5 Τθερέλα Σημασία Κάι ντα Κάνα;

ΣΙΓΟΥΡΑ τθερένα παρατηριντό ότι ο πο μπουτ οργανωμέ θρησκείες ντένα μπαρί σημασία κο τρόπος σο ισί κερντέ ο κτίρια προσευχής ντα τσσουβένα συγκεκριμέ σαάτια για τι κερέν προσευχές. Βακερέλα, άραγε, η Γραφή ότι αμαρέ προσευχές πρέπει τι αβέν σάντε εκχέ συγκεκριμέ τθανέστε ντα σαατίστε;

Η Γραφή σικαβέλα ότι υπαρχίντιβενα μερικές περιπτώσεις σο ισί λατσσό τι κεράς προσευχή. Για παράδειγμας, πριν ο Ιησούς τι χαλ πι μαθητέντζαρ, κερέλας προσευχή για τι βακερέλ ευχαριστώ κο Ντεβέλ. (Λουκάς 22:17) Επίσης, κάνα λέσκε μαθητές συναθροίντιβενας για τι ντεν λατρεία, προσευχίντιβενας σαρέ γιεκ. Ισινέ εκ συνήθεια σο κερένας-λα μπουτ βακίτι κο συναγωγές σο τθερένας ο Ιουδαίοι ντα κο ναός κι Ιερουσαλήμ. Ο Ντεβέλ μανγκέλας τι αβέλ ο ναός «κχερ προσευχιάκο σαρέ ι τθεμένγκε».​—Μάρκος 11:17.

Κάνα ο υπηρέτες ι Ντεβλέσκε συναθροίντιβενα ντα προσευχτίντιβενα σαρέ γιεκ, οντουλά σο μανγκένα μπορίνενα τι ανέν αποτέλεσμας. Άμα ισί σαρέ ενωμέ κο τρόπος σο σκεφτίνενα ντα άμα η προσευχή σο κερένα ισί αντικάς σαρ βακερένα ο αρχές ι Γραφιάκε, αβέλα ι Ντεβλέσκο γκι. Η προσευχή μπορεί μάλιστα τι τσσίντελ-λες τι κερέλ κάτι σο μπέκιμ μα τι κερέλας. (Εβραίους 13:18, 19) Ο Μάρτυρες ι Ιεχωβάσκε προσευχίντιβενα σαρέ κο συναθροίσεις σο κερένα. Καλίνασα-τουμέν αντράλ αμαρέ γκίσταρ τι αβέν σε εκ Αίθουσα Βασιλείας σο ισί οτθέ πασέ σο μπεσένα ντα τι ασουνέν τουμέν ο ίδιοι ανταλά προσευχές.

Όμως, η Γραφή να βακερέλα ότι ο προσευχές πρέπει τι αβέν σάντε εκχέ συγκεκριμέ σαατίστε ή τθανέστε. Η Γραφή σικαβέλα ότι ο υπηρέτες ι Ντεβλέσκε κερένας προσευχή κάνα ντα κάι μανγκένας. Ο Ιησούς βακερντάς: «Κάνα προσευχίντιβεσα, τζα αντρέ τι δωματιόστε, πφάντε τι πόρτα ντα σοράν κερ προσευχή τι Νταντέστε σο ισί γκεραντό. Αζομάν το Ντατ σο ντικχέλα-τουτ γκεραντέ τθανέσταρ, κα ντελ-τουτ ζαμ».​—Ματθαίος 6:6.

Να χαιρίνενα σο τζανένα-λες ανταβά; Μπορίνενα τι τζαν πασέ Οντουλέστε σο κερέλα κουμάντος ο σύμπαν κάνα-ντα μανγκένα, χωρίς τι ντικχέλ-τουμέν καέκ γιαβέρ, ντα τι αβέν σίγουροι ότι βοβ κα ντικχέλ-τουμέν. Οτθάρ, νανέ παράξενος σο ο Ιησούς ρόντελας μπουτ φαρ ευκαιρίες τι κερέλ κορκορό προσευχή! Εκ φαρ, προσευχίντιβελας σαρί ι ιράτ κο Ντεβέλ ντα λογικά μανγκέλας λέσταρ τι οδηγίνελ-λες σε εκ μπουτ δύσκολη απόφαση σο έπρεπε τι λελ.​—Λουκάς 6:12, 13.

Γιαβερά-ντα μουρσά ντα τζουβλιά σο βακέρντιβενα κι Γραφή προσευχίντιβενας κάνα τθερένας τι λεν μπαρέ αποφάσεις ή κάνα τθερένας μπαρέ δυσκολίες. Μπάζιμ προσευχίντιβενας αβριάλ, ενώ γιαβερά φαρ αντρά-πουμένταρ. Προσευχίντιβενας γιεκ γιαβερέντζαρ, αλλά κορκορέ-ντα. Ο θέμας ισί ότι προσευχίντιβενας. Ο Ντεβέλ βακερέλα σαρέ πι υπηρετόνγκε: «Προσευχίντιβεν συνέχεια». (1 Θεσσαλονικείς 5:17) Ισί έτοιμος τι ασουνέλ οντουλέν σο κερένα λέσκο γκι, καζόμ-ντα σαάτια τι χρειαζίντιβελ. Να σικαβέλα αγάπη ανταβά σο βακερέλα αμένγκε τι κεράς;

Βέβαια, αντιβές μπουτ τζενέ νανέ σίγουροι άμα η προσευχή μπορίνελα μπαγιά τι κερέλ λένγκε λατσσιπέ. “Κα βοηθίνελ-μαν σε κάτι;” μπέκιμ τι σκεφτίνενα.