Ο Ιεχωβά Ντινάς-μαν πιο Μπουτ Σαρέ Οντουλένταρ σο Μπεκλεντίναβας

Κάνα λιντόμ τελικά ο σκαπανικός, πουτάρντιλο ανγκλά-μάντε εκ ντρομ σο γκερντάς-μαν εκχέ ζωγιάτε σο ισινέ μπουτ πιο λατσσί σαρέ οντουλένταρ σο μπεκλεντίναβας. (Εφεσ. 3:​20) Μπορεί τι πουτσένα σαρ αβιλό-πες ανταβά. Κα βακεράβ τουμένγκε.

Μπιάντιλομ κο Βερολίνος κο 1939 σάντε χάνικ μάσεκ αφού αρχισάλο ο Δεύτερος Παγκόσμιος Πόλεμος. Κάνα ανταβά τζένγκι τελειώνελας κο 1945, ο αεροπλάνα φουρτίνενας μπουτ μπόμπες κο Βερολίνος. Εκ φαρ, πελέ μπόμπες αμαρέ ντρομέστε, ντα μι φαμιλιάσαρ τθαβντισάλαμ εκχέ τθανέστε τι αρακχαβάς-αμέν. Πιο σοράν, για τι αβάς ατζέ πιο αρακχαντέ γκιλάμ κι Ερφούρτη, οτθέ σο μπιάντιλιας μι ντάι.

Μι ντάι ρόντελας σαρέ πι γκίσαρ τι αρακχέλ ι αλήθεια. Διαβάνελας βιβλία σο γραφιντέ γκοντιαβέρ τζενέ ντα ροντιντάς μπουτέ θρησκειέντε αλλά να νιωθίνελας πφερντί αντρέ πέστε. Κο 1948, ντούι Μάρτυρες ι Ιεχωβάσκε μπασκιαρντέ αμαρί πόρτα. Μι ντάι βακερντάς λένγκε τι αβέν αντρέ ντα κερέλας λένγκε ι εκ ερώτηση παλάλ κατά γιαβέρ. Περίπου εκ σαάτι πιο σοράν, βακερντάς μι χουρντέ πφενιάκε ντα μάνγκε: «Αρακχλόμ ι αλήθεια!» Μπουτ σουγκό, ο τριν-ντα αρχισάλαμ τι τζας συναθροίσεις κι Ερφούρτη.

Κο 1950, βουρτισάλαμ κο Βερολίνος ντα τζάας συναθροίσεις κι Κχανγκιρί Βερολίνο Κρόιτσμπεργκ. Σοράν, γκιλάμ τι μπεσάς γιαβερτθέ κο Βερολίνος ντα τζάας συναθροίσεις κι Κχανγκιρί Βερολίνο Τέμπελχοφ. Μι ντάι μπολντιλί, αλλά με σακιντίναβας. Σόσκε;

ΝΑΣΚΙΑΡΑΒΑ ΑΝΤΡΑ-ΜΑΝΤΑΡ Ι ΛΑΤΖ

Ισινόμας μπουτ λατζανό ντα ανταβά ατσσικιαρέλας-μαν παλάλ. Παρόλο σο τζάβας κο έργος, ντούι μπρεσά να πουταρντόμ μο μούι τι κεράβ λάφι κο τζενέ. Σαρέ αλλαξάλε κάνα αρχισάλομ τι κεράβ παρέα πφραλέντζαρ ντα πφενίντζαρ σο σικαντέας ότι ισινέ μπίνταρανε ντα αφοσιωμέ κο Ιεχωβά. Μερικοί λένταρ μπουτσσάντιλεας κο στρατόπεδα συγκέντρωσης ή τσσουβντιλέας φυλακή κι Ανατολική Γερμανία. Γιαβερά γκερένας ο έντυπα αποτσοράλ κι Ανατολική Γερμανία, παρόλο σο μπορεί τι ασταρένας-λεν ντα τι τσσουβένας-λεν φυλακή. Λένγκο παράδειγμας ατσσιλό μάνγκε. Σκεφτιντόμ ότι, αφού να χαλάς-λεν ανάγκη άμα κα μερένας ή άμα κα τζάνας φυλακή ι Ιεχωβάσκε ντα πουμαρέ πφραλένγκε, με-ντα έπρεπε τι κεράβ σο νακχέλας μι βαστένταρ για μα τι λατζάβ αζόμ μπουτ.

