ΘΕΜΑΣ ΚΙ ΑΝΓΚΛΑΪΝΙ ΣΕΛΙΔΑ | Η ΑΓΙΑ ΓΡΑΦΗ ΑΤΣΣΙΛΙ ΑΡΑΚΧΑΝΤΙ—ΣΑΡ;
Εκ Σημαντική Ιστορία
Η Αγία Γραφή ισί διαφορετική σαρέ κατά θρησκευτικά βιβλία. Καέκ γιαβέρ βιβλίος να αλλαντάς ο γκοντιά αμπόρ μπουτ τζενένγκε ντα αζόμ μπουτ βακίτι. Οκιά μπάνταρ, καέκ γιαβέρ βιβλίος να κερντάς αζόμ μπουτ τζενέν τι ρόντεν ντα τι βακερέν πουμαρί γνώμη ανταλένγκε σο γραφίνελα.
Για παράδειγμας, μερικά σπουδαγμέ τζενέ νανέ σίγουροι άμα ο Άγιες Γραφές σο τθεράσα αντιβές βακερένα ο ίδια λάφια σο υπαρχίντιβενας κο πουρανέ μπρεσά. «Να μπορίνασα τι αβάς σίγουροι ότι τθεράσα ι Γραφιάκε κείμενα σαρ ισινέ ντιπ κι αρχή», βακερέλα εκ καθηγητής θεολογίας. «Τθεράσα σάντε αντίγραφα σο ισί πφερντέ λάθη, ντα ο πο μπουτ ανταλένταρ γραφίντιλε μπουτ μπρεσά σοράν κατά πρώτα κείμενα, οτθάρ, τθερένα μπερεκέτι διαφορές οντουλένταρ».
Γιαβερά τζενέ να πακιάνα καμπόρ σημαντική ισί η Γραφή ιτιρί κατά πράγματα σο σικλιλέ χουρντιαρέλα μπερί πουμαρέ θρησκειάταρ. Ο Φάιζαλ, για παράδειγμας, σικλιλό πι φαμιλιάταρ σο νανέ Χριστιανοί ότι η Γραφή ισί εκ ιερός βιβλίος σο αλλαξάλο όμως. «Ανταβά κερντάς-μαν μα τι νταβ μπέσα κο τζενέ σο βακερένας μάνγκε ι Γραφιάκε», βακερέλα βοβ. «Αφού να τθερένας ι Γραφή σο υπαρχίντιβελας κο πουρανέ μπρεσά. Η Γραφή αλλαξάλι!»
Τθερέλα σημασία άμα η Γραφή αλλαξάλι ή όχι; Σκεφτίνεν ακαλά ερωτήματα: Μπορίνενα τι ντεν μπέσα κο υποσχέσεις κι Γραφιάκε σο κοβλιαρένα αμαρό γκι άμα να ισινέν σίγουροι ότι ανταλά υποσχέσεις μπαγιά γραφισάλεας κο πουρανέ κείμενα; (Ρωμαίους 15:4) Κα στηρίντιβενας κο αρχές κι Γραφιάκε για τι λεν σημαντικές αποφάσεις ι μπουτιάκε, ι φαμιλιάκε ή για τι ντας λατρεία ι Ντεβλές, άμα ο Γραφές σο τθεράσα αντιβές ισινέ απλώς αντίγραφα σο τθερένα λάθη;
Παρόλο σο να τθεράσα ο πρώτα βιβλία ι Γραφιάκε, υπαρχίντιβενα μπερεκέτι πουρανέ αντίγραφα σο μπορίνασα τι ρόντας αντρέ λέντε. Σαρ ατσσιλέ ανταλά αντίγραφα παρόλο σο νακχλέ μπουτ μπρεσά; Σαρ ατσσιλί η Γραφή παρόλο σο γκιλέ λάσαρ κόντρα ντα παρόλο σο μπουτ τζενέ προσπαθιντέ τι αλλάνεν ο λάφια λάκε; Σαρ ανταλά σο νακχλάς ο Λάφι ι Ντεβλέσκο μπαριαρένα τουμαρί εμπιστοσύνη κι Γραφή σο τθερένα αντιβές; Ντικχέν σαρ απαντίντιβενα ανταλά ερωτήματα κο γιαβερά θέματα.