Η Ραάβ Πακιάλας κο Ιεχωβά

Βάκερ ότι ισινάμ κι Ιεριχώ, εκ τθεμ κι πφουβ Χαναάν, σο ο τζενέ να πακιάνα κο Ιεχωβά. Ατθέ, τζουβντιόλα εκ τζουβέλ σο βακερένα λάκε Ραάβ.

Όταν η Ραάβ ισινέ χουρντί, ασουνέλας ιστορίες σο βακερένας σαρ μπορισάλο ο Μωυσής τι πουτρέλ κο μασκάρ ι Ερυθρά Θάλασσα ντα τι νικαβέλ ι Ισραηλιτέν κατά Αίγυπτος. Επίσης, η Ραάβ ασουνέλας σαρ ο Ιεχωβά βοηθίνελας-λεν τι νικίνεν πουμαρέ ντουσμανίν κο τζένγκια, δηλαδή κο πόλεμοι, σο κερένας. Ακανά λιντάς αμπέρι ότι ο Ισραηλίτες μπεσλέ πουμαρέ τσαντιρίντζαρ πασέ κι Ιεριχώ!

Εκ ιράτ, ντούι Ισραηλίτες τσσουβένα-πες αποτσοράλ κι Ιεριχώ για τι σικλιόν σο α­βέλα-πες. Τζάνα κο κχερ της Ραάβ, ντα βόι τσσουβέλα-λεν αντρέ ντα βακερέλα λένγκε τι μπεσέν. Αρατί, ο βασιλιάς της Ιεριχώς λιντάς αμπέρι ότι αβιλέ αποτσοράλ ντούι Ισραηλίτες ντα γκιλέ κο κχερ της Ραάβ. Οτθάρ, μπουτσσαντάς τι ασταρέν-λεν. Η Ραάβ γκεραβέλα ι ντουέ Ισραηλιτέν οπράλ πι νταρατσάτε ντα βακερέλα κι βασιλιάσκε στρατιώτες: “Ο Ισραηλίτες ισινέ ατθέ, αλλά νασλέ μπίλιμ κατά πόλη. Άμα κα τθάβντεν ακανά, κα ερεσαβέν-λεν!” Τζανέσα σόσκε η Ραάβ γκεραβέλα ι ντουέ Ισραηλιτέν;​— Επειδή πακιάλα κο Ιεχωβά ντα τζανέλα ότι Βοβ κα ντελ κο Ισραηλίτες ο τθεμ Χαναάν.

Πριν τι νασέν οντουλά ντούι Ισραηλίτες κατά κχερ της Ραάβ, ντένα-λα πουμαρό λάφι ότι βόι ντα λάκι φαμιλί κα σώντιβεν αζομάν σο κα καταστραφίντιβελ η Ιεριχώ. Τζανέσα σο βακερένα λάκε τι κερέλ;​— Βακερένα λάκε: “Λε ακαβά λολό σολό, ιμπλάβ-λες τι παραθυρόσταρ, ντα κον ισί τι κχερέστε κα σώντιβελ”. Η Ραάβ κερέλα ακριβώς οντουβά σο βακερένα λάκε ο ντούι Ισραηλίτες. Τζανέσα σο αβέλα-πες σοράν;​—

Μετά από χάνικ ντιβεσά, ο Ισραηλίτες πφιρένα ντονταλάι κατά πόλη χωρίς τι κερέν λάφι. Ανταβά κερένα-λες σιοβ ντιβεσά, εκ φαρ κο ντιβές. Αλλά οπράλ κο εφτά ντιβεσά, πφιρένα ντονταλάι κατά πόλη εφτά φαρ. Σοράν σαρέ γιεκ ντένα βίκος μπουτ ζουρανές. Ο Ιεχωβά κερντάς ο βουτσσέ ντουβάρια σο ισινέ ντονταλάι κι πόλη τι περέν. Ο κχερ, όμως, ι λολέ σολέσαρ σο ιμπλάντιβελα κατά παράθυρος να πελό! Ντικχέσα-λες κι φωτογραφία;​— Η Ραάβ ντα λάκι φαμιλί σώντιβενα!

Σο σικλιόσα κατά Ραάβ;​— Η Ραάβ πακιάλας κο Ιεχωβά επειδή σικλιλίας μπουτ σουκάρ πράγματα λέσκε. Τούι-ντα σικλιόσα μπουτ σουκάρ πράγματα ι Ιεχωβάσκε. Πακιάσα λέστε σαρ η Ραάβ;​— Σίγουρα πακιάσα!