“Οντουλά σο Ασουνένα-τουμέν” κα Σώντιβεν

1. Σο μανγκάσα αμαρέ τζενένγκε σαρέ;

«ΟΤΘΑΡ μπερί σο σικλιλόμ ι αλήθεια, μανγκάβας τι τθεράβ σαρί μι φαμιλί μάντζαρ κο Παράδεισος», βακερέλα εκ πφεν, η Πολίν.b «Ατζέ πιο μπουτ μανγκάβας μο ρομ ντα μο τσσαβό τι υπηρετίνεν ι Ιεχωβάς μάντζαρ». Τουμέν, τθερένα τζενέν σο να σικλιλέ ντα να μανγκλέ ατζέκ ι Ιεχωβάς; Άμα τθερένα, μπορεί τι νιωθίνενα σαρ η Πολίν.

2. Καλά ερωτήσεις κα ντικχάς ανταλέ μαθημάστε;

² Ναστί κεράσα αμαρέ τζενέν τι ασουνέν ζορίσαρ ο λατσσέ αμπέρια. Αλλά μπορίνασα τι βοηθίνας-λεν τι πουτρέν πουμαρί γκοντί ντα πουμαρό γκι κο λάφια κι Γραφιάκε. (2 Τιμ. 3:​14, 15) Σόσκε πρέπει τι ντας μαρτυρία αμαρέ τζενέντε; Σόσκε χρειαζίντιβελα τι αγαβάς-λεν; Σαρ κα βοηθίνας-λεν τι μανγκέν ι Ιεχωβάς σαρ μανγκάσα-λες αμέν; Ντα σαρ κα βοηθίνεν-αμέν σαρέ ο πφραλά ντα ο πφενιά κατά κχανγκιρί;

ΣΟΣΚΕ ΤΙ ΝΤΑΣ ΜΑΡΤΥΡΙΑ ΑΜΑΡΕ ΤΖΕΝΕΝΤΕ;

3. Σόσκε πρέπει τι ντας μαρτυρία αμαρέ τζενέντε σαρ βακερέλα ο εδάφιος 2 Πέτρου 3:9;

³ Ατζεχάνικ, ο Ιεχωβά κα ανέλ ο τέλος ανταλέ ντουνιάσκο. Σάντε οντουλά “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα” κα τζουβντιόν. (Πράξ. 13:​48) Ντάσα μπουτ αμαρέ σαατίσταρ ντα αμαρέ ζοριάταρ για τι κεράς λάφι τζενέντζαρ σο να τζανάσα, οτθάρ ισί λογικός τι κεράς λάφι αμαρέ τζενέντζαρ-ντα για τι υπηρετίνεν ι Ιεχωβάς αμέντζαρ. Αμαρό λατσσό Ντατ, ο Ιεχωβά, «να μανγκέλα τι καταστραφίντιβελ καέκ τζενό αλλά σαρέ τι μετανιώνεν».​—Διαβάνεν 2 Πέτρου 3:9.

4. Καβά λάθος μπορεί τι κεράσα κάνα ντάσα μαρτυρία αμαρέ τζενέντε;

⁴ Μα μπιστρέν ότι υπαρχίντιβελα σωστός ντα λάθος τρόπος για τι βακεράς ο λατσσέ αμπέρια σο μπορίνενα τι σώνεν ι τζενέν. Μπορεί τι κεράσα λάφι λατσσιμάσαρ κάνα ντάσα μαρτυρία οντουλέντε σο να τζανάσα-λεν, αλλά μα τι κεράσα λάφι αντικάς αμαρέ τζενέντε.

5. Σο πρέπει τι τθεράς αμαρέ γκοντιάτε πριν τι κεράς λάφι ι Ιεχωβάσκε αμαρέ τζενέντζαρ;

⁵ Μπουτ αμένταρ μπορεί τι μετανιώνασα για το τρόπος σο ντινάμ μαρτυρία αμαρέ τζενέντε ι πρώτη φαρ ντα κα μανγκάας τι κεράας λέντζαρ λάφι γιαβέρτουλους. Ο απόστολος Παύλος ντινάς κο Χριστιανοί ακαγιά συμβουλή: «Τουμαρέ λάφια πάντα τι αβέν γκουλντέ, τι τθερέν λον, για τι τζανέν σαρ πρέπει τι απαντίνεν ι κάθε εκχέσκε». (Κολ. 4:5, 6) Ισί λατσσό τι τθεράς-λες ανταβά αμαρέ γκοντιάτε κάνα κεράσα λάφι αμαρέ τζενέντζαρ. Άμα να κα τθεράς-λες, μπορεί τι χολιασκιαράς-λεν αντίς τι βοηθίνας-λεν τι ασουνέν.

