Ο Σαμουήλ Κερέλας Συνέχεια ο Σωστός

Χουρντιαρέλα μπερί, ο Σαμουήλ τζουβντιόλας ντα κερέλας μπουτί κι σκηνή της μαρτυρίας, κο τθαν σο τζάνας ο τζενέ για τι ντεν δόξα κο Ιεχωβά. Τζανέσα σόσκε γκιλό οτθέ ο Σαμουήλ; Πρώτα, για τι σικλιάς μερικά πράγματα λέσκε νταγιάκε σο βακερένας λάκε Άννα.

Η Άννα μανγκέλας, μπουτ μπρεσά, τι κερέλ εκχέ μαξιμίς, αλλά ναστί ατσσόλας κχαμνί. Οτθάρ, κερντάς προσευχή κο Ιεχωβά ντα μολιντάς-λες αντράλ πι γκίσταρ τι βοηθίνελ-λα. Ντινάς πο λάφι κο Ντεβέλ ότι, άμα κερέλας τσσαβές, κα μπουτσσαβέλας-λες τι τζουβντιόλ ντα τι κερέλ μπουτί κι σκηνή της μαρτυρίας. Ο Ιεχωβά απαντιντάς λάκε προσευχιάτε. Η Άννα ατσσιλί κχαμνί ντα μπιαντάς εκχέ τσσαβές, σο τσσουντάς λέσκε Σαμουήλ. Σαρ ντινάας πο λάφι, όταν ο Σαμουήλ αβιλό τρινέ ή σταρέ μπρεσένγκο, γκερντάς-λες κι σκηνή της μαρτυρίας για τι υπηρετίνελ ι Ντεβλές οτθέ.

Αρχιερέας κι σκηνή της μαρτυρίας ισινέ ο Ηλεί. Οτθέ ισινέ ιερείς ο ντούι-ντα τσσαβέ λέσκε. Σαρ τζανέσα, η σκηνή της μαρτυρίας ισινέ ο κχερ σο ντένας δόξα κο Ντεβέλ, ντα σαρέ έπρεπε τι κερέν λατσσέ πράγματα οτθέ. Όμως, ο τσσαβέ του Ηλεί κερένας μπέτι πράγματα, ντα ο Σαμουήλ ντικχέλας-λεν. Μήπως κερέλας βοβ-ντα μπέτι πράγματα;​— Όχι, κερέλας συνέχεια ο σωστός, σαρ σικλιαρντάας-λες λέσκο ντατ ντα λέσκι ντάι.

Σο αμντίνεσα ότι έπρεπε τι κερέλ ο Ηλεί πι ντουέ τσσαβέντζαρ;​— Έπρεπε τι τιμωρίνελ-λεν ντα μα τι μουκχέλ-λεν τι κερέν μπουτί αντρέ κι Ντεβλέσκο κχερ. Επειδή, όμως, να κερντάας-λες ανταβά, ο Ιεχωβά χολιασάλο λέσκε ντα λέσκε ντουέ τσσαβένγκε ντα αποφασιντάς τι τιμωρίνελ-λεν.

Εκ ιράτ, σαρ σοβέλας ο Σαμουήλ, ασουντάς ότι κάποιος ντέλας-λες βίκος: “Σαμουήλ!” Τθαβντισάλο κο Ηλεί, αλλά βοβ βακερντάς: “Να ντινόμ-τουτ βίκος”. Ανταβά αβιλό-πες ατζέ ντούι φαρ. Σοράν, κι τρίτη φαρ, ο Ηλεί βακερντάς λέσκε ότι, άμα κα ασουνέλας πάλι οντιά φωνή, έπρεπε τι βακερέλ: “Σε παρακαλώ, Ιεχωβά, κερ λάφι. Ασουνάβα”. Ντα αντικάς κερντάς ο Σαμουήλ. Αζομάν ο Ιεχωβά βακερντάς λέσκε: “Τι βακερές κο Ηλεί ότι κα τιμωρίναβ λέσκι φαμιλί ανταλέ μπέτι πραγματένγκε σο κερντέ”. Πακιάσα ότι ισινέ εύκολος τι βακερέλ ο Σαμουήλ ανταβά πράγμας κο Ηλεί;​— Όχι, να ισινέ. Αλλά παρόλο σο νταρέλας, ο Σαμουήλ κερντάς οντουβά σο βακερντάς λέσκε ο Ιεχωβά. Ο λάφια ι Ιεχωβάσκε νικίστιλε μπαγιά. Ο Ηλεί ντα λέσκε ντούι τσσαβέ μουλέ.

Ο Σαμουήλ ισί λατσσό παράδειγμας αμένγκε. Κερέλας ο σωστός παρόλο σο ντικχέλας γιαβερέν τι κερέν μπέτι πράγματα. Κα κερές τούι συνέχεια ο σωστός, σαρ κερέλας-λες ο Σαμουήλ; Άμα κα κερές-λες, κα χαιρίνελ εμ ο Ιεχωβά εμ το ντατ ντα τι ντάι.