Αρχισάλομ τι νασκιαράβ αντρά-μάνταρ ι λατζ κάνα γκιλόμ σε εκ εκστρατεία κο 1955. Σε εκ επιστολή σο νικίστιλι κο Πληροφορητής,a ο πφραλ Νάθαν Νορ βακερντάς ότι η εκστρατεία ισινέ εκ κατά πιο μπαρέ σο κα κερέλας η οργάνωση. Βακερντάς ότι, άμα γκιλέας σαρέ ο πφραλά, “κα τθεράας ο πιο λατσσό μάσεκ σο τθεράας ποτές κο έργος σαρί κι πφουβ”. Ντα ανταβά αβιλό-πες! Χάνικ πιο σοράν ντινόμ μο λάφι κο Ιεχωβά τι τζουβντιάβ λέσκε, ντα κο 1956 μπολντιλόμ μι νταντέσαρ ντα μι πφενιάσαρ. Μπουτ σουγκό όμως, έπρεπε τι λαβ εκ γιαβέρ-ντα σημαντική απόφαση.

Τζανάβας μπουτ μπρεσά ότι ο σκαπανικός κα αβέλας λατσσό μάνγκε, αλλά πάντα βακεράβας ότι κα λάβας-λες πιο σοράν. Σικλιλόμ κο Βερολίνος σαρ τι κινάβ ντα τι μπικινάβ πράγματα γιαβερέ τθεμέντε. Σοράν, μανγκάβας τι κεράβ χάνικ καιρός ανταγιά μπουτί για τι σικλιάβ-λα ατζέ πιο λατσσές. Οντουλέσκε, κο 1961, γκιλόμ τι κεράβ μπουτί κο Αμβούργος, κο πιο μπαρό λιμάνι κι Γερμανία. Καζόμ πιο μπουτ κεράβας ανταγιά μπουτί, αζόμ πιο μπουτ μουκχάβας ι ολοχρόνια υπηρεσία για πιο σοράν. Σο κα κεράβας;

Ισινόμ πφερντό εκτίμηση ι Ιεχωβάσκε σο τσσουντάς λατσσέ πφραλέν τι βοηθίνεν-μαν τι αγαβάβ ότι λέσκι υπηρεσία ισί ο πιο σημαντικός πράγμας. Μπουτ αμαλά μιρέ λιντέας ο σκαπανικός ντα μουκχλέ μάνγκε μπουτ λατσσό παράδειγμας. Ντα ο πφραλ Έριχ Μουντ, σο ατσσιλόας τζουβντό κο στρατόπεδος συγκέντρωσης, βακερντάς μάνγκε τι τθεράβ εμπιστοσύνη κο Ιεχωβά. Βακερντάς ότι κο στρατόπεδος συγκέντρωσης ο πφραλά σο ντένας μπέσα πουμαρέ νεαυτόσκε χασαρντέ πουμαρί ζορ πιο σοράν. Αλλά οντουλά σο τθερένας σαρί πουμαρί εμπιστοσύνη κο Ιεχωβά ατσσιλέ πιστοί ντα ντινέ ζορ ι γιαβερέν κι κχανγκιρί.

