Ο Ιεχωβά Τσσουντάς Σημασία μι Προσευχιέντε

ΕΚ ΕΠΙΣΚΕΨΗ ΣΟ ΑΛΛΑΝΤΑΣ ΑΜΑΡΙ ΖΩΗ

Μπιάντιλομ 22 Δεκεμβρίου 1929 κο Νοβίλ, εκχέ χουρντέ γκαβέστε σο τθερέλας εννιά φάρμες ντα ισινέ πασέ κο Μπαστόν κο βελγικές Αρδένες. Ντάβα-μαν γκοντί μπουτ σουκάρ πράγματα από αζομάν σο ισινόμας χουρντό κι φάρμα μι νταντέσαρ ντα μι νταγιάσαρ. Γιεκ μι χουρντέ πφραλέσαρ, τον Ρεϊμόν, νικαβάας ο τθουτ κατά γκουρουμνιά κάθε ντιβές. Επίσης, πάντα βοηθίναας τι τσσινάς ο στάχυα ντα τι γκίντας ο γκιβ. Αμαρέ γκαβέστε σαρέ κερένας μπουτί γιεκ για τι βοηθίνεν ο εκ ι γιαβερές.

Μο ντατ ντα μι ντάι, ο Εμίλ και η Αλίς, τθερένας εκ γιαβέρ θρησκεία. Ισινέ Καθολικοί. Πακιάνας μπουτ ντα οτθάρ τζάνας κι κχανγκιρί κάθε Κυριακή. Όμως, κο 1939, αβιλέ αμαρέ γκαβέστε σκαπανείς κατά Αγγλία ντα ντινέ μι νταντέστε ο περιοδικός Παρηγορία (ακανά βακέρντιβελα Ξύπνα!). Μο ντατ αγαντάς σουγκό ότι ανταγιά ισί η αλήθεια ντα αρχισάλο τι διαβάνελ ι Αγία Γραφή. Κάνα τσσιναντάς κατά κχανγκιρί, αμαρέ γείτονες, σο πο τζανγκλέ μανγκένας-αμέν, ακανά τζάνας αμέντζαρ μπαρί κόντρα. Πιένενας μπουτ μι νταντές τι ατσσόλ Καθολικός, ντα βακερένας-λες ανταβά με μπουτ έντονος τρόπος.

Πφανγκιόλας μπουτ μο γκι σο ντικχάβας μι νταντές τι τθερέλ αζόμ μπαρί κόντρα κατά γείτονες. Ανταβά τσσιντιντάς-μαν τι κεράβ οντιά προσευχή σο βακερντόμ κι αρχή ντα τι μολίναβ ι Ντεβλές τι βοηθίνελ μι νταντές. Κάνα ο γείτονες σταματιντέ χάνικ χάνικ τι τζαν λέσαρ κόντρα, μο γκι πφερντιλό χαρά. Ανταβά βοηθιντάς-μαν τι αγαβάβ ότι ο Ιεχωβά ισί “Οντουβά σο ασουνέλα προσευχή”.

ΚΑΝΑ ΑΒΕΛΑΣ-ΠΕΣ Ο ΔΕΥΤΕΡΟΣ ΠΑΓΚΟΣΜΙΟΣ ΠΟΛΕΜΟΣ

Αζομάν σο κερέλας κουμάντος ο Χίτλερ, η Γερμανία τσσουντάς-πες κο Βέλγιος 10 Μαΐου 1940 ντα αντικάς μπουτ τζενέ αναγκασάλε τι νασέν κατά τθεμ. Αμαρί φαμιλί γκιλί κι νότια Γαλλία. Καζόμ κεράας ταξίδι, νακχλάμ επικίνδυνε τθανένταρ σο ο στρατιώτες κατά Γερμανία πολεμίνενας ι στρατιωτέν κατά Γαλλία.

