή σο βακερντάς. Αρακχάσα ανταγιά προσευχή κο εδάφια Ματθαίος 6:9-13.
«Ντάντε σο ισινάν κο ουρανός, τι αγιάντιβελ το ναβ».
Ανταλέ λαφίντζαρ, ο Ιησούς αντάς κι γκοντί πι μαθητένγκι ότι πρέπει τι κερέν σαρέ ο προσευχές λέσκε Νταντέστε, κο Ιεχωβά. Τζανένα, όμως, σόσκε ισί αζόμ σημαντικός ο ναβ ι Ντεβλέσκο ντα σόσκε πρέπει τι αγιάντιβελ;
Κο κήπος της Εδέμ, βακέρντιλε ψέματα σο μελιαρντέ ο άγιος ναβ ι Ντεβλέσκο. Ο ντουσμάνι ι Ντεβλέσκο, ο Μπενγκ, βακερντάς ότι ο Ιεχωβά ισί εκ Άρχοντας σο βακερέλα ψέματα ντα ότι ντικχέλα σάντε πο νεαυτός. Βακερντάς ότι ο Ντεβέλ να τθερέλα ο δικαίωμας τι κερέλ κουμάντος οντουλέντε σο λατσσαρντάς. (Γένεση 3:1-6) Μπουτ τζενέ τσσίντενα κατά Μπενγκ, ντα σικλιαρένα ότι ο Ντεβέλ ισί σουρντό, σκληρός, ότι να ντουκχάλα ι τζενένγκε ή ότι νανέ Οντουβά σο κερντάς σαρέ ο πράγματα. Γιαβερά τζενέ γκιλέ κόντρα κο ναβ κι Ιεχωβάσκο, νικαντέ-λες κατά μεταφράσεις ι Γραφιάκε ντα να μουκχένα ι γιαβερέν τι χρησιμοποιήνεν ανταβά ναβ.
Η Γραφή σικαβέλα ότι ο Ντεβέλ κα νασκιαρέλ σαρέ ανταλά αδικίες. (Ιεζεκιήλ 39:7) Αντικάς, κα ντελ-τουμέν σο-ντα τθερένα ανάγκη ντα κα λύνελ σαρέ τουμαρέ πρόβλημα. Σαρ; Ο λάφια σο βακερντάς ο Ιησούς πο σοράν πι προσευχιάτε ντένα ι απάντηση.
«Τι αβέλ τι Βασιλεία».
Αντιβές, ο σπουδαγμέ τζενέ σο ασχολίντιβενα ι Γραφιάσαρ τθερένα διαφορετικές απόψεις ι Ντεβλέσκε Βασιλειάκε. Αλλά, ο τζενέ σο ασουνένας ι Ιησούς, τζανένας ότι ο προφήτες ι Ντεβλέσκε βακερντέας κατά πουρανέ μπρεσά ότι ο Μεσσίας, εκ Σωτήρας τραμπιμέ κατά Ντεβέλ, κα αβέλας ο Βασιλιάς εκχέ Βασιλειάτε σο κα αλλάνελας ι ντουνιάς. (Ησαΐας 9:6, 7· Δανιήλ 2:44) Ανταγιά Βασιλεία κα αγιάνελ ο ναβ ι Ντεβλέσκο ντα κα σικαβέλ ότι σαρέ οντουλά σο βακερέλα ο Μπενγκ ισί ψέματα ντα σοράν κα καταστραφίνελ εμ λες εμ οντουλά σο κερέλα. Η Βασιλεία ι Ντεβλέσκι κα νασκιαρέλ ο τζένγκια, ο νασφαλίματα ι μποκχ ατζέ-ντα ο μεριπέ. (Ψαλμός 46:9· 72:12-16· Ησαΐας 25: 8· 33:24) Κάνα προσευχίντιβενα τι αβέλ η Βασιλεία ι Ντεβλέσκι, προσευχίντιβενα τι νικιόν μπαγιά σαρέ ανταλά υποσχέσεις.
«Τι αβέλ-πες οντουβά σο μανγκέσα, σαρ κο ουρανός, αντικάς οπράλ κι πφουβ-ντα».
Σαρ βακερντάς ο Ιησούς, καζόμ σίγουρος ισί ότι οντουβά σο μανγκέλα ο Ντεβέλ αβέλα-πες κο ουρανός οτθέ σο μπεσέλα, αζόμ σίγουρος ισί ότι κα αβέλ-πες κι πφουβ-ντα! Τίποτα να τσσιναντάς ι Ντεβλές τι κερέλ οντουβά σο μανγκέλα κο ουρανός. Οτθέ, ο Τσσαβό ι Ντεβλέσκο κερντάς τζένγκι ι Μπενγκέσαρ ντα λέσκε στρατόσαρ ντα φουρτιντάς-λεν κι πφουβ. (Αποκάλυψη κεφάλαιο 12:9-12) Ο τρίτος πράγμας σο σικλιαρντάς-αμέν ο Ιησούς τι μανγκάς κι προσευχή σαρ ο πρώτα ντούι, βοηθίνελα-αμέν τι τθεράς αμαρέ γκοντιάτε οντουβά σο ισί πο σημαντικός—όχι οντουβά σο μανγκάσα αμέν, αλλά οντουβά σο μανγκέλα ο Ντεβέλ. Οντουβά σο μανγκέλα ο Ντεβέλ ισί οντουβά σο πάντα κερέλα ο πο μπαρό λατσσιπέ σαρί κι δημιουργία. Άκ’ σόσκε ατζέ-ντα ο Ιησούς σο ισινέ εκ τέλειος τζενό βακερντάς πι νταντέσκε: «Μα τι αβέλ-πες οντουβά σο μανγκάβα με, αλλά οντουβά σο μανγκέσα τούι».—Λουκάς 22:42.
