Σαρί Αμαρί Ζωή Σικλιάσα Κατά Μπαρό Εκπαιδευτής

Ο ΠΑΡΑΔΕΙΓΜΑΣ ΜΙ ΝΤΑΝΤΕΣΚΟ ΝΤΑ ΜΙ ΝΤΑΓΙΑΚΟ

Κο τέλος κι μπρεσέσκο 1950, μο ντατ ντα μι ντάι νασλέ κατά Ιταλία ντα γκιλέ κο Κίντερσλι σο ισί κο Σασκάτσιουαν, κο Καναδάς. Χάνικ πο σοράν σικλιλέ ι αλήθεια, ντα αβιλί ο πο σημαντικός πράγμας αμαρέ ζωγιάτε. Ντάβα-μαν γκοντί ότι, κάνα ισινόμας χουρντό, τζάβας μπουτ φαρ κο έργος μι φαμιλιάσαρ. Οτθάρ μερικές φορές βακεράβας χάι ότι «κεράβας βοηθητικός σκαπανικός» κάνα ισινόμας οχτώ μπρεσένγκο!

Μο ντατ ντα μι ντάι ισινέ τσορορέ. Όμως ισινέ μπουτ σουκάρ παράδειγμας αμένγκε επειδή κερένας πράγματα ι Ιεχωβάσκε. Για παράδειγμας, κο 1963 μπικιντέ μπουτ πουμαρέ πραγματένταρ για τι γκίντεν ο λοβέ σο χρειαζίντιβενας για τι τζαν κι μπαρί συνέλευση σο αβιλίας-πες κι Πασαντίνα, σο ισί κι Καλιφόρνια, κι Αμερική. Κο 1972 κερντάμ χίλια χιλιόμετρα για τι τζας κο Τρέιλ, σο ισί κι Βρετανική Κολομβία κο Καναδάς. Μι νταντέσκι μπουτί ισινέ τι φροντίνελ κάποια κτίρια. Να δεχτιντάς μπουτιά σο κα μπορίνελας τι νικαβέλ πο μπουτ λοβέ επειδή μανγκέλας τι τσσουβέλ πρώτα πι ζωγιάτε ι υπηρεσία ι Ιεχωβάσκι.

Εκτιμίναβα μπουτ ο παράδειγμας σο μουκχλέ μο ντατ ντα μι ντάι μάνγκε ντα μι τρινέ πφραλένγκε. Αντράλ κατά παράδειγμας λένγκο, ο Ιεχωβά σικλιαρντάς-μαν ο πρώτα πράγματα σο κα χρειαζίντιβαβας για τι αρχίναβ ι υπηρεσία λέσκι. Σικλιαρντέ-μαν κάτι σο να κα μπιστράβ ποτές: Άμα τσσουβάβα πρώτα ι Βασιλεία ι Ντεβλέσκι μι ζωγιάτε, ο Ιεχωβά κα φροντίνελ-μαν.​—Ματθ. 6:33.

ΑΡΧΙΣΑΛΟΜ Ι ΟΛΟΧΡΟΝΙΑ ΥΠΗΡΕΣΙΑ

Κο 1980, παντρισάλομ με την Ντέμπι, εκχέ μπουτ σουκάρ πφενιάσαρ σο μανγκέλας μπουτ τι υπηρετίνελ ι Ιεχωβάς. Μανγκάας τι αρχίνας ι ολοχρόνια υπηρεσία, ντα αντικάς η Ντέμπι αρχισάλι τι κερέλ σκαπανικός τριν μασεκά σοράν αμαρέ μπιαβέσταρ. Εκ μπρες σοράν αμαρέ μπιαβέσταρ, γκιλάμ σε εκ χουρντί κχανγκιρί σο τθερέλας ανάγκη, ντα αρχισάλομ με-ντα τι κεράβ σκαπανικός γιεκ λάσαρ.