Πο σοράν μπορισάλαμ τι βουρτίνας κι φάρμα αμαρί, όμως ντικχλάμ ότι ο πο μπουτ αμαρέ πραγματένταρ τσορντέας-λεν. Σάντε αμαρό τζουκέλ, ο Μπόμπι, ισινέ οτθέ. Σαρέ ανταλά σο νακχλάμ κερντέ-μαν τι πουτσάβ-μαν: “Σόσκε υπαρχίντιβελα τζένγκιa ντα βάσανα;”

Οντουβά βακίτι, αβέλας τι ντικχέλ-αμέν εκ πιστός σκαπανέας ο πφραλ Εμίλ Σραντζ.b Ανταβά ντέλας-αμέν μπαρί ζορ. Βακερντάς αμένγκε ξεκάθαρα αντράλ κατά Γραφή σόσκε ισί βάσανα ντα απαντιντάς γιαβερέ-ντα ερωτησιέντε σο τθεράβας. Μι φιλία ι Ιεχωβάσαρ αβιλί ατζέ πο ζουρανί ντα αγαντόμ ότι ισί εκ Ντεβέλ σο μανγκέλα-αμέν.

Ατζέ-ντα πριν τι τελειώνελ ο τζένγκι, αμαρί φαμιλί μπορίνελας τι ντικχέλ ντα τι κερέλ λάφι πο μπουτ ι πφραλέντζαρ. Κο Αύγουστος κο 1943, ο πφραλ Ζοζέ-Νικολά Μινέ αβιλό κι φάρμα αμαρί για τι κερέλ εκ ομιλία. Πουτσλάς: «Κον μανγκέλα τι μπολντιόλ;» Μο ντατ ντα με βαντιντάμ αμαρό βας. Μπολντιλάμ εκχέ χουρντέ λενιάτε σο ισινέ πασέ κι φάρμα σο τθεράας.

Κο Δεκέμβριος κο 1944, ο στρατός κι Γερμανία αρχιντάς πι τελευταία πο μπαρί επίθεση κι δυτική Ευρώπη. Ανταγιά επίθεση βακέρντιβελα Μάχη των Αρδενών. Τζουβντιάας πασέ οτθέ σο αβέλας-πες η μάχη. Οτθάρ, για εκ μάσεκ περίπου μπεσάας πφαντέ κο υπόγειος αμαρέ κχερέσκο. Εκ ντιβές κάνα νικίστιλομ για τι νταβ χαμπέ κο ζώα, φουρτιντέ βόμβες κο οπραϊνό μέρος της αποθήκης σο τθερέλας ο χαμπίματα για το ζώα. Εκ Αμερικανός στρατιώτης σο ισινέ οτθέ ντινάς-μαν βίκος: «Περ τελέ!» Τθαβντισάλομ, πελόμ τελέ πασέ λέστε ντα βοβ τσσουντάς πο κράνος οπράλ μι σορέστε για τι αρακχαβέλ-μαν.

ΜΙ ΦΙΛΙΑ Ι ΙΕΧΩΒΑΣΑΡ ΜΠΑΡΙΟΛΑΣ

Σοράν κατά τζένγκι μπορίναας τι ντικχάς πο μπουτ ι πφραλέν εκχέ κχανγκιριάτε κι Λιέγη, σο ισινέ περίπου 90 χιλιόμετρα ντουρ αμένταρ. Καζόμ νακχέλας ο βακίτι μπορισάλαμ τι κεράς εκ χουρντό όμιλος κο Μπαστόν. Αρχισάλομ τι κεράβ μπουτί κι εφορία ντα σπουδαντόμ νομικά. Πο σοράν κερντόμ μπουτί σε εκ συμβολαιογραφείος. Κο 1951, κανονιντάμ εκ χουρντί συνέλευση περιοχής κο Μπαστόν. Αβιλέ περίπου εκατό τζενέ. Αντρέ ανταλέντε ισινέ εκ σκαπάνισσα σο πφαμπόλας μπουτ ι εργόσκε, η Έλι Ρόιτερ. Κερντάς 50 χιλιόμετρα ι ποδηλατόσαρ για τι αβέλ κι συνέλευση. Μπουτ σουγκό μανγκλάμ-αμέν ντα νισανλισάλαμ. Η Έλι λιντάας πρόσκληση για τι τζαλ κι Σχολή Γαλαάδ κο Ηνωμένες Πολιτείες. Γραφιντάς κο παγκόσμια κεντρικά γραφεία ντα εξηγιντάς σόσκε πακιάλας ότι δεν έπρεπε τι δεχτίνελας ι πρόσκληση. Ο πφραλ Νορ, σο οδηγίνελας ι Ιεχωβάσκε λαός αζομάν, απαντιντάς λάκε λατσσιμάσαρ ντα βακερντάς λάκε ότι μπέκιμ εκ ντιβές τι τζαλ κι σχολή Γαλαάδ πι ρομέσαρ. Παντρισάλαμ κο Φεβρουάριος 1953.