Ο πφραλ Μάρτιν Πέτσιγκερ σο υπηρετιντάς πιο σοράν κο Κυβερνών Σώμας ντέλας ζορ ι πφραλέν ακαλέ λαφίντζαρ: «Ο θάρρος ισί ο πιο πολύτιμος πράγμας σο μπορίνενα τι τθερέν!» Σκεφτιντόμ λατσσές ανταλά λάφια ντα σοράν μουκχλόμ μι μπουτί ντα λιντόμ ο σκαπανικός κο Ιούνιος 1963. Ανταγιά ισινέ η πιο λατσσί απόφαση μάνγκε! Νακχλέ ντούι μάσεκ, ντα να ερεσαντόμας τι ρόνταβ γιαβερέ μπουτιάκε κάνα μανγκλέ μάνταρ τι αβάβ ειδικός σκαπανέας. Χάνικ μπρεσά πιο σοράν, ο Ιεχωβά ντινάς-μαν πιο μπουτ σαρέ οντουλένταρ σο μπεκλεντίναβας. Γκιλόμ κι Σχολή Γαλαάδ κι τάξη 44.

ΣΙΚΛΙΑΒΑ ΚΑΤΙ ΜΠΟΥΤ ΣΗΜΑΝΤΙΚΟΣ ΚΙ ΓΑΛΑΑΔ

«Μα σιγκιαρέν τι μουκχέν τουμαρό διορισμός». Ανταβά ισινέ εκ κατά πιο σημαντικά πράγματα σο σικλιλόμ, πιο μπουτ κατά πφραλά Νάθαν Νορ ντα Λάιμαν Σουίνγκλ. Βακερένας αμένγκε τι κεράς ο πιο λατσσό για τι ατσσάς αμαρέ διορισμόστε ατζέ-ντα άμα ανταβά ισινέ δύσκολος. Ο πφραλ Νορ βακερντάς: «Κάι κα τθερέν τουμαρί γκοντί; Κι μελ, κο μακχιά ντα κο κουνούπια, κο τσοροριπέ; Ή κα ντικχέν ο δέντρα, ο λουλούδια ντα ο ασαπέ κι τζενένγκο μούι; Σικλιόν τι μανγκέν ι τζενέν!» Εκ ντιβές, κάνα ο πφραλ Σουίνγκλ βακερέλας σόσκε μερικά πφραλά σιγκιαρντέ τι μουκχέν πουμαρό διορισμός, λέσκε γιακχά πφερντιλέ δάκρυα. Τσσιναντάς τι κερέλ λάφι μέχρι τι ηρεμίνελ. Ανταβά ασταρντάς μο γκι ντα βακερντόμ ότι ποτές να κα πφανγκάβ ο γκι ι Χριστόσκο ντα λέσκε πιστέ πφραλένγκο.​—Ματθ. 25:40.

Κάνα λιντάμ αμαρέ διορισμοί, τριν Μπεθελίτες πουτσλέ χάνικ τζενέν αμένταρ κάι κα τζάας. Βακερένας λατσσέ λάφια ι κάθε τθεμέσκε αλλά κάνα με βακερντόμ ότι κα τζάβας κο Κονγκό, ατσσιλέ χάνικα ντα βακερντέ σάντε: «Ωχ, κο Κονγκό! Ο Ιεχωβά τι αβέλ τούσαρ!» Οντουλά μπρεσά, ασουνάας κο ειδήσεις ότι αβένας μπουτ τζένγκια ντα μουνταρίματα κο Κονγκό (Κινσάσα). Αλλά με ατσσικιαρντόμ μι γκοντιάτε οντουλά σο σικλιλόμας. Χάνικ πιο σοράν κατά αποφοίτηση σο αβιλί κο 1967 κο Σεπτέμβριος, ο Χάινριχ Ντένμποστελ, ο Κλοντ Λίντσεϊ ντα με γκιλάμ κι πρωτεύουσα οντουλέ τθεμέσκι, κι Κινσάσα.

ΣΙΚΛΙΑΒΑ ΜΠΟΥΤ ΠΡΑΓΜΑΤΑ ΣΑΡ ΙΕΡΑΠΟΣΤΟΛΟΣ

Κάνα ερεσλάμ κι Κινσάσα, σικλιάας γαλλικά τριν μάσεκ. Σοράν, γκιλάμ ι αεροπλανόσαρ πασέ κι Ζάμπια κο Λουμπούμπασι, σο ανγκλέ βακέρντιβελας Ελιζαμπετβίλ. Μπεσλάμ σε εκ ιεραποστολικός κχερ αντρέ κι πόλη.