Σοράν από χάνικ βακίτι, χασαρντάμ αμαρί ζορ ντα αποφασιντάμ τι νασάς. Πρώτα, όμως, κερντάμ λάφι αμαρέ επισκοπόσαρ. Βακερντάς αμένγκε μανγκιμάσαρ αλλά χωρίς τι σακιντίνελ: «Τουμέν-ντα φταίνενα σο νιωθίνενα μπίζουρανε. Ατσσόνα σάντε κο δυσκολίες σο τθερένα. Όμως άμα κα ρόντενας ι λατσσέ πραγματένγκε σο τθερένα, κα αγαβένας καλά ισί». Ισινέ ντιπ η συμβουλή σο χρειαζίντιβαας. (Ψαλμ. 141:5) Κερντάμ αμέσως οντουβά σο βακερντάς αμένγκε ντα μπουτ σουγκό αγαντάμ ότι υπαρχίντιβενας μπουτ σουκάρ πράγματα αμαρέ διορισμόστε. Μπουτ πφραλά κι κχανγκιρί μανγκένας τι κερέν πο μπουτ πράγματα ι Ιεχωβάσκε, ατζέ-ντα ο τερνέ ντα ο πφενιά σο λένγκε ρομά να ισινέ κι αλήθεια. Να μπισταρντάμ ποτές ανταλά σημαντικά λάφια. Σικλιλάμ τι ρόντας ο λατσσέ πράγματα σο τθεράσα κάι-ντα τι αβάς ντα τι ντας μπέσα ότι, κο σωστός σαάτι, ο Ιεχωβά κα νασκιαρέλ ο πρόβλημας σο μπορεί τι τθεράσα. (Μιχ. 7:7) Ισινάμας πάλι χαρούμενοι ντα ο πράγματα αβιλέ πο λατσσές.

Ο εκπαιδευτές σο τθεράας κι πρώτη σχολή σκαπανέων σο νακχλάμας υπηρετιντέας κχανγκιρίντε σο κερένας λάφι εκ γιαβέρ τσσιπ. Σικαβένας αμένγκε φωτογραφίες ντα βακερένας αμένγκε ο δυσκολίες ντα ο ευλογίες σο τθερένας κάνα υπηρετίνενας ι Ιεχωβάς γιαβερέ τθεμέντε. Ανταβά κερντάς-αμέν τι μανγκάς μπουτ τι υπηρετίνας σαρ ιεραπόστολοι. Αντικάς αρχισάλαμ τι κεράς πράγματα για τι μπορίνας αμέν-ντα τι πετυχίνας ανταβά στόχος.

Για τι πετυχίνας αμαρό στόχος, κο 1984 γκιλάμ κο Κεμπέκ σο κερένας λάφι γαλλικά, ντα ισινέ 4 χιλιάδες χιλιόμετρα πο ντουρ κατά Κολομβία σο κερένας λάφι αγγλικά. Οτθέ, έπρεπε τι σικλιάς εκ νεβί κουλτούρα ντα τσσιπ. Εκ γιαβέρ δυσκολία ισινέ ότι να τθεράας μπουτ λοβέ. Εκ φαρ, ο μόνος πράγμας σο τθεράας τι χας ισινέ πατάτες εκχέ χωραφίσταρ σο ο τζενό σο τθερέλας-λες μουκχλάς-αμέν τι γκίντας. Η Ντέμπι κερέλας-λεν μπουτέ διαφορετικέ ντα μπουτ σουκάρ τροπόντζαρ! Παρόλο σο υπαρχίντιβενας δυσκολίες, κερντάμ ο πο λατσσό για τι νταϊντίνας χαράσαρ. Ντα ισινάμας σίγουροι ότι ο Ιεχωβά κα φροντίνελας-αμέν.​—Ψαλμ. 64:10.

Εκ ντιβές λιντέ-αμέν εκ τηλέφωνος σο να μπεκλεντίναας-λες. Βακερντέ αμένγκε τι τζας κο Καναδάς για τι υπηρετίνας κο Μπέθελ. Πο τζανγκλέ όμως κερντάμας αίτηση για την Σχολή Γαλαάδ. Οτθάρ παρόλο σο ισινάμας χαρούμενοι σο κα τζάας κο Μπέθελ, στεναχωρισάλαμας σο να κα τζάας κι Σχολή Γαλαάδ. Όμως δεχτιντάμ τι τζας κο Μπέθελ. Κάνα ερεσλάμ, πουτσλάμ ι πφραλές Κένεθ Λιτλ, σο υπηρετίνελας κι Επιτροπή Τμήματος: «Σο κα κεράς άμα κα καλίνεν-αμέν κι Γαλαάδ;» Βοβ βακερντάς: «Άμα κα καλίνεν-τουμέν, κα ντικχάς σο κα κεράς».

Εκ εβδομάδα πο σοράν, καλιντέ-αμέν κι Γαλαάδ. Έπρεπε τι λας εκ απόφαση. Ο πφραλ Λιτλ βακερντάς αμένγκε: «Σο-ντα τι τραμπίνεν, κάποιες φαρ μπορεί τι σκεφτίνεν ότι η γιαβέρ απόφαση κα αβέλας πο λατσσί. Ναστί βακεράσα ότι η εκ απόφαση ισί πο λατσσί κατά γιαβέρ, σόσκε ο Ιεχωβά μπορίνελα τι ευλογίνελ ο ντούι-ντα». Τελικά δεχτιντάμ τι τζας κι Γαλαάδ, ντα καζόμ νακχένας ο μπρεσά ντικχλάμ ότι οντουλά σο βακερντάς ο πφραλ Λιτλ ισινέ μπαγιά. Μπουτ φαρ βακεράας κο γιαβερά ο λάφια ι πφραλέσκε κάνα τθερένας τι τραμπίνεν καβά διορισμός κα λεν κι υπηρεσία κι Ιεχωβάσκι.

ΑΜΑΡΙ ΖΩΗ ΣΑΡ ΙΕΡΑΠΟΣΤΟΛΟΙ

Χαιρίναας μπουτ σο ισινάμας κι τάξη 83 κι Γαλαάδ. Σαρέ γιεκ ισινάμας 24 μαθητές. Νακχλάμ-λα κο Μπρούκλιν, κι Νέα Υόρκη κο Απρίλιος 1987. Ο πφραλά Γιούλισες Γκλας ντα Τζακ Ρέντφορντ ισινέ αμαρέ εκπαιδευτές. Νακχλέ μπουτ σουγκό ο παντς μασεκά σο ισινάμας κι σχολή ντα μπιτισκιαρντάμ ι σχολή 6 Σεπτεμβρίου κο 1987. Λιντάμ διορισμός κι Αϊτή, γιεκ ι πφραλέσαρ ντα ι πφενιάσαρ Τζον ντα Μαρί Γκουντ.

Κο 1962 σαρέ ο ιεραπόστολοι σο ισινέ κι Αϊτή χρειαζίντιλο τι νασέν. Οντουλέσκε, να γκιλό ξανά κι Αϊτή καέκ ιεραπόστολος οτθάρ μπερί. Τριν εβδομάδες αφού μπιτισκιαρντάμ ι σχολή, αρχισάλαμ τι υπηρετίνας κι Αϊτή εκχέ κχανγκιριάτε σο ισινέ ντιπ κο βεσά ντα τθερέλας 35 πφραλέν. Ισινάμας τερνέ ντα τθεράας μπουτ τι σικλιάς. Επίσης, μπεσάας κορκορέ κο ιεραποστολικός κχερ. Ο τζενέ οτθέ ισινέ μπουτ τσορορέ ντα ο πο μπουτ να τζανένας τι διαβάνεν. Οντουλά ντιβεσά, ο τζενέ χάνας-πες ιτιρί κατά πολιτικά ντα προσπαθίνενας τι περαβέν ι κυβέρνηση. Επίσης αβένας-πες φασαρίες ντα υπαρχίντιβενας ζουρανέ μπαρμπαλιά.

Σικλιλάμ μπουτ πράγματα κατά πφραλά ντα κατά πφενιά κι Αϊτή σο ισινέ ζουρανέ ντα τθερένας χαρά. Μπουτ λένταρ τθερένας δυσκολίες, αλλά μανγκένας μπουτ ι Ιεχωβάς ντα ο έργος. Εκ πφουρί πφεν να αγαβέλας τι διαβάνελ αλλά τζανέλας αβριάλ περίπου 150 εδάφια. Ο προβλήματα σο τθερένας ο τζενέ κερντέ-αμέν τι μανγκάς πο μπουτ τι βακεράς λένγκε ότι σάντε η Βασιλεία μπορίνελα τι νασκιαρέλ ο προβλήματα. Αβέλα αμαρό γκι κάνα ντικχάσα μερικέν κατά πρώτα τζενέ σο κερντάμας λέντζαρ μελέτη τι υπηρετίνεν σαρ τακτικοί σκαπανείς, ειδικοί σκαπανείς ντα πρεσβύτεροι.

Κάνα ισινάμας κι Αϊτή, γνωριντόμ τον Τρέβορ, εκχέ τερνές σο ισινέ Μορμόνος ιεραπόστολος, ντα συζητίναας κατά Γραφή μπουτ φαρ. Κάποια μπρεσά πο σοράν, λιντόμ εκ γράμμας λέσταρ οτθέ σο να μπεκλεντίναβας-λες. Βοβ γραφιντάς: «Κα μπολντιάβ κι γιαβέρ συνέλευση! Μανγκάβα τι βουρτίναβ κι Αϊτή ντα τι υπηρετίναβ σαρ ειδικός σκαπανέας κο ίδιος τθεμ σο ισινόμας Μορμόνος ιεραπόστολος». Ντα κερντάς-λες ανταβά για μπουτ μπρεσά, γιεκ πι ρομνιάσαρ.

ΕΥΡΩΠΗ​—ΣΟΡΑΝ ΑΦΡΙΚΗ

Λιντάμ διορισμός τι υπηρετίνας εκχέ τθεμέστε κι Ευρώπη, σο οτθέ πο τζανγκλέ ο τζενέ να μουκχένας-αμέν τι κεράς έργος. Κο 1992 γκιλάμ κι Λουμπλιάνα σο ισί κι Σλοβενία, πασέ οτθέ σο μπαριλό μο ντατ ντα μι ντάι πριν τι τζαν κι Ιταλία. Αζομάν συνεχίντιβελας ο τζένγκι κι πρώην Γιουγκοσλαβία. Ο Μπέθελ κι Βιέννη σο ισί κι Αυστρία, ο Μπέθελ κο Ζάγκρεμπ σο ισί κι Κροατία ντα ο Μπέθελ κο Βελιγράδι σο ισί κι Σερβία τθερένας ι ευθύνη για το έργος οτθέ. Ακανά ο κάθε εκ κατά τθεμά σο ισινέ κι πρώην Γιουγκοσλαβία κα τθερέλας πιρό Μπέθελ.

Ανταβά μανγκέλας τι βακερέλ ότι έπρεπε τι σικλιάς εκ γιαβέρ τσσιπ ντα κουλτούρα. Ο τζενέ οτθέ βακερένας μπουτ φαρ: «Η τσσιπ ισί δύσκολη». Ντα ανταβά ισινέ μπαγιά! Μπεϊντιντάμ μπουτ σο ο πφραλά ντα ο πφενιά ισινέ πιστοί ντα έτοιμοι τι δεχτίνεν χαράσαρ σο-ντα αλλαγή κερέλας η οργάνωση ντα ντικχλάμ σαρ ο Ιεχωβά ευλογιντάς-λεν. Ατζέκ εκ φαρ, ντικχλάμ σαρ ο Ιεχωβά διορθώνελα πάντα ο πράγματα μανγκιμάσαρ ντα κο σωστός σαάτι. Σικλιλάμ μπουτ πράγματα κάνα ισινάμας κι Σλοβενία. Επίσης ο πράγματα σο σικλιλάμας ανγκλέ βοηθιντέ-αμέν τι νταϊντίνας ο δυσκολίες σο νακχλάμ οτθέ.

Αλλά αμαρί ζωή συνεχίνελας τι αλλάνελ. Κο 2000 λιντάμ διορισμός κι Ακτή Ελεφαντοστού σο ισί κι Δυτική Αφρική. Ντα σοράν, κο Νοέμβριος κο 2002, ιτιρί κατά τζένγκι, γκιλάμ κι Σιέρα Λεόνε. Οτθέ μόλις τελειωσάλοας εκ τζένγκι σο ατσσικιαρντάας 11 μπρεσά. Ισινέ δύσκολος τι νασάς κατά Ακτή Ελεφαντοστού αζόμ ξαφνικά. Όμως ο πράγματα σο σικλιλάμας οτθέ βοηθιντέ-αμέν τι ατσσικιαράς αμαρί χαρά.

Τθεράας αμαρί γκοντί κο τζενέ σο μανγκένας τι σικλιόν ι αλήθεια ανταλέ τθεμέστε ντα κο λατσσέ πφραλά ντα πφενιά σο νταϊντιντέ μπουτ μπρεσά κο τζένγκι. Ισινέ τσορορέ αλλά μανγκένας τι ντεν οντουλένταρ σο τθερένας κο γιαβερά. Εκ πφεν ντινάς κι Ντέμπι μερικά σέα. Κι αρχή, η Ντέμπι να μανγκέλας τι δεχτίνελ-λεν αλλά η πφεν βακερντάς λάκε: «Κάνα ισινέ τζένγκι, ο πφραλά γιαβερέ τθεμένταρ στηριντέ-αμέν. Ακανά ισί αμαρί σειρά τι βοηθίνας». Τσσουντάμ στόχος τι μοιάζας λέντε.

Τελικά βουρτισάλαμ κι Ακτή Ελεφαντοστού, αλλά ο πολιτικά προβλήματα οτθέ αντέ πάλι βία. Οτθάρ, κο Νοέμβριος κο 2004, νασλάμ με ελικόπτερος, ντα λιντάμ παλ’ αμέντε σάντε εκ τσάντα. Ι ιράτ, σοτάμ κο πάτωμας σε εκ γαλλική στρατιωτική βάση ντα ο γιαβέρ ντιβές γκιλάμ κι Ελβετία. Κάνα ερεσλάμ κο Μπέθελ αντρέ κι ιράτ, η Επιτροπή Τμήματος ντα ο εκπαιδευτές κι Σχολή Διακονικής Εκπαίδευσης γιεκ πουμαρέ ρομνίντζαρ καλωσοριντέ-αμέν αντράλ πουμαρέ γκίσταρ. Ντινέ-αμέν ανγκάλι, τατό χαμπέ ντα μπουτ ελβετικές σοκολάτες. Συγκινισάλαμ μπουτ.

Διορισάλαμ για χάνικ κι Γκάνα ντα σοράν γκιλάμ παλάλ κι Ακτή Ελεφαντοστού κάνα σταματισάλο ο τζένγκι. Ο πφραλά ντα ο πφενιά σικαντέ αμένγκε αγάπη ντα βοηθιντέ-αμέν τι νταϊντίνας οντουλά μπαρέ δυσκολίες ντα ο αλλαγές κο διορισμούς σο τθεράας. Η Ντέμπι ντα με συμφωνιντάμ ότι παρόλο σο αμαρέ πφραλά ντα πφενιά σικαβένα πάντα αγάπη, να μανγκάσα τι σκεφτίνας ότι ανταβά ισί κάτι συνηθισμέ. Κι πραγματικότητα, ατζέ-ντα οντουλά δύσκολα ντιβεσά σο νακχλάμ σικλιαρντέ-αμέν μπουτ σημαντικά πράγματα.

ΤΘΕΜΑ ΚΙ ΜΕΣΗ ΑΝΑΤΟΛΗ

Κο 2006 εκ γράμμας κατά παγκόσμια κεντρικά γραφεία βακερντάς αμένγκε για εκ νεβό διορισμός κι Μέση Ανατολή. Ανταβά μανγκέλας τι βακερέλ ότι ατζέκ εκ φαρ κα τζουβντιάας νεβέ πράγματα, κα τθεράας νεβέ δυσκολίες, ντα κα σικλιάας νεβέ τσσιμπά ντα νεβέ κουλτούρες. Τθεράας μπουτ ατζέκ τι σικλιάς ανταλέ τθεμέστε σο τθερέλας προβλήματα κατά πολιτικά ντα κατά θρησκεία. Μπεϊντιντάμ ο μπουτ τσσιμπά σο τθερένας ο κχανγκιριά ντα ντικχλάμ ότι μπορίνασα τι αβάς ενωμέ κάνα ακολουθίνασα ο οδηγίες κατά οργάνωση ι Ιεχωβάσκι. Κερέλας αμένγκε εντύπωση σο ο πο μπουτ πφραλά νταϊντιντέ με θάρρος κάνα λένγκε τζενέ, λένγκε συμμαθητές, ο τζενέ κι μπουτί ντα ο γείτονες, τζάνας λέντζαρ κόντρα.

Κο 2012, γκιλάμ κι ειδική συνέλευση κο Τελ Αβίβ σο ισί κο Ισραήλ. Ανταγιά συνέλευση ισινέ η πρώτη φαρ σο γκιντισάλε αζόμ μπουτ πφραλά οντουλέ τθεμέστε σοράν κατά Πεντηκοστή κο 33 Σ.Κ.Χ. (σοράν κατά Χριστός). Σο σουκάρ ισινέ ανταβά!

Οντουλέ μπρεσέντε, μπουτσσαντέ-αμέν τι τζας σε εκ τθεμ σο η κυβέρνηση να μουκχέλας-αμέν τι κεράς ελεύθερα έργος. Αντάμ μερικά κατά έντυπα αμαρέ, κεράας έργος ντα χουρντέ συνελεύσεις. Υπαρχίντιβενας παντού στρατιώτες με όπλα ντα τθανά σο κερένας-τουτ έλεγχος. Αλλά επειδή εμ αμέν εμ ο χάνικ πφραλά σο ισινέ οτθέ κεράας-λεν σαρέ ανταλά προσεκτικά, νιωθίναας αρακχαντέ.

ΠΑΛΑΛ ΚΙ ΑΦΡΙΚΗ

Κο 2013 λιντάμ εκ μπουτ διαφορετικός διορισμός, τι υπηρετίνας κο Μπέθελ κι Κινσάσα σο ισί κο Κονγκό. Ο Κονγκό ισί εκ μπουτ μπαρό ντα σουκάρ τθεμ αλλά τθερέλα μπουτ τσοροριπέ ντα μπουτ φαρ αβένα-πες τζένγκια. Κι αρχή βακερντάμ: «Τζανάσα ι Αφρική, ισινάμ έτοιμοι». Αλλά τθεράας τι σικλιάς αζόμ μπουτ πράγματα, ειδικά κάνα έπρεπε τι τζας κάπου χωρίς τι υπαρχίντιβεν ντρομά ντα πφουρτιά. Αρακχλάμ μπουτ λατσσέ πράγματα για τι σκεφτίνας. Για παράδειγμας ντικχάας ι χαρά ντα ι υπομονή ι πφραλένγκι παρόλο σο τθερένας προβλήματα, λένγκι αγάπη για το έργος ντα λένγκι προσπάθεια για τι τζαν κο συναθροίσεις ντα κο συνελεύσεις. Ντικχλάμ αμαρέ γιακχίντζαρ ότι μπουτ τζενέ σικλιόνας ι αλήθεια σάντε επειδή ο Ιεχωβά ευλογίνελας ντα υποστηρίνελας αμαρό έργος. Ο μπρεσά σο ισινάμας κι ολοχρόνια υπηρεσία κο Κονγκό σικλιαρντέ-αμέν μπουτ σημαντικά πράγματα ντα κερντάμ μπουτ λατσσέ αμαλέν σο ισινέ σαρ φαμιλί αμένγκε.

Κο τέλος κι μπρεσέσκο 2017, λιντάμ εκ νεβό διορισμός κι Νότια Αφρική. Ανταβά ισί ο πο μπαρό Μπέθελ σο υπηρετιντάμ ποτές, ντα ο διορισμοί σο τθεράας κο Μπέθελ ισινέ νεβέ αμένγκε. Πάλι, υπαρχίντιβενας μπουτ πράγματα τι σικλιάς, αλλά ο πράγματα σο σικλιλάμ ανγκλέ βοηθιντέ-αμέν κο γιαβερά διορισμούς σο τθεράσα. Μανγκάσα μπουτ ι πφραλέν ντα ι πφενίν σο ατσσιλέ πιστοί για 20, 30, 40 ή πο μπουτ μπρεσά. Ντα ισί μπουτ σουκάρ σο ντικχάσα ότι η φαμιλί Μπέθελ κερέλα μπουτί ενωμέ παρόλο σο υπαρχίντιβενα μπουτ φυλές ή κουλτούρες. Ισί εύκολος τι ντικχάς ότι ο Ιεχωβά ευλογίνελα πι λαός ντα ντέλα-λες ειρήνη, επειδή λέσκο λαός ιρίλα ο νεβό χαρακτήρας ντα κερέλα πι ζωγιάτε ο αρχές ι Γραφιάκε.

Ο μπρεσά σο νακχλέ, η Ντέμπι ντα με λιντάμ μπουτ σουκάρ διορισμούς, σικλιλάμ διαφορετικές κουλτούρες ντα νεβέ τσσιμπά. Να ισινέ πάντα εύκολος, αλλά νιωθίναας πάντα ι αγάπη ι Ιεχωβάσκι αντράλ λέσκε οργανωσιάταρ ντα αμαρέ πφραλένταρ. (Ψαλμ. 144:2) Πακιάσα ότι η ολοχρόνια υπηρεσία κερντάς-αμέν πο λατσσέ υπηρέτες ι Ιεχωβάσκε.

Εκτιμίναβα μπουτ οντουλά σο σικλιαρντέ-μαν μο ντατ ντα μι ντάι, ι βοήθεια μι αγαπημέ ρομνιάκι της Ντέμπι, ντα ο λατσσέ παραδείγματα ι πφραλένγκε ντα ι πφενίνγκε σαρό κο ντουνιάς. Καζόμ σκεφτίνασα οντουλά σο ισί ανγκλ’ αμέντε, ισινάμ αποφασισμέ τι συνεχίνας τι σικλιάς κατά Μπαρό Εκπαιδευτής αμαρό.