Οντουβά μπρες, η Έλι ντα με γκιλάμ κι Συνέλευση της Κοινωνίας του Νέου Κόσμου κο Στάδιος Γιάνκι κι Νέα Υόρκη. Κάνα ισινάμας οτθέ γνωριντόμ εκχέ πφραλές σο βακερντάς μάνγκε ότι τθερέλας εκ μπουτ λατσσί μπουτί μάνγκε κο Ηνωμένες Πολιτείες ντα καλιντάς-μαν τι μπεσάβ οτθέ. Κερντάμ προσευχή ανταλέσκε κο Ιεχωβά. Σοράν η Έλι ντα με αποφασιντάμ μα τι δεχτίνας ανταγιά μπουτί. Μανγκάας τι βουρτίνας κο Βέλγιος για τι βοηθίνας κο χουρντό όμιλος κο Μπαστόν σο τθερέλας περίπου ντες τζενέν. Ο γιαβέρ μπρες τθεράας εκ ευλογία. Μι ρομνί μπιαντάς αμαρέ τσσαβές τον Σερζ. Όμως, σοράν από εφτά μασεκά, ο Σερζ νασφάλιλο ντα μουλό. Πφανγκιλόας αμαρό γκι. Βακεράας κο Ιεχωβά, αντράλ κατά προσευχή, καζόμ στεναχωριμέ ισινάμας. Ντα η ελπίδα ότι κα αναστίντιβελ ντέλας-αμέν ζορ.

ΟΛΟΧΡΟΝΙΑ ΥΠΗΡΕΣΙΑ

Κο Οκτώβριος κο 1961, μπορισάλομ τι αρακχάβ εκ μπουτί χάνικ σαατίντζαρ. Αντικάς κα μπορίναβας τι κεράβ ο σκαπανικός-ντα. Οντουβά ντιβές όμως, λιντάς-μαν τηλέφωνος ο υπηρέτης τμήματος κατά Βέλγιος. Πουτσλάς-μαν άμα μπορίναβας τι υπηρετίναβ σαρ υπηρέτης περιοχής (ακανά βακέρντιβελα επίσκοπος περιοχής). Με πουτσλόμ: «Μήπως μπορίνασα πρώτα τι κεράς για χάνικ σκαπανικός πριν τι λας ανταβά διορισμός;» Ο πφραλά συμφωνιντέ. Υπηρετιντάμ οχτώ μασεκά σαρ σκαπανείς ντα σοράν αρχισάλαμ ο έργος περιοχής κο Σεπτέμβριος κο 1962.

Σοράν από ντούι μπρεσά κο έργος περιοχής, καλιντέ-αμέν τι υπηρετίνας κο Μπέθελ κο Βρυξέλλες. Αρχισάλαμ τι υπηρετίνας οτθέ κο Οκτώβριος κο 1964. Ανταβά νεβό διορισμός αντάς αμένγκε μπουτ ευλογίες. Κο 1965 ο πφραλ Νορ αβιλό κο Μπέθελ σο ισινάμας αμέν ντα χάνικ πο σοράν, χωρίς τι μπεκλεντίναβ-λες, διορισάλομ υπηρέτης τμήματος. Πο σοράν, η Έλι ντα με λιντάμ ι πρόσκληση τι τζας κι Σχολή Γαλαάδ, κι τάξη 41. Ο λάφια σο βακερντάας ο πφραλ Νορ 13 μπρεσά πο τζανγκλέ νικίστιλεας μπαγιά! Κάνα τελειωσάλαμ ι Σχολή, βουρτισάλαμ κο Μπέθελ κο Βέλγιος.