Καέκ να κερντάας λάφι ι Ντεβλέσκε κο πιο μπουτ τθανά κο Λουμπούμπασι, οτθάρ ισινέ μπουτ μπαρί χαρά αμένγκε σο ισινάμας ο πρώτοι σο κεράας-λες ανταβά. Μπουτ σουγκό, να ερεσαβάας σαρέ ο μελέτες σο τθεράας. Ντα κεράας λάφι τζενέντζαρ σο κερένας μπουτί κι κυβέρνηση ή ασκερίντζαρ. Μπουτ λένταρ σεβάνενας μπουτ ο Λάφι ι Ντεβλέσκο ντα αμαρό έργος. Ο τζενέ οτθέ κερένας λάφι πιο μπουτ σουαχίλι, οντουλέσκε ο Κλοντ Λίντσεϊ ντα με σικλιλάμ ανταγιά-ντα τσσιπ. Χάνικ πιο σοράν μπουτσσαντέ-αμέν εκχέ κχανγκιριάτε σο κερντιόλας λάφι σουαχίλι.

Ο σουκάρ εμπειρίες ισινέ μπουτ αλλά τθεράας δυσκολίες-ντα. Μπουτ φαρ ματέ στρατιώτες σο τθερένας όπλα ντα χολιαμέ ασκέρια κατηγορίνενας-αμέν ψεύτικε λαφίντζαρ. Εκ φαρ μπουτ ασκέρια σο τθερένας όπλα τσσουντέ-πες κο ιεραποστολικός κχερ αζομάν σο κεράας συνάθροιση ντα γκερντέ-αμέν κο αστυνομικός τμήμας. Τσσουντέ-αμέν τι μπεσάς τελέ ντα τθερένας-αμέν οτθέ μέχρι σο γκιλό ο σαάτι 10 ντα μουκχλέ-αμέν τι νασάς.

Κο 1969, αβιλόμ επίσκοπος. Ισινέ φαρ σο πφιράβας μπουτ σαάτια τσικαλέ ντρομέντε σο τθερένας μπαρέ τσαριά. Εκχέ γκαβέστε, εκ κχανί πι πιλιτσκέντζαρ τσσουβέλας-πες τελάλ μι κρεβατίσταρ κάθε ιράτ. Ποτές να κα μπιστράβ καζόμ ζουρανές μπασέλας ντα τζανγκαβέλας-μαν πριν τι ντισιόλ. Ντα σο σουκάρ ισινέ κάνα μπεσάας ι πφραλέντζαρ ντονταλάι κατά γιακ αρατί ντα κεράας λάφι ι Γραφιάκε!

Εκ κατά πιο μπαρέ δυσκολίες αβιλέ οντουλένταρ σο κερένας-πες ότι ισινέ πφραλά, αλλά υποστηρίνενας ο Κιταουάλα.b Μερικοί λένταρ μπολντιλέας ντα αβιλέας πρεσβύτεροι-ντα. Ο πιστά πφραλά ντα πφενιά αγαντέ μπουτέν οντουλέ τζενένταρ σο ισινέ σαρ “γκεραντέ βράχια”. (Ιούδα 12) Τελικά, ο Ιεχωβά νικαντάς οντουλέ τζενέν κατά κχανγκιριά ντα σοράν μπουτ τζενέ αβιλέ κι αλήθεια.

