Υπηρετίνασα ι Ντεβλές σο «Τζιτζίνελα Μπουτ ι Γιαβερένγκε»

1. Σο μπέκιμ τι αβέλα αμαρέ γκοντιάτε κάνα ασουνάσα ότι εκ τζενό τζιτζίνελα ι γιαβερένγκε;

ΚΑΝΑ ασουνάσα ότι εκ τζενό τζιτζίνελα ι γιαβερένγκε, μπέκιμ σκεφτίνασα ότι σικαβέλα λατσσιπέ, τθερέλα λατσσό γκι, πφαμπόλα ι γιαβερένγκε ντα ντέλα πι βαστένταρ. Μπέκιμ τι αβέλα αμαρέ γκοντιάτε η ιστορία σο βακερντάς ο Ιησούς ι λατσσέ Σαμαρειτίσκε. Οντουβά τζενό, σο να ισινέ Ιουδαίος, «τζιτζισάλο» εκχέ Ιουδαιόσκε σο πελόας κι τσορένγκε βαστά. Ο Σαμαρείτης «τζιτζισάλο» ι Ιουδαιόσκε σο ισινέ ντινό, ντα λατσσιμάσαρ βοηθιντάς-λες. (Λουκ. 10:​29-37) Ανταγιά παραβολή σικαβέλα αμένγκε καζόμ μπουτ τζιτζίνελα ι γιαβερένγκε αμαρό Ντεβέλ. Ο Ντεβέλ τζιτζίνελα αμένγκε σόσκε μανγκέλα-αμέν. Ντα κερέλα-λες ανταβά μπουτέ τροπόντζαρ κάθε ντιβές.

2. Καλέ γιαβερέ τροπόσαρ σικαβέλα εκ τζενό ότι τζιτζίνελα ι γιαβερένγκε;

² Ισί εκ γιαβέρ-ντα τρόπος τι σικαβέλ εκ τζενό ότι τζιτζίνελα ι γιαβερένγκε. Μπέκιμ τι τραμπίνελ μα τι τιμωρίνελ εκχέ τζενές σο πρέπει τι τιμωρίντιβελ. Ανταβά κερντάς ο Ιεχωβά αμέντζαρ. Ο ψαλμωδός βακερντάς: «Να κερντάς αμένγκε σύμφωνα με το αμαρτίες σο κερντάμ». (Ψαλμ. 103:​10) Γιαβερά φαρ όμως ο Ιεχωβά μπέκιμ τι διορθώνελ αυστηρά εκχέ τζενές σο κερντάς αμαρτία.

3. Καλά ερωτήσεις κα ντικχάς;

³ Ανταλέ μαθημάστε, κα ντικχάς τριν ερωτήσεις: Σόσκε ο Ιεχωβά τζιτζίνελα ι γιαβερένγκε; Αβέλα-πες η αποκοπή εκχέ τζενέσκι τι σικαβέλ ότι ο Ιεχωβά τζιτζίνελα λέσκε ντα ι κχανγκιριάκε; Ντα σο κα βοηθίνελ-αμέν τι τζιτζίνας ι γιαβερένγκε; Για τι ντικχάς σο βακερέλα ο Λάφι ι Ντεβλέσκο ανταλέ ερωτησιένγκε.

ΣΟΣΚΕ Ο ΙΕΧΩΒΑ ΤΖΙΤΖΙΝΕΛΑ Ι ΓΙΑΒΕΡΕΝΓΚΕ

4. Σόσκε ο Ιεχωβά τζιτζίνελα ι γιαβερένγκε;

⁴ Ο Ιεχωβά μπεϊντίνελα τι τζιτζίνελ ι γιαβερένγκε. Ο απόστολος Παύλος βακερντάς ότι ο Ντεβέλ «τζιτζίνελα μπουτ ι γιαβερένγκε». Ανταλέ λαφίντζαρ, ο Παύλος σικαντάς ότι ο Ντεβέλ τζιτζίνελα ι γιαβερένγκε σόσκε ντέλα πι χρισμέ υπηρετόντε σο ισί ατελείς ι ελπίδα τι τζουβντιόν κο ουρανός. (Εφεσ. 2:​4-7) Αλλά ο Ιεχωβά να τζιτζίνελα σάντε πι χρισμέ υπηρετόνγκε. Ο ψαλμωδός Δαβίδ γραφιντάς: «Ο Ιεχωβά ισί λατσσό σαριλέντζαρ, ντα ντικχίντιβελα σαρέ οντουλέντε σο κερέλα ότι τζιτζίνελα ι γιαβερένγκε». (Ψαλμ. 145:9) Επειδή ο Ιεχωβά μανγκέλα ι τζενέν, τζιτζίνελα λένγκε κάθε φαρ σο τθερέλα λόγους τι κερέλ-λες ανταβά.

5. Σαρ σικλιλό ο Ιησούς ότι ο Ιεχωβά τζιτζίνελα ι γιαβερένγκε;

⁵ Ο Ιησούς τζανέλα πο λατσσές σαρέ αμένταρ καζόμ μπουτ μπεϊντίνελα ο Ιεχωβά τι τζιτζίνελ ι γιαβερένγκε. Ο Ιεχωβά ντα ο Ιησούς ισινέ γιεκ κο ουρανός μπουτ βακίτι πριν τι αβέλ ο Ιησούς κι πφουβ. (Παρ. 8:​30, 31) Μπουτ φαρ ο Ιησούς ντικχλάς πι Νταντές τι τζιτζίνελ ατελείς τζενένγκε. (Ψαλμ. 78:​37-42) Κάνα ο Ιησούς σικλιαρέλας ι τζενέν, βακερέλας λένγκε μπουτ φαρ καζόμ τζιτζίνελας λέσκο Ντατ ι τζενένγκε.

6. Καγιά παραβολή βακερντάς ο Ιησούς για τι ντελ-αμέν τι αγαβάς ότι λέσκο Ντατ μπεϊντίνελα τι τζιτζίνελ ι γιαβερένγκε;

⁶ Σαρ ντικχλάμ κο γιαβέρ μάθημας, ο Ιησούς βακερντάς εκ παραβολή εκχέ τσσαβέσκε σο νασλόας πι κχερέσταρ για τι ντελ-αμέν τι αγαβάς καζόμ μπουτ μπεϊντίνελα ο Ιεχωβά τι τζιτζίνελ ι γιαβερένγκε. Ανταβά τσσαβό σο νασλόας πι κχερέσταρ, “χαλαντάας σαρί πι κληρονομιά επειδή κερέλας μπέτι ζωή”. (Λουκ. 15:​13) Σοράν, μετανιωσάλο οντουλένγκε σο κερντάς, ταπεινωντάς πο νεαυτός ντα βουρτισάλο κχερέ. Σο κα κερέλας λέσκο ντατ; Ο τερνό να αργισάλο τι σικλιόλ-λες ανταβά. Ο Ιησούς βακερντάς: «Λέσκο ντατ ντικχλάς-λες ντουράλ ντα πφαμπιλό λέσκε, ντα τθαβντισάλο ντα ντινάς-λες αγκάλι ντα τσσουμιντάς-λες μανγκιμάσαρ». Ο ντατ να κερντάς πι τσσαβές τι νιωθίνελ μπέτι. Αλλά συγχωριντάς-λες, τζιτζισάλο λέσκε ντα πουταρντάς λέσκε πάλι πι φαμιλί. Ο αμαρτίες ι τσσαβέσκε ισινέ μπουτ μπαρέ, αλλά επειδή μετανιωσάλο, λέσκο ντατ συγχωριντάς-λες. Ο ντατ σο τζιτζισάλο πι τσσαβέσκε ανταλέ ιστοριάτε μανγκέλα τι σικαβέλ ι Ιεχωβάς. Ανταλέσαρ, ο Ιησούς σικαντάς αμένγκε μπουτ λατσσές ότι ο Ιεχωβά μανγκέλα τι συγχωρίνελ οντουλέν σο μετανιωσάλε μπαγιά ι αμαρτιάκε σο κερντέ.​—Λουκ. 15:​17-24.

7. Σαρ σικαβέλα ο τρόπος σο τζιτζίνελα ο Ιεχωβά ι γιαβερένγκε ότι ισί γκοντιαβέρ;

⁷ Επειδή ο Ιεχωβά ισί μπουτ γκοντιαβέρ, τζιτζίνελα ι γιαβερένγκε. Ο Ιεχωβά πάντα λέλα αποφάσεις σο κερένα λατσσιπέ οντουλένγκε σο λατσσαρντάς. Η Γραφή βακερέλα ότι «η σοφία σο γουλίλα οπράλ . . . τζιτζίνελα μπουτ ντα ισί πφερντί λατσσέ καρπούς». (Ιακ. 3:​17) Σαρ λατσσό ντατ, ο Ιεχωβά τζανέλα ότι κερέλα λατσσιπέ πι τσσαβένγκε κάνα τζιτζίνελα λένγκε. (Ψαλμ. 103:​13· Ησ. 49:​15) Επειδή ο Ιεχωβά τζιτζίνελα λένγκε, τθερένα ελπίδα ι ντιβεσένγκε σο κα αβέν παρόλο σο ισί ατελείς. Ο Ιεχωβά ισί μπουτ γκοντιαβέρ, ντα ανταβά τσσίντελα-λες τι τζιτζίνελ ι γιαβερένγκε κάθε φαρ σο τθερέλα λόγους τι κερέλ-λες ανταβά. Αλλά ο Ιεχωβά τζανέλα επίσης κάνα δεν πρέπει τι τζιτζίνελ. Επειδή ισί γκοντιαβέρ, ποτές να πφάντελα πο γιακχά κο πφιρνιπέ για τι τζιτζίνελ ι γιαβερένγκε.

8. Σο ισί σημαντικός τι αβέλ-πες μπάζιμα κι κχανγκιρί, ντα σόσκε;

⁸ Βακερέν ότι εκ υπηρέτης ι Ντεβλέσκο αρχίνελα τι κερέλ μπίλατζανε πράγματα. Σο πρέπει τι κεράς; Ο Παύλος γραφιντάς ι Ντεβλέσκε πνευμάσαρ: «Τι τσσιναβέν τι κερέν [λέσαρ] παρέα». (1 Κορ. 5:​11) Κάνα οντουλά σο κερένα αμαρτία να μετανιώνενα, χάνα αποκοπή. Ανταβά ισί μπουτ σημαντικός τι αβέλ-πες κι κχανγκιρί σόσκε αρακχαβέλα αμαρέ πιστέ πφραλέν ντα πφενίν ντα σικαβάσα ότι κεράσα ο κανόνες ι Ιεχωβάσκε. Ισί τζενέ σο μπέκιμ τι βακερένα ότι η αποκοπή εκχέ τζενέσκι να σικαβέλα ότι ο Ντεβέλ τζιτζίνελα λέσκε ντα ι κχανγκιριάκε. Ισί μπαγιά ανταβά; Για τι ντικχάς.

ΣΙΚΑΒΕΛΑ Η ΑΠΟΚΟΠΗ ΕΚΧΕ ΤΖΕΝΕΣΚΙ ΟΤΙ Ο ΙΕΧΩΒΑ ΤΖΙΤΖΙΝΕΛΑ ΛΕΣΚΕ ΝΤΑ Ι ΚΧΑΝΓΚΙΡΙΑΚΕ;

9, 10. Σόσκε βακεράσα ότι η αποκοπή σικαβέλα ότι ο Ιεχωβά τζιτζίνελα σαρ βακερένα ο εδάφια Εβραίους 12:5, 6; Βακερέν εκ παράδειγμας.

⁹ Κάνα ασουνάσα κι συνάθροιση ότι εκ τζενό σο τζανάσα ντα μανγκάσα «τσσιναντάς τι αβέλ Μάρτυρας ι Ιεχωβάσκο», πφανγκιόλα αμαρό γκι. Μπέκιμ τι σκεφτίνασα άμα έπρεπε τι χαλ αποκοπή οντουβά τζενό σο μανγκάσα. Σικαβέλα η αποκοπή εκχέ τζενέσκι ότι ο Ιεχωβά τζιτζίνελα λέσκε; Βα. Άμα χρειαζίντιβελα εκ τζενό διόρθωση ντα να ντάσα-λα λέστε, ανταβά νανέ γκοντιαβέρ ούτε σικαβέλα ότι μανγκάσα-λες ούτε ότι τζιτζίνασα λέσκε. (Παρ. 13:​24) Αβέλα-πες η αποκοπή τι βοηθίνελ εκχέ τζενές, σο κερντάς αμαρτία ντα να μετανιωσάλο, τι αλλάνελ; Βα, αβέλα-πες. Μπουτ πφραλά ντα πφενιά σο κερντέ εκ αμαρτία βακερντέ ότι η αποκοπή ισινέ οντουβά σο χρειαζίντιβενας για τι αγαβέν πουμαρό λάθος, τι μετανιώνεν, τι αλλάνεν ντα τι βουρτίνεν κο Ιεχωβά.​—Διαβάνεν Εβραίους 12:5, 6.

¹⁰ Για τι ντικχάς εκ παράδειγμας. Εκ τσομπάνης ντικχέλα ότι εκ τανό λέσκε μπρακένταρ ισί νασφαλό. Τζανέλα ότι, για τι αβέλ λατσσές ο μπρακό, πρέπει τι λελ-λες ντουρ κατά γιαβερά μπρακέ. Αλλά ο μπρακέ μανγκένα τι αβέν γιεκ ι γιαβερέ μπρακέντζαρ ντα μπέκιμ μα τι μπεϊντίνενα τι ατσσόν ντουρ κατά γιαβερά. Μήπως κάνα κερέλα-λες ανταβά ο τσομπάνης σικαβέλα ότι να μανγκέλα-λεν ή ότι να σικαβέλα λένγκε λατσσιπέ; Νάα. Βοβ τζανέλα ότι, άμα κα μουκχέλ ι μπρακές σο ισί νασφαλό γιεκ ι γιαβερέ μπρακέντζαρ, κα νασφάλιβεν σαρέ. Κάνα λέλα ι νασφαλέ μπρακές ντουρ κατά γιαβερά, αρακχαβέλα σαρέ ι μπρακέν.​—Ντικχέν Λευιτικό 13:3, 4.

11. (α) Σόσκε μπορίνασα τι βακεράς ότι εκ αποκομμέ τζενό ισί σαρ εκ νασφαλό μπρακό; (β) Σο μπορίνενα τι κερέν ο αποκομμέ τζενέ ντα καγιά βοήθεια τθερένα

¹¹ Κα μπορίναας τι βακεράς ότι εκ Χριστιανός σο χάλα αποκοπή ισί σαρ εκ νασφαλό μπρακό. Επειδή τσσιναντάς τι αβέλ αμάλ ι Ιεχωβάσκο, ισί νασφαλό, σαρ τι βακεράας. (Ιακ. 5:​14) Σαρ εκ τζενό σο ισί νασφαλό μπέκιμ τι κερέλ ι γιαβερέν-ντα τι νασφάλιβεν, αντικάς εκ τζενό-ντα σο τσσιναντάς τι αβέλ αμάλ ι Ιεχωβάσκο μπέκιμ τι κερέλ ι γιαβερέν-ντα τι κερέν γκεραλέ πράγματα. Οτθάρ, μπάζιμα, πρέπει τι χαλ αποκοπή εκ τζενό σο αμαρτιντάς. Ανταγιά διόρθωση σικαβέλα ι αγάπη ι Ιεχωβάσκι ι πιστέ τζενένγκε αντρέ κι κχανγκιρί ντα μπέκιμ τι βοηθίνελ ι τζενές σο κερντάς αμαρτία τι αγαβέλ καζόμ μπαρί ισινέ ανταγιά αμαρτία ντα τι μετανιώνελ. Καζόμ ισί αποκομμέ, μπορίνελα τι αβέλ κο συναθροίσεις, για τι λελ σικλιαριπέ κατά Γραφή ντα τι κερέλ πάλι ζουρανί πι πίστη. Μπορίνελα επίσης τι ντικχέλ ο JW Broadcasting^® ντα τι λελ έντυπα για τι διαβάνελ ντα τι σικλιαρέλ-πες. Καζόμ ο πρεσβύτεροι ντικχένα σαρ τζάλα, μπέκιμ τι ντεν-λες μπάζιμα συμβουλές για τι βοηθίνεν-λες τι αβέλ πάλι ζουρανό πνευματικά ντα τι βουρτίνελ κι αλήθεια.b

12. Σο πρέπει τι κερέν ο πρεσβύτεροι εκχέ τζενέσκε σο να μετανιωσάλο πι αμαρτιάκε για τι σικαβέν αγάπη ντα ότι τζιτζίνενα;

¹² Ισί σημαντικός τι ντας-αμέν γκοντί ότι σάντε οντουλά σο να μετανιωσάλε πουμαρέ αμαρτιάκε χάνα αποκοπή. Ο πρεσβύτεροι τζανένα ότι πρέπει τι σκεφτίνεν μπουτ λατσσές πριν τι αποφασίνεν τι κερέν αποκοπή εκχέ τζενές. Τζανένα ότι ο Ιεχωβά διορθώνελα «ακριβώς καζόμ χρειαζίντιβελα». (Ιερ. 30:​11) Μανγκένα πουμαρέ πφραλέν ντα να μανγκένα τι κερέν λένγκε ζιάνι κι φιλία σο τθερένα ι Ιεχωβάσαρ. Μπάζιμα όμως, για τι σικαβέν αγάπη ντα ότι τζιτζίνενα, πρέπει τι νασκιαρέν κατά κχανγκιρί οντουλές σο κερντάς αμαρτία.

13. Σόσκε έπρεπε τι χαλ αποκοπή εκ Χριστιανός κι Κόρινθος;

¹³ Ντικχέν σο βακερντάς ο απόστολος Παύλος εκχέ τζενέσκε σο κερντάς αμαρτία ντα να μετανιωσάλο. Εκ Χριστιανός κι Κόρινθος κερέλας μπίλατζανε πράγματα πι νταντέσκε ρομνιάσαρ. Σο μπέτι πράγμας ισινέ ανταβά! Ο Παύλος τζανέλας ότι ο Ιεχωβά βακερντάας κο πουρανέ Ισραηλίτες: «Ο μουρς σο σοβέλα πι νταντέσκε ρομνιάσαρ ανέλα λατζ πι νταντέσκε. Ο ντούι-ντα σίγουρα πρέπει τι μερέν». (Λευιτ. 20:​11) Ο Παύλος ναστί βακερέλας ι κχανγκιριάκε ότι οντουβά τζενό έπρεπε τι μερέλας. Αλλά βακερντάς κο Κορίνθιοι ότι έπρεπε τι χαλ αποκοπή. Ο μπίλατζανε πράγματα σο κερέλας οντουβά τζενό χαλαβένας ι γιαβερέν-ντα αντρέ κι κχανγκιρί. Μερικοί λένταρ να αγαβένας ότι κερντάς εκ μπουτ μπαρί αμαρτία!​—1 Κορ. 5:1, 2, 13.

14. Σαρ σικαντάς ο Παύλος ότι τζιτζισάλο ι αποκομμέ τζενέσκε κι Κόρινθος, ντα σόσκε; (2 Κορινθίους 2:​5-8, 11)

¹⁴ Αφού νακχλό χάνικ βακίτι, ο Παύλος σικλιλό ότι οντουβά τζενό κερντάας μπαρέ αλλαγές. Μετανιωσάλοας μπαγιά ι μπαρέ αμαρτιάκε σο κερντάας! Παρόλο σο οντουβά τζενό αντάας λατζ κι κχανγκιρί, ο Παύλος βακερντάς ι πρεσβυτερόνγκε ότι να μανγκέλας τι αβέλ «μπουτ σκληρός». Βακερντάς λένγκε: «Τι συγχωρίνεν-λες λατσσιμάσαρ ντα τι παρηγορίνεν-λες». Ντικχέν σόσκε βακερντάς ο Παύλος τι κερέν-λες ανταβά: «Για μα τι χαλ-λες η μπουτ στεναχώρια». Ο Παύλος τζιτζισάλο οντουλέ τζενέσκε σο μετανιωσάλο. Να μανγκέλας τι τσσουβέλ αζόμ μπουτ πι γκίστε οντουβά τζενό ντα αντικάς τι τσσιναβέλ τι μανγκέλ συγχώρηση.​—Διαβάστε 2 Κορινθίους 2:​5-8, 11.

15. Σαρ αβέλα-πες ο πρεσβύτεροι τι διορθώνεν αυστηρά εκχέ τζενές αλλά εμ τι τζιτζίνεν λέσκε;

¹⁵ Σαρ ο Ιεχωβά, ο πρεσβύτεροι μπεϊντίνενα τι τζιτζίνεν ι γιαβερένγκε. Κα διορθώνεν αυστηρά εκχέ τζενές σο κερντάς αμαρτία κάνα χρειαζίντιβελα, αλλά κα τζιτζίνεν λέσκε κάνα τθερένα λόγους τι κερέν-λες ανταβά. Άμα ο πρεσβύτεροι να κα διορθώνεν ιτς ι τζενές σο κερντάς αμαρτία, να σικαβένα ότι τζιτζίνενα λέσκε. Οκιά μπάνταρ, πφάντενα πουμαρέ γιακχά κι αμαρτία. Αλλά σάντε ο πρεσβύτεροι πρέπει τι τζιτζίνεν ι γιαβερένγκε;

ΣΟ ΚΑ ΒΟΗΘΙΝΕΛ ΣΑΡΙΛΕΝ ΑΜΕΝ ΤΙ ΤΖΙΤΖΙΝΑΣ Ι ΓΙΑΒΕΡΕΝΓΚΕ;

16. Σαρ ντικχέλα ο Ιεχωβά οντουλέν σο να τζιτζίνενα ι γιαβερένγκε σαρ βακερέλα ο εδάφιος Παροιμίες 21:13;

¹⁶ Σαρέ ο Χριστιανοί προσπαθίνενα τι τζιτζίνεν ι γιαβερένγκε σαρ ο Ιεχωβά. Σόσκε; Εκ λόγος ισί ότι ο Ιεχωβά να ασουνέλα οντουλέν σο να τζιτζίνενα ι γιαβερένγκε. (Διαβάνεν Παροιμίες 21:​13) Καέκ αμένταρ να κα μανγκέλας μα τι ασουνέλ ο Ιεχωβά λέσκε προσευχές, οτθάρ κεράσα ο πο λατσσό για μα τι τσσιναβάς τι τζιτζίνας ι γιαβερένγκε. Αντίς τι πφάντας αμαρέ κανά κι ντουκχ εκχέ πφραλέσκι, μανγκάσα πάντα τι τθεράς-λεν πουταρντέ για τι ασουνάς ο «βίκος οντουλέσκο σο νανέ σημαντικός». Αντικάς, κεράσα ο πο λατσσό για τι ντας καν ακαλέ λαφίστε σο βακερέλα η Γραφή: «Οντουβά σο να τζιτζίνελα ι γιαβερένγκε κα κρίντιβελ χωρίς τι τζιτζίνεν λέσκε». (Ιακ. 2:​13) Άμα ισινάμ ταπεινοί ντα ντάσα-αμέν γκοντί καζόμ μπουτ χρειαζίντιβασα τι τζιτζίνεν αμένγκε, μπέκιμ αμέν-ντα τι σικαβάς ότι τζιτζίνασα ι γιαβερένγκε. Πο μπουτ πρέπει τι σικαβάς ότι τζιτζίνασα εκχέ τζενέσκε κάνα μετανιώνελα οντουλέσκε σο κερντάς ντα βουρτίνελα κι κχανγκιρί.

17. Σαρ σικαβέλας ο βασιλιάς Δαβίδ ότι τζιτζίνελας αντράλ πι γκίσταρ ι γιαβερένγκε;

¹⁷ Αντρέ κι Γραφή ισί παραδείγματα σο μπορίνενα τι βοηθίνεν-αμέν τι τζιτζίνας ι γιαβερένγκε ντα μα τι αβάς σκληροί. Για τι ντικχάς σο κερντάς ο βασιλιάς Δαβίδ. Βοβ μπουτ φαρ τζιτζίνελας αντράλ πι γκίσταρ ι γιαβερένγκε. Παρόλο σο ο Σαούλ μανγκέλας τι μουνταρέλ-λες, ο Δαβίδ τζιτζισάλο ι Ντεβλέσκε χρισμέ βασιλιάσκε. Ποτές να προσπαθιντάς τι λελ εκδίκηση ντα να ατσσικιαρντάς λέσκε χολί.​—1 Σαμ. 24:​9-12, 18, 19.

18, 19. Καλά ντούι φαρ σικαντάς ο Δαβίδ ότι να τζιτζισάλο ι γιαβερένγκε;

¹⁸ Αλλά ισινέ φαρ-ντα σο ο Δαβίδ να τζιτζισάλο ι γιαβερένγκε. Για παράδειγμας, ο Νάβαλ ισινέ εκ σκληρός τζενό σο προσβαλιντάς ι Δαβιδίς ντα να μανγκλάς τι ντελ χαμπίματα λέστε ντα λέσκε μουρσέντε. Ανταβά κερντάς ι Δαβιδίς τι χολιάνελ ντα γκιλό τι μουνταρέλ ι Ναβαλίς ντα σαρέ ι μουρσέν λέσκε κχερέστε. Αλλά ι Ναβαλίσκι ρομνί, η Αβιγαία, σικαβέλας λατσσιπέ ντα υπομονή, ντα γκιλί σουγκό τι ντελ χαμπίματα κο Δαβίδ. Αντικάς, ο Δαβίδ να μουνταρντάς ι Ναβαλίς ντα λέσκε μουρσέν.​—1 Σαμ. 25:​9-22, 32-35.

¹⁹ Εκ γιαβέρ φαρ, ο προφήτης Νάθαν βακερντάς ι Δαβιδίσκε εκχέ χουλανέ τζενέσκε σο τσορντάς πι τσορορέ γειτονάσταρ λέσκε μπρακές σο μανγκέλας πο μπουτ. Ο Δαβίδ χολιασάλο μπουτ ντα βακερντάς: «Καζόμ μπαγιά ισί ότι τζουβντιόλα ο Ιεχωβά, ο τζενό σο κερντάς-λες ανταβά πρέπει τι μερέλ!» (2 Σαμ. 12:​1-6) Ο Δαβίδ τζανέλας σο βακερέλας ο Μωσαϊκός Νόμος. Εκ τζενό σο τσορέλας εκχέ γιαβερέσταρ εκχέ μπρακές έπρεπε τι βουρτίνελ λέσκε σταρέ μπρακέν. (Έξοδ. 22:1) Αλλά ισινέ μπουτ πφαρό λάφι τι βακερέλ ότι ο τσορ έπρεπε τι μερέλ. Ο Νάθαν βακερντάς ι Δαβιδίσκε εκ ιστορία για τι αγαβέλ καζόμ πο μπαρί ισινέ η αμαρτία σο κερντάας βοβ! Ο Ιεχωβά τζιτζισάλο ι Δαβιδίσκε παρόλο σο βοβ να τζιτζισάλο ι τζενέσκε σο τσορντάς ι μπρακές κι ιστορία σο βακερντάς λέσκε ο Νάθαν!​—2 Σαμ. 12:​7-13.

20. Σο σικλιάσα κατά Δαβίδ;

²⁰ Κάνα ο Δαβίδ χολιασάλο μπουτ, βακερντάς ότι ο Νάβαλ ντα σαρέ λέσκε μουρσά έπρεπε τι μερένας. Ντα εκ γιαβέρ φαρ, βακερντάς ι χουλανέ τζενέσκε κι ιστορία σο βακερντάς λέσκε ο Νάθαν ότι έπρεπε τι μερέλ οντουλέσκε σο κερντάς. Αλλά, αφού ο Δαβίδ ισινέ εκ τζενό σο τθερέλας λατσσό γκι, σόσκε βακερντάς ότι έπρεπε τι μερέλ ο χουλανό τζενό σο τσορντάς; Για τι ανάς αμαρέ γκοντιάτε σαρ ισινέ αζομάν ο Δαβίδ. Οντουβά βακίτι, ι Δαβιδίς χάνας-λες ο τύψεις. Άμα εκ τζενό ισί σκληρός ι γιαβερέντζαρ, ανταβά σικαβέλα ότι λέσκι φιλία ι Ιεχωβάσαρ νανέ ζουρανί. Ο Ιησούς βακερντάς ακαλά μπουτ ζουρανέ λάφια πι μαθητένγκε: «Μα κρίνεν για μα τι κρίντιβεν· σόσκε αντικάς σαρ κρίνενα κα κρίντιβεν». (Ματθ. 7:1, 2) Πρέπει τι κεράς ο πο λατσσό για μα τι αβάς σκληροί ντα τι μαράς-αμέν τι “τζιτζίνας μπουτ ι γιαβερένγκε” σαρ αμαρό Ντεβέλ.

21, 22. Καλά ισί μερικά πράγματα σο μπορίνασα τι κεράς για τι σικαβάς ότι τζιτζίνασα ι γιαβερένγκε;

²¹ Τι τζιτζίνας ι γιαβερένγκε να μανγκέλα τι βακερέλ ότι σάντε πφαμπάσα λένγκε αντρέ αμαρέ γκίστε. Μανγκέλα τι βακερέλ ότι κεράσα πράγματα-ντα για τι βοηθίνας-λεν. Οτθάρ, σαρέ μπορίνασα τι ντικχάς άμα χρειαζίντιβελα βοήθεια εκ τζενό αμαρέ φαμιλιάτε, αμαρέ κχανγκιριάτε ντα οτθέ σο μπεσάσα. Μπορίνασα τι αρακχάς μπουτ ευκαιρίες για τι σικαβάς ότι τζιτζίνασα ι γιαβερένγκε! Μήπως μπορίνασα τι λοκχιαράς ο γκι εκχέ τζενέσκο σο τθερέλα-λες ανάγκη; Μπορίνασα τι γκεράς χαμπίματα εκχέ τζενέσκε ή τι κεράς λέσκε κάτι γιαβέρ για τι βοηθίνας-λες; Μήπως εκ Χριστιανός σο ισινέ αποκομμέ ντα βουρτισάλο κι αλήθεια, χρειαζίντιβελα εκχέ λατσσές αμαλές σο κα ντελ-λες ζορ; Μπορίνασα τι βακεράς κο γιαβερά τζενέ ο λατσσέ αμπέρια; Ανταβά ισί εκ κατά πο λατσσέ τρόπους για τι σικαβάς ότι τζιτζίνασα σαρέ ι τζενένγκε σο αρακχάσα.​—Ιώβ 29:​12, 13· Ρωμ. 10:​14, 15· Ιακ. 1:27.

²² Άμα τθεράσα πουταρντέ αμαρέ γιακχά για τι ντικχάς τζενέν σο τθερένα ασακέ ανάγκες, κα αγαβάς ότι τθεράσα μπουτ ευκαιρίες τι σικαβάς ότι τζιτζίνασα λένγκε. Κάνα τζιτζίνασα ι γιαβερένγκε, κεράσα μπουτ ο γκι αμαρέ Ντεβλέσκο σο «τζιτζίνελα μπουτ ι γιαβερένγκε»!