ΥΠΕΡΑΣΠΙΝΑΣΑ Ο ΝΟΜΙΚΑ ΔΙΚΑΙΩΜΑΤΑ Ι ΙΕΧΩΒΑΣΚΕ ΛΑΟΣΚΕ

Καζόμ νακχένας ο μπρεσά, τθεράβας ι ευκαιρία τι χρησιμοποιήναβ οντουλά σο τζανάβας για το νομικά για τι βοηθίναβ τι μπορίνας τι ντας λατρεία ελεύθερα κι Ευρώπη ντα γιαβερτθέ. (Φιλιπ. 1:7) Αντικάς κερντόμ λάφι τζενέντζαρ σο ισινέ 55 ντα πο μπουτ τθεμένταρ ντα τθερένας μπαρί θέση. Οντουλέ τθεμέντε να μουκχένας-αμέν τι κεράς μπουτ πράγματα κο έργος ή αμαρό έργος ισινέ απαγορευμέ. Αντίς τι βακεράβ οντουλέ τζενένγκε καζόμ μπουτ πράγματα τζανάβας για το νομικά, βακεράβας λένγκε ότι ισινόμ «Ντεβλέσκο τζενό». Πάντα μανγκάβας ι βοήθεια ι Ιεχωβάσκι αντράλ κατά προσευχή ντα αγαβάβας ότι «ο γκι ι βασιλιάσκο [ή ι δικαστίσκο] ισί σαρ λενιά κο βας κι Ιεχωβάσκο. Γκερέλα-λες κάι μανγκέλα Βοβ».​—Παρ. 21:1.

Ατζέκ ατζέκ ντάβα-μαν γκοντί ι συζήτηση σο τθεράβας εκχέ τζενέσαρ κατά Ευρωπαϊκός Κοινοβούλιος. Μπουτ φαρ μανγκλόμας τι κεράβ λέσαρ λάφι, ντα τελικά δεχτιντάς. Βακερντάς μάνγκε: «Ντάβα-τουτ παντς λεπτά. Όχι πο μπουτ». Με κερντόμ τελέ μο σορό ντα αρχισάλομ τι προσευχίντιβαβ. Ο ευρωβουλευτής πουτσλάς-μαν χολιάσαρ σο κεράβας. Βαντιντόμ μο σορό ντα βακερντόμ: «Ευχαριστιντόμ ι Ντεβλές επειδή ισινάν λέσκο διάκονος». Βοβ πουτσλάς-μαν: «Σο μανγκέσα τι βακερές;» Σικαντόμ λέσκε ο εδάφιος Ρωμαίους 13:4. Ισινέ Προτεστάντης, οτθάρ ανταβά εδάφιος ταρτιντάς λέσκι προσοχή. Σο αβιλό-πες σοράν; Μουκχλάς-μαν τι κεράβ λέσαρ λάφι επκάς σαάτι. Τθεράας εκ μπουτ λατσσί συζήτηση. Βακερντάς επίσης καζόμ μπουτ σεβάνελας αμαρό έργος.

Καζόμ νακχένας ο μπρεσά, ο λαός ι Ιεχωβάσκο γκιλό μπουτ φαρ κο δικαστήριος κι Ευρώπη για τι μανγκέλ κάποια πράγματα. Σαρ για παράδειγμας μα τι τζαν ο πφραλά κο στρατός, τι μπορίνεν τι τραμπίνεν βον κον κα λελ ι τσσαβέν άμα αβιλό εκ διαζύγιος, μα τι τσσουβέν αμένγκε φόρους σινανέ ντα γιαβερά. Τθεράβας ο προνόμιος τι βοηθίναβ με-ντα σε μπουτ ανταλένταρ σο αβιλέ-πες ντα τι ντικχάβ πασάλ σαρ ο Ιεχωβά βοηθιντάς τι τζαν λατσσές. Ο Μάρτυρες ι Ιεχωβάσκε κερδιντέ πο μπουτ από 140 δίκες κο Ευρωπαϊκός Δικαστήριος των Δικαιωμάτων του Ανθρώπου!