Κο 1971, διορισάλομ κο γραφείος τμήματος κι Κινσάσα. Οτθέ, κεράβας μπερεκέτι μπουτιά σαρ ισινέ ο γράμματα σο μπουτσσαβάας ή λάας, ο παραγγελίες για το έντυπα ντα γιαβερά πράγματα σο αβένα-πες κο Τμήμας Υπηρεσίας. Κο Μπέθελ, σικλιλόμ τι οργανώναβ ο έργος εκχέ μπουτ μπαρέ τθεμέστε σο ο πιο μπουτ πράγματα κο υπηρεσίες οντουλέ τθεμέσκε να αβένας-πες σωστά. Για παράδειγμας, ισινέ φαρ σο νακχένας μασεκά για τι ερεσέν κο κχανγκιριά ο γράμματα σο μπουτσσαβάας. Ο ταχυδρομείος μπουτσσαβέλας ο γράμματα αεροπλανόσαρ, ντα σοράν τσσουβένας-λεν κο βάρκες σο ατσσόνας οτθέ μπουτ εβδομάδες ιτιρί κατά τσαριά σο ιτσσαρένας ο πανιά σαρ μπαρό χαλίς. Ο έργος όμως αβέλας-πες παρόλο σο τθεράας ανταλά ντα γιαβερά δυσκολίες.

Ατσσάβας πουταρντέ μόσαρ κάνα ντικχάβας σαρ κερένας ο πφραλά μπαρέ συνελεύσεις μπουτ χάνικ λοβέντζαρ. Λατσσαρένας κορκορέ ο βήμας, λένας μπουτ μπαρέ καλάμια για τι κερέν ο ντουβάρια ντα μερικά καλάμια πακιαρένας-λεν ντα κερένας-λεν σαρ γιαστίκια για τι μπεσέν. Χρησιμοποιήνενας μπαμπού για τι κερέν κολόνες ντα καλάμια για τι κερέν σκεπές ντα τραπέζια. Ντα ανταλά πφάντενας-λεν σολέντζαρ σο κερένας κατά δέντρα. Να αβέλας-πες μα τι ατσσάβ πουταρντέ μόσαρ οντουλέ πφραλέντζαρ σο αρακχένας μπουτ λατσσέ τρόπους για τι νακχαβέν ο δυσκολίες. Μανγκλόμ-λεν σαρέ μι γκίσαρ. Καζόμ μπουτ σικλιντίναβας λένγκε κάνα μπουτσσάντιλομ εκχέ γιαβερέ τθεμέστε!

ΥΠΗΡΕΤΙΝΑΒΑ ΚΙ ΚΕΝΥΑ

Κο 1974, μπουτσσάντιλομ κο γραφείος τμήματος κο Ναϊρόμπι, κι Κένυα. Οτθέ τθεράας μπουτ τι κεράς σόσκε ο γραφείος τμήματος τθερέλας ι ευθύνη ι εργόσκε σο αβέλας-πες ντεσέ τθεμέντε οτθέ πασέ, ντα μερικά οντουλέ τθεμένταρ να μουκχένας ι πφραλέν τι κερέν έργος. Μπουτσσαντέ-μαν μπουτ φαρ οντουλέ τθεμέντε, ντα ατζέ πιο μπουτ κι Αιθιοπία σο αμαρέ πφραλά νακχένας μπουτ μπαρέ δυσκολίες σόσκε ο τζενέ οτθέ τζάνας κόντρα λέντζαρ. Μπουτέν ταλαιπωρίνενας-λεν ή τσσουβένας-λεν φυλακή. Γιαβερέν μουνταρντέ-λεν. Αλλά ο πφραλά νταϊντιντέ ντα να χασαρντέ πουμαρί πίστη σόσκε τθερένας ζουρανί φιλία ι Ιεχωβάσαρ ντα ο εκ ι γιαβερέσαρ.

Κο 1980, αβιλό-πες κάτι μπουτ σουκάρ μι ζωγιάτε. Παντρισάλομ με την Γκέιλ Μάθσον, σο ισί κατά Καναδάς. Η Γκέιλ ντα με ισινάμας κι ίδια τάξη κι Γαλαάδ. Σοράν, μπουτσσαβάας γράμματα ο εκ κο γιαβέρ. Η Γκέιλ ισινέ ιεραπόστολος κι Βολιβία. Ντικχλάμ-αμέν πάλι κι Νέα Υόρκη 12 μπρεσά πιο σοράν. Αφού νακχλό χάνικ καιρός, παντρισάλαμ κι Κένυα. Εκτιμίναβα-λα μπουτ σόσκε ντικχέλα πάντα ο πράγματα σαρ ντικχέλα-λεν ο Ιεχωβά ντα ερεσένα-λα οντουλά σο τθερέλα. Ατζέκ ατζέκ ισί η πιο μπαρί βοήθεια μάνγκε ντα μανγκέλα-μαν μπουτ.

