Ο Ισραηλίτες Λένα ι Χαναάν

ΜΠΟΥΤ μπρεσά πριν τι λεν ο Ισραηλίτες ι Χαναάν, ο Ιεχωβά ντινάας πο λάφι ότι κα ντέλας οντουβά τθεμ κο προσάγγονα του Αβραάμ. Ακανά, ενώ κερέλας-λεν κουμάντος ο Ιησούς του Ναυή, ο Ισραηλίτες ισινέ έτοιμοι τι λεν πουμένγκε ο τθεμ σο βακερντάας ο Ιεχωβά ότι κα ντέλας-λεν.

Ο Ντεβέλ λιντάας ι απόφαση τι καταστραφίνελ τους Χαναναίους επειδή βον πφερντέας οντουβά τθεμ με μπουτ μπέτι πράγματα, κερένας μπουτ λουμνιπέ ντα μουνταρένας γιαβερέν. Οτθάρ, οντουλά πόλεις σο τθερένας ο Χαναναίοι έπρεπε τι καταστραφίντιβεν ντιπ όταν κα λένας-λεν ο Ισραηλίτες.

Όμως, πριν τι λεν οντουβά τθεμ, ο Ιησούς του Ναυή μπουτσσαντάς ντουέ Ισραηλιτέν κι πόλη της Ιεριχώς. Όταν γκιλέ οτθέ, μπεσλέ εκχέ τζουβλιάτε σο βακερένας λάκε Ραάβ. Βόι δεχτιντάς-λεν πι φαμιλιάτε ντα αρακχαντάς-λεν παρόλο σο τζανέλας ότι ισινέ Ισραηλίτες. Η Ραάβ πακιάλας κο Ντεβέλ σο τθερένας ο Ισραηλίτες, επειδή ασουντάας ότι ο Ιεχωβά σώνελας ντα αρακχαβέλας πι λαός. Τσσουντάς ι ντουέ Ισραηλιτέν τι χαν λάκε σοβέλ ότι βόι ντα λάκι φαμιλί κα σώντιβενας όταν κα καταστραφίντιβελας οντιά πόλη.

Πιο σοράν, όταν ο Ισραηλίτες τσσουντέ-πες κι Χαναάν ντα γκιλέ τι λεν ι Ιεριχώ, ο Ιεχωβά κερντάς εκ θαύμας​—περαντάς ο βουτσσέ ντουβάρια της Ιεριχώς. Ο στρατός του Ιησού του Ναυή τσσουντάς-πες κι πόλη ντα καταστραφιντάς-λα, αλλά σωντάς τη Ραάβ ντα λάκι φαμιλί. Σοράν, αντρέ σε σιοβ μπρεσά, ο Ιησούς του Ναυή μπορισάλο τι λελ μπαρέ τθανά οντουλέ τθεμέσταρ σο βακερντάας ο Ιεχωβά ότι κα ντέλας-λεν. Μετά, οντουβά τθεμ ιλιάντιλο κο φάρες κι Ισραηλιτόνγκε.

Χάνικ πριν τι τελειώνελ ο διορισμός σο τθερέλας αζόμ μπρεσά, ο Ιησούς του Ναυή γκιντιντάς ι λαός. Αντάς λένγκε γκοντιάτε οντουλά σο κερέλας ο Ιεχωβά κι έρημος λένγκε τζενένγκε ντα βακερντάς κο λαός τι υπηρετίνελ ι Ιεχωβάς. Όμως, όταν μουλέ ο Ιησούς του Ναυή ντα οντουλά σο βοηθίνενας-λες, ο Ισραηλίτες μουκχλέ ι Ιεχωβάς ντα υπηρετίνενας ψεύτικε ντεβλέν. Για περίπου 300 μπρεσά, ο Ισραηλίτες να ασουνένας πιστά ο νόμοι ι Ιεχωβάσκε. Οτθάρ, ο Ιεχωβά μουκχλάς λένγκε ντουσμανίν, σαρ για παράδειγμας τους Φιλισταίους, τι κερέν-λεν κουμάντος ντα τι τιμωρίνεν-λεν. Αλλά όταν ο Ισραηλίτες μανγκένας ι βοήθεια ι Ιεχωβάσκι, βοβ βοηθίνελας-λεν ντα για τι σώνεν-λεν, τσσουντάς 12 τζενέν σο βακέρντιβενας «κριτές».

Ο βιβλίος Κριτές βακερέλα ότι ο πρώτος κριτής ισινέ ο Γοθονιήλ ντα ο τελευταίος ισινέ ο Σαμψών, σο τθερέλας ι πιο μπαρί ζορ σαριλένταρ. Η πιο σημαντική αλήθεια σο σικάντιβελα μπουτ φαρ κο βιβλίος Κριτές ισί: Άμα κα ασουνάς οντουλά σο βακερέλα ο Ιεχωβά, κα ευλογίντιβας, ενώ άμα να κα ασουνάς ι Ιεχωβάς, κα τθεράς μπαρέ προβλήματα.

​—Στηρίντιβελα κο βιβλία Ιησούς του Ναυή ντα Κριτές ντα κο εδάφια Λευιτικό 18:​24, 25.