ΚΕΡΑΣΑ ΕΡΓΟΣ ΠΟ ΕΛΕΥΘΕΡΑ ΚΙ ΚΟΥΒΑ

Πο σοράν, κερντόμ μπουτί ι πφραλέσαρ Φίλιπ Μπράμλεϊ, κατά παγκόσμια κεντρικά γραφεία, ντα ι πφραλέσαρ Βάλτερ Φαρνέτι, κατά Ιταλία, για τι βοηθίνας ι πφραλέν κι Κούβα τι κερέν έργος πο ελεύθερα. Ανγκλέ, να μουκχένας ι πφραλέν κι Κούβα τι κερέν μπουτ πράγματα κο έργος. Οτθάρ, γραφιντόμ κι πρεσβεία της Κούβας σο ισινέ κο Βέλγιος. Σοράν, γκιλόμ τι ντικχάβ πασάλ εκχέ τζενές σο τθερέλας μπαρί θέση ντα βακερντέας λέσκε τι ντικχέλ οντουβά σο μανγκλάμας λένταρ. Κο πρώτες φορές σο κερντάμ λάφι να μπορισάλαμ τι λύνας ο παρεξηγήσεις σο κερντέ ι κυβέρνηση τι τσσιναβέλ αμαρό έργος οτθέ.

Αφού μανγκλάμ ι βοήθεια ι Ιεχωβάσκι αντράλ κατά προσευχή, μανγκλάμ άδεια για τι μπουτσσαβάς 5.000 Γραφές κι Κούβα, ντα λιντάμ-λα. Ο Γραφές γκιλέ κι πφραλένγκε βαστά χωρίς τι παθίνεν τίποτα. Οτθάρ αγαντάμ ότι ο Ιεχωβά ευλογίνελας αμαρέ προσπάθειες. Σοράν μανγκλάμ άδεια για τι μπουτσσαβάς ατζέκ 27.500. Ανταβά-ντα δεχτιντέ-λες. Ντινάς-μαν μπαρί χαρά σο βοηθιντόμ ι πφραλέν ντα ι πφενίν κι Κούβα τι τθερέν πουμαρέ Γραφές.

Γκιλόμ κι Κούβα μπουτ φαρ για τι βοηθίναβ τι αβέλ-πες ο έργος οτθέ πο ελεύθερα. Καζόμ κεράβας-λες ανταβά, μπουτ τζενέ σο τθερένας μπαρί θέση αρχισάλε τι τζαν-λεν λατσσές μάντζαρ.

ΝΤΙΝΤΙΟΛΑ ΒΟΗΘΕΙΑ ΚΟ ΠΦΡΑΛΑ ΚΙ ΡΟΥΑΝΤΑ

Κο 1994, ο τζενέ κι Ρουάντα αρχισάλε τι χαν-πες αζόμ μπουτ σο μουνταρένας ο εκ ι γιαβερές. Μουλέ πο μπουτ από 1.000.000 τζενέ κατά φυλή Τούτσι κι Ρουάντα. Αντρέ ανταλέντε ισινέ-ντα μερικά πφραλά ντα πφενιά. Μπουτ σουγκό, εκ ομάδα πφραλένγκι κανονιντάς τι ντιντιόν ο βασικά πράγματα ντα βοήθεια κο πφραλά ντα κο πφενιά οντουλέ τθεμέστε.

Κάνα αμαρί ομάδα ερεσλί κι πρωτεύουσα, κο Κιγκάλι, ντικχλάμ ο μεταφραστικός γραφείος ντα ι αποθήκη σο τθεράας ο έντυπα τι αβέν πφερντέ γούρνες κατά σφαίρες. Ασουντάμ μπουτ μπέτι ιστορίες πφραλένγκε ντα πφενίνγκε σο μουνταρντέας-λεν τσσουρίντζαρ. Ασουντάμ επίσης σο κερντέ ο πφραλά για τι σικαβέν αγάπη. Για παράδειγμας, γνωριντάμ εκχέ πφραλές κατά φυλή Τούτσι σο ισινέ γκεραντό εκχέ γουρνάτε τελάλ κατά πφουβ 28 ντιβεσά. Οτθέ, αρακχαβέλας-λες εκ φαμιλί Μαρτυρένγκι κατά φυλή Χούτου. Εκχέ συναθροισιάτε κο Κιγκάλι, σο ισινέ πο μπουτ από 900 πφραλά ντα πφενιά, κερντάμ ο πο λατσσό για τι λοκχιαράς λένγκο γκι ντα τι ντας-λεν ζορ.

