6 Βοηθίνελα-αμέν;

ΚΕΡΕΛΑ αμένγκε λατσσιπέ η προσευχή; Η Γραφή ντέλα ξεκάθαρη απάντηση, βακερέλα ότι ο προσευχές σο κερένα ο πιστοί υπηρέτες ι Ντεβλέσκε μπαγιά κερένα λένγκε λατσσιπέ. (Λουκάς 22:40· Ιακώβου 5:13) Κι πραγματικότητα, η προσευχή κερέλα αμένγκε μπαρό λατσσιπέ πνευματικά, κι γκοντί, κο γκι, ατζέ-ντα κο σώμας. Σαρ αβέλα-πες ανταβά;

Φιρειπείν βακερέν ότι τθερένα εκχέ τσσαβές σο κάποιος κερέλα λέσκε εκ δώρος. Κα σικλιαρένας τουμαρέ τσσαβές ότι πρέπει απλώς τι νιωθίνελ εκτίμηση; Ή κα σικλιαρένας-λες τι σικαβέλ-ντα πι εκτίμηση; Κάνα βακεράσα οντουλά σο νιωθίνασα λαφίντζαρ, ντάσα μπουτ προσοχή οντουλέντε σο βακεράσα ντα μάλιστα ανταλά αισθήματα κεράσα-λεν πο ζουρανέ. Αβέλα-πες όμως ανταβά κάνα κεράσα λάφι ι Ντεβλέσαρ; Σίγουρα αβέλα-πες! Ντικχέν μερικά παραδείγματα.

Προσευχή για τι βακεράς ευχαριστώ. Κάνα βακερέσα ευχαριστώ αμαρέ Νταντέστε κο Ιεχωβάς σαρέ οντουλένγκε σο ντινάς-αμέν, ντάσα πο μπουτ προσοχή κο ευλογίες σο τθεράσα. Αντικάς, τθεράσα πο μπαρί εκτίμηση, πο μπουτ χαρά ντα πο λατσσί διάθεση.​—Φιλιππησίους 4:6.

Παράδειγμας: Ο Ιησούς σικαντάς πι εκτίμηση σο λέσκο Ντατ ασουνέλας ντα απαντίνελας λέσκε προσευχιέντε.—Ιωάννης 11:41.

Προσευχή για συγχώρηση. Κάνα μανγκάσα ι Ντεβλέσκι συγχώρηση, κεράσα πο ζουρανί αμαρί συνείδηση, κεράσα αμαρό γκι τι μετανιώνελ μπαγιά ντα αγαβάσα πο λατσσές καζόμ σοβαρή ισί η αμαρτία. Επίσης, νασέλα αμένταρ ο πφαριπέ ντα ο τύψεις.

Παράδειγμας: Ο Δαβίδ κερντάς προσευχή για τι βακερέλ ότι μετανιωσάλο μπαγιά ντα τι σικαβέλ πι ντουκχ.—Ψαλμός 51.

Προσευχή για τι οδηγίνελ-αμέν ο Ιεχωβά ντα για τι ντελ-αμέν σοφία. Κάνα μανγκάσα κατά Ιεχωβά τι οδηγίνελ-αμέν ντα τι ντελ-αμέν ι κατάλληλη σοφία για τι λας σωστές αποφάσεις, ανταβά βοηθίνελα-αμέν τι σικαβάς μπαγιά ότι ισινάμ ταπεινοί. Ντάσα-αμέν γκοντί αμαρέ όρια ντα ανταβά κερέλα-αμέν τι μπαριαράς αμαρί μπέσα αμαρέ Νταντέσκε σο ισί κο ουρανός.​—Παροιμίες 3:5, 6.

Παράδειγμας: Ο Σολομών μανγκλάς ταπεινά τι οδηγίνελ-λες ο Ιεχωβά ντα τι ντελ-λες σοφία για τι κερέλ λατσσές κουμάντος κο Ισραήλ.—1 Βασιλέων 3:5-12.

Προσευχή για τι βακεράς αμαρί ντουκχ. Άμα πουτράσα αμαρό γκι κο Ιεχωβά κάνα ντουκχάσα αντρέ αμαρέ γκίστε, αμαρό γκι λοκχιόλα, ντα στηρίντιβασα κο Ιεχωβά ντα όχι αμαρέ νεαυτόστε.—Ψαλμός 62:8.

Παράδειγμας: Ο Βασιλιάς Ασά κερντάς προσευχή κάνα ισινέ ανγκλάλ εκχέ ζουρανέ ντουσμανίστε.—2 Χρονικών 14:11.

Προσευχή ι τζενένγκε σο νακχένα δυσκολίες. Ασακέ προσευχές βοηθίνενα-αμέν μα τι ντικχάς σάντε αμαρό νεαυτός, αλλά τι αγαβάς ι γιαβερένγκι ντουκχ ντα τι πφαμπάς λένγκε.

Παράδειγμας: Ο Ιησούς κερντάς προσευχή πι μαθητένγκε.—Ιωάννης 17:9-17.

Προσευχή για τι ντας δόξα κο Ιεχωβά. Κάνα ντάσα δόξα ι Ιεχωβάς σαρέ ι σουκάρ πραγματένγκε σο κερντάς ντα για το ιδιότητες λέσκε, αμαρό σεβασμός ντα η εκτίμηση σο τθεράσα λέσκε μπαριόνα. Ασακέ προσευχές βοηθίνενα-αμέν τι τζας πο πασέ κο Ντεβέλ σο ισί αμαρό Ντατ.

Παράδειγμας: Ο Δαβίδ ντινάς αντράλ πι γκίσταρ δόξα κο Ντεβέλ ι πραγματένγκε σο λατσσαρντάς.​—Ψαλμός 8.

Εκ γιαβέρ ευλογία σο λάσα αντράλ κατά προσευχή ισί «η ειρήνη ι Ντεβλέσκι σο ισί πο οπρέ σαρέ οντουλένταρ σο αγαβάσα». (Φιλιππησίους 4:7) Ισί μπουτ μπαρί ευλογία τι τθεράς ειρήνη αντρ’ αμέντε ανταλέ δύσκολε ντουνιάστε. Επίσης κερέλα αμένγκε λατσσιπέ κι υγεία-ντα. (Παροιμίες 14:30) Μήπως, ανταβά αβέλα-πες σάντε επειδή κεράσα αμέν μπαρέ προσπάθειες; Ή μήπως τθερέλα τι κερέλ με κάτι πο σημαντικός;