Κο 1986, με την Γκέιλ αρχισάλομ τι τζαβ τθαν τθανέστε σαρ επίσκοπος ντα υπηρετίναβας κι Επιτροπή του Τμήματος-ντα. Σαρ επίσκοπος, γκιλόμ μπουτέ τθεμέντε σο τθερέλας λένγκι ευθύνη ο γραφείος τμήματος κι Κένυα.

Σο σουκάρ ισινέ κάνα κεράας ετοιμασίες εκχέ συνελευσιάκε κι Ασμάρα (Ερυθραία) κο 1992! Αζομάν η κυβέρνηση οτθέ μουκχέλας ι πφραλέν τι κερέν έργος. Δυστυχώς, αρακχλάμ σάντε εκ αποθήκη σο τσσουβένας πουσά σο ισινέ μπουτ μπέτι αβριάλ ντα ατζέ πιο μπέτι αντράλ. Κο ντιβές σο ισινέ η συνέλευση, ατσσιλόμ πουταρντέ μόσαρ κάνα ντικχλόμ σαρ ο πφραλά λατσσαρντέας-λες αντράλ για τι μπορίνας τι ντας λατρεία οτθέ ι Ιεχωβάς. Μπουτ φαμιλιά αντέ σουκάρ κοτορά ντα ιτσσαρντέ σο-ντα ντικχίντιβελας μπέτι. Ανταλέ μπουτ σουκάρ συνελευσιάτε αβιλέ 1.279 τζενέ ντα τθεράας μπαρί χαρά σο ισινάμας οτθέ.

Ο έργος σαρ επίσκοπος τθαν τθανέστε ισινέ μπαρί αλλαγή αμένγκε σόσκε κάθε εβδομάδα μπεσάας μπουτ διαφορετικέ τθανέντε. Εκ φαρ, μπεσλάμ εκχέ μπουτ μπαρέ ντα πααλίς κχερέστε κι ντεριάβ ντα εκ γιαβέρ φαρ μπεσλάμ εκχέ παραγκάτε λαμαρινένταρ οτθέ σο μπεσένας εργάτες ντα ο κινέφι ισινέ πιο ντουρ από 100 μέτρα. Αλλά κάι-ντα τι αβάας, ο πιο σουκάρ πράγματα σο ντάσα-αμέν γκοντί ισί ο πφερντέ ντιβεσά σο υπηρετίναας πιστέ σκαπανίντζαρ ντα γιαβερέ πφραλέντζαρ. Κάνα λιντάμ γιαβέρ διορισμός, μουκχλάμ παλάλ μπουτέ αμαλέν σο μανγκάας ντα σικλιντίναας λένγκε μπουτ.

ΛΑΣΑ ΜΠΟΥΤ ΕΥΛΟΓΙΕΣ ΚΙ ΑΙΘΙΟΠΙΑ

Κατά 1987 μέχρι κο 1992, ο κυβερνήσεις μπουτέ τθεμέντε σο τθερέλας ι ευθύνη ο γραφείος τμήματος κι Κένυα, μουκχλέ ι πφραλέν τι κερέν ο έργος. Οντουλέσκε, κερντιλέ γιαβερά-ντα γραφεία τμήματος ντα γραφεία τθεμέσκε. Κο 1993, μπουτσσαντέ-αμέν κο γραφείος κι τθεμέσκο κι Αντίς Αμπέμπα, κι Αιθιοπία. Μπουτ μπρεσά ο έργος οτθέ αβέλας-πες αποτσοράλ αλλά αβιλόας ο σαάτι τι ντιντιόλ κο πφραλά ο δικαίωμας κατά νόμος τι κερέν έργος.

Ο Ιεχωβά ευλογιντάς ο έργος κι Αιθιοπία. Μπουτ πφραλά ντα πφενιά λιντέ ο σκαπανικός. Κατά 2012 μέχρι ακανά, κο 100 πφραλά πιο μπουτ από 20 κερένα τακτικός σκαπανικός κάθε μπρες. Ο θεοκρατικές σχολές σικλιαρένα ι πφραλέν, ντα κερντιλέ πιο μπουτ από 120 Αίθουσες Βασιλείας. Κο 2004, η φαμιλί Μπέθελ ακχαρντάς-πες εκχέ νεβέ τθανέστε, ντα εκ γιαβέρ μπαρί ευλογία ισινέ ότι κερντιλί οτθέ εκ Αίθουσα Συνελεύσεων-ντα.

Κο μπρεσά σο νακχλέ, η Γκέιλ ντα με αβιλάμ μπουτ λατσσέ αμαλά πφραλέντζαρ ντα πφενίντζαρ κι Αιθιοπία. Μανγκάσα-λεν μπουτ σόσκε ισί μπουτ τατέ γκίσκε ντα λατσσέ. Επειδή νικίστιλε αμένγκε προβλήματα υγείας, έπρεπε τι μπουτσσαβέν-αμέν κο γραφείος τμήματος κι Κεντρική Ευρώπη. Οτθέ μανγκένα-αμέν ντα φροντίνενα-αμέν, αλλά σικλιντίνασα μπουτ αμαρέ αγαπημέ αμαλένγκε σο ισί κι Αιθιοπία.

Ο ΝΤΕΒΕΛ ΚΕΡΝΤΑΣ-ΛΕΣ ΤΙ ΜΠΑΡΙΟΛ

Ντικχλάμ αμαρέ γιακχίντζαρ σαρ κερντάς ο Ιεχωβά πο έργος τι μπαριόλ. (1 Κορ. 3:6, 9) Για παράδειγμας, να ισινέ ιτς πφραλά κι Ρουάντα κάνα κερντόμας λάφι πρώτη φαρ τζενέντε σο αβιλέας οτθάρ για τι αρακχέν χαλκός κο Κόπερμπελτ, κο Κονγκό. Ακανά ισί 30.000 ντα πιο μπουτ πφραλά κι Ρουάντα. Κο 1967, κο Κονγκό (Κινσάσα) ισινέ περίπου 6.000 πφραλά. Ακανά ισί περίπου 230.000, ντα πιο μπουτ από εκ εκατομμύριος τζενέ γκιλέ κι Ανάμνηση κο 2018. Σαρέ κο τθεμά σο ανγκλέ τθερέλας ι ευθύνη ο γραφείος τμήματος κι Κένυα ο πφραλά ισί ακανά πιο μπουτ από 100.000.

50 ντα πιο μπουτ μπρεσά πιο τζανγκλέ, ο Ιεχωβά τσσουντάς μπουτέ πφραλέν τι βοηθίνεν-μαν τι λαβ ι ολοχρόνια υπηρεσία. Παρόλο σο ατζέκ ατζέκ μαράβα-μαν τι νασκιαράβ αντρά-μάνταρ ι λατζ, σικλιλόμ τι τθεράβ εμπιστοσύνη κο Ιεχωβά σαρέ μι γκίσαρ. Οντουλά σο νακχλόμ κι Αφρική βοηθιντέ-μαν τι σικλιάβ τι νταϊντίναβ ντα τι ερεσέν-μαν οντουλά σο τθεράβα. Η Γκέιλ ντα με ατσσάσα πουταρντέ μόσαρ ι αγαπητέ πφραλέντζαρ σο ισί μπουτ φιλόξενοι, νταϊντίνενα κο μπαρέ προβλήματα ντα τθερένα εμπιστοσύνη κο Ιεχωβά. Εκτιμίναβα αντράλ μι γκίσταρ ο λατσσιπέ ι Ιεχωβάσκο σο να αξίνασα-λες. Βοβ ντινάς-μαν μπαγιά πιο μπουτ σαρέ οντουλένταρ σο μπεκλεντίναβας.​—Ψαλμ. 37:4.