Σοράν, γκιλάμ κο Ζαΐρ, σο ακανά βακέρντιβελα Λαϊκή Δημοκρατία του Κονγκό. Οτθέ, ρόνταας μπουτέ Μαρτυρένγκε κατά Ρουάντα σο γκιλέας σε καταυλισμούς προσφύγων πασέ κι πόλη Γκόμα. Ναστί αρακχάας-λεν, οτθάρ κερντάμ προσευχή κο Ιεχωβά για τι γκερέλ-αμέν λέντε. Αζομάν ντικχλάμ εκχέ τζενές τι αβέλ πασέ αμέντε ντα πουτσλάμ-λες άμα τζανέλας τζενέν σο ισινέ Μάρτυρες ι Ιεχωβάσκε. Βοβ βακερντάς: «Βα, με ισινόμ Μάρτυρας. Ελάν κα γκεράβ-τουμέν με κι επιτροπή παροχής βοήθειας». Κάνα γκιντισάλαμ με την επιτροπή παροχής βοήθειας, σαρέ λιντέ μπαρί ζορ. Σοράν κερντάμ εκ συνάθροιση σο ισινέ περίπου 1.600 πρόσφυγες για τι λοκχιαράς λένγκο γκι ντα τι ντας-λεν ζορ. Επίσης διαβαντάμ λένγκε εκ επιστολή κατά Κυβερνών Σώμας. Λιντάς ροϊπέ ι πφραλέν κάνα ασουντέ ακαλά λάφια: «Προσευχίντιβασα συνέχεια τουμένγκε. Τζανάσα ότι ο Ιεχωβά να κα μουκχέλ-τουμέν». Ανταλά λάφια κατά Κυβερνών Σώμας ισινέ μπαγιά! Αντιβές, πο μπουτ από 30.000 Μάρτυρες κι Ρουάντα υπηρετίνενα γιεκ ι Ιεχωβάς χαράσαρ!

ΑΠΟΦΑΣΙΣΜΕ ΤΙ ΑΤΣΣΑΒ ΠΙΣΤΟΣ

Σοράν από 58 μπρεσά σο ισινόμας παντριμέ, μι αγαπημέ ρομνί η Έλι μουλί κο 2011. Ο Ιεχωβά λοκχιαρέλας-μαν κάνα βακεράβας λέσκε ι ντουκχ σο τθεράβας μι γκίστε αντράλ κατά προσευχή. Επίσης, βοηθίνελας-μαν μπουτ σο βακεράβας ο λατσσέ αμπέρια κο γιαβερά τζενέ.

Ακανά ισινόμ πο μπουτ από 90 μπρεσένγκο, αλλά κεράβα έργος ατζέκ ατζέκ κάθε εβδομάδα. Επίσης, ντέλα-μαν μπαρί χαρά σο βοηθίναβα κο Νομικός Τμήμας ατθέ κο Μπέθελ κο Βέλγιος. Οντουλά σο σικλιλόμ μι ζωγιάτε βοηθίνενα-μαν τι νταβ ζορ κο πο τερνέ πφραλά κι φαμιλί Μπέθελ.

Πριν από 84 μπρεσά κερντόμ πρώτη φαρ προσευχή κο Ιεχωβά. Αζομάν αρχισάλομ τι μπαριαράβ εκ ζουρανί φιλία λέσαρ σο αντάς-μαν πο πασέ λέστε. Εκτιμίναβα μπουτ σο ο Ιεχωβά σαρέ μι ζωγιάτε τσσουβέλας σημασία μι προσευχιέντε.—Ψαλμ. 66:19.c