«Ντε-αμέν αντιβές αμαρό μαντρό ανταλέ ντιβεσέσκε».
Σοράν, ο Ιησούς σικαντάς ότι μπορίνασα αμαρέ προσευχιέντε τι μανγκάς προσωπικά-ντα πράγματα. Νανέ λάθος τι προσευχίντιβας κο Ντεβέλ ι πραγματένγκε σο τθεράσα ανάγκη κάθε ντιβές. Ανταβά ανέλα αμαρέ γκοντιάτε ότι ο Ιεχωβά ισί οντουβά σο «ντέλα σαριλέντε ζωή ντα ανάσα ντα σαρέ ο πράγματα». (Πράξεις 17:25) Η Γραφή σικαβέλα ότι ο Ιεχωβά ισί σαρ εκ λατσσό ντατ σο χαιρίνελα τι ντελ πι τσσαβέντε σο-ντα τθερένα ανάγκη. Όμως σαρ κάθε λατσσό ντατ, να ντέλα πι τσσαβέν κάτι σο τζανέλα ότι νανέ λατσσό λένγκε.
«Συγχώρινε αμαρέ αμαρτίες».
Τθερένα μπαγιά ανάγκη ι συγχώρηση ι Ντεβλέσκι; Μπουτ τζενέ αντιβές να αγαβένα σο ισί η αμαρτία ντα καζόμ σοβαρή ισί. Η Γραφή όμως σικλιαρέλα ότι η αμαρτία φταίνελα ι πο μπαρέ προβληματένγκε σο τθεράσα, σόσκε ισί ο λόγος σο μερένα ο τζενέ, αφού μπιάντιβασα αμαρτωλοί κεράσα αμαρτίες μπουτ φαρ, ντα ο μόνος τρόπος για τι τζουβντιάς για πάντα ισί τι συγχωρίνελ-αμέν ο Ντεβέλ. (Ρωμαίους 3:23· 5:12· 6:23) Όμως, οντουβά σο βακερέλα η Γραφή λοκχιαρέλα αμαρό γκι: «Τούι, Ιεχωβά, ισινάν λατσσό ντα έτοιμος τι συγχωρίνες».—Ψαλμός 86:5.
«Μα μουκχ τι περάς κο πειρασμός».
Αγαβένα καζόμ μπαρί ανάγκη τθερένα ο αρακχαϊπέ ι Ντεβλέσκο; Μπουτ τζενέ να μανγκένα τι πακιάν ότι υπαρχίντιβελα “ο πφιρνό”, ο Μπενγκ. Όμως ο Ιησούς σικλιαρντάς ότι ο Μπενγκ ισί πραγματικός ντα βακερντάς ότι ισί ο «άρχοντας ανταλέ ντουνιάσκο». (Ιωάννης 12:31· 16:11) Ο Μπενγκ επηρεαντάς ανταλέ ντουνιάς σο κερέλα-λες κουμάντος ντα μανγκέλα τι επηρεάνελ τουμέν-ντα για μα τι αβέν πασέ τουμαρέ Νταντέσαρ Ιεχωβάσαρ. (1 Πέτρου 5:8) Όμως ο Ιεχωβά ισί μπουτ πο ζουρανό κατά Μπενγκ ντα μανγκέλα τι αρακχαβέλ οντουλέν σο μανγκένα-Λες.
Οντουλά σο ντικχλάμ χάνικ λαφίντζαρ κατά προσευχή σο σικλιαρντάς-αμέν ο Ιησούς, νανέ σαρέ ο πράγματα σο μπορίνασα τι βακεράς αμαρέ προσευχιάτε. Ντεν-τουμέν γκοντί ότι ο εδάφιος 1 Ιωάννη 5:14 βακερέλα αμένγκε ι Ντεβλέσκε: «Σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα, βοβ ασουνέλα-αμέν». Οτθάρ, μα νταρέν ότι τουμαρέ προβλήματα ισί αζόμ χουρντέ σο να αξίνελα τι βακερέν-λεν κο Ντεβέλ.—1 Πέτρου 5:7.
Σο κα βακεράς όμως ι σαατίσκε ντα ι τθανέσκε; Τθερέλα σημασία κάνα ντα κάι προσευχίντιβασα;