ΣΑΡ ΚΑ ΒΟΗΘΙΝΑΣ ΑΜΑΡΕ ΤΖΕΝΕΝ;

6, 7. Βακερέν εκ παράδειγμας σο σικαβέλα σόσκε πρέπει τι αγαβάς αμαρέ ρομές ή αμαρέ ρομνιά σο νανέ κι αλήθεια.

⁶ Τι αγαβέν-λεν. Η Πολίν βακερέλα: «Κι αρχή, μανγκάβας τι κεράβ λάφι μι ρομέσαρ σάντε ι Ντεβλέσκε ντα ι Γραφιάκε. Να κεράας ιτς λάφι οντουλένγκε σο αβένας-πες κάθε ντιβές». Αλλά λάκο ρομ, ο Γουέιν, να τζανέλας μπουτ πράγματα ι Γραφιάκε, οντουλέσκε να αγαβέλας σο βακερέλας λέσκε. Αμντίνελας ότι η Πολίν τθερέλας πι γκοντιάτε σάντε πι θρησκεία. Νταρέλας ότι μπλεξάλι εκχέ επικίνδυνε θρησκειάσαρ ντα ότι χουχαντέ-λα.

⁷ Η Πολίν βακερέλα ότι μπουτ σαάτια, αρατί ντα κο σαββατοκύριακα, ισινέ ι πφραλέντζαρ ντα ι πφενίντζαρ κο συναθροίσεις, κο έργος ντα κο παρέες. Βόι βακερέλα: «Ισινέ φαρ σο ο Γουέιν βουρτίνελας κχερέ ντα αρακχέλας-λες τσουτσό, οτθάρ νιωθίνελας κορκορό». Σικλιντίνελας πι ρομνιάκε ντα πι τσσαβέσκε. Να τζανέλας κάσαρ ισινέ ντα ντικχίντιβελας ότι η Πολίν τσσουβέλας πι νεβέ αμαλέν πιο οπρέ λέσταρ. Οτθάρ, ο Γουέιν βακερντάς λάκε ότι κα λέλας διαζύγιος λάταρ. Σαρ κα μπορίνελας η Πολίν τι σικαβέλ ότι αγαβέλας πιο μπουτ πι ρομές;

8. Σο ντικχένα πιο μπουτ αμαρέ τζενέ σαρ βακερένα ο εδάφια 1 Πέτρου 3:1, 2;

⁸ Μουκχέν τουμαρί συμπεριφορά τι κερέλ λάφι. Μπουτ φαρ, αμαρέ τζενέ ντικχένα οντουλά σο κεράσα πιο μπουτ οντουλένταρ σο βακεράσα. (Διαβάνεν 1 Πέτρου 3:1, 2) Η Πολίν τελικά αγαντάς-λες ανταβά. Βακερέλα: «Τζανάβας ότι ο Γουέιν μανγκέλας-αμέν ντα να μανγκέλας μπαγιά τι λελ διαζύγιος. Αλλά κάνα βακερντάς-λες ανταβά, αγαντόμ ότι έπρεπε τι αρχίναβ τι κεράβ ο πράγματα σαρ μανγκέλα ο Ιεχωβά. Αντίς τι κεράβ λέσαρ αζόμ μπουτ λάφι ι αληθειάκε, έπρεπε τι νταβ λατσσό παράδειγμας οντουλέντζαρ σο κεράβας». Η Πολίν να κερντάς ατζέκ φαρ λάφι ι Γραφιάκε κο Γουέιν χωρίς τι μανγκέλ βοβ ντα αρχισάλι τι κερέλ λέσαρ λάφι οντουλένγκε σο αβένας-πες κάθε ντιβές. Ο Γουέιν ντικχλάς ότι λέσκι ρομνί αβιλί πιο ήρεμη ντα ότι λένγκο τσσαβό αβιλόας πιο λατσσό. (Παρ. 31:​18, 27, 28) Κάνα αγαντάς καζόμ λατσσιπέ κερένας ο λάφια ι Γραφιάκε λέσκε φαμιλιάκε, πουταρντάς πι γκοντί ντα πο γκι ανταλέ λαφίντε.​—1 Κορ. 7:​12-14, 16.

9. Σόσκε δεν πρέπει τι τσσιναβάς τι κεράς ο πιο λατσσό;

⁹ Μα τσσιναβέν τι κερέν ο πιο λατσσό. Ο Ιεχωβά ντέλα-αμέν ο παράδειγμας. Ντέλα «παλάλ γιαβερέστε» κο τζενέ ι ευκαιρία τι ασουνέν ο λατσσέ αμπέρια ντα τι τζουβντιόν. (Ιερ. 44:4) Ντα ο απόστολος Παύλος βακερντάς ι Τιμοθεόσκε μα τι τσσιναβέλ τι κερέλ ο πιο λατσσό για τι βοηθίνελ ι γιαβερέν. Σόσκε; Επειδή αντικάς κα σώνελας εμ πες εμ οντουλέν σο ασουνένας-λες. (1 Τιμ. 4:​16) Μανγκάσα αμαρέ τζενέν, οτθάρ μανγκάσα τι σικλιόν ι αλήθεια σο ισί κο Λάφι κι Ντεβλέσκο. Καζόμ τζάλας, η Πολίν κερέλας λατσσιπέ πι φαμιλιάκε οντουλέντζαρ σο βακερέλας ντα κερέλας. Ακανά ισί χαρούμενη σόσκε υπηρετίνελα ι Ιεχωβάς πι ρομέσαρ. Ο ντούι-ντα ισί σκαπανείς, ντα ο Γουέιν ισί πρεσβύτερος-ντα.

10. Σόσκε πρέπει τι κεράς υπομονή;

¹⁰ Τι κερέν υπομονή. Κάνα τραμπίνασα τι τζουβντιάς σαρ μανγκέλα ο Ντεβέλ, μπορεί τι αβέλ δύσκολος αμαρέ τζενένγκε τι δεχτίνεν ο νεβέ πράγματα σο πακιάσα ντα κεράσα. Μπουτ φαρ, ο πρώτος πράγμας σο ντικχένα ισί ότι να κεράσα γιορτές λέντζαρ ντα να συμμετεχίνασα κο πολιτικά. Μερικοί λένταρ μπορεί κι αρχή τι χολιάνεν. (Ματθ. 10:​35, 36) Μα τι πακιάς όμως ότι ναστί αλλάνενα. Άμα κα τσσιναβάας τι βοηθίνας-λεν τι αγαβέν οντουλά σο πακιάσα, κα αβέλας σαρ τι βακεράας ότι νανέ άξιοι τι τζουβντιόν για πάντα. Ο Ιεχωβά να τσσουντάς-αμέν τι κρίνας ι τζενέν, αλλά ντινάς ανταγιά μπουτί κο Ιησούς. (Ιωάν. 5:​22) Άμα κεράσα υπομονή, μπορεί τι αβέλ ο σαάτι σο αμαρέ τζενέ κα μανγκέν τι ασουνέν-αμέν.​—Ντικχ ο πλαίσιος «Τι Χρησιμοποιήνεν Αμαρό Ιστότοπος για τι Σικλιαρέν».

11-13. Σο σικλιόνα οντουλένταρ σο κερντάς η Άλις για τι βοηθίνελ πι νταντές ντα πι νταγιά;

¹¹ Τι αβέν σταθεροί αλλά τι κερέν λάφι λατσσιμάσαρ. (Παρ. 15:2) Ντικχέν σο κερντάς η Άλις. Κάνα σικλιλί ι Ιεχωβάσκε, τζουβντιόλας ντουρ πι νταντέσταρ ντα πι νταγιάταρ, σο να πακιάνας κο Ντεβέλ ντα ανακατούντιβενας μπουτ κο πολιτικά. Αγαντάς ότι έπρεπε τι κερέλ λέντζαρ λάφι καζόμ αβέλας-πες πιο σουγκό ι λατσσέ πραγματένγκε σο σικλιόλας. Η Άλις βακερέλα: «Καζόμ πιο μπουτ αργίνεσα τι βακερές τι φαμιλιάκε ο νεβέ πράγματα σο πακιάσα ντα κερέσα, αζόμ πιο μπουτ κα χολιάνεν». Γραφίνελας πι νταντέσκε ντα πι νταγιάκε γράμματα ντα πουτσέλας-λεν σο πακιάνας βον μερικέ πραγματένγκε σο βακερέλα η Γραφή σαρ ισί η αγάπη. (1 Κορ. 13:​1-13) Βακερέλας λένγκε ευχαριστώ σο μπαριαρντέ-λα λατσσές. Επίσης, μπουτσσαβέλας λένγκε δώρα. Κάνα τζάλας τι ντικχέλ-λεν, κερέλας σο νακχέλας λάκε βαστένταρ για τι βοηθίνελ πι νταγιά κο μπουτιά κι κχερέσκε. Κι αρχή λάκο ντατ ντα λάκι ντάι να χαιρισάλε κάνα βακερντάς λένγκε ι νεβέ πραγματένγκε σο πακιάλας.

¹² Κάνα η Άλις ισινέ κχερέ πι νταντέσαρ ντα πι νταγιάσαρ, συνεχίνελας τι διαβάνελ ι Γραφή κάθε ντιβές. Βόι βακερέλα: «Ανταβά βοηθιντάς μι νταγιά τι αγαβέλ καζόμ σημαντική ισινέ η Γραφή μάνγκε». Λάκο ντατ αποφασιντάς τι σικλιόλ κάποια πράγματα ι Γραφιάκε για τι αγαβέλ σο κερντάς λέσκε τσσαγιά τι αλλάνελ. Μανγκέλας επίσης τι αρακχέλ λάθη κι Γραφή. Η Άλις βακερέλα: «Ντινόμ-λες εκ Γραφή ντα γραφιντόμ λέσκε αντρέ χάνικ σουκάρ λάφια». Καβά ισινέ ο αποτέλεσμας; Αντίς τι αρακχέλ λάθη, οντουλά σο διαβαντάς κατά Λάφι ι Ντεβλέσκο ερεσλέ λέσκε γκίστε.

¹³ Πρέπει τι αβάς σταθεροί αλλά τι κεράς λάφι λατσσιμάσαρ, ατζέ-ντα κάνα κα τθεράς δοκιμασίες. (1 Κορ. 4:​12β) Για παράδειγμας, η Άλις τθερέλας προβλήματα πι νταγιάταρ. «Κάνα μπολντιλόμ, μι ντάι βακερντάς μάνγκε ότι να ισινόμας λατσσί τσσάι». Σο κερντάς η Άλις; «Αντίς τι κεράβ-μαν κασουκί, εξηγιντόμ λάκε με σεβασμός ότι αποφασιντόμας τι αβάβ Μάρτυρας ντα ότι ανταβά να κα αλλάνελας. Προσπαθιντόμ τι κεράβ-λα τι πακιάλ ότι μανγκάβας-λα μπαγιά. Ροντάμ ο ντούι-ντα, ντα σοράν κερντόμ λάκε εκ λατσσό χαμπέ. Οτθάρ μπερί, μι ντάι αρχισάλι τι αγαβέλ ότι η Γραφή κερέλας-μαν πιο λατσσί τζενί».

14. Σόσκε δεν πρέπει τι κεράς παλάλ κάνα πιένενα-αμέν;

¹⁴ Μπορεί τι χρειαζίντιβενα χρόνος για τι αγαβέν ντιπ αμαρέ τζενέ καζόμ μπουτ αποφασισμέ ισινάμ τι υπηρετίνας ι Ιεχωβάς. Για παράδειγμας, κάνα η Άλις τραμπιντάς τι κερέλ σκαπανικός ντα μα τι τζαλ κο πανεπιστήμιος σαρ μανγκέλας λάκο ντατ ντα λάκι ντάι, η ντάι λάκι ροντάς πάλι. Η Άλις όμως ατσσιλί σταθερή. Βακερέλα: «Άμα κα κερές παλάλ εκχέ πραγμάστε, αζομάν τι φαμιλί μάλλον κα πιένελ-τουτ γιαβερέ πραγματέντε-ντα. Όμως, άμα ισινάν λατσσό λέντζαρ αλλά ατσσόσα σταθερός, μπορεί τι ασουνέν-τουτ». Ανταβά αβιλό-πες με την Άλις. Εμ λάκο ντατ εμ λάκι ντάι ισί ακανά σκαπανείς, ντα λάκο ντατ ισί πρεσβύτερος-ντα.

ΣΑΡ ΜΠΟΡΙΝΕΝΑ ΤΙ ΒΟΗΘΙΝΕΝ ΣΑΡΕ Ο ΠΦΡΑΛΑ ΝΤΑ Ο ΠΦΕΝΙΑ;

15. Σαρ μπορίνενα ο «λατσσέ πράγματα» σο κερένα ο γιαβερά τι βοηθίνεν αμαρέ τζενέν σαρ βακερένα ο εδάφια Ματθαίος 5:​14-16 ντα 1 Πέτρου 2:12;

¹⁵ Ο Ιεχωβά ταρτίνελα πασέ πέστε τζενέν αντράλ κατά «λατσσέ πράγματα» σο κερέλα η Χριστιανική κχανγκιρί. (Διαβάνεν Ματθαίος 5:​14-16· 1 Πέτρου 2:​12) Άμα τουμαρό ρομ ή τουμαρί ρομνί νανέ Μάρτυρας, τζανέλα πφραλέν κατά κχανγκιρί; Η Πολίν καλίνελας πφραλέν ντα πφενίν πι κχερέστε για τι γνωρίνελ-λεν λάκο ρομ, ο Γουέιν. Βοβ ντέλα-πες γκοντί σαρ βοηθιντάς-λες εκ πφραλ τι αγαβέλ σαρ ισί μπαγιά ο Μάρτυρες: «Λιντάς εκ ντιβές άδεια πι μπουτιάταρ σάντε για τι ντικχάς γιεκ εκ αγώνας. Σκεφτιντόμας: “Ισί φυσιολογικός τζενό!”»

16. Σόσκε ισί λατσσό τι καλίνας αμαρέ τζενέν κο συναθροίσεις;

¹⁶ Εκ μπουτ λατσσό τρόπος για τι βοηθίνας αμαρέ τζενέν ισί τι καλίνας-λεν αμαρέ συναθροισιέντε. (1 Κορ. 14:​24, 25) Ο Γουέιν γκιλό πρώτη φαρ συνάθροιση κι Ανάμνηση επειδή ατσσικιαρέλας χάνικ σαάτι ντα ισινέ σοράν λέσκε μπουτιάταρ. Βοβ βακερέλα: «Να αγαντόμ σο βακερέλας ι ομιλία, αλλά να μπισταρντόμ ι τζενέν». Αβένας πασέ μάντε, καλωσορίνενας-μαν ντα ασταρένας σικίς μο βας. Αγαντόμ ότι ισινέ μπαγιά λατσσέ τζενέ». Εκ πφραλ πι ρομνιάσαρ σικαντέας μπαρό λατσσιπέ κι Πολίν, κάνα βοηθίνενας-λα λάκε τσσαβέσαρ κο συναθροίσεις ντα κο έργος. Οτθάρ, κάνα ο Γουέιν αποφασιντάς τι σικλιόλ πιο μπουτ ι νεβέ πραγματένγκε σο πακιάλας λέσκι ρομνί, μανγκλάς οντουλέ πφραλέσταρ τι κερέλ λέσαρ μελέτη.

17. Καλέ πραγμάσκε να φταίνασα-αμέν, αλλά σόσκε δεν πρέπει ποτές τι πακιάς ότι αμαρέ τζενέ ναστί αλλάνενα;

¹⁷ Μανγκάσα σαρέ αμαρέ τζενέ τι υπηρετίνεν ι Ιεχωβάς αμέντζαρ. Όμως, παρόλο σο κεράσα μπαρέ προσπάθειες, βον μπορεί μα τι δεχτίνεν ι αλήθεια. Άμα κα αποφασίνεν τι κερέν-λες ανταβά, να φταίνασα-αμέν. Ναστί ζορισκιαράσα καεκχές τι δεχτίνελ οντουλά σο πακιάσα. Όμως, άμα τουμαρέ τζενέ ντικχένα καζόμ ευτυχισμέ ισινέν καζόμ υπηρετίνενα ι Ιεχωβάς, ανταβά μπορεί τι βοηθίνελ-λεν. Τι προσευχίντιβεν λένγκε. Τι κερέν λέντζαρ λάφι λατσσιμάσαρ. Μα τσσιναβέν τι κερέν ο πιο λατσσό! (Πράξ. 20:​20) Τι αβέν σίγουροι ότι ο Ιεχωβά κα ευλογίνελ τουμαρέ προσπάθειες. Ντα άμα τουμαρέ τζενέ τραμπιντέ τι ασουνέν-τουμέν, κα